Nađan Dumanić "Moja dica o' besid"

SPLITU NA DAR

MOJA DICA O’BESID Nađan Dumanić

Tisak: DES Split Nakladnik: Urednik: prof. Slobodana Matijević Naslovnica: Nađan Dumanić Ilustracije: Iris Dumanić Tiskano u siječnju 2015.

Naklada: 400 komada CIP- Katalogizacija u publikaciji, Sveučilišna knjižnica u Splitu UDK www.svkst.hr ISBN

Nađan Dumanić

SPLITU NA DAR

MOJA DICA O’BESID

Split, 2015.

Čači, Materi i mojoj Iris za sve dobrega ča su učinili za me’

PREDGOVOR Život vazme, ritko vraća Uvik nidir čeka baketin Dani smija, dani plača Sve se meklo u škafetin Umjetnost nikada ne prima svijet kakvim ga je našla, niti ga ostavlja takvim (AugustinTin Ujević).

Uistinu, naš splitski pjesnik Nađan Dumanić u svojoj knjizi pjesama ne projicira onu percepciju grada Splita kakva nas danas okružuje, sliku grada golemih predgrađa u kojima žive ljudi doseljeni u ovaj prostor čije su fantazije i unutrašnji svjetovi nalik puzzlama ispremiješanih raznolikih krajolika, navika i nerijetko makaronskih jezika, u koje tek katkad prodre staro svjetlo novog zavičaja grada Splita.

Dumanić, naprotiv, poput arheologa duha svojim stihovima traga za izvorištima duše prapostojbine starih Splićana, starosjedilaca koji su savili ovo naše toplo mediteransko gnijezdo u kome ima mjesta i za stare i za nove „tiće“.

Tuja krv se izmišala Novi vitri vrtidu koltrinu U grandecu mladost infišala Rascipalo staru je veltrinu Stari splitski jezični idiom njegovih pjesama, koje nanovo nostalgično otjelovljuju prohujala vremena, nalik je ladici starinskog ormara u kojoj su dobro zapretane starinske splitske mudrosti i ludosti, emocije i racionalizacije, muke i radosti, brige i ljubavi, igre i dužnosti, starinska etika puna blagosti i velikodušnosti.

Dobrome se dobro vrati i pozlati Srce vaja širit, nikad stiskat Sriću neće šoldi platit Ven je duša triba iskat •5•

Pjeva nanovo, kao probuđena iz sna, u Dumanićevoj zbirci melodiozna starinska splitska čakavština, pjeva jednostavno i prozračno, vedro i dobrodušno, toplo i prisno, meko i nježno poput uspavanke starog roditelja svojim najdražim unucima. Pjeva nam o didovoj konobi, o karetu, o splitskim lipoticama, o negdašnjoj oskudici i praznim pjatima, ali i o piciginu, tombuli, kartanju, krnjevalu, nadimcima, ljubavi i ljubomori i poštovanju svome gradu. Stotinjak pjesama ove Dumanićeve zbirke pjesama uistinu, kako tvrdi Tin Ujević, ne ostavlja svijet kakav je našla.

U mac slike požmarile Nika pisma i karte za poje Gagrice su buže učinile A na podan još stojidu foje Stihovi našeg pjesnika Nadana Dumanića zaustavljaju vrijeme, uzimaju nas za ruku i vode k izvoru našeg suvremenog splitskog zavičaja, razmiču zastore navučene naslagama novih problema, svjetonazora i materijalizma i vode prostranim negdašnjim splitskim poljima i malim težačkim kvartovima gdje su nekad i običaji, i zanati, i trpeze, pa i vonji bili drugačiji.

Tučedu zvona za pokoj duše I ka’ se novi život raja Zazvonu sama ka’ vitar puše Oli ka’ jubav jusku spaja Ipak, spoznaje Dumanić, kao i njegovi splitski preci, da je oduvijek život bio kompliciran i težak. No, zbog toga ne treba tugovati, već se ironično narugati životnim nedaćama i pučkom filozofijom nadmudriti život Život je isto ka partija karat Za igrat pošteno triba znat varat Triba znat krest i ča moš vazest Pa znat štrocat, akužat, strišat Triba i puštit, motat i lišat •6•

Potraga se za srećom je vječna, kako nekad tako i danas na svim prostorima, a tragalo se i u prošlosti Splita, no perspektive su se promijenile: A srića je jude volit Trudon svojin kruva prosit Pa se smijat, suzu prolit I ka’ križe triba nosit S drugin dilit to ča jemaš I otvorit srce, dušu Turat naprid i ka’ fermaš U bonace i ka’ vitri pušu Split je grad Dumanićevog rođenja, odrastanja, školovanja, zrelosti, roditeljstva, ali i grad njegove nepresušne inspiracije i nadahnuća.

Iz svake riječi, bila ona arhaična ili suvremena, zrači osobita i originalna umjetnička simbioza Dumanićevog umjetničkog izričaja i Splita koji ga je iznjedrio kao umjetnika, čovjeka, roditelja, inženjera i profesora. Tako će nam pjesnik prozboriti i o pjesničkom umijeću Rič se s riči mora jubit Besida se zagrlit besidon Pisma je i vitru trubit I karanje sa susidon Duša riči u se sprema Triba kaza kako vaja Čovik pismu u se jema I sa njon se raja Stoga, našem dragom pjesniku Nađanu Dumaniću možemo poželjeti mnogo umjetničkog uspjeha u potrazi za riječima koje se ljube, grle i svađaju te da ih nakon prerade u svojoj duši prepusti povoljnom vjetru koji će ih i ubuduće u nekoj zbirci dolepršati do nas koji volimo Split i poeziju njegova pjesnika Nađana Dumanića.

Slobodana Matijević, prof.

•7•

RIŠPET NAĐANOVU DIŠPETU Globalizacija i tehnološka čudesa koja neumoljivo pristižu iz svjetskih sila sa sobom donose i dominaciju engleskog jezika, pa se od anglizacije teško, i uz pomoć zakona o jeziku, brane i veće nacije, a mali narodi se moraju pomiriti da će tu bitku izgubiti kadtad. Jezikoslovci tvrde da dnevno nestaje po jedan jezik, ili mjesni govor, kojim se služilo neko pleme ili pak manja društvena zajednica, njegov grob postaju usne izdahnule zadnje bake ili starca koji su se njime služili. Stilom života, ponašanjem, odjećom, komunikacijskim vodovima sve smo sličniji jedni drugima i novo doba ždere posebnosti i male jezike. Tako nije lijepo čuti da nas je sve manje u Lijepoj našoj, i ovo malo vitalnih grana demografskog stabla odseljava u bijeli svijet i uči druge jezike, pa je sve upitnija i sudbina hrvatskog jezika. I u gradu Splitu su prestala bubriti prigradska naselja i sve je manje fetivih Splićana, osim u malim tinelima starih kuća oko carske palače gotovo se i ne čuje čakavština.

Protjerana je iz javnih medija, malo se uči i u školama, povukla se i gotovo getoizirala u malim librima zavičajne književnosti. Doduše, valja pohvaliti napore drugoga hrvatskog grada da se prikoči i uspori odumiranje baštinjene čakavske riči naših začinjavaca, pa u Marulovu gradu već više od četiri desetljeća izlazi naš jedini polugodišnji dijalektalni časopis Čakavska rič. Utemeljena je udruga „Marko Uvodić Splićanin“ za očuvanje splitske čakavštine, koju je i Ministarstvo kulture u siječnju 2013. zaštitilo kao nematerijalnu baštinu, a na društvenoj mreži Facebook aktivno djeluje Udruga „Čakavski jezik“ koja okuplja čakavske pjesnike sa svih naših dalmatinskih otoka i krajeva. Njihovim tragom da se ne zaudobi materinska rič, kročio je i profešur Nađan Dumanić, koji je zadnjih godina, kada se iskustvo počelo taložiti u njegovo pero, intenzivno počeo pisati na čakavštini kakvom govore ovodobni potomci negdašnjih splitskih težaka i batelanata. Nije to čakavština kakvom su govorili naši (pra)

•9•

djedovi, pisali Ivan Ivko Kovačić, Ante Parčina, Ante Vlahović i drugi spli›ski judi od pera, mišanca je to riječi koje su kroz tri rata, pet država, dva kolodvora, morsku i zračnu luku dohodile i doplovile do Dioklecijanovih zidina. Kakva je, takva je, i neka je! Treba je zapisati i tako otrgnuti od prašine nebrige i tame zaborava.

Iako živi u neboderu u urbanim, istočnim spavaonicama svoga rodnog grada, Dumanić koristi svaku prigodu da misli i progovori riječima koje je prve naučio u životu. Sve češće nastupa na književnim večerima, u emisiji „Kad se smijah tad i bijah“ HR Radio Splita svake nedjelje kazuje fjabe i uncutarije po spli›sku, a evo nam se predstalja i prvom zbirkom stihovlja. U stotinjak pjesama, posloženim abecednim redom naslova, opjevao je cijeli Split, sve njegove fešte i geste, stađunske užance i krejance, skule i redikule, mižerje i perje, tombule i tiramole, dječje igre, bićerin, pimperlin, tabakin, neverin i picigin, šentade, berekinade i škuribande, Bajamontušu i peškariju, foje i vonje, altroke njoke, opisao sedam mostova, osam potoka, dvanaest miseci, popisao sve kvartove… i tako sagradio osebujnu Splisku pismaricu koja ima svoj šest, šušt i gušt. U ozračju najboljih pučkih pjesnika, piše u dvostisima i katrenima, koristi sve poetske slogove od šesterca do dvanaesterca, vazda u rimi, katkada i u nagomilanom četverostrukom sroku. Kao pravi meštar od riči, voli se igrati jezikom i leksemima, a budući da je nadahnjivao vedrinom i svoje pero zamakao u tintu dobroćudnog humora, između ovih korica posebno će uživati najmlađi čitatelji. Dumanićeve pjesme valja čuti u njegovu kazivanju, jer ih on dodatno oživi i udahne im dušu, ali vjerujem da ćemo ih čuti i s usana naših prvašića koji će ih krasnosloviti na prigodnim školskim priredbama i veselicama. Time je autor dao neizbrisiv timbar očuvanju splitske čakavštine, usprotivio se njezinu putu k izdisaju, i tom dišpetu valja iskazat rišpet. Evala!

Mladen Vuković

• 10 •

SPLIT Stari Split je jema četri aša Svitu dragi koja je to maša Malu Moskvu uvik sunce supa Veli Varoš karik je o kupa Omar višje mlaji brat mu pari Dobri stoji ka’ karik dinari Neg gre pisma, ne bi ti dištona’ Manuš je bija aš o baštona I još osta na kraj serenadi Lučac bili karik je o špadi Vazeli smo sve ča nan se pruža Split je sva četiri karika akuža Špjegat ću van sa ka san o voje Sve se drugo zvalo splisko poje Ma sve skupa lipotu nan čini I drugo su punti, nima tot lišini Lora, Table, Meje, Pjat i Duje Dragovode pa Mertojak, sve do Sirobuje Karepovac, Dujmovača, Kopilica i Mejaši Pujanke, Sučidar, Špinut ko se ne bi maši

• 11 •

Lokve, Brda, Plokite i Ravne njive Lovret, Kila, Bol, Poljud di su vode žive

Pa Bačvice i Firule i Bilice i Dračevac Blatine i Škrape, Smokovik i Neslanovac Kman, Kocunar, Smrdečac, Sukoišan Gospinica, Lazarica, Sustipan, Poišan Gripe, Zenta, Kamen i Perun Matejuška, Piškera i Šperun Pazdigrad i Duilovo,Žnjan, Stinice Mostine, Trstenik, Radoševac i Skalice Priko Križin, Plakaluše, Kašteleta Od Lovrinca, Trščenice, pa do Toča, Geta Koliko li tega jema, ma sve san udrobi Siguro je ča uteklo, čovik zaudobi Ma moš notat i ti, ako moreš boje Sve je ovo Split i staro splisko poje Odavod nidir ja nebi uteka Fala ti Bože ča si me tot meka I svoju van rič, ja osad pripuštan Sedin na Merjanu i u Splitu guštan.

• 12 •

SPLI’SKA ČAKAVICA To mi dojde o’pape i dide Cili život su otin se diči’ Sva teplina spli’ske nan beside Jur lipota naše spli’ske riči Vaja nan je daje turat Kroz vrimena luda, slipa Potla nas će ona durat Čakavica spli’ska lipa Na svojega čače grobu Plačen ova naša slova Nikada da se zaudobu Doklen zem’je i vikova Slaka, juska riči spli’ska Kako pisma arjon leti Bo’je ni nan triba iska’ Dicu našu ti posveti Jazik čače vaja štova’ Da pritekne doklen svita Rišpet duši pradidova Slavit jude, ime Splita.

• 13 •

RIŠPET SPLITU Pokloni se bilon gradu Teplon će te dušon primit Izajdi na promenadu Ma mu nemoj kontra činit Ko je na Split ruku meka Nije steka, ni dočeka Puno se je ti opeka Pa je kleka i uteka Moš me misit, mečit, cidit Moš me pjucat, rigat, tirat I uvridit i najidit Ma mi u Split nemoj dirat Loše ću ti dobrin vratit S puta ti se uvik micat Ako triba glavon platit Ma se u Split nemoj ticat.

