Die Ja! Kleuter Bybel - Afrikaans

Hierdie kleurvolle geïllustreerde Bybelstorie-reeks is spesiaal geskep vir Ja! Kleuters. Elke storie word vergesel deur ’n gebed om kinders te help om met God te praat, en ’n Christelike waarde wat daarby pas.

Hierdie boek help kinders om Ja! Kleuters te wees. ’n Ja! Kleuter sê ’n groot Ja! om Jesus te volg én om ’n goeie en gelukkige lewe te leef.

Gids vir ouers en versorgers: Ja! Kleuter is ontwikkel met die inagneming van jou kind se ontwikkelingsfases en unieke temperament.

Dit help met geloofsvorming, woordeskat sowel as leesvaardighede én emosionele ontwikkeling.

Vir ’n volledige gids vir ouers blaai na bladsy 108 & 109.

OntwikkelingsUnieke fases temperament

Geloofsvorming

Woordeskat

Spraakvorming

Leesvaardigheid

Luistervaardigheid

Voorstelle om hierdie boek saam met jou kind te geniet:

• Lees die Bybelstorie en • gesels dan oor die storie en Christelike waardes met jou kind.

• Sê die gebed saam met jou kind op.

Hoe nader jy en jou kind aan God groei, hoe nader groei julle aan mekaar.

ISBN: 978-1-92059-356-8

www.christianmediapublishing.com

Geskryf deur Ewald van Rensburg Illustrasies deur Lilani Brits

Aan my Ja! Kleuter: _________________________ Met liefde van: ______________________

Die

-S

Bybel

t o r i e s & G e be de -

’N DRUKNAAM VAN

CHRISTIAN MEDIA PUBLISHING

Nota aan ouers en versorgers Ons hoop dat jy dit sal geniet om hierdie stories saam met jou kind te lees. Die Bybelstories is oorvertel in woorde wat klein kinders maklik kan verstaan, maar tog ook getrou is aan die boodskap van die Skrif. Deurgaans was dit ons doel om kinders te help om ’n sterk en liefdevolle verhouding met God te ontwikkel. Die woorde en prente beklemtoon Bybelse waardes.

Jy kan die prente gebruik om besprekings oor God en geloof te stimuleer. Aan die einde van elke storie is daar ’n gebed om te bid en ’n beginsel of boodskap om met jou kind te deel. Wees op die uitkyk vir die diere-vriende wat in die Bybelstories voorkom. Een van hulle sal die kind help om die boodskap of die waarde van die storie te onthou. Die ander een vra ’n vraag wat jou kind sal help om ’n besonderheid van die storie te onthou.

Hierdie boek van Bybelstories is soveel meer as ’n storieboek. Gebruik dit om aan kinders die vreugde en betekenis van Christen wees te leer en wat Jesus vir hulle in hul lewens kan beteken.

6

Inhoudsopgawe 1. My God is so groot 2. Luister altyd na God 3. Niks is vir God onmoontlik nie 4. God laat ’n donkie praat 5. God luister na jou gebed 6. Praat, Here, ek luister 7. Slim Salomo 8. God gee kos en water 9. God is baie sterker as Baäl 10. Nehemia help om Jerusalem weer mooi te maak 11. Met God se hulp 12. Daniël 13. Jona wil nie na God luister nie 14. Jesus word gebore 15. Jesus word nou groot 16. Vyf brode en twee vissies 17. Daar is niemand soos Jesus nie 18. Die pappa met die oop arms 19. Die tien meisies 20. Slegte Saggeus word Goeie Saggeus 21. Hier kom Koning Jesus 22. Jesus het sy vriende lief 23. Die Kruis 24. Jesus staan uit die dood op 25. Jesus gaan terug huis toe Gids vir ouers en versorgers

8 12 16 20 24 28 32 36 40 44 48 52 56 60 64 68 72 76 80 84 88 92 96 100 104 108

1. My God is so groot (Genesis 1-2)

God het ons mooi wêreld gemaak.

Hy het eers die lig geskep. Die son vir die dag en die maan en die sterre vir die nag. Hy het ook die see en die land gemaak. Toe maak Hy die plante en bome. Oral waar jy kyk, was daar blomme en vrugte.

8

Ons groot God het ook ander dinge in hierdie mooi wêreld gemaak, selfs die visse wat rondswem en die voëls wat so pragtig sing. Die wilde diere, die mak diere, die insekte en goggas – alles kom van God af.

9

Toe doen God iets baie spesiaal ...

Hy maak die eerste mense. Die man se naam was Adam en die vrou s’n Eva. Die Here het hulle baie lief gehad.

Kom ons bid saam: Here, U is so groot, daar is niks wat U nie kan doen nie.

Dankie dat U alles so mooi gemaak het. Amen.

10

God het al die mooi dinge in die wêreld gemaak.

Watter name het God vir die eerste man en vrou gegee?

11

2. Luister altyd na God (Genesis 3)

God het vir Adam en Eva in die tuin van Eden laat bly. Dit was ’n baie mooi plek. God het vir hulle gesê: “Julle kan van alles eet, maar een boom is spesiaal. Julle mag nie van die vrugte van daardie boom eet nie. As julle dit doen, gaan Ek julle swaar straf.”

Eendag vermom die slegte duiwel homself as ’n slang. Hy praat toe met Eva en jok vir haar: “Julle kan maar regtig van daardie spesiale boom se vrugte eet. God sal julle nie straf nie.”

12

13

Eva en Adam eet toe van die vrugte. God was hartseer omdat hulle nie na Hom geluister het nie. As straf mag hulle nie meer in die tuin van Eden gebly het nie.

Verkeerde goed gebeur nou nog as ons nie na God luister nie. Gelukkig vir ons het Jesus met sy lewe alles reg gemaak.

Kom ons bid saam: God, ons Vader, help my om altyd na U te luister. Amen.

14

Jesus het met sy lewe alles reg gemaak. Luister altyd na God.

Waar het Adam en Eva gewoon?

15

3. Niks is vir God onmoontlik nie (Genesis 12, 13, 15, 17, 18 en 21)

God het vir Abraham gesê om na ’n ander land toe te trek. Hy vat toe sy vrou, Sara, en sy neef, Lot, saam. Hulle was gelukkig daar totdat Lot en Abraham se werkers met mekaar begin stry het. Daarom het Abraham vir Lot gesê: “Kies waar jy wil bly.”

Lot kies toe die groenste, beste deel.

16

17

God belowe toe vir Abraham dat Hy vir hom sal sorg en vir hom ’n groot familie sal gee.

Abraham en Sara het geen kinders gehad nie.

Hulle wou graag kinders hê, maar hulle was al baie oud. Het God dan van hulle en sy belofte vergeet?

Eendag het drie mans vir Abraham kom kuier.

Hulle vertel toe vir hom dat Sara ’n seuntjie gaan hê. Toe Sara dit hoor, het sy gelag.

God wou by haar weet waarom sy lag. Het sy vergeet dat God enigiets kan doen? Hulle het toe ’n seuntjie, Isak, gehad.

Wat was Isak se mamma en pappa se name?

18

Kom ons bid saam: Dankie dat U ook vir my sorg. Dankie dat U enigiets kan doen. Amen.

God kan enigiets doen wat mense nie kan nie en kom altyd sy beloftes na.

19

4. God laat ’n donkie praat (Numeri 22)

Koning Balak wou vir Bileam baie geld betaal om slegte goed van God se mense te sê.

Maar God het besluit om hom te keer.

Bileam het met sy donkie na koning Balak toe gery. In die pad het die engel van die Here met ’n swaard gestaan.

20

Net die donkie het die engel gesien, maar Bileam kon nie. Die donkie het drie keer vir die engel uitgedraai en elke keer het Bileam sy donkie geslaan.

21

Vir wat slaan jy my so?

Maak ek altyd so met jou?

Omdat jy my gek maak!

Nee!

Met wie het die donkie gepraat?

22

Toe maak die Here Bileam se oë oop en hy sien skielik die engel raak.

Die engel sê toe vir hom: “Van nou af sal jy net sê wat God vir jou sê.” Bileam het presies so gemaak.

Kom ons bid saam: My God, help my om nie lelike goed van ander mense te sê nie. Amen.

Jesus hou nie daarvan dat jy slegte goed van ander mense sê nie.

23

5. God luister na jou gebed (1 Samuel 1)

Elkana het in ’n dorpie saam met sy vrou, Hanna, gebly. Hulle kon nie kinders hê nie. Die mense in die dorpie het vir Hanna daaroor gespot. Dit het haar baie ongelukkig gemaak.

24

Hanna bid toe in die tempel dat God vir haar ’n kindjie moet gee. Sy het gehuil terwyl sy bid. Eli, die priester, het met haar geraas, want hy het gedink sy is dronk. Toe vertel sy haar storie vir hom en dadelik besef hy sy is nie dronk nie, net baie hartseer.

25

Hy sê toe vir haar: “God sal vir jou ’n kindjie gee.” Dit gebeur toe soos Eli gesê het.

Die seuntjie se naam was Samuel.

God was goed vir Hanna, want sy het daarna nog vyf kinders gehad. Niemand het ooit weer met Hanna gespot nie.

Kom ons bid saam: Jesus, dankie dat U altyd na my luister. Amen.

26

Jesus wil nie hê dat ’n mens iemand anders spot nie.

Watter vrou kon nie ’n babatjie hê nie?

27

6. Praat, Here, ek luister (1 Samuel 3)

Samuel het by Eli in die tempel gebly.

Een oggend vroeg het daar iets spesiaal met Samuel gebeur. Eli het nog geslaap. ’n Stem het geroep: “Samuel!” Samuel het geantwoord: “Ek kom!” en dadelik na Eli toe gehardloop. Hy het vir ’n deur-die-slaap Eli gesê: “Hier is ek, want u het my geroep.”

Eli het sy kop geskud: “Dit was nie ek nie.”

Na die derde keer, besef Eli dit is die Here wat vir Samuel roep. Eli sê dadelik vir hom: “As iemand jou weer roep, sê jy: ‘Praat, Here, ek luister.’”

28

29

Dit is presies wat Samuel gedoen het en die Here het toe met hom gepraat. Almal het van toe af oral in die hele land gepraat oor Samuel wat altyd presies gedoen het wat die Here van hom gevra het.

Kom ons bid saam: Jesus, help my om altyd te luister na wat U in die Bybel vir my sê. Amen.

30

Die Here praat vandag deur sy Bybel met ons.

Met wie het die Here gepraat?

31

7. Slim Salomo (1 Konings 3)

Een aand het koning Salomo gedroom dat God vir hom vra: “Wat wil jy die graagste van My hê?”

“Maak dat ek altyd gehoorsaam aan U sal wees.” God het toe vir Salomo die slimste in die hele wêreld gemaak.

32

Op ’n dag kom twee vroue met een baba na koning Salomo toe. Albei sê die baba is hulle s’n. Die een vrou se baba is in die nag dood. Toe steel sy die ander se baba.

Maar watter vrou is die regte mamma?

33

Salomo het ’n slim plan gehad: “Sny die baba in die helfte en gee vir elke vrou ’n halwe baba ... ” Dadelik sê die een vrou: “Sny hom deur.” Maar die ander een sê: “Nee, gee dan liewer die baba vir haar. Moenie hom doodmaak nie.”

Dadelik het Salomo geweet wie die regte mamma is. Net die regte mamma sal so baie omgee vir haar kind se lewe. Hy gee toe die baba vir haar.

Almal het gepraat oor hoe slim God vir Salomo gemaak het.

Kom ons bid saam: Jesus, help my om U bly te maak deur elke dag na U te luister. Amen.

34

Onthou om elke dag te bid.

Wie was ’n baie wyse koning?

35

8. God gee kos en water (1 Konings 17)

Elia was ’n man wat die Israeliete van God vertel het. Maar koning Agab en die res van die volk wou nie na God luister nie.

Toe vertel hy vir koning Agab daar gaan vir baie lank geen reën wees nie, omdat Agab nie wil hoor nie. Koning Agab besluit toe om vir Elia te laat doodmaak.

God stuur toe vir Elia om naby ’n riviertjie te gaan wegkruip. Daar was genoeg water om te drink, maar geen kos nie. Elia het baie honger geword.

36

37

God stuur toe kraaie met vleis en brood in hulle bekke. Hulle het in die oggend en die aand na Elia toe gekom.

Elia het geweet dat God altyd vir hom sal sorg.

Kom ons bid saam: God, ons Vader, dankie dat U altyd vir my gee wat ek nodig het. Amen.

Sê altyd vir Jesus dankie dat jy kos het om te eet en iets het om te drink.

338 8

Na wie toe het God die kraaie gestuur om vir hom kos te neem?

39

9. God is baie sterker as Baäl (1 Konings 18)

Elia het na koning Agab en sy kwaai vrou, Isebel, toe gegaan. Hy het vir hulle gesê: “Ek gaan vir julle wys dat God baie sterker is as julle god, Baäl. Vra julle Baäl om hout aan die brand te steek. Ek sal vir God dieselfde vra.”

Niks het met hulle hout gebeur nie. Daar was geen teken van vuur nie.

40

41

Elia gooi toe sy hout nat en bid tot God. God steek toe die sopnat hout aan die brand.

Almal het besef dat God groter en baie sterker as Baäl is.

Maar Elia was nog nie klaar nie: “God gaan dit nou nog laat reën ook.” Al wat daar in die lug was, was ’n wolkie so groot soos ’n mens se hand.

Koning Agab en die res van die mense kon nie glo wat hulle sien nie, want skielik was die lug donker en het dit begin reën en reën en reën.

Daar is niemand soos ons God nie.

Kom ons bid saam: God, ons Vader, dankie dat U so groot en sterk is. Amen.

442 2

God is groot en daar is niks wat Hy nie kan doen nie.

Weet jy wat die name van die koning en die koningin was?

43

10. Nehemia help om Jerusalem weer mooi te maak (Nehemia 1-7)

Nehemia was ’n Israeliet. Hy was die skinker in die Persiese koning se paleis.

Dit was ’n belangrike werk, want hy moes alles proe voordat die koning iets kon drink.

44

Hy het van die Israeliete wat na Jerusalem teruggegaan het, gehoor hoe sleg alles daar lyk. Selfs die mure is afgebreek. God wou hê dat hy sy mense moes gaan help om Jerusalem weer vir Hom mooi te maak. Nehemia was baie lief vir God.

45

Hy besef toe hy moet dadelik vir die Persiese koning vra of hy na Jerusalem kan teruggaan.

Hy was nogal bang vir wat die koning sou sê, daarom het hy gebid net voordat hy vir hom gevra het. Die Here het sy gebed verhoor. Hy is terug Jerusalem toe. Daar het hulle weer die plek mooi gemaak en vir God belowe dat hulle altyd na Hom sal luister.

Kom ons bid saam: God, ons Vader, ek wil na U luister sodat ek ook mooi goed vir U kan doen. Amen.

46

Daar is niks wat jou meer bly maak as om vir God lief te hê nie.

Wie het die mure van Jerusalem oorgebou?

47

11. Met God se hulp (Ester 1-10)

Ester was ’n baie mooi vrou. Sy was so mooi dat die koning van Persië haar sy vrou en koningin gemaak het.

Eendag kom Mordegai, haar oom, na haar toe.

Hy sê toe vir haar: “Al ons Jode – jy ook – is in die moeilikheid.

Die slegte Haman wil ons almal laat doodmaak.

Hy het vir die koning leuens vertel en nou is daar ’n wet wat sê dat al die Jode op ’n sekere dag vermoor moet word.” Mordegai het op sy knieë voor Ester gegaan en gesê: ”Asseblief, Ester, net jy kan ons red.”

48

Sy het die koning en die slegte Haman vir ete genooi.

49

Sy vertel toe vir die koning van Haman se planne om haar en haar mense dood te maak.

Die koning was baie kwaad vir Haman. Hy maak toe ’n nuwe wet wat die Jode gered het. Al die Jode was bly en het in die strate gedans. Ester was ’n dapper vrou wat met God se hulp haar mense gered het.

Kom ons bid saam: My God, omdat ek U liefhet, help ek graag ander mense. Amen.

50

God werk deur gewone mense soos Ester en jy om ander mense te help.

Wie was die dapper en mooi, jong vrou?

51

12. Daniël (Daniël 6)

Daniël was ’n belangrike man wat in Persië gebly het. Almal het geweet dat hy baie lief vir God was. Hy het elke dag in die oggend, middag en aand gebid.

Mense was jaloers op hom. Hulle laat koning Darius toe ’n wet maak dat mense net die koning mag aanbid.

Mense wat dit nie doen nie, sal in ’n leeuhok gegooi word.

Daniël het hom nie hieraan gesteur nie en steeds tot God gebid. Dié mense het vir die koning daarvan vertel.

52

53

Daniël is toe in ’n hok vol leeus gegooi. Maar God het die leeus se bekke toegemaak en Daniël was veilig. Toe weet die koning Daniël se God is die ware God.

Kom ons bid saam: Jesus, by U is my lewe veilig. Amen.

54

Net soos God vir Daniël in die leeuhok gehelp het, kan Hy vir jou ook help.

Wie is in die leeuhok gegooi?

55

13. Jona wil nie na God luister nie (Jona 2)

God het vir Jona gevra om vir die mense van Nineve te gaan sê om nie meer verkeerd te doen nie. Jona wou nie na God luister nie.

Jona vaar toe met ’n boot weg van God af.

Maar niemand kan van God wegloop nie, want God kan oral sien.

Nineve

Boot na Tarsis

56

Skielik is daar ’n storm op die see.

Almal op die boot is bang. Die matrose gooi toe vir Jona in die see. God stuur ’n groot vis om Jona te red. Dié sluk vir Jona in. Binne-in die vis sê Jona vir God dat hy jammer is.

57

Die vis spoeg hom op die strand uit en Jona gaan doen wat God vra. Hy sê vir die mense van Nineve om nie meer verkeerd te doen nie.

Hulle sê: “Here, ons is jammer.” God vergewe hulle. Maar Jona is kwaad daaroor, want hy hou nie van die mense nie. God is lief vir alle mense en daarom vergewe Hy hulle.

Kom ons bid saam: Jesus, help my om altyd jammer te sê as ek verkeerd doen. Amen.

58

Sê jammer as jy verkeerd was. Jesus het jou en alle mense lief.

Wie het probeer om van God af weg te hardloop?

59

14. Jesus word gebore (Lukas 1-2)

Maria was van die dorpie Nasaret.

Sy was verloof aan Josef. Eendag kom iemand vir haar kuier. Dit was nie sommer enigiemand nie, hoor. Dit was een van God se hoofengele, Gabriël, wat vir haar kom kuier het. Hy het vir haar vertel dat sy ’n baba gaan hê wat eintlik die Seun van God is. Dadelik vra sy: “Hoe kan so iets gebeur, ek is dan nog nie getroud nie?” Gabriël het dadelik gesê dat sy nie bekommerd moet wees nie, want vir God is niks onmoontlik nie.

Die baba sal ’n wonderwerk uit die hemel wees.

60

61

Sy kon nie anders as om vir die engel te sê nie: “Sê vir God ek sal dit doen. God kan maar met my maak soos Hy goed dink.”

Die engel is toe daar weg en haar lewe was nooit weer dieselfde nie. Sy en Josef is toe later getroud. Dit was die grootste oomblik toe hierdie spesiale baba uit die hemel, in Betlehem gebore is en sy Hom vasgehou het.

Josef het toe die baba Jesus genoem. Ja, die baba, Jesus, sou die wêreld heeltemal verander.

Kom ons bid saam: Here, ek wil U loof en prys, omdat U enigiets kan doen. Amen.

62

Jesus se Naam beteken: “God Red”. Vra vir Mamma of Pappa wat jou naam beteken.

Waar is Jesus gebore?

63

15. Jesus word nou groot (Lukas 2)

Jesus word nou mooi groot. Hy luister na sy ouers.

Eendag gaan hy saam met Maria en Josef na Jerusalem om saam met die ander Jode fees te vier – hulle wil vier dat God so groot is.

Toe Maria en Josef ná die fees saam met almal terugloop huis toe, kom hulle ’n vreeslike ding agter. Jesus is weg!

64

Hulle kon Jesus nie tussen die ander kinders kry nie. Maria en Josef was baie bekommerd.

Hulle loop toe dadelik terug na Jerusalem om vir Jesus te soek. Hulle soek en soek en soek oral in die groot stad ...

65

Hulle kry toe vir Jesus in die kerk en was baie bly. Daar was Jesus besig om met ’n paar slim mans oor God te praat. Die slim mans was verbaas oor hoe slim Jesus is.

Terug in Nasaret het die mense geweet God is baie lief vir Jesus en die mense het sommer baie van Jesus gehou.

Kom ons bid saam: Jesus, ek wil graag soos U wees. Amen.

66

Net soos Jesus se ouers vir Hom omgegee het, gee jou ouers vir jou om.

Ken jy die name van Jesus se pappa en mamma?

67

16. Vyf brode en twee vissies (Johannes 6)

Baie, baie mense het graag na Jesus kom luister. Op so ’n dag was die mense teen etenstyd baie honger. Hulle het skoon vergeet om vir hulle kos in te pak.

68

Jesus sê toe vir sy vriende hulle moet vir die mense kos gee. Andreas, een van Jesus se vriende, bring toe ’n seuntjie na Hom toe en sê: “Hierdie seuntjie het twee vissies en vyf broodjies by hom.

Maar dit is te min om al hierdie mense kos te gee.”

69

Maar Jesus glimlag vir die seuntjie en neem sy kos by hom. Hy het vir God daarvoor dankie gesê. Jesus vat toe die vissies en die broodjies en gee al die mense daarmee kos.

Dit was ’n wonderwerk! Almal het genoeg geëet.

Daarna het die dissipels twaalf mandjies volgemaak met die kos wat oorgebly het.

Kom ons bid saam: Here Jesus, ek weet U kan enigiets doen. Amen.

770 0

Jesus kon wonderwerke doen, wat gewone mense nie kan doen nie.

Kan jy die broodjies en vissies tel?

71

17. Daar is niemand soos Jesus nie (Lukas 8)

Toe Jesus weer met ’n klomp mense praat, het Jaïrus tussen hulle deurgestap en voor Jesus op sy knieë neergeval. Hy sê toe vir Jesus: “My dogtertjie is baie siek. Ek weet U kan haar gesond maak.” Jesus het saam met hom gegaan.

Mense het na hulle toe aangehardloop gekom en vertel dat Jaïrus se dogtertjie alreeds dood is.

72

Jesus het vir Jaïrus getroos: “Moenie bekommerd wees nie. Hou net aan glo.”

Toe hulle by Jaïrus se huis kom, het Jesus al die huilende mense stilgemaak. Hy het hulle vertel dat die dogtertjie net slaap.

Die mense het vir Jesus uitgelag.

Jesus het in die huis gegaan, die dogtertjie se hand gevat en vir haar gesê: “Staan op!”

73

Sy het dadelik gesond geword.

Jesus het gesê dat hulle vir haar kos moet gee. Almal het toe geweet daar is niemand soos Jesus nie.

Kom ons bid saam: Here Jesus, U is regtig wonderlik. Ek is baie lief vir U. Amen.

774 4

Daar is niemand soos Jesus nie. Onthou, Jesus kan ons regtig help.

Wie se dogtertjie het Jesus gesond gemaak?

75

18. Die pappa met die oop arms (Lukas 15)

Jesus was lief om stories te vertel.

Hierdie is een van sy mooiste stories ...

Eendag was daar ’n goeie pappa wat baie lief vir sy twee seuns was.

Die jongste seun besluit op ’n dag dat hy al sy geld wil hê en het toe van die huis af weggegaan.

76

Hy het na ’n baie ver land gereis en al sy geld uitgemors. Toe al sy geld op was, moes hy varke oppas. Hy het selfs die varke se kos geëet om aan die lewe te bly.

77

Dit het so sleg met hom gegaan, dat hy besluit het om na sy pa terug te gaan.

Toe sy pa sien dit is hy wat aangestap kom, het hy na hom gehardloop en hom vasgehou.

Sy pa was so bly om hom terug te hê dat hy vir sy jongste seun nuwe klere gegee en ’n groot partyjie gehou het.

Kom ons bid saam: Jesus, dankie dat U sulke mooi stories vertel het om vir ons te leer hoe lief U ons het. Amen.

78

Ons hemelse Pappa is altyd lief vir ons.

Waarvan het Jesus gehou om te doen?

79

19. Die tien meisies (Matteus 25)

Jesus het ook hierdie storie vertel …

Tien meisies het met hulle olielampe vir iemand spesiaals gewag. Maar hulle het nie geweet wanneer hy gaan kom nie.

Hulle lampies het die hele tyd gebrand, want dit was donker. Ongelukkig was net vyf van die meisies slim en het gesorg vir ekstra olie.

Al tien jong meisies het later lang gape gegee en aan die slaap geraak. Hulle skrik wakker toe iemand hard skreeu: “Hier kom hy – die spesiale een!”

80

81

Die vyf slim meisies het hulle lampe vol olie gemaak. Die ander vyf moes na die naaste winkel hardloop om te gaan olie koop. Die spesiale man was baie bly om die vyf slim meisies te sien. Hulle het lekker partytjie gehou. Daar was heerlike goed om te eet en te drink. Toe die ander vyf daar aankom, was dit te laat. Hulle het al die pret gemis.

Kom ons bid saam: Jesus, ek wil ook vir U bly maak en eendag saam met U in die hemel speel. Amen.

82

Doen altyd jou beste vir Jesus, want Hy doen sy beste vir jou.

Hoeveel meisies het lampies gehad?

83

20. Slegte Saggeus word Goeie Saggeus (Lukas 19)

Saggeus was ’n baie kort man. Hy was baie ryk en het in Jerigo gebly.

Niemand het van hom gehou nie, omdat hy so lelik met almal was. Hy wou baie graag vir Jesus sien, maar hy was te kort om oor al die mense se koppe te sien.

84

Die mense het hom in elk geval uit die pad gestoot, want hulle wou nie die slegte Saggeus naby hulle toelaat nie.

Hy het toe in ’n boom wat daar naby was, geklim. Toe kon hy goed sien.

85

Jesus het hom dadelik raakgesien. Tot almal (en Saggeus) se verbasing het Jesus met hom begin praat. Hy het saam met Saggeus in sy huis geëet.

Van toe af het “Slegte Saggeus”, “Goeie Saggeus” geword wat almal gehelp het.

Kom ons bid saam: Here Jesus, ek wil graag ander mense help.

Amen.

86

Mense wat Jesus liefhet, help graag ander mense.

Wat is die naam van die man wat in die boom geklim het?

87

21. Hier kom Koning Jesus (Matteus 21)

Toe hulle naby Jerusalem kom, het Jesus vir sy vriende gesê: ”Bring vir My ’n jong donkie.”

Hy sê toe vir hulle waar om so ’n donkie te kry en wat hulle vir sy eienaar moet sê.

Toe hulle by die plek aankom waarheen Jesus hulle gestuur het, vat hulle die jong donkie.

Dadelik vra die eienaar: “Waarom vat julle my donkie?”

Hulle antwoord: “Jesus het hom nodig.”

Toe die man dit hoor, was hy tevrede en het hy sy donkie dadelik vir hulle gegee.

88

89

Jesus het op dié donkie Jerusalem ingery.

Baie mense het langs die pad gestaan, met palmtakke gewaai en uitgeroep: “Loof die Here. Hier kom die Koning!”

Kom ons bid saam: Here Jesus, ek wil ook elke dag van U liefde sing. Amen.

90

Vertel vir almal dat Jesus die beste Koning van jou lewe is.

Op watter dier het Jesus gery?

91

22. Jesus het sy vriende lief (Johannes 13)

Jesus en sy vriende het aan tafel gesit.

Jesus het gesien dat sy vriende se voete vol stof was omdat hulle heeldag deur die strate geloop het. Hy het sy hemp uitgetrek en ’n handdoek om sy lyf gebind. Toe het Hy water in ’n skottel gegooi. Hy het begin om sy vriende se voete te was en toe af te droog.

Petrus was een van Jesus se beste vriende.

Natuurlik wou hy nie toelaat dat Jesus, hulle leier, sy voete was nie: “U sal nooit my voete was nie.”

92

93

Maar Jesus het gesê: “As Ek nie jou voete was nie, is jy nie deel van My nie.”

En toe laat Petrus toe dat sy voete gewas word. Hierdeur het Jesus gewys dat Hy al sy vriende liefhet en vir hulle omgee.

Kom ons bid saam: Jesus, help my om vir al my maats lief te wees. Amen.

94

Onthou om spesiale dinge vir jou maats te doen.

Wat het Jesus vir sy vriende gedoen?

95

23. Die Kruis (Matteus 21)

Jesus se vyande het geweet dat hulle Jesus moet doodmaak. Hulle het Hom na Pilatus, die belangrikste man in die hele land, gestuur om Hom skuldig te bevind. Maar hy kon niks teen Jesus kry nie.

Pilatus besluit toe om die mense te vra.

Toe hulle vir Jesus sien, het hulle kliphard geskree: “Kruisig Hom!” Jesus se vyande het vir hulle gesê om dit te doen. Pilatus laat toe vir Jesus kruisig op ’n plek met die naam Golgota. Daar het Jesus tussen twee ander mense aan ’n kruis gehang.

96

97

Jesus het aan die kruis gevra dat God, sy Vader, tog die mense wat so lelik met Hom was, moet vergewe.

Die Vrydagmiddag is Jesus dood.

Maar dié Vrydag staan nou bekend as Goeie Vrydag, omdat Jesus hierdeur gesorg het dat mense weer vriende met God kan wees.

Kom ons bid saam: Here Jesus, dankie dat U aan die kruis vir my sonde gesterf het. Amen.

98

Jesus het aan die kruis gesterf sodat ons verkeerde dinge – ons sonde – vergewe kan word.

Wat is die naam van die plek waar Jesus gekruisig was?

99

24. Jesus staan uit die dood op (Matteus 28)

Jesus is die Vrydag begrawe in ’n graf wat ’n vriend van Hom, Josef, gegee het.

Almal was baie hartseer.

Sondagoggend vroeg het ’n klomp vroue na die graf gegaan. Hulle het gewonder hoe hulle by die graf gaan inkom, want daar was ’n groot klip voor die ingang van die graf gerol.

Toe hulle daar aankom, was die klip klaar weggerol en die graf was leeg. ’n Engel het vir hulle vertel dat Jesus uit die dood opgestaan het.

100

101

Baie bly hardloop hulle toe om vir die res van Jesus se vriende die goeie nuus te vertel.

Een van die vroue, Maria Magdalena, het teruggekom na die leë graf toe.

Daar het iemand vir haar geroep: “Maria!” Sy het geweet dit is Jesus self.

Sy het toe vir almal gaan vertel dat sy Jesus met haar eie oë gesien het.

Kom ons bid saam: Here Jesus, dankie dat U lewe en dat ek hemel toe kan gaan. Amen.

102

Jesus leef! Daarom gaan almal wat Hom liefhet hemel toe as hulle doodgaan.

Wie het vir Jesus met haar eie oë gesien?

103

25. Jesus gaan terug huis toe (Handelinge 1)

Jesus se vriende was baie bly om Hom terug te hê. Hulle het geweet dat daar niemand so sterk soos Hy is nie.

Hy het selfs teen die dood gewen.

Eendag het Jesus vir hulle gesê dat Hy moet teruggaan na sy Vader in die hemel toe. Dit is waar sy regte huis is.

Maar hulle moenie hartseer wees nie, want Hy gaan vir al sy vriende daar plek regkry.

Jesus en sy vriende het toe teen ’n berg opgeklim.

104

105

Daar het ’n wolk gekom. Die wolk het toe vir Jesus weggeneem. Jesus se vriende het baie hartseer na bo gekyk. Skielik staan daar twee engele.

Hulle sê toe vir die dissipels (dit is wat mense Jesus se vriende genoem het) dat Jesus weer eendag sal terugkom.

Hulle moet nou vir die res van die wêreld gaan vertel dat Jesus vir almal lief is.

Kom ons bid saam: Here Jesus, ek weet U is in die hemel, want die Bybel leer my dit. Amen.

106

Al is Jesus in die hemel, weet ons Hy kyk na ons en sorg vir ons.

Waarheen het die wolk vir Jesus geneem?

107

Gids vir ouers en versorgers Temperament

Elke kind is uniek – maar daar is sekere eienskappe, wat gemeenskaplik is aan alle mense, wat in vier temperamente verdeel kan word. Sommige kinders floreer in omstandighede waar daar definitiewe reëls, ’n bestendige roetine en verantwoordelikhede (roetine-kinders) is; ander verkies om in die oomblik te lewe en geniet dit om dinge te doen (aksie-kinders); dan is daar diegene wat daarvan hou om probleme op ’n kreatiewe manier op te los, selfs al beteken dit om dinge anders as op die bekende manier te doen (waarom-kinders) en laastens kinders wat volgens hulle verbeelding en waardes lewe (die verbeeldingryke, mense-georiënteerde kinders). CMP boeke is ontwikkel sodat hulle elke temperament-tipe sal aantrek en stimuleer. Vir meer inligting oor die temperamente, besoek die CMP webwerf, www.christianmediapublishing.com

Ontwikkeling

CMP neem die verskillende ontwikkelingsfases van kinders in ag. Ons doel is om ouers en versorgers te help om kinders intellektueel en emosioneel te stimuleer sodat maksimum groei op hierdie gebiede verseker kan word. Vir meer inligting, besoek die CMP webwerf, www.christianmediapublishing.com

Geloofsvorming

Die vorming van kinders se geloof is deels uniek vir elke kind.

Daar is egter ook algemene kenmerke van geloofsvorming wat vir die meeste kinders geld. Hoe word geloof by kinders gevorm? Daar is drie algemene maniere: • Ouers doen gereeld basiese dinge saam met hulle kinders: Bybellees, vertel van Bybel- en ander stories, bid en die aktiwiteite in hierdie boek.

• Kinders vra self geloofsvrae. Neem hierdie vrae ernstig op en antwoord dit eerlik op kinders se verstaansvlak.

• Kinders volg hulle versorgers se voorbeelde.

Emosionele intelligensie

Ons ervaar emosies reeds lank voordat ons die taal aanleer om dit in woorde uit te druk. Daarom behoort kinders daarin gelei te word om dit wat hulle voel, in woorde uit te druk. Kyk na die prentjies wat by elke storie is en vra dan vir jou kind hoe voel die mense en diere in die prentjie. Op hierdie manier raak hulle bewus van hul eie emosie, maar ook die emosies van ander en skep ons ’n leergeleentheid waar hulle taal kan aanleer om hulself emosioneel uit te druk.

108

Leesvaardigheid

Wanneer jou kind begin lees, gaan ’n wonderlike wêreld oop. Geniet elke oomblik op hierdie reis saam met jou kind. Neem jou kind op jou skoot waar hy of sy gemaklik en veilig voel, blaai die boek van voor af oop, hou dan die boek voor julle albei oop, lees duidelik en met gevoel en laat jou kind met jou saam “kamma-lees”. Jy kan maar dieselfde stories oor en oor lees. Wys met jou vinger waar jy lees – so kan jou kind die verband begin maak tussen letters, woorde, klanke en betekenis. Moedig jou kind se eerste leespogings aan, al klink dit soos brabbeltaal.

Luistervaardigheid

Luister is ’n belangrike leer- en ontwikkelingsvaardigheid. Help jou kind om met aandag te luister en te verstaan wat hy of sy hoor, om sy of haar verbeelding te gebruik, om die storie of dele daarvan te onthou en om dit self weer te gee. Vra jou kind om die stories oor te vertel na aanleiding van die prentjies. Vra vrae oor en rondom die storie. Laat woorde weg uit ’n verhaal wat die kind ken en vra hom of haar om die woorde in te vul.

Woordeskat

Gebruik alle kanse om jou kind se woordeskat uit te brei. Dis ’n lewenslange geskenk. Begin met alledaagse voorwerpe en persone in die illustrasies.

Wys na die illustrasie, sê die woord, maak ’n sinnetjie daarmee en sê die woord weer. Laat jou kind die woord herhaal. Kyk of jy dieselfde woord op ’n ander plek ook kan gebruik, byvoorbeeld “tent” in hierdie boek en weer by ’n kampeerplek.

Spraakvorming

Bou aan jou kind se woordeskat reg van die begin af – woorde is die boustene van spraak. Noem gedurig voorwerpe rondom jou, wys dit uit, maak seker dat jou kind na jou mond kyk en aan jou lippe en keel voel wanneer jy die woorde uitspreek. Soos jou kind ouer word, verhoog stelselmatig die ingewikkeldheidsgraad van die woorde terwyl jy jou kind se begrip daarvan verbreed. Moedig jou kind se eerste pogings om te praat aan. Help jou kind om die klanke en woorde uit te spreek. Op hierdie stadium is akkuraatheid nie so belangrik soos die probeerslag nie.

Syfervaardigheid

Dis uiters belangrik dat jou kind syfervaardig word en getalbegrip ontwikkel.

Speel met eenvoudige somme, soos: “Hoeveel eendjies is daar in die prentjie?

Twee eendjies kom by – hoeveel is daar nou? Drie vlieg weg ... ” (Wys op jou vingers.) Jou kind kan ook die vorm van syfers leer – knip groot syfers uit karton en laat hom of haar daarmee speel. Bou ’n getallelyn daarmee.

109

Die

-S

Bybel

t o r i e s & G e be de -

© Alle regte voorbehou.

Christian Media Publishing, Posbus 3228, Matieland Poskantoor, Stellenbosch, 7602, Suid-Afrika www.christianmediapublishing.com Outeur: Ewald van Rensburg Illustrasies, Ontwerp en Uitleg: Lilani Brits Publikasiebestuurder: Noeline N Neumann Reg No 2010/008573/07 Geen gedeelte van hierdie publikasie mag op enige manier gereproduseer word nie – elektronies of andersins – sonder die skriftelike toestemming van die uitgewer nie.

Eerste uitgawe, 2016 10 9 8 7 6 5 ISBN 978-1-920593-56-8

Hierdie kleurvolle geïllustreerde Bybelstorie-reeks is spesiaal geskep vir Ja! Kleuters. Elke storie word vergesel deur ’n gebed om kinders te help om met God te praat, en ’n Christelike waarde wat daarby pas.

Hierdie boek help kinders om Ja! Kleuters te wees. ’n Ja! Kleuter sê ’n groot Ja! om Jesus te volg én om ’n goeie en gelukkige lewe te leef.

Gids vir ouers en versorgers: Ja! Kleuter is ontwikkel met die inagneming van jou kind se ontwikkelingsfases en unieke temperament.

Dit help met geloofsvorming, woordeskat sowel as leesvaardighede én emosionele ontwikkeling.

Vir ’n volledige gids vir ouers blaai na bladsy 108 & 109.

OntwikkelingsUnieke fases temperament

Geloofsvorming

Woordeskat

Spraakvorming

Leesvaardigheid

Luistervaardigheid

Voorstelle om hierdie boek saam met jou kind te geniet:

• Lees die Bybelstorie en • gesels dan oor die storie en Christelike waardes met jou kind.

• Sê die gebed saam met jou kind op.

Hoe nader jy en jou kind aan God groei, hoe nader groei julle aan mekaar.

ISBN: 978-1-92059-356-8

www.christianmediapublishing.com

Geskryf deur Ewald van Rensburg Illustrasies deur Lilani Brits