U scalafrellu. Mì u scalafrellu novu. Mì u pratu, è po verde. Mì u pratu tamantu, smisuratu. Paru paru, hè. Dananzu à a casa u pratu, è s’ellu ci hè u capu ùn si pò vede, mancu a poi sapè ciò chì ci hè in quill’altru capu. In quill’altru capu semu, quì, dananzu à a casa semu, quill’altru capu hè in quill’altru capu, luntanu mì. Calcosa ci hà da esse in quill’altru capu. Chene ? Ùn si sà. Mancu si vede nulla. 1
Hè cusì. Hè u pratu. U ventu. À pinarella di ventu. Hè chjuculellu u ventu. Hè un vintisgiolu. Tira à pinarella. L’arba di u pratu trimuleghja. À mezu pratu sò fiori, trimuleghjanu, gialli sò, hè u radichju, è po di l’altri, bianchi, fiori bianchi, in tagliu di pratu sò, sò irici, ma irici ci ne hè ancu di culore sfarente, sò l’irici culor’ di viola, trimuleghjanu, i face trimulà 2
u ventu, mì, u vintisgiolu chì i manganieghja un suppulu, micca ch’ella venga a paura, ciò ch’ellu hè chì trimuleghja, trimulella, roba viva, si dà di rumenu a roba viva. Mì e ciatte, una ciatta bianca tacculata nera è po una antra, culor’ d’aranciu, si ponenu, mìlle mìlle, luntanu po ùn sò, chjappà le ùn si ponu, sò in lu pratu, ver’ di quill’altru capu, quandini quallà, 3
billissime ciatte sò, si tornanu à vulà, calate ch’elle sò si ponu chjappà, marchji pianu pianu è ti avvicini è chjappiti ! A ciatta hè chjappa, è sì tù a tocchi ùn pò più vulà, hè pilacciuta. È po ci sò ancu di l’altri, animalozzi micca ciatte, animalozzi chì scurruzuleghjanu, animalozzi à strascinelle, chì u so stazzu hè in punta di l’arba ci sò l’animalozzi, ci sò l’animalozzi di sottu à a 4
tarra, è po ci sò l’animalozzi ch’ùn si vedenu vistu ch’elli stanu à nantu à l’arba, sò verdi è tandu ùn si ne pò vede o allora da vicinu vicinu, anu certe antenne ! Ci sò l’animalozzi chì scantarizzeghjanu è quelli chì ùn facenu trustu micca, l’animalozzi chì piantanu di scantarizzà da chì tù ti avvicini, ci vole à fà si vicinu pianu pianu, ti faci avanti, stai fermu 5
mancu più alenu, sò chjuchi chjuchi, sò sintachji, sò impauriti, in lu pratu sò, si piattanu in lu pratu. Scurruzuleghjanu. Grilli è cardalline, mì. Una cardallina a poi chjappà è mette la à corpu in sù, move e so zampette è po stoppiti, hè morta. Sì tù a metti in lu so versu, tratorna. I grilli i poi mette in le so gabie, cantanu. Ci sò ancu l’animalozzi chì pugnenu. Anu i pruni neri, à u culu. 6