• 14 •

BOG I SPLIT Split je Boga štova, voli I nad grebon i vrj zikve Split se uvik Bogu moli Sveton riči svoje crikve A vridnome spliskon puku Ka’ je fešta i žgobava Bog bi uvik pruži ruku Sveton riči viru dava U pokori, skrušenoj molitvi Otvorena stalno vrata naša Post na kruvu, vodi, blitvi Od vrimena Dujma, Staša Split je uvik živi Boga Pojen, moren, priko žmula Nikor ga ni vazest moga Sveta rič se ovod čula Split je uvik Boga voli A i Bog je pazi Split Sveton vodon nas je proli I tako će uvik bit.

• 15 •

RADUNICA Sve gori o vrja Lučca Gre lagašna nizdolica Do širine do Trumbučca Sve je oto Radunica Omar perva ozgar, Dumanića kala Jušto četr broja jema, pa znaš da je mala Pa Ninčevića,Ružića,Viskotina i Bubala Kuzmića,Kukoča,Dvornika i Pervana još ostala Devet mali težaški kalica Teplinom se i juskošću ćute Stivalo se ka devet sestrica I stisnilo materi uz skute O Trumbučca drito gori Petrića i Vesanovića u grop činu Ispo’ su van Dupjančića dvori A još nižje, Na tupinu Perve dvi su o pazara Zvizdina i Tarara Ozgar Kuzmanića s Mosorskon zatvara I s bande joščec Rokova stara Lipa li je Radunica Ma najlipja o svi kali Lušca žila kucavica Ča bi drugi za nju dali.

• 16 •

CENTAR SVITA Nikidan me dite pita Pape di je centar svita Da se čerce ne bi ita Nije nidir vanka Splita Ka odovod niko pojde Bilo koga da obajde Nek sva mora sinja projde Naza mira u Split najde Da sve bande svita spajaš Ka kroz pirju sve da ide Ka balotu da uvajaš Jušto smo u sridu sride Puno nji se vanka skita Ma duša u Split učita Vidiš čerce da mirita Da je u Split centar svita.

• 17 •

LIPOTICE SPLI’SKE Pari mi se da je Bogu uteklo o bote Da jednemu mistu da toko lipote Ma ne u Ervaskoj, neg u cilon svitu Nima lipji divojak od oni u Splitu Spličanke su uvik lipe bile Još ka bi se narešile, okitile Na kadene veli medaljuni Na košuju sve zlatni botuni A u kosu zlatni petenini Fermaji i forketi o brilanti fini Na prst vera, povrj bračoleti Zlatne jagle i brošeti Svaki vrsti puntapeta I biserni šapunjeta A rečine samo take I na njima pindolice svake Svileni korduni povrj vele fjube A zlatni se rekami sa žlingama jube Lipotu su redon cure miritale Prinčipese spliske sve su figurale

• 18 •

I za dišpet svima uvik figuradu Najlipje divojke u najlipjen gradu.

• 19 •

RIVA Iz Varoša banda liva Omar ti je spli’ska riva Od tejatre drito briva Marmontovon spli’ska riva Ma da si u Getu piva U vonju je spli’ska riva Pod Lučcon se Pazar stiva A na podan spli’ska riva Ako se feraton ariva S desna ti je spli’ska riva Je si li vaporon pliva Jušto ti je spli’ska riva I ka se u suncu uživa I ka grmi i ka siva I svit pusti ka se zbiva Uvik stoji spliska riva Zdrava, živa i doziva….

• 20 •

SPLI’SKI MISECI Potla Božića i godine nove Pervi se misec sičanj zove Maške se žešču, loze plaču Već smo eto u vejaču Pupi, bure ladne, ariva je marač Marčani petki, sunce, bi će sipi i komarač Evo Uskrs, skoro zima je partila Premaliće potla je aprila Trišnje, Sv Duje, sve je kako vaja Lipo vrime, lagja maja, usrid maja Svitnjak Ivan, Sv Ante o’banja štajun Pa vručine perve, petrovače smokve, uvati nas jun Fjaka, ladni bibit i brodi na mulu Svit najvišje opoćije jušto u julu Triba počet radit, nebo perve kiše prospe U avgust smo, misec Vele Gospe Setenbar je lito ode Triba ubrat truda plode Znalo se je o’starina Otobar je misec liganj, tiči, vina

• 21 •

U novenbru mertvima se rišpet daje Nevere su vele, Bog pervi snig pošaje Prajce uredi, fešte gredu, mekni sve novo U decenbru rođenje je Isusovo Pasali smo tako svij dvanajst miseci Priko užanci, vrimena i sveci Sičanj, vejača, marač miseci u spliskoj tešti Poza marču gedu četvrti, peti, šesti……

• 22 •

SPLISKI KOLURI Uvik je ovod ista pitura Ni se patilo o pustega kolura Sve ča je svitlije je čaro To dolazi od onega kjaro Ma ča ni svitlega kolura E to ti je pitura škura Rečeš li bjonda, boja je bila Dikod se duperala i lila Sve se zacrni ka je nevera Divojka mora, ka noć nera Jema i kombinacjun crno bili kolura Ka more noću svitli, oće reč ardura Uvik si kolur veživa za ništo Ne triba ti pinel moj artišto Modra je boja o našega mora A zelena boja o merjanskog bora Od pure je boja zlatno žuta Naranča je ka’ more sunce guta Spli’ska je kapa crljena A sve je na kraj zemja kafena.

• 23 •

FJERA SV DUJE Sv Petra apostola bi je učenik Bog ga je uputi, ni se zalud ode naša Sv Duje solinski mučenik Split nan čuva sa pomoći Sv Staša Svakeg lita na sedan petoga Na daleko zna se, čuje Zaštitnika slavimo svojega U Splitu je fjera Sv Duje Bunbal bati s kampanela Sva ga spliska pratu zvona Svaka kuća mantinela Feštajemo svojega patrona Judi moji koji konfužjun I svit pusti debeli i tanak Pa tumbula, a prin procesjun Na Rivu i Pazar sve do banka, banak Ocu vazmi bukaru, temperin Sebi splisku kapu crljenu Curi lipi svileni šudarin A ženan u kući po žlicu drvenu Svake spize i bibiti i đelati Vadi sve pineze, za koga i čuvat Klepetušu, čarčaiku sve pošteno plati Na svirak o Sv Duje dite mora puvat

• 24 •

Pusti svit je izvanka ariva I mertvi se dižu iz kočete Mladost bala, klapa lipo piva A po noći biće i rokete Pašticeri ne mogu odanit Na višje se misti i jančića peče Triba jude pokripit, naranit Nemoj da ti fritula u kroštule uteče S katedrale bumbal zvoni Dalmaciju zove da se javi Čuju ga i oni, u Saloni A Split svoju Sudamju slavi.

• 25 •

ČUVAJ BOŽE Gledan vitar meju bore I smokvu ča mličon cidi Pa maslinu stare kore Sve ča dura i ne blidi Čutin grozje puno šuga I tiradu o vrduna Bilu robu s vonjen luga Svu lipotu sa peruna More zibja, ginga, pini A klapa nas pismon liči Lustre svitlu na bankini Jer sve ovod raju sliči Čuvaj Bože ča moš boje Da je niko nebi taka Ovo lipo splisko poje Svetu zemju o težaka Čuva Bože dok je svita Svaku onu svetu stinu Da je nikor nebi ita Da ostane našen sinu Pazi svaku kapju rose Svrj lipote još lipotu Neka stoji sve napose Našon ćeri za u dotu.

• 26 •

PRIŠVARAK Ka’ ča brzo izgori suvarak Tako bi ti u Split petalo prišvarak Meknimo dva Dumanića Viska,oba s Lušca, oba spliska Pa ti najdi koga tribaš i oćeš li praveg iska Prišvarak si nosi prema didi, papi I po njemu svak te zna, a ime isklapi S prišvarkon ti ni tribalo zaludu poć Trefi bi jušto u dvor di triba doć Za prišvarak dobit malo se otilo Samo i je u Dumaniće, tries bilo Slušajte me dobro, pratite atento Jerbo su za se Dumanić Šulento I još bi ti notat, za ne fali Varoški Dumanići sa Lušca su arivali A Kandele, Majorice i Študijo svaki U matične libre notani su taki Sve o’ Sinka, Ševeja, Šila, Žmrlina Do Patane, Kruške, Kreda i Marina Rusmarina Pa Badeša, Bonda, Čavlov, Cunfo, Evanđelišta Veštito, Šendo, Palaska i Pope fuzbališta

• 27 •

Decijo, Kecko, Kopačica, Nunkalo I samo je jeno za spomenit još ostalo Na kraj vaja timbrat, neka lipo bota O’ moji je Dumanići prišvarak Gigota I joščec bi ode nadopisa Ozretići moji Joskanovi- Lisa O’ matere otac Kragić Marinići I matere mater Kranjčevi Reići Pogledajte svitu te lipote, blaga U Spliske prišvarke kolika je snaga.

• 28 •

MA JE UVIK SPLIT Još tamo u niki pasali datum Bi Spalathon, Spalatrum, Spalatum Da bi mladost naša znala Spalatum je poje o’ kameni pala Aspalato je poviri na vikova ponistru Pa je ariva Aspalatos u brnistru Ako ti je lagje, onda vako svati Misto uz palac zove se Spalati Svima su poznati spliski ambicjuni A Luški su vrtli bili Spalacjuni Zvali su ga i Spalato i Spaleta Ka’ ča je o’ prjca noga špaleta Spalatensis civitas i Špalatro a ke Pa niko vrime i Splet, altroke I pomalo tako ijadu devesto deveta Došli smo do Splita zanamisto Spljeta Kroza sve to vrime, lipo je tot bit Moš ga zvat kako oš, ma je Split uvik Split.

• 29 •

KRNJEVAL (VRIME O’MAŠKAR) Ča je ovi krnjeval o Rija Za onega ča je u Split bija Ko more šuperat spliske aškare Ovod su bile najboje maškare Svak je pari i kurba i fratar O svega se činija tejatar Niki su perfin odili šalturu Za sašit po guštu monturu A ka si glavu meka ispo morete Moga si činit fjabe i dišpete I cilome svitu ča očeš petavat Najlipje divojke redon korteđavat Svaka bi rič o cukra bila slađa Jer ispo morete ne fali kurađa Ako te ko ni šmeka, oli te idi Ijadu mu besid slidi i dikoja ga uvridi Pusti kunfeti, korijandoli i peline Bilo i je na duzine Ili su se mendulati, pandoleti U nebo se itali roketi

• 30 •

Vinski dekot u litre je teka Popilo se rožolja, prošeka Ni falilo pusti redikula Koji šušur i koja gungula Svaki je jema niki mot, niku svoju andu Niki su se morbinali, a niki u škuribandu Sve je vodi i upravja batištrada Bi je car o svi monada Obučen u svoje prnje, bidni krnje kraj o konfužjuna A kako i slidi za njin svita o cukuna Onda bi se arivalo di će krnji sudi Šentencu mu proštit, pa ga užgat judi Za sve je on kriv i sa onin ča gre stin Neka ognju plati konte i neka ga izi dim Cile noći svit se nebi štufa Koja fešta i koja barufa I jesi li ujutro skinija postole, čizme Nako bos bi ugazi u dane korizme.

• 31 •

TOMBULA Ka na fjeru Sv Duje sunce zeru mine Na Rivu se tombula učine Tombulon se svudir svit zabavja Ma se ovod u Split ona prestavja Jo belece i veseli čunci Veli tejatar sa ijadu glumci Niki su vazeli cili kartelun Pa ne miču oči di je tabelun Da boje vidiš, produji šjolu Numeri su meknuti na tolu Je si li mi lapiš vazela Je li ko tebe moja kartela A koja gungula svita li luda Broj trinaest, pervi pa juda Ma nima ovde labava Evo šestišest, dva brata gobava Svit se žešči, bati pulac Osan pa jedan, oće reč mulac Finito, ko me je cinkvina Ma jesi vidi kurbina sin

• 32 •

Ne beštimaj, ne skalaji Boge Sedandesetisedan ženske noge Joščec mi dva numera fale Osandesetiosan biskupove očale Dvajsčetiri dvi duzine, pa evo trice Pedesetipet dvi sestrice usidilice Jedanaest ščap o metle, koja san mona Oće li izvuč devedesat, nona Četardesetčetiri, dvi katrige Kako je zavika čuja se do đige Jema li živi, oli su sve mrci Tridesetitri, kurirovi brci Priberi se, popi žmul bevande More me spasit dvajsidva Sv Mande Svit se žešči, tombula se vata Ka se jedan zadere: FATA Nasta je taj, bilo je i plača Je li dobi Vlaj oli niko s Brača I sve je fermalo, naglo pasalo Ijade karteli po tleju ostalo Svit se pokupi, a ča će, di će Dogodine biće, mrvu boje sriće.

• 33 •

TEJATAR U Split nikad neš proć lišo Uvid te ovod dočeka trapula Je li drito oli strišo Niko se o monadi ni škapula Ovod je uvik kurbin pir I od dide učine se baba Niko će te siguro uvatit u đir Od svega se tot učine fjaba Batali su stalno atenti na glendu Doživit ćeš na ijade čuda Neš na miru izist ni marendu Jerbo na batudu gre nova batuda Ma di da se najdeš u ludemu gradu Njanci minut nečeš jemat mira Pribotunat će ti niku botunadu Oli koji škerac u fino utira’ Uvik će te kogod zafrkavat Za ništa ti, ma kojega truda U nan je da moramo štucigavat Od pametnog ovod učinemo luda Tako u Split mora bit Ne triba ti sihijatar Cili ti je bili Split Jedan veliki tejatar.

• 34 •

SEDAN MOSTOV Ferata je arivala Frižon dugin grad frižala Do Općine u livel je bila Onda lasno doli zanorila S jedne bande Manuš, Lučac mili Doli Dobri, Palac, veli Varoš cili Kako dišpet i prija razdvaja Sedan mostov spli’ske jude spaja Najvišje su Manuš iskrižali Su četri ga mosta izmrižali Sve i vaja notat da se ne uvridu Pa pojdimo redon, kako svitu slidu Di se jubu Livanjska,Balkanska, ka’ dvi žile Najširji je Most Sjeverni, uza zide Bulatove vile Bokun nižje u Istarsku, mostić viši Malin Moston svit je u grad priši Manuški je dva Manuša spaja Da budu u cilo, ne ka’ dva retaja Ko’ Đardina još o’cokul bati Vojničkin Moston s Grip gredu soldati

• 35 •

Pazarski vrj pazara svi su znali, priskakali I šverceri, pa šiptari, pušti manovali Podan Sv.Petra, deboto ga tica Luški Most je o’Rive repica Ferata fermaje, gre u šine kraće Kupališni Most, di vengo na Baće Cili je o’driva bija, pervi i sagnjija Nika jopet u cimenat, tudeškima tratamenat Ma i danas osta je za žuntu Sve za dišpet, još stoji na puntu Grad jopet spojilo, prugu ukopalo Mostove sorilo, u povist poslalo Odo perve deboto ni nedan O’ svi sedan, prispi jušto jedan.

• 36 •

OSAN POTOKOV Pusto se je vode u more ulilo Osan je potokov težaku služilo A svi osan iza Trstenika Sve da i je spojit bilo, prava rika Trstenički potok, po Dumaniću Kandeli ime bilo Pervi je po redu, a niki ga zvali i Krajevo vrilo Pa Joskanov potok po Ozretiću mome pradidi Danas to je Radoševac ako ti se višje svidi Kuzmanića Šilve potok, ka’ Zijavac znan A njemu je ime sad potok Žnjan Pa potok Vodice o stari Bagatova Jušto na granicu Žnjana, Duilova Andrešov potok po Šegviću Andreši omar je iza A šesti po redu Brnabića potok je Prviza U Jerinoj dragi teka je Orišac potok stari I na kraj Oparin potok po Krstuloviću Opari Puštili smo ludi svitu da se svi ugase Ka’ čoviku ne tribaju, vazela i zemja za se.

• 37 •

BAJAMONTUŠA Akvadukton uređenin da ne more boje bit Živa voda rike Jadro došla je u Split Velon mistu, vela stvar i triba je slavit Funtanu velebnu na vrj Rive stavit Da figura, da je se mirita Po fjorin je dalo dabi pola Splita Jemala je na se da za vike traje Izvor Jadra, Solinsku valu i sve more daje A tritona četiri nereide mire S vrja mončić livicon u Bosnu upire Po’ je vika mirovala, figurala Smijala se i gradon guštala Ma sve se promini i vrime i judi Od pametneg, dobreg učine se ludi Zaludu ti bili konti Lipi šjor Bajamonti Velu su pamet dostigli Funtanu u arju digli Kurbanjski su mekli mine Kada lomu u petradu stine

• 38 •

Kamen bili rastvorili Kipe vridne su sorili Ludost strajon začinili Sve su u praj učinili Ka’ niki u široke gaće uletu Fontana bidna platila buletu Okrnili mrvu spli’sku dušu Ukreli nan Bajamontušu I fontanu na Šperunu rat je toka Sv. Petra Luškog i crikvicu Sv. Roka Na širinu isprid kuće Deškovića Pari da se prosula gnjoja vrića Sv. Frane i vela Prokurativa Barenko malo oti jad pokriva Funtanu si jema da se sviton diči A našto in sad, ono doli sliči.

• 39 •

PEŠKARIJA Marmontova dva tejatra jema Jedan na vrj, oni pravi Ča je duši likarija Ali na po’ vaja ferma’ U letu se tot zabavi Tejatar je puški naša peškarija Okrunjene glave miritaju banka Sve stivane čoviku na že’ju O’plastike stoli meknuti su vanka Sitna riba je u foajeu Nek’ se niko ne uvridi U tem carstvu luštri, vonja Crnilo kapa, led se cidi Jedan špicaje, drugi ronja Ajmo svitu kome špara Svake ribe dobre cine Evo lubin za likara A za penšjunate friške papaline Mišanca za brujetadu Posoljeni inčuni, sardele Pa šanpjero za jušnu gregadu Ribe vele na gradele

• 40 •

Za pofrigat omar vako Na buzaru šuga puna Ka’ cukar je svitu slako S dva kumplira oli makaruna Friška riba, vidi jon branče Sve se luštre srebron zabliščale Pari mi se vidit, evo ti manče A na mutne oči mekni jon očale Jedan fali, drugi štucigaje Debelu pirku, proguca knez Premjera se ovod uvik daje Moreš guštat brez pinez Čuju se beštimje, pecete A jopet se zna zapivat Dikod letidu pajeri, kašete Onda se triba mrvu škivat Ma kako dojde, projde morbin Gre se na žmul do perve oštarije Koltrina se skala, svršija je čin Sutra je jopet tejatar o’peškarije.

• 41 •

DIDINA KONOBA Lozu triba volit, ašeštit, ugajat Šnjon umirat, a i šnjon se rajat Natopit je znojen i lagodit žujen Tepat jon i pupe jubit, ka sa svetin ujen Jematvon se težaku refajedu trudi Botam je spreman, o vina svi sudi Pojdimo trgat, evo bujoli, vrići Temperini, kosiri i lateni sići Sve meknimo na jarpu uz pojatu Za lagje pribrat u koslatu I od dropa nima vina boja Ka se izmiša sa višje poja A onda karon u konobu ča prije Smečit nogan da u badanj vrije Pa protjepjat, okrenit na perun I slador izmirit na gradacjun Ako fali bokun gradi Cukron maškabanon zasladi I kroza kanelu cidit u maštile Pa priko pirje ulit u karatile A ča ostane u turanj dosizat Kriketon s kunjon coke pritizat Pa puštit,laškat,vratit ne šuntat I nove coke nadožuntat Turnjanje je uvik prava fešta Ka se grozje meći, ka se u mast pešta Udrobjeni grozdi u čemuje, pluktine, čežaje A vino se doli cidi i o cukra slaje Bokun po bokun koja lipota Puni se perva mezobota

• 42 •

Svaka se kapja čuva da ne kane U jenu mezabotu šest stolitri stane Drop se iz turnja pribere,rastrese I dropuja rakija se peč odnese Dil vina se cukron obilato pini Da se za svece prošek učini Sude ražentaj, mekni u kantun Na svaku bačvu nasloni tapun Vino je lik i triba znat šnjin Jer dezmezano gre u špuntin Iz vina se vaja uklonit feca Pritočit na šijun,a ne prolit po deca A konobu tiščat ka oltar čisto I sve da stoji na svoje misto Dižice, bocuni, poti, potići Žmuli, pirje, brentvice, sići Prošek, rakija, opol,crnjak u kantun Sve jema svoj požicjun Gori su meknute dvi tanke žice A na nji za zobat suvice,mačice Vino si gušta na justa,nos,oči Nisu se onda činili paštroči I sa mi dikod dica suzu vide Ka se sitin konobe svojega dide Ne bi tija a oko se stiska Za konobon lipon Dumanića Viska.

• 43 •

VERDURA Da se boje čisti i višje dura Čoviku se uvik išče verdura Za večeru prava je mira Blitva s ujen i dva kumplira Za obid ona zelen bokun jača Verzot, cikla oli špinjača Žutinica i mišanca ka’ je o štajuna Oli lešan kavor s dvi kapje limuna Kukumari veli, mali, pome, pomidore Ravanele, kapulica ko odolit more Karota i kapula gre u sve bronzine Pa tikvice cukete, balancane fine Brez petrsimula i češnjaka nije lipo ist Moš meknit murtilu, ružmarin i lovora list Od šljivaric izajde najboja šalša Putarica i radić ni salata falša Pa ka’ dojdu šparožine, bob, arčičoki i biži Poriluk i mezobiži su šaku riži A ripu san zaudobi dokle san nabraja Čimulica mlada o’ cukra je slaja

• 44 •

Svašta moreš činit o’ te zelenade Sirovo, lešano, u brujete, toče, moš na gradelade I šenicu i kukuruz još bi ovod tura Neka kruv i pura nisu verdura Doživičeš višje veseja i žeja Bokun largaj meso, uvati se zeja.

• 45 •

FRUT Slaka smokva, još slaja žižula Uzrijala zlati se nješpula Sve bogastvo ka’ se kuša oskoruša Oli ona mezo dinja promenčuša Za nike kostela, za me pelegrinka Popucaće grane o’ ti arzelinka Ona lipa crna, tugarka trišnja I ča mrči justa, žerbasta višnja Meke kake i murve si vata Ko’ more odolit vonju cata Koliko su dica dobili frnjokuli Za ukrest šaku barakokuli Najgore su bile o’ kupine mače I sa mi se plače o te puste drače Pa svi oni narančini, kruškic i mezolimun Naši mali jabučic, kiseli bokun I grozje sa zobat sa odrine vanjske Vodenjače zrile, cipanice praske A bačići lipi ka’ si moga nać Oli zube oštrit na suvi rogač Iz bora iz šiške vadi si pinjoje I pribira orije i mendule boje • 46 •

Pa si šipke raspucane čeka A marune na žeravu peka Očima bi čovik tu blagost proguta Na cilome svitu nima vakog fruta Ja barenko nisan, trefi slaje,boje Vengo ča ga rodi ovo splisko poje.

• 47 •

NJOKI Lučani su uvik na njoke žestoki Ča je njima za obid izist mašur njoki Ruku bi u vatru mekni da u našen gradu Neš trefit čovika ča ne šmeka njokadu Kumplire lešaj i nek se ladu polagašno Pa nek i pospuga domaće brašno Štrukaj i lipo na štrukapatatu Mekni jaje, sol i mast da boje uvatu I onda sve vojon privrči i misi Da se po zanatu u tisto umisi Meju ruke stisni, razvajaj po banku I dovedi tisto u štrucu tanku Ako triba još razvajat i brašna doda A iz teče u glogoje čeka vrila voda Onda lipo kidaš miru na pošadu I okreneš po perunu da i figuradu Pa ga itneš u teču, onako živa I skupiš ga kacjolon ka gori ispliva Jo ča su lipi, guštan i vidit Mekni ji u šupjaču bokun ocidit

• 48 •

Pribaci ji s pacjencon u vele stanjade I po njima pospi šug o pašticade I još priko tega pravi njoki tražu Da fregulon parmiđana projdeš gratakažu Malo svita zna i ritko se čuje Njoke moreš začinit i na luk i uje Ako ča priteče čuvaj ka likariju Za večeru stepli na banju mariju Ma je li dobra maša, ča će obilato zalit Takima će uvik dvi kacjole falit Udrila mi uglavu ta njokada pusta Dobro san ogladni, gre voda na justa I višje ni beside ode notat neću Ne triba mi pijat, vego mekni cilu teču.

• 49 •

U GVANTJERU OLI BIĆERIN Malo svita slakemu odoli Ritko da ćeš trefit da ga ko ne voli A dica bi samo slako ila Druga spiza ne bi se otila O’ dunj meke kotunjade Karamela iz rožade Pandešpanji, lipi pandulati Od menduli slaki mendulati Pa kroštule ča se zlate I fritule sa suvican, pršurate Svit je tišča u kredence Kunfete za posut mladence A ka ka’ bi se vinča, oda Od krokanta torta na tri poda Sa drugin si slakon svaku feštu tica Za Svisvete bobiči, za Uskrs sirnica O’ cukra de orzo ništa ni slaje Za kripost si sa prošekon, žbativa jaje Škanjata sa suvican daje forcu tilu A dešop i galetine usupat u kafu bilu

• 50 •

Ča marmeladi na biškotin fali Oli lipoj, veloj s cukron pecipali Meki šavojardi justa ti se topu Rafijoli se ne sramiš niti odnit popu Svaki je goluz i čovika mata Paradižot tepli, a po vrju čikolata Lipote i slasti za velu gvantjeru Moš se mašit za obid , večeru Domaćicu uvik vaja pofalit Nazdravit joj, a i slako zalit Od orahovic i rožolja niko ni uteka A koga ne šmeka, bičerin prošeka Pa rožulin oli rogačuša Očeš višnjak novi kuša Dropuja i travarica o’ sedan trav Misno vino i liker o’ smokav Uvik se je slako ilo, pilo Lipi moji u zdravje van bilo.

• 51 •

STARINSKA KUŽINA Uvik je kužina za se koridur Lavel, špaker, fugera i maškadur Pa komoštri i trinog za bronzine Teče, lopiže, pršula i potine I škancija bila, su dva škafetina Za tiščanje žlic, peruni, pošadi, pjatina Pa čikare, žmuli, zdile i stanjade Terine, gvantjere, škrovade, portade Štrukapatate, pašabrodi, gratakaže Kavatapi i šupjače, kjuči za otvarat važe Gamele, barilci za sardele, kacjolina Za šnicele macola, za uje i osto karafina Platul liši, štikadente, pirja, pasaverdura Pa moleta i balanca, sve do lazanjura Sva pokriva pusta, botije i botijuni Roštjera, škudela, kajin i bocuni Sito i rešeto, kortelina, svi pinjati I lavaman sa šaldamon za sude oprati I ka’ ražentaš, sve mekneš na stol Na čistu kanavacu oli tavajol.

• 52 •

BEŠTJE U Split je najdražja beštja tovar To je težaku o’ Boga dar Sitni, mladi meki pulac Oli neuškopjeni crni krušac I ženskega tovara čovik se denja Ugotu su ovod zvali kenja Prin ni beštje nisu bile line Konj bi prini kvintale tupine Basetni bi konjić goni, ora Pribaciva iz poja do dvora O’ verdure, grozja, lozja, vode iz bunara Sve je išlo priko kara, oli sa samara Split je voli i janjce braške A još višje tuke vlaške Mali težaški pas pomerinac, tabakin I sve su i zvali Bizerin oli Cigalin On je uvik skaka i slidija kar U poje težaku bija je par Ka’ dite si najvišje o’ koze drča Malo i je jemalo dobrega prča

• 53 •

Vinograd i poje bili su imanje A prajci u kocu velo blagostanje Uvik je bilo spirin i granzoli Biće lipje meso ka’ se posoli U kapunjeru pulastri, kokošice, pivac A dikad bi trefi i kunac sivac Skoro svak je jema mašku, manje-više Da očisti pantagane, guščerice, miše Grdelini pivali su operete, serenade Okol’ čibe gladni rebac, ako zrno spize pade Prin si beštje tišča, jerbo brez nji nisi moga A danas su zjogatule, ča ji tiščiš zaraj švoga I beštju bi naučija ča po redu slidi A danas beštja, gospodaru zapovidi.

• 54 •

BEŠTJICE Na ijade i je bilo I okolo i na tilo Niki se libi, niki lize Niki škakje, a niki ugrize Stoju u škuricu, sakriveni u bužu Oli se na zvizdan lino opružu Pa letidu oli se kolotaju Mir ne dadu, dišpetaju Buji, baje, tarme, pjatule vele Pa brakuje, zelenbači i po noći tarantele Taljaferi, škaranbeži, čimavice Gundevali, papataži i gagrice I bakule, guščerice, mali gaštapani Pa ušenki,cvrčki, potopiri, veli pantagani Gundeji, popići i balavi špuži I smrdjive guje, črvi, mravi čemprguži Od leptiric mali, do gospini kokoš Svega blaga ma koliko oš Još san zaudobi konobe kantun Di u fermu čuva macagrabun Pušti beštji ka u fili Poje i kuću su njima si dili • 55 •

A danas se judi moji Čovik svoje sjene boji U cakleno zvono čovik spava O malega miša učinedu lava.

• 56 •

MAŠKA Na parapet stoji maška I po nikoj buži čaška Lipa, čista, šesna maška A ne nika naopaška Ni ni braška, a ni vlaška Vengo prava spliska maška Edukana nika maška Gre se napit di je vaška Svrati u dvor barba Paška Sardelicu izist maška A onda se u lad laška Rastizat ka’ svaka maška Dočin čuti vitra daška U lov pojde naša maška Furbasta je ova maška S kara žešči pasića težaška Pari nika bogataška maška A ne luška siromaška Biž ča maško, dosta mi te više Ajde lovit repce, miša.

• 57 •

TABAKIN (TEŽAŠKI PASIĆ) Iza tovara, ka’ iza ferate vaguncin Lagašno skače mali tabakin Težak zna di je, neka ga ne vidi Gospodara prati, vrti se, slidi Samo je kurjož, ne bi ujija, griza Ne moj se mislit, ovod je iza Ne triba mužaljora, za vezat špag Kako je smišan, malešan, drag I jušto se okrene povrj gaštapana Poklopi ga mriža od macakana Ostraja je bidan samo zalaja Kada je vidi nikoga vlaja Je li mi to pasa itaš u vriću Vrag nek ti vazme dušu i sriću Molaj mi s miron tabakina Ćuti će ti škina, di je bankina Veseli pasić kleka, šerjasto glavu meka Ajdemo mali doma, jedva je dočeka.

• 58 •

PIVAC U kraj dvora kamen živac Četr’ bota na po’ sna su judi Navrj skoči i zapiva pivac Sve težake u kaletu budi Pulastar se žešči zoron Iz morbina cili se napuva A potla će trkat dvoron I kokoše svoje čuva Gori, doli stalno đirat I konfužjun cili tokat Od simena repce tirat Sve privrčat, kjunon čokat Pušti s miron kokošice mlaje Ka’ je tijo ne zovi nevere Da u gnjizdo učinedu jaje Opoćinu u lad kapunjere Sakrija si nogu livu I uliza u niku škuricu Onda naglo činiš brivu Širiš krila i repicu Ajde pivac kalmaj, biži Ne strišaji, daj uvati mira Kapelinon u kraj striži Oš’ pod peku su šaku kumplira.

• 59 •

SIPA Iz ruk’ klizne krene paša I bokun me oto pripa Isto san se brzo snaša I na bandu dojde sipa Bome lipa, prava sipa Sva se blišči o’života Fjankon lize, madir pipa Ta krajica o’rižota Puše sipa kada vitar cipa I žvelto se minjadu kolure Kjunon arju falšo ščipa I još čini repicon bravure Daj je brzo u sič turni Ne daj da ti jopet pune Na kosti je obaturni Grijota je da crnilo pjune Škinu škica i dok san se drica Jopet ništo sebi tunju kupi Evo gre joj i sestra parica A gren i ja za rižot san skupi.

• 60 •

CIPAL O’ PORTA Cipal o’porta Kraj o’đige Svoja je sorta U veštit na rige Skoči brez krila U fermu prati Brz je ka’ strila Ča oće uvati Tišći se škurice Poznaje sve buže Ne boji se lice O’kolombu škinu struže Tunje je zagropa Iskidana mriža Salbun iskopa Bankinu friža Lubin ga rišpeta U straj riba manja Ka’ se on prošeta Komarča se klanja O’brodi lata Bota o’šćige Kruna o’zlata Za kraja o’đige

• 61 •

Pala sa kareta O’sardel torta Učinila mareta Za cipla o’porta.

• 62 •

CVRČAK Zvizdan peče, zemja gori Cvrču cvrčki u borove Prin će puknit vengo se umori Stružu arju u zborove Ka’ san prija mali bija Ja san svoga cvrčka tija Jednega mi dida ulovija U škatulu šoferini ga sakrija Svima san ga pokaživa I kroz bužu ist mu dava Ali cvrčak nije piva Nije ija, samo spava Oli je mutav, oli se prči Siguro ga žena išće, čeka U slobodu bora jedino ti cvrči Žvelto san ga na bor meka Poletija, u grane skočija Svojima se cvrčkima javija Omar pismu uvatija Sritan bija, a šnjin i ja.

• 63 •

TIĆI Split se svitu uvik diči Lipon pismon svoji tići Veliki tičari, oželanduri O batudi profešuri Vino je u demejane Vrime je o oželande Vazmi višč, bošket, baketinu Na pošt pojdi grdelinu U fagot su svi rečami Da najboje tiće mami Kroz pletiva sve botaje Kroz zijade i voltaje Tičar gušta u tiradi I boji se da ne tradi Da batuda duje dura Evo jato s koridura Fermali su baš di triba Na bošket di je čiba Sve ji mekni u čibun I sakriji u kantun

• 64 •

Pa u logu vataj mir Na pašaj gre novi tir Onda boje tiće odredi Sve i priberi, lošije špedi Najboje nemoj ruvinat Vengo i doma nosi inčibat Jema bilači, cibaši, morac Lipaši, šporkuji i jedan krnjolac I vrduni, frzelini Faganeli , lugarini Sve mi s terace miči Jerbo mi ovod gredu tići Daj šedemekan i frišku vodu Pazi ka gredu u modu Pa i lipo tetoši, čuvaj i tekut in s perja pujaj Neka je manjadura puna I kost o sipe za lipotu kjuna Uvik triba uklonit šporkicu I znat ka beštja išče škuricu A ka ga triba meknit na škuru Da tuče batude koju uru Da očak sebi da reta Neka zvoni cila kaleta • 65 •

Kada najlipju operu puštaš Sediš i guštaš, guštaš,guštaš…..

• 66 •

BULIN, BALOTA Skupili se balotaši kraj svojega zjoga Za kibice s bande uvik jema švoga Sve jude domaće i furešte nike U krajevstvo o balot u Kragića Čike Dva terena karici iz maca Zjog od balot iza stareg placa Tot se ronja, žešči, smije Jubi, kara, bevanda popije Vajaj za bulinon, malo se ubila Evo je cika jušto di je tila Omar udri, vataj bulin balotu Ča uvatiš ni u grijotu Oću li apjombo oli po podu povuć Ne govori na ruku ka jeman tuč Itnen je gori, a doli se vata Zavrti je uruku, nek gre odrebata Tovara ti prajca zapela je svoja Slabo san vidi o pustega znoja Balote vajaš a ne balun Ajde mekni jenu u jovi kantun

• 67 •

Vrati se korak, ma ni priša Gledaj o dvi šponde, pa je striša Kalmaj, lagje , nek gre basje Ne duži puno kurbe ti pasje Udri mi ovu za dva punta Ostala mi balota ka žunta Baci je podase , niman u te vire Pari mi se da i ova jema mire.

• 68 •

FRANJE Sa ka skontaš višje, manje Svi smo igrali na franje Na miru si triba stat Za boje uvajat trat Zna to klapa stara Trat se zva i jara Vidi moje naprsnice A ti moje bonjolice Ova mi je otprin cikana Koliko je puti čipana Visok, poluvisok užga san prst Sve pobe napunjač, klamprst Sve ča cimaš, gre tebi A ko tako igra nebi Dvi san izgubi, a dobi dvi nove Amo jenu u parove Ova dica danas nimadu to znanje Jerbo na kompjutor nemoš igrat franje.

• 69 •

KARET (na balinjere) O stare metle ščap Zanja osovina i trap Na dvi bande sestre balinjere A ko će dat amortizere Prva balinjera je širja bila Njoj osovina vrj ručice badila A za refat visinu s boka Naprid gredu dva drvena coka O konobe vazmen stari krakun I lipo ga meknen ka timun A da bi gujca boje sela Spojiš bokune puntižela Oli se kome i lipje oće Najde li komad drvene ploče Joščec triba matica i vida Da se timun okriče di sida Samo ti fali moj inđinjere Brokvan kunjat sve balinjere A je li patiš o kolure Moreš povuč i ruku piture Sve smo ovod u riči stisli Blaženi ko ga izumisli Sa vaja poč na nizbrdicu I odrat ruke i guzicu Progucat use ono straja I puštit karet da se vaja A komeš priznat kako boli Ka kočiš šjolon o postoli Pa gujcon dricaš svaku bužu Dok balinjere cestu stružu I strišaješ jude,bovane,zide Čuuuvaj karet ide.

• 70 •

PARTIJA KARAT

Život je isto ka partija karat Za igrat pošteno triba znat varat Triba znat krest i ča moš vazest Pa znat štrocat, akužat, strišat Triba i puštit, motat i lišat Život je isto ka mac o karat Triba motavat, s drugon se karat Dobro izmišat, sič, okrenit zjog I tuč i zvat ka nimaš svog A karta gre pa stane,čovik se idi, viče Ma boje uvik gubit, a u jubav jemat sriće.

• 71 •

U SIČANJE NA SPLISKI BALUN Spliski puk je uvik druka Ol za Splita, ol Ajduka U našemu lipon gradu Voli si i Mornar,Borac,Uskok,Nadu Na garbuncin, na krpaša Igrala je perva o fuzbala maša Uvik bi se pusti narod stiva Široka je ledina ta Krajeva njiva I svak koje za mijuron trka ka cukun Nek u poje pojde radit, a ne igrat na balun S vrimenon sve je uvatilo livel Zanamisto krpaša, mijura doša mantel buvel A drukeri jemali su čarčaike i bandire I u žepe sakrivene pome i kumpire Furešta si triba stisnit i puplikon štucigavat Neka znadu da će kisnit i balune sve kendavat Tiraj žešče, šucaj bulun iz onega fanga Neće kurba u branku, vengo jopet štanga Igralo se onda za vicje i rišpet Svima kontra i svima za dišpet Dobiva si i teljance i one ingleze Igra si za dušu, a ne za pineze • 72 •

Dosta ti je bija žmul bevande i mendule gorke Ko je onda misli na pineze šporke Pravi se druker za svoje impešta Na plac se odilo kada je fešta Čuva si ka Gospu svoju maju s brojen Monturu bi bilu natopi znojen Ni rođenon bratu onda nisi pušta Srce mekni u travu, da puplika gušta Ne daj Bože daće doma koga ti blesirat Oli da ti neće niki elfer svirat Čin si doša blizu, počimje gungula Nisi u Split uša već gubiš dva nula Doveja te vapor, oli ferata Ne tribaš se ni svučivat, gujca te litrata Dočim si ariva, moš se drito vratit Dobit ćeš u korpet i buletu platit Nikod se ovod ni lišo izvuka Trapulu bi uvik meka barba Luka I sad svitu mozak stane Ča bi čini barba Frane Vukas i je dribla u duzine, file A Kragiću tribalo je kidat žile

• 73 •

Jerbo ka bi on udrija balun Kada si vratara meka prid kalun One koje nisan stavi, neće se uvridit Ma na ova četiri nima se ko jidit Prin su nas se svi bojali Rišpetali i drčali Ma baluna višje nima, ne igradu balunjeri Sve je danas to kužina šotokuci, hoštapleri Ča čedu nan zapovidat tot pod našin nebon Oni ča su jučer skinuli opanke Nek igradu sami sebon A mi ćemo guštat na male branke Ne spominjen se višje tega štađuna Ka smo bili na vrj tabeluna Stari plac je jema ništo, reklo bi se dušu Ajde pojdi ti linčari ka drukeri u vrat pušu Nima višje ti vrimen i nisan fločun Ma je sa starin placen, umra i balun.

• 74 •

PICIGIN Sve se muva, ita, skače I gomeni, liši, leti baluncin Meki salbun jušto u dno Baće Igra klapa s gušton picigin ‘Vod se uvik more miša Ma picigin nikad ne fermaje Ka’ je bura, jugo, kiša I po snigu dura daje A sa’ svaki neka svoju misli Picigin se rodi usrid Splita Picigin se u Split izumisli I ovod se igra i prvenstvo svita Lipo san ga bota A ti si ga striša Pada je divota Vidi di je iša Skrati mrvu ruku Gre puno visoko Čujen ga po zvuku Čipon ti u joko Zape’ san u bužu Utekla mi noga Ma ne išći skužu Ne beštimaj Boga

• 75 •

Na kosti se baci Prsimice itni Samo mi pribaci Svi su punti bitni Žvelto se dodaji Vako je najslaje Skači, ne škivaji Neka duje traje More si uzmuti Sve okolo štrapa U širje uputi Dentjera ti klapa Judi o’picigina svoja su sorta Niki bokun desni, niki mrvu livi Picigin je ovod višje o’športa Picigin se u Split živi Ma ‘ko ovo more plati Svitova je čača sinu Uvik uru na Bačvice svrati Pa guštaj u piciginu.

• 76 •

MALE BRANKE I ka’ mončić i ka’ dite se računa Omar ka’ bi iša vanka Nidir ne bi brez baluna A sve nan je bilo branka Dil bi dvora izglancali I za štange mekli dva bovana Pa trkali i šucali Igralo se doklen dura dana Par-dišpar, vaja se izbirat Tri na tri najboja maša Jednega triba na branku tirat A mi ćemo cipat mantel buvelaša Dodaj, driblaj, kroza noge turni Daj mi u for, lobon, tišči ga na petu Glavon skoči, kostima ga obaturni Mekni ga u bandu, volejon u letu Lakton me striša, iz nosa krvi Balun je sakri, ko će ga čuvat Ka’ gre u kontru cipni ga pervi Čekajmo i nazad, moredu nan puvat Ne zovi me ka’ štopajen Provat ću na ovu špondu Na perun ti balun dajen ‘Namo mirin onu bjondu

• 77 •

Vrati mi iza, špicon ću probit Sam si, ne tribaš dodavat Jo ča je lipo tuju kalu dobit A još lipje potla štucigavat.

• 78 •

NAJLIPJA BAŠTARDA Pod Merjanon ka s oltara Varoš Veli,grada znamenita U krajevstvu kadujara Jema kala Kamenita A u kali lipa diva I pod Gripan ka s oltara Lučac spliska perjanica U krajevstvu o njokara Jema kala Radunica A u kali težak vridni I ka su se namirili Varoš s Lučcon pomirili A ka su se rukovali Didi mome život dali.

• 79 •

MOBI’JA Kuća ti je brez mobije Ka’ čovik ča nima grije Bilo je komori di je posteja jedina A i oni o’ luši, morbina U sridu mekneš kočetu lipo Oli unjulu, oli o’ peršone i po Sa svake bande po kantunal A na njemu šugaman i s vodon bokal Lako se je pravit sa konduton fin A prin, pod posteju vrčina oli bukalin Pod ponistron komon su četiri škafetina Povrj bonegracija di visi koltrina Podan posteje na bavul si sida Dikor bi bila poltrona oli katrida Naša bi se i šemizet, veltrina, tavulin Tambuć meki, oli samo tamburin Za steplit se jema si škaldin Povrj niki postej visi baldakin Ako si ženu naidi, učini belaj Vanka si spava na uski šofaj

• 80 •

Iza vrat je visi pikatabaj Za ne škicat robu, na pikaj Ča ni u komon, oli na pikaj stalo U veli se armerun stivalo Inbotide, pjumine, bijace, kuverture vele Pa sukance, bjankariju, lancune i intimele Zlato si u škafetin na boketu kjučon škroca Kraj zrcala na stoliću ča se zvalo joca U caklenu veltrinu je porculan ča bi na pir dobija I ako san dobro zbroji to je sva mobija Sve su žene u čisto tiščale Praj otrale, fregale, luštrale U mobiji staroj gušta si, uživa Sve je bilo po zanatu o’ punega driva Činilo se za sto godin, a ne jenu uru Sve je bilo za duperat, a ne za figuru.

• 81 •

BARJAK I BANDIRA Na štandarac navrj gori Nikako mi ne da mira Je li se barjak vijori Oli pače lambika bandira Ne šticaji se šjor šticun I jedan i drugi triba se vit Barjak je veli ka’ lancun A o’ bandire, bandirica more bit Ma i jova jema mista Ka’ ča čovik jema viru Pod barjakon duša čista A puno i minjalo bandiru Sa bandiron drukaš mašu Barjak ti je srce taka Bandirican dica mašu Ščap barjaka išče i junaka Svit je mrvu vode, praja I za salamune i za injorante Sa barjakon gine se i raja Za bandiru mekneš i mudante Ka’ vitar ne mava, bandiru uspava Ma barjak ne spava i ka’ nije bava Bandira se vrti spore su makakon A meni je dražje ostat pod barjakon.

• 82 •

IMENJAČE DIDIN Na katridu opoćije dida I smije se, nima ida Jerbo sidi spore šnjin O’ prvega sina sin Šerjasto ga mali stimaje A stari mu reta daje U unuka infišaje A dite se kokolaje Sritan li san za te Ča te Bog pošaje Da nan loza cvate I prezime dura daje Sedi ovod didin mišu Vidi ča se grdelini čuju Sve pacjenca, pušti prišu Vazećemo svirak za Sv. Duju Sve će tebi špjegat dida Imenjače lipi, fini Kako o’stinj ziđat zida I kako se vino čini Voliš li ti svoga didu Berzo reci staroj babi I ka’ čuje žejenu besidu O’sriće se dida krabi

• 83 •

Puno tega o’dide ćeš dobit Okrit ću ti svaki čuda Ajde baba izvadi nan obid Debuli smo o’veloga truda.

• 84 •

LAVANDERA Tuje robe i šporkice svaka se naprala Lavandera vridna, da bi dica ist jemala Kosti liše pizon teškin sorivene Ruke natečene, vodon izivene Sve su bile dežbjego i krive O’kvintali robe i stolitri vode žive S funtane vodon se punila kaldaja Nosila je lavandera višje vengo u dva vlaja Užgi oganj nek se dobro grije Napuni bjankarijon ka uzvrije Sve mekni na platul, a ispo kain Pa udri na sapun i bruškin U maštil ostavi vodu o lancuni, bjankarije Za otokon oprat sve stvari grezije Grubo točat, deškargavat, ražentavat Onda potla za kraj jopet lušijavat Da sve bude još lipje, za robu biliju Dodaj šaku luga, pojačaj lušiju I na glavu mekni sparu, na nju lavaman Pa na tiramolu, dobro suši, o’bure je dan

• 85 •

Onda skupiš, šumprešaš, pjete dricaš Stivaš sve po špagu da ne škicaš Pa odnesi na gotovo, na kuću svitu A gospoja uvik ronja, prin ti da munitu Onda jopet trči daje do drugega dvora I pokupi maštil robe jer se živit mora Gledan danas doli na Piškeru U povist je ostavilo staru lavanderu Opralo je vrime, sveton vodon lavanderu Gori s miron anđelima baldakine peru.

• 86 •

MARANGUN (mome dobremu papi) S papinoga marangunskog banka Svaki je beleci izašlo vanka Sinjat, fermat, rukon izdilat Na bansegu ugrezo ispilat O puntižela učine se kantinela I blažujka živa tek je komad driva Ako triba dešvat, dištakat Pa onda stivat, adatat Bokun pošplanjat, inkašat, smušat Pa svažat, inkolat, štukat, luštrat U moršu stisnit, škrokat Na miru svorcat, pa inbrokat Glave o brokav kacačodat, šaližat Onda piturat oli vernižat I gotov armerun, škura oli vrata Ča bi se reklo na puntu o mlata Sve je lipo, drito ka pinel Moreš ga meknit drito u tinel Moj pape je bi marangun, modelišta Ma bi je svitu o driva artišta.

• 87 •

BARBIR Di bakankin o’ mesinga na kolonu visi Prid butigon o’ barbira ti si Ako si joščec čoviku ti sličit, oli modu tira Za vlasi uredit ujdi u barbira Evo jedan sve do rice, rica To je učinija znoj i šporkica Ovi jema glavu veću Ostriži ga na kacijolu oli teču Ovemu je kosa masna, sva se zališala Kada ga je krava su jazikon polizala Evo jedan pelav, a gori mu pari muf A ovemu jopet sve do cufa, cuf Pariš jež od ovi kratki vlasi Uvati mu riga bandu da se ništo spasi Ostriga te utreso ka mladu lozu Boje vengo istrigucat ka divju kozu A bafe su kratke zvale se bandete Poravnaj na čelo te male franzete Tvoje vlasi formu glave slide Pituraj se bokun da sakriješ side

• 88 •

Spliska je glava manja, od mire A vlaške je komad i sva na bačire Moš o’ kose repicu učinit perfin Oli je po starinsku vezat u kinkin I sa mekni klobuk, špančeru, kapelin Beretun, kanjetu oli borsalin Kapu težašku na pirju oli kukujicu Strijač, osmicu i francuzicu Jerbo ako barbir bokun i falije Uvik jema kapa da se sve pokrije.

• 89 •

ŠALTURICA Šalturica vridna konac je udila Pa je tašel mužu na gače sašila Tribala je učinit suknju o›bavela Muštru izabrala i mire vazela Pervo je sinjala, skrojila, inbazdala Sa pomulan uvatila, onda ingažjala Pjete učinila i lipu borduru Bokun merlo inkolala za lipju figuru Vazela je rokel konca, jaglu, botuncin Na polšu je mekla fjoket i bustin Šigurecon uvukla je kurdilu u duge mudante Na prst zizjal mekla za mendavat bičve, gvante Sve je znala, rekamala, stara šalturica Radila je bržje, boje vengo nova zingerica Sašila bi od jaketi, vešti, kularina Pa lancuni, intimeli sve do koltrina Bržje joj je sve odilo, vengo ča bi gleda Rekami i rišeljei, pa miljeti i toleda Volila je fine štofe, a i greze tele Pa bunbake, bonbažine, fuštanje, flanele

• 90 •

I sve je tiščala u škatulu o›pokojne tete Ažule, rodule,jagle, probočice, unčinete Partila je šalturica, a škatula pala u kantun Višje nikor nezna sašit njanci botun.

• 91 •

KAFA, FOJE I ŠPANJULETI Najprin kafa gre u bruštulin A ka se oladi u mažinin Evo u kogomu uskuvala voda Makni s vatre triba kafu doda Pa sve lipo mekni na gvantjeru Sve čikare a i cukarjeru Svaka o čikari jema i pjatin A na njemu mali kučarin Polako ulij, jebenti miša Da se fundač ne izmiša I u letu omar užgi šoferin Zapali španjulet, mekni u cigalin Otvori foje, prošti novitade Pazi da ti pepel na gaće ne pade I priskoči stranicu di su šoneti Da ti ne naškodu i kafa i španjuleti.

• 92 •

MERJANSKA KADENA Sve po Splitu bilu Po spliskemu poju Na ovemu dilu, cilu Svit je iska viru svoju Od živice i tupine I u samo brdo sresle O’granita i mramora stine Crikve ovod ponaresle I dišpetne i samotne Nike vele, nike male I vesele i korotne I usale, procvitale Izvor voda sa oltara I krv sveta o’junaka Na žujima o’ribara I na potu o’težaka Podan sunca, bori grana Vitar cipa, nebo štrapa Stoju crikve o’Merjana Di se s moren jubi škrapa Sv. Jure s punte viri I pozdravja sve nevere Pinu mora s roson miri S vrja čuva Sv. Jere

• 93 •

Brnistra se žuta prospe U liposti i milosti Omar podan o’Betlema Gospe Stoji Gospe O’sedan žalosti Svitovat se triba, a ne dušu ita I za marinere molitvu izmoli Na Kaštelet Gospi O’dobrega Svita I na putu Vidilice Sv. Nikoli A svetost je vela i sa one bande Pokajnici pusti neka se uputu Benediktu Svetom sve do Svete Mande Oli crikvi maloj Gospi u Špinutu Judi moji o’zemje smo manji Ča smo manji vičnost nan je bliža A Mikula Sveti čeka nas na Stanji Kraj Gospe O’Soca oli Sv. Križa Mišaju se poja, bori, grebi, drača Tila partu, a duše su za vrimena Ma uvik figura i o’sveg je jača Dvanajs’ crikvi, Merjanska kadena Pasali smo Merjan cili Ka’ lipaš u letu Nek molitva spoji ča čovik razdili Stinje blagoslova, splisku zemju svetu.

• 94 •

DVANAJST APOSTOLA (VRTLI DUILOVA)

Duilovo, vrtli Dumanića roda Ka’ ča lancun, rišelje uresi Bog je zemji mrvu raja doda I sa bande dvanajst je čempresi Jedan drugeg tiču nako fini Alamari, zlatna in je smola Stivali se lipo u duzini Nji je dvanajst, dvanajst apostola Sve bi sunce zimi pospugali A liti bi učinili lada Roson bistron zemju naspugali Nika’ ne bi falila intrada Vrtli puni fruta i verdure Višje dadu vengo truda tražu Puni cukra i svake kolure Čempresi su tiščali in stražu Nima višje ote particele Državi je išla bagatele Za soldate digli su otele Uskopali vrtle, iscipali sve čemprese vele Zemju svetu moji pradidova Izgazila tuja je postola Ukreli su vrtle Duilova I sorili dvanajst apostola.

• 95 •

DUJMOVAČA Pervi su pivci jušto pasali Judi uprtili tovare, kare Težaci se spli’ski na put intrali Ne vidu višje svoje fumare.

Vela gungula u Dujmovaču Svako je jutro uvik isto Beštje se vrtu, revu i njaču Okolo funtane iščedu misto.

Spličani gredu radit u poja Vlaji u Split gonu forcu, trude Košu’ja svaka čutit će znoja A vrime čiča, dupera jude.

Na funtanu beštjan vodu namirit Napunit badanj za zalivat Mlikarice tuste sve će izmirit Ča mlika fali nadolivat Gospojan žvelto doma odnit Dopratit muže na žurnatu Usput ništo na Pazar odnit I skupit kruva za panadu Muški će kopat, cili dan krčit Oli žgobavat ka’ batelanti Umorno tilo zemjon mrčit Na gropive ruke nima gvanti

• 96 •

Vazest cukra, kafu, uje Pa lagašno naza’ pu’ svoje vlaške U ladnu vodu omekšat žuje I grope duše siromaške Mrvu oprat sve one mače Trefit težake ča doma gredu Na funtanu s puta Dujmovače A sutra jopet po iston redu. Životu teškon nima predujma Niti ćeš vodu utaman prolit U crikvi maloj Sv. Dujma Samo se moreš Gospi pomolit.

• 97 •

MATEJUŠKA Smojin Šanto, a prin Roko i Cicela Gajete su tot tiščali, ankorali O’ malemu svitu štorija je vela Mandrač u dno Rive svi su duperali U toj vali pušti brodi stali Nevere pasali, mora burdižali Tunje ogropali i mriže armali Matejušku svi su uživali Stolitre se tot popilo, a sve cilo Kvintali sardele na vrile gradele Brujetadi vagun se izilo i ribari odgojilo Sve na vesla, žuje, ni bilo propele U mandrač bi svaki ferma Barenko čakulu i žmul podili I ka’ nimaš tot si jema Matejušku judi su živili Matejuška i sa’ doli stoji Nika nova, liša, tuja, druga Ma ni isto judi moji Višje nima duše, švoga, šuga.

• 98 •

DUJE I VISKO Zvizdan litnji, arja gori Vaja tilo okripit u ladu Vrj tovara Dupjančića dvori Seden bokun na onu šentadu Ka’ evo ti niki dida Strijač, ščap i mokra maja Brez da pita s bande sida Ronja ništo kontra vlaja Šudaron se otare po tešti I povuče špag na gaće Izmiri me kada san furešti Sa kolina nokton struže maće Barba zdravi i veseli bili Incuka se i strijač popravi Fala Gospi ča milosti dili Da me niko po spli’ski pozdravi A čigov si, jesi li Lučani A koji su tvoji stari, jesu živi Jesan barba, po Lučani, a po Varošani Su sve četri bande san fetivi Kolpat će me sinko ovod u ladu Atento su već Božji kuriri Oli taki još jema u gradu Ča me drago da san te namiri

• 99 •

Pitali ste koja mi je raca Dumanića na težaške žuje Gigota je prišvarak iz maca Visko dida, a pradida Duje Pošćer Visko, težak vridni Dobro ti se sićan dide Nika ne bi ferma bidni Kada i sa’ Radunicon ide Na broj četardeset, starina je vaša Pradida ti Duje nosi bagulin U splisku bi robu on vanka izaša Iz žepa nan dici dava bonboncin I papu ti znan još iz škvera spli’ska Sinko dobri, lipega imena Pape van je gori, ko’ Duje i Viska Partija je prin malo vrimena Ča ćeš sinko, greš pa fermaš Bog odluči ka’ će u šteriku punit Ma ti jopet Duju, Viska jemaš I neće se Dumanići o Lušca udunit.

• 100 •

ČIBA Gledan mašku di se libi Kontra vitra repicu okriće Namirila vrduna u čibi A on bidan samo glavon miče Uzmuva se kapelin mu žuti Kjunon lampa i po žici struže Ni vidija mašku, ali je očuti Trepje, drće, ka› iz nike buže I čovik je ka vrdun u čibu Sve ga stišče, sve mu je u miru Pari da u vršu, živu tiščiš ribu U kurbanjskon piru, izgubi si viru Pa uvatiš mrvu reta, kofidence Kada si iz čibe uliza u čibun I o›pušte priše fali ti pacjence U čoviku svakem jema po vrdun Sve vrduni, napolak cukuni Krila jemaš, a letit ne dadu Maški moreš u guzicu puni› Ma zapivat nećeš o›sveca tiradu Privrni, zavrni isto ti se sprema Život te ujija, uvik si ogriza Svaki o› nas svoju mašku jema Oli sami imo, ol› smo nikon spiza.

• 101 •

STARA VELTRINA Povist cila o’ famije Stivano je štorij na duzine Sve se grubo u lipo sakrije U škafetin o’ stare veltrine Život vazme, ritko vraća Uvik nidir čeka baketin Dani smija, dani plača Sve se meklo u škafetin Veli kjuči za staru konobu Rekamani babin šudar i lumin Križ o’driva zamotan u robu Za navrčat didin temperin Libret mali za Bogu se molit Škatulica puna šoferini U terinu šaka svete soli I osto o’tarmen da čudo učini U mac slike požmarile Nika pisma i karte za poje Gagrice su buže učinile A na podan još stojidu foje Pa zrcalo o’soldati konac i jaglica U škartoce o’vrdure sime O’ orija dičja šuškalica I još ništo ča mu neznan ime

• 102 •

Tuja krv se izmišala Novi vitri vrtidu koltrinu U grandecu mladost infišala Rascipalo staru je veltrinu Sve peškalo i sorilo Škafetine vižitalo i manice izgulilo Vrime se je umorilo U povist se sve prolilo.

• 103 •

GRATAKAŽA Koja je to gratakaža Žešča i o’papataža I junak bi špedija kuraža Uvati li gratat, ota gratakaža U možjane drito grata Ka’ brez britvel o konobe vrata I frižaje ka’ pokrivo važa Pa ti templa put unutra svaža Škapulat te neće ni papina straža Grata li ga grata, ota gratakaža U grlo zapela cila mi manjaža A u juši zvoni nika fićotaža Ne fermaje, propju struže Ma sve tura kroza oštre buže Ča o’gricul, ča o’štrapataža Satrala me, oderala, ota gratakaža Duša tilon ne more baratat Gratakažo kalmaj mrvu gratat.

• 104 •

ČISTA BURA Užežin svake bure Roba bi se prokuvala,lušijala Pa na špage ispo škure U bilini lambikala Tiramole male, vele Oli podan modijuni Bjankarija intimele Tavaje i lancuni Ispo luminari i abaini Kroz mudante vitar svira Podan parapeti i frontini Vijoru se ka bandira Špag zvižđe i piva I friškeca lipa dura Balaju ščipunice o driva Tira bolest čista bura.

• 105 •

GNJILO JUGO Po glavi pribiren ćuke Mušic je puna kužina I lipu mi se ruke U arju je gnjila južina Ne čutin se nikako I sve se pripomištan brez voje Vrtin se ka makako Ne pašu mi ni foje Ne triba mi na rep meknit soli Ovo su dani ka te izi kuća I cila te škina o vajanja boli Ni mi do besid, samo bi muća Ni spiza ne lize,dišperan stojin Kantan li kantan, a ča bi drugo Pribiren nebo, zvizde brojin Oće li sutra pasat ovo jugo.

• 106 •

NEVERIN (ŠKAPULADA) Štufalo me burdižat Vaja brod armižat Uvatit se u porat Sidro kalat, brod ankorat Počeja me vitar tirat Teško orcat, težje virat Provu vata fikada Pa jopet kontra vogada Krmu mi fundaje Makinja molaje Triba brzo akoštat More te glave koštat Puno mi peškaje S bande prilije, fondaje Jače zavozit, šijat Uteč, guzicu škivat Dušu san svitu ispurga Doklen se nisan surga I dočin san se s broda maka Bogu zavali, usnan zemju taka.

• 107 •

PASA VRIME( i sve šnjime) Leti vrime ka’ strila, roketa Kako propuj uduni pavere Berzo dojdu side vrj koleta Ka’ mažinin vrtidu se švere Dicu za odgojit triba bit eroj Jučer si je korteđava, danas baba s tebon spava Nikad ne fermaje, verti se leroj Fortuna te tira, a pari se bava Dikod vrime samo u čoviku stane Ka’ uvati bolest, korota dišpera Kroza nike uspomene, bokunić odane Pa potira naglo svojega šofera Uvik ništo čekaš, a kraj tebe projde Potla babarina, šjalpa, kularina Nisi se ošerva, a partenca dojde Bati mali bumbal s vrja žveljarina Mlije zemju, stinje stara brekerica Sve je sitni praj i u stini veloj Nikad ne škrokaje Božja vekerica A čovik je jušto duperani reloj.

• 108 •

RIŠPET MORU I ka ti se uližije Ka se na te i uvridi Blagost svoju ka kažije I žestinu dok se idi I bonacon ka te ziba Maeštralon ka te pipa Fortun juga ka te šiba Tramuntanon ka te cipa Brez svatova ni pirovat Svetin ujen uvik se pomazat Nikad moru ni virovat Vengo uvik rišpet kazat Poklonit se i pomolit Use jemat ništo straja Uvik će te more prolit Oli barenko zavaja Puno se je nji igralo Idra svoja razapelo More i je progucalo Za se i vezalo Moru nemoj kontreštavat Ne fali ga i ne krivi Nemoj se ni kokolavat Vengo mu se samo divi.

• 109 •

TIRAMOLA Život uvik tira A čovik bi mola Prišu ti utira O’vrimena tiramola Kolo se okriče Žica se zatiže Veli grop se miče A špag samo kliže Naza mrvu, pa tir napri Jope’ napri, omar naza Largaj bokun, forcon zapri A di triba ‘ko će kaza Visu bičve i mudante Ređipeti i tavaje Ženski šudar, muške gvante Kombineti ,donje maje Pa se cidi zimska deka Sa posteje baldakina Niko je i trliš meka S bonegracje skinuta koltrina Nima tote nikad kraja Ma i ne znaš ka’ je pola Brez retaja, sve se spaja Verti žvelto tiramola.

• 110 •

ŠENTADA Podan palme, ka› pod karon težaški pas Povisti puna, pušti novitada Ča bi sve špjegala da jema glas Obišna jena spli›ska šentada O› gozda jema svoje bande Gori su stivane kantinele Opoćini mrvu potla bevande I šinjore dvi su za odanit sele Divojci friško, uza monka se zbija Pošprucani batelant na kosti lega Suvin kruvon baba repce dozivja Pinpinić mali jedva tlej dosega Panti ona svake švoge Pa čakule vele, male Pušte gujce, šnjima noge I notane jubavne sinjale Vitar je tuče, zvizdan prži I bota o›kiše kanonada Ma još se tišči, dobro se drži Obišna jena spliska šentada.

• 111 •

ŠEMPREŠOLA ( STARA CURA) Zakrikala tiramola Vrime pasa,a ne stane Sama stoji šemprešola Su kin ubit stare dane Parti mater, a i pape I poje je zareslo u drače Grdelin u čibu zape Triba dricat sve rogače Utekla je karijola Otilo se pušto birat Ča ti vridi šemprešola Sa’ je kasno naza’ se ozirat Dan za danon žvelto klizi Eto projde mladost cila Jušto mrvu škaršo izi Ni za robu ne bacila Bandira je na po’ ašta O’paukov svudir mriže Falinga se ne oprašta Nemoš frižon ličit friže Sa zida je opala pitura Sve je išlo Bogu za kurire Iza škure stoji stara cura Žute slike u albun pribire.

• 112 •

BRODI O’DRIVA Gajeta se stara na more ginga Ne boji se vala, vrimena i štringa Po morima još je didin dida u nju skita Uvatila u madire deboto sto lita U nježinom ladu, gavuni se kupu A galeb je u gvardiju na kvadra pupu E ka’ bi govorit znala o’prove joj ašta Rekla bi ti svašta da more ne prašta Koliko je vitra, žuji, znoja proliveno A štoriji tuge i veseja ispo škafa sakriveno Argola je sagnjijala, a pajole nima ko išekat Bura timun je dešvala, a nikoga neš dočekat Ča ne zdrobi more, učinit će vrime Oli će se cila raspast, oli će joj puknit cime Arivali zanji dani o’driva gajeti Ka’ potone još će plivat nježini pajeti Partijedu stari brodi ča jemadu dušu Vrimena su luda došla, divji vitri pušu Malo je bonaci, sve višje neveri Nima višje trabakuli, leut, gajet i braceri

• 113 •

BONKULOVIĆ (KA’ ZA PIR) Fregula paškega sira S pršuton jušto mira Kripna juva i lešada Dva, tri njoka pašticada Praščevina u škrovadu Jena sarma na stanjadu Pašta fažol, meso suvo Biži s jancon da ni gluvo Dolče garbo vrj pulente I tripice svin kuntente Na gradele šnicele, bržole Palačinke i kroštule, rafijole.

U joni tamo kantun Jemaš žmul i bocun Sve bokuni lipi naši A ča čekaš daj se maši.

• 114 •

PIMPERLIN Patinaj postole I take do šjole Vazmi špacetu Projdi jaketu Stivaj facolet Inkolaj kolet Šumprešaj košuju Vonja na kaduju Na gače pjete Nek budu drete Stegni fjubu o’kaiša Polako, ni priša Kularina je pala Boje gre farfala Ne znaš ča prin Povuci điletin Botune na polše Srića nima borše Leroj dobro navi Na kadenu stavi

• 115 •

Očisti cigalin Izluštraj bagulin Zapni gornji botuncin U žep mekni takujin Vlasi ujen zaliži Brke bokun ostriži Potla svega gre kolonja Namuščaj se neka vonja Formaj špančeru Na bandu liđeru Jo koji morbin Moj šjor pimperlin.

• 116 •

PECETONA Sve ča reka U fermu ga čeka Ni besida brez fudre Na svaku mu timbar udre Ol’ u glavu, oli samo strišo Nikad nećeš proć lišo Uvik čutiš buletu Na sve mekne pecetu Na svaku ricetu Nadožunta pecetu Pulitika, vrime, iće Nima čega se ne tiče Fusbal, ribe, bali Di ste stali i ča fali Sve joj kuri, sve joj ide Uvik jema dvi beside Ma raje će govno čučat Vengo kalmat, bokun mučat Koja je to čakulona A još žešča pecetona Nikad dosad ni kalmala I Bogu bi pecetala Gren ja lipo, mrvu spavat Pa moš sebi pecetavat.

• 117 •

SIROMAJ (MIŽERJA) Istučene postole Izlizane šjole Razbivene špigete Ruzinave verete Tašelane gaće S bande kraće Sve na maće Pune drače Iskidana maja Cila o’retaja Iz škovac je zaja U glib izvaja Škicana košuja Ničigova tuja Masna o’uja Bužon srid trbuja Brez fudre jaketa Ka’ komad saketa Nima botuni, koleta U žepe buže o’cigareta Slomivena kapa S pituron je poštrapa Kroza nju kapa Na juši klapa

• 118 •

Sve same štrace Ča drugi bace Šporke kanavace Iz kante o’škovace Ni teple kočete Ni kruva dvi fete Spava u kašete A vitar ga plete Ni sriće, ni švoga Ni sebe , ni svoga Da izdurat bi moga Jema samo Boga.

• 119 •

REDIKULI Uvik čini škiribicje Štucigaje, špjega vicje Ka’ zvizdan upeče Bižiš podan tende On ti berzo fjabu reče Oli udre dvi, tri glende Jopet ništo bižingaje Ma u fermu i atento Kada arju tramakaje I smije se sve kuntento Ne notaje, a sve panti Zna sve fešte, svakeg sveca Rič mu piza ka’ brilanti Daj mu ulij još dva deca Nima nidir njemu ista Svoj je čovik, svoje vire Sve ča reče jema mista Za sve svitu jema mire Ma za lavur ni ga briga Obe dvi bi u zrak diga Ka’ se triba proštit knjiga Sa libron bi skupa liga

• 120 •

Mrvu čiste robe s vonjon bure Bokun kruva i žmul vina Komorica sitna i u svežo škure Dikod koja šinjorina Njegove su kale i kantuni Poza njin je pušta skula A svi oni kampjuni, cukuni Tišču ga za redikula Ma on žive po svojoj užanci Dobro ste me svitu čuli U sitnemu čovik gušta, ne u obilanci Svi smo skupa ovod redikuli.

• 121 •

DI STOJI Projdeš kroza kaletu Izajdeš na pjacetu Omar si u kontradu Samo učini skalinadu Gazi na šaliž Pazi na korniž Iza ona dva dvora Je vela agora Jemaš i mulegin u matun I onda oni lipi portun Pa jena liša particela I meju kuće kanižela Iza ti stoji kolovaja Di su pribili vlaja Kolona višja, do nje manja Pa jena komodna stanja A ispo onega pergula Ti je otvorena vargula Pa ka izajdeš iz koridura Čeka te nježina balatura Lagje ti je proč, ka pane noć Vidiš da je do kuće joj doć.

• 122 •

ĐELOŽIJA I KOKOLECA Ka› po Rivi ti điraješ Svima žvelto reta daješ Samo mene ne fermaješ Zaraj čega mi petaješ Puna furje burdižaješ Sve ka› more oplimaješ Svima drito, a mene strišaješ Svaku voju mi slišaješ Đelož u me ti stivaješ Forcu tilu mi kalaješ Višje me ni ne stimaješ Su ničin ne rišpetaješ Makinju mi ti škrokaješ Kako šesno dišpetaješ Reci da me zafrkaješ Da se samo kokolaješ.

• 123 •

SRIĆA Dobrome se dobro vrati i pozlati Srce vaja širit, nikad stiskat Sriću neće šoldi plati Ven je duša triba iskat A ča misliš da je srića Ladne vode pola siča I batuda grdelina tića Obid ča ga ma’ sparića I u mraku mala svića I ka’ dite mater čića Ka’ se jubu srodna bića Pa ka’ dida glendu priča S naše smokve kapja mliča Pisma cvrčka i popića Tovar mali u poju kostrića Boga, Gospu rišpetat, veliča Na teracu pitar cvića Da se čovik zdrav osića Samo lipeg nek se sića U duboko more jena vala plića Perun ića i žmul pića Dobre voje puna vriča Di privrča, ča okriča Sve je ovo vela srića Je li vidiš koja maša Ako si cilu ti obaša Bokun zanaša, ma se snaša E onda si sriću naša.

• 124 •

SJETA Ka’ vidin vinograd, poje Spugan vonje koromača,cate Omar se čutin bokun boje Tilo se liči, a duša cvate Pijedu rebci iz male lokve Ladna je liša pradidova stina Seden na banak ispo’ smokve Pluća se punu, dricaje škina I litnje bave mrvu zapušu Odnesu šporkicu i umidecu Žmul vina ti kripi dušu Fregulu sira mekneš u drecu Zasladi se, vazmi praske fetu I vrati se daje u vrime mlaje Jo’ ča berzo godine letu Prin je parilo da duje traje Na veštitu lišala se pjeta U škatulu sićanja ostala Uvati me vela sjeta Za vrimena stara i pasala.

• 125 •

VRIĆA BOŽJA Bog zagrabi u svoju vriću Pa svakome dili sriću Nikon višje, nikom manje dade Ma svakega njegov dil dopade A srića je jude volit Trudon svojin kruva prosit Pa se smijat, suzu prolit I ka’ križe triba nosit Cilog sebe uvik davat Iz ruk puštit maleg tiča I tugovat i frajavat Sve je oto vela srića Na motiku činit žuje I jačat se sa živicon stinon Kruvon supat maslinovo uje Justa oprat ladnin vinon Mriže teške, parangale dizat Pa na lozje ispeč ribu Na sve prispit i dosizat Sve učinit za potribu S drugin dilit to ča jemaš I otvorit srce, dušu Turat naprid i ka’ fermaš U bonace i ka’ vitri pušu U Božju se vriću ne more poviri’ Svilon se ladit, ol’ bruškinon kefat Svaki trpi ča mu se namiri A u nebo potla mrvu će se refat.

• 126 •

MISA Nedija, prin obida Vikovima, razumi se Ne bilo van zapovida Vrime je o mise Dojdi, skrušen sidi Za se išči iskupjenje Ako očeš prin se ispovidi I moli se za zdravje, poštenje Za pokojne i za žive naše Za sve mlaje i starije Redon moli Očenaše Slava ocu i Zdravo Marije Dušon primi blagovijesti Pokaj se za svoje grije Pokoran se ti pričesti Neka svetost u čoviku zrije Pokloni se pod oltaron I sa ka si umiven spokojon Prikrsti se sveton vodon Pa produji Božjon vojon.

• 127 •

DRUGO VRIME Svit je sve prin po Svecima računa I ča se more uza kojeg rani Znalo se ča gre za tega štajuna I ka su o čega partili zemani Ka ča ubrat a ka sadit Sve se znalo baš ka triba Ča po poju moreš radit Ka se lovi koja riba Koliko će tijo trajat Ka u porat bacit cime Je li Bogu dane zajat Oli će okrenit vrime Busulu si u se jema U kosti si moga čutit Je li doma triba ferma Moreš li se di uputit Sve si iska u prirodu Nisi pisa ni zna štit Ma si sluša sunce,vodu I čuti si ča će bit Pari da su sve pegule Ubila nas je nauka Nima mire i regule I čovika sve incuka Ma sa višje konti nima I sve se je izlišalo Ka je lito a ka zima Sve se judi izmišalo.

• 128 •

BOKUN Jema si regulu, nisi bi frajun Fregulicu, mervu, bokunić, bokun Svako more tiščat obilance timun Ma se triba naučit na škarši bokun Jerbo sve ča gori, to se i udune Pa se ti nauči na lipe bokune Ako ništo kidaš na miljun miljuni Ni meni ni tebi o’peci bokuni Najmanje ćeš smetat, sedi u kantun Jerbo će ko zapet za glave bokun A moreš se i okrenit, nek nisi kampjun Ka’ lipu curu vidiš, pravi je bokun Ma svak jednon dojde Sv Petru na račun Oli od bote, oli bokun po bokun.

• 129 •

FALŠO Ka’ čovik ne tišči rič bokun Svi rečedu da je falšun Danas se najvišje kuva Frigani kumplir i falša juva Ka’ dištonaješ, pivaš škaršo Znamo da pivaš falšo Ka’ ni o zjoga karta lišina Ča će na karik jena falšina Ako si robu na pazar kupija Oto je falšet oli falšija Nogu san žginca, crni jon vrazi Oće reč da si u falšo ugazi Ka’ dite i dobiješ, ka stari izgubi To je dentjera oli falši zubi Ka’ je dobra kolura, pitura I o falše ženske je bela figura I notat moreš falši sinjal Od falšeti pusti ča je oriđinal.

• 130 •

FERAL U škuricu o’ferala Mladost jubovala Bava ladiškala Dica se igrala Leptirica ludovala Maška repca ogranfala Tarantela mala pala Kurdila se ingropala Šjora Cvita inkantala Ka’ je u govno stala Pa meštre Pjera incukala Dežbjego van je farfala Strila s neba zalampala I u kapje se skalala Povodajen sneverala Kako došla i fermala Svaka tajna vela, mala Berzo se je tot doznala Ča je jučer obidvala I ča tišči ispo kantunala A onda je picaferaj doša do ferala Udune se svitlost, kako se užgala I nočina crna drugem arivala A lipota sunca nas je obasjala.

• 131 •

PRAZNI PJATI Svak te ščipje, kida, grize U teču se arja muva Svit je žejan mrvu spize Puno i je gladno kruva Ma u koga jemat vire I ča radiš nima ti ko’ plati Po škovacan svit pribire Gladne joči penšjunati Sve propalo, sve fermalo Ča svitovat bidnoj dici Izduralo ča jemalo Ma sve sami škiribici Ruvinalo timun brodu Njima dobro, nan ga žbate Di nas judi ovo vodu Su čin supat prazne pjate Raj zemajski, a stoji zaništa Rič molitve čovik Bogu šaje Nevajalo vaja pripomišta A ča daje i jema li daje Mutno oko tišči kapju slanu U grlo su veli gropi stali Nima višje vode u funtanu Ma jesmo li ovo miritali.

• 132 •

ŠETIMANA Jopet pa jopet za sedan dana Poza šetimani, druga šetimana Ajdemo počet o› nedije Gre se na misu, potla opoćije Omar bi poza pervidan meka Jerbo veli posal čovika čeka Utorkon jopet isto slidi Sve se ponovi i u sridi U četvrtak već je svega dosta Pa onda petak vrime o›posta Svitu divota, srce mi bota Evo je došla i subota Guštaču danas, a i u nediju Skupit doma cilu famiju Pa skontat da nan ča ni uteklo Je li se sve di triba meklo Pasala je tako šetimana ova A sutra jopet sve isponova.

• 133 •

LAKU NOĆ JUBE Daj mi pape fetu kruva Namaži mi marmelade One ča je mater čuva Za vrimena ka’ zalade Stepliću ti u potiću mlika Vi dičica drugo i ne bacilate Za zaspat ti nima bojeg lika I po vrju posut praj o’čikolate A kako me lipo čuvaš Ugajaš mi, ništa me ne idi I večeru ti najboje kuvaš Da mater ne čuje, da se ne uvridi Lako ti je ćerce danas kuvat Falše spize najboje ti kuru Po kužini mrvu se uzmuvat Cili obid sparićat za uru Ako si gotova moja jube Mekni na se za leć robu Do konduta pojdi oprat zube Pa drito u svoju sobu Oćeš li i ti s menon doć Namistit kušin, povuć lancun Pojubit me lipo za laku noć Užgat malo svitlo u kantun Da oću li ćerce, lipoto moja Sve bi učini pape za te Noć je za spavat, ne triba se boja’ Anđeli mali pazit će na te.

• 134 •

ISTI ČAČA Kada priko maće Gre ista maća O svega je oto jače Paola je isti čača A čači je drago, Bogu fala I su tin se svudir diči Da smišnica moja mala Na svojega čaču sliči I po licu i životu I ča višje reste I po andi i po motu Sve o’čače vata šeste Jo ča guštan u Paolu moju Sve po svoju, a zna i sneverat Jema forcu, jema voju I možjane zna duperat Piva, bala, svira, nikad mira I beside svake mlije Crta, štije, čači dušu dira Svoju uvik tira, ma se jopet smije To me krabi, to me liči I u život voju vrača Ča Paola na me sliči Ča je svitu isti čača.

• 135 •

ZAŠTO JE PAPE SVOJ Zašto po noći nosiš o sunca očale Zažto imaš repicu, ča je ne ošišaš Zašto bičve nosiš na sandale Ma zašto tata ti sve izmišaš Ka projde lito, zašto se kupaš Zašto zimi piješ ladno pivo Masnoče jemaš, a kruv uvik supaš I zašto po svoju ti činiš sve živo Zašto se uvik muvaš po brodu Jemaš svoje mote, niku svoju andu Zašto se pereš u ladnu vodu Zašto si uvik na svoju bandu Taki san, kaki san i Bog mi je da Svako ti jema svoje škerce Ma jubavi moja nek ti ni ža Tribaš me volit kakvi san čerce.

• 136 •

POSTEJE SE TAKAT Za ludu ti ovod plakat Uvik jema skuža za posteju takat Je li te loša noć toka Na noge moreš sklopit oka Nima li posla u butigu Bokun ćeš zaknjat na katrigu A i ka’ si žvelto radi Noge digneš, boje te sladi Mladost najvišje voli kocat Po danu spavat, a u noć štrocat Poza dva bota Vaja ura pižolota Jerbo će obid boje deponit Ako se mrvu greš naslonit Bacije me fibra, najden kavadinu Ča intimela vonja, udreš ligadinu U arju sve četiri, koje liposti Rekuperat tilo, izdricat kosti Daj malo života i veseja Oli si i ti noć za dan vazeja

• 137 •

Gledan je li lancun ravan Samo činin fintu da spavan Doklen se na kauč večera čeka Da noge steplin, deku san meka Škatulu gledan, oči mi snene Mrvu ja nju, mrvu ona mene Kasno je svitu uvatilo već U kočetu mi vaja poć leć Posal me ubi, cili san trudan Ne mogu višje izdurat budan.

• 138 •

PISMA SEBE NAJDE

Rič se s riči mora jubit Besida se zagrlit besidon Pisma je i vitru trubit I karanje sa susidon Duša riči u se sprema Triba kaza kako vaja Čovik pismu u se jema I sa njon se raja Riči same para tražu I lipo ga sebi naju I onda se same slažu Nadodaju i stivaju A pisma će sma izač Iza svega vers izmilit Triba je samo u arju nać I okolo judima podilit I ka pisma vanka izajde Ona sama sebe piva Pisnik je samo pervi najde I okolo judima dariva.

• 139 •

NAS DVA SKUPA

(srce jedno, a dvi bande) Meni grubo, a njoj šesno Ona livo, ja bi’ desno Meni sla’ko, a njoj gorko Meni čisto, njoj je šporko Ona zeje, ja bi meso Meni drito, njoj je treso Ja bi švoga, ona mira Njoj je jubav, meni vira Njoj je sidit, meni trkat Ona tijo, ja ću ‘rkat Za nju bumbak, meni tela Meni mala, njoj je vela Ja sve grezo, ona fino Vodu pije, a ja vino Meni brava, ona kjuče Njoj je ladno, meni vruče Ča joj crno, meni bilo Ja sve živje, ona zrilo Uvik kontra, svaki svoje Meni dobro, njoj je boje

• 140 •

Ona kupe, ja u špade Daj mi force, a njoj nade Ona špadu, evo kupa To nas svitu tišći skupa Da ni tako, nima šuga Svako sebi najde druga Vino vodon do bevande Vaja spojit obe bande.

• 141 •

DOPALO TE ( SA TIŠČI) Arivala nika furešta I uvečer bila je fešta Uzavrila čoviku tešta U arja se dignula vešta I tako se bidan inpešta Jel’ tudeška oli češka Đentilasta oli teška Ma koliko dobra ješka Svak falije, bude greška Pa sa tišči ča si peška Čoviće nisi bi furba Moga si i boje nać Ka’ se ne plati kurba Duplo će te likar izač Ma nemoš se uvik plaši Dikod vazmeš, dikod se vrati Ka’ si se lipo maši Sa tišči ča si uvati.

• 142 •

DUŠA BREZ TILA Ka’ anđel se rajaš Draču triba proć Oli nisi, oli va’jaš U anđele jopet doć Vidin svitlo srid škura tunela Ča si moga to si kuša Zem’ja dala i vazela A pritekla nebu duša Sa briga života U dolinu smrti Neka, ni grijota Tilo dušu prti Ka’ se rišiš piza tila Duša išće drugi svit Jur pritekne zem’ja gnjila Iz nje reste novi cvit.

• 143 •

ĐARDIN Sa spliskoga širokoga poja Ubrat si moga ča te voja Mlična trava tavka, troskot i trščica Bušina i Božji drivac, pa kopriva žigavica Za tića kostrića, slavak, šušak i crikvina Pa jojice, rute, žilja i malešni veludina Vrisa, smrike, divje drače tutivike Pa murtile, ošebada i crljene šepurike Galopera, švilca i gruja o› kupine drača Brnistre žute, ružmarina, koromača Poponac mirisni navonja bi slipi A mujor se sam za bičve lipi Pa firula ča s levandon spava I ivica kadujica, likovita trava Svi đirani, garifuli, rusulice Margaritele, oleandri i jubice A bilo je i bungavil spore s tin Ma sve jedan lipi đardin.

• 144 •

SMOKVA Nije bilo vinograda, a ni poja Brez da bude smokva koja I svak bi ti ovod reka isto Grozje pervo, pa maslina, a smokva na treće misto Je li kraj pojate oli ukraj dvora Cablo smokve nać se mora Bolesnu smokvu napa je medič A njžine suze bile zovedu se mlič Figeret je cablo ka je smokva mlada Doklen ne nareste i učine lada Prin sušenja smokve ražentaj u salamuru Pa neka se suše na o slame sturu U ona vrimena teška, ča su prija bila Smokva je famije nike škapulala, odranila Stari svit je za užancu čuva Po obidu izist smokvu sa fregulon kruva Da se nako bokunić zasladi A i štumik onda boje radi Ka si trudan, da se forca vrati prije Su dvi suve smokve popi bičerin rakije

• 145 •

Ka med su slake bilice Pa sve one puste modruje, zimice Za sušit su najboje sušice Ko ne voli duge pojarice Crljenice male s gornje particele A Sv bi Petar doni, petrovače vele Bog je meka o starine Da izduraš boje, duje Grozje, smokve i masline Vino, kripost, uje.

• 146 •

FETIVI (PREZIME SPLI’SKO) Svaki ča se ovod rodi Spličaninon sebe vodi Zaludu ti ča si ovod nika Spličanin se konta o’petnajstog vika A u stare libre vaja iska Prezimena prava spliska Vrime nas je sve izilo i odnilo Splisku krv je razvodnilo Joščec malo spličani je živi Po ocu i materi fetivi Ne mogu se ni ja višje otin diči I moja su dica baštardani tiči A o moje dice, dica, kako daje ide Od svojega dide neće znat beside Sve je manje spličani, oni o’kolina A sve višje oni iza brda, sa planina I ča gremo svitu daje Spličani se navrću u vlaje Ništa višje ni ka’ prije Splisko joj prezime, a po vlaški mlije

• 147 •

Ovo malo ča nas je ostalo, judi Svi okolo tiščidu nas ludi I neće proć puno, bidni spliski svitu Spličanina nednog neće bit u Splitu Polagašno odnit će nas vrime U libre će samo ostat, splisko prezime.

• 148 •

MULAC Sve je stivano po livelu Ovamo fali, tamo pritiče Uvik na jubav pravu, velu Najde se jedna brez nade, sriće Vridna cura, težaške kuće Iz bonace upade u nevere Dala je monku, poštenja k’juče A on je pobiga u marinere Ostala sama, a dite mu nosi Dočekala nije vese’je, dotu U čače nima ko je isprosi’ Familji ciloj došla na sramotu Pape se štica zaraj svita Šporku vodu vaja prolit Mater se bidnu i ne pita Moreš se samo Sv. Anti molit Smiluje se teta, stara udovica Ali ko će prigovorit bratu Da su dite, učinila dica Gubiš bitku u svakemu ratu Svi na svitu prid Bogon smo grišni Zato čovik uvik Boga slavi Rodija se muškić smišni Ricast, bjondo, anđel pravi

• 149 •

Sveta rič i blagost o’svega je jača Ča je razbiveno, molitve spoju Za sve je dozna marinerov čača Sa’ ženon je doša po nevistu svoju Pape za života nije oprostija Po starinsku, ni se moga miri’ Ča će mi u kuću tuja mularija A uvik bi s kara malega poviri Mene ne spominji, ajde vidi dite Meju prste u falšo bi ništo mrvi I vazmi mu čakod, od ovo munite Neka je mulac, naše je krvi I umra je tako, svon rišpetu sluga Sa’ ka’ je pasalo, koga li se boja Prin vengo je iša u vrimena druga Svojemu je mulcu ostavi sva poja.

• 150 •

STARI SPLI’SKI BALI Spličani su uvik mota jemali I ka’ su lavurali i ka’ su o’ bali I svaki je plesa kako vaja Uči se nisi, su otin se raja Ma koje danas ču za žigeru Oli lipu staru prižuneru I sotič i albu u kompletu Da ne spominjen pajacetu A ovod se joščec o’ starina Balala dušon morfina Zibjale su šotane, brnice, kurtini Pa falde, kamufi, pjete, volantini Zna si koja bi te divojka dopala O’ svega je samo kvadrilja ostala Pušti oti plesovi stari u povist pasali A sa su arivali, niki drugi bali Uvik te niko ne da mira,dira i tira Danas se bala brez da se svira I čoviku jopet kruva fali Kome je višje stalo do bali.

• 151 •

TEKNIKA Najprin o svega je bi tovar Pa je doša konj i kar Ako si se za morbine smuca Triba ti karoceta i karuca Ferata rera, oli feratin Ča vuče vagune oli vaguncin Je li jemaš pulce i lumbule vele Moreš turat karijole i japanele Ko se nije svojin nogan šeta Vrtila se bičikleta I još boje motorbičikleta Oli teljanska vespa lambreta Već su svudir svitu bili Puste vrste tonobili Na letriku trolebusi Na dva kata autobusi Piz je nosi kamion perfin Oli koji kamioncin Svega je bilo sa svij strana Lipote puste ma i karanpana E da ništa višje ne fali I reoplani su arivali • 152 •

A ka si se okreni pu mora Na ijade vaporeti i vapora Leuti, gajete, guci, motorini Bracere, trabakuli, kaići, batelini Čovik samo izabere s kin će, di će A teknika pusta guzicu mu miče.

• 153 •

VLAJ U RAJ Kako li se zove to mlado čejade Meni čako Pil’p ime dade A oklen si ti Pilipe doskita Tuder san striko, iz Splita Nisi ti iz Splita, vengo bi to tija Jesan bona izdakle bi bija Znan oklen si, to mogu naslutit Nu ga, nu ga, nemereš me mutit Svi bi sinko tili bit iz Splita Jušto svaki kojega san pita A spličanin pravi ka’ se s Rive uputi Nanoge do kuće jema njanci dvajst minuti Pozna san te sinko po šestu i glasu Nega iđen ja ujtit zanju tarabasu Cili dan san ziđa, ubija me posa’ Okani se striko mene, java te ne nosa.

• 154 •

UMITNIK More je umitnik, vični artišta Uvik vrti žalo ne stoji zaništa Stinje pripomišta, tura, razgrče Salbun umisi pa ga privrče Špicasti bovan učine u zavijutak O’stinčic oštri ispade oblutak Na podan brakov forma sve sike Dila i kroz vike, učine u slike A s vitron ka’ uvati pravu viradu Sve vanjske škrape mