Argazkia: Luis Llavori
Zumaiako flora
Kuletoa, Gorringoa Izen zientifikoa: Amanita Caesarea Izen arrunta: Kuletoa
Jateko BIKAINA, askorentzat perretxikorik onena. Perretxiko zaleak etengabe ibiltzen dira bila, baina ale gutxi batzuk baino ez dira jasotzen. Udan eta udazkenean hazten da, intxaurrondo, haritz edo pagoen basoetan. Txapela 20 cm bitarteko diametrokoa izan daiteke eta haragitsua. Hasieran hemisferio itxurakoa, gero konbexua eta azkenean zapala. Kutikula laranja edo gorri-laranja kolorekoa da, gutxi batzuetan bolbaren arrastoez beteta. Orriak horiak--urre kolorekoak dira, askeak, eta estu-estu jarrita. Hanka urre kolorekoa, 8-15 cm garai eta 2 cm lodi, haragitsua, kotoi itxurako batez betea. Eraztun zabala, hauskorra, hankaren kolore berekoa. Bolba zabala, gotorra, altua, zuria. AMANITA MUSCARIA edo KULETO FALTSUArekin eta AUREOLArekin nahas daiteke (guztiak ere pozoitsuak), nahiz eta bi horietan txapela gorri kolorekoa izan, bolbako ezkatatxo zuriekin. Pozoitsuen orriak eta hanka erabat zuriak dira; AMANITA CAESAREAn (KULETOA), berriz, hori--urre kolorekoak dira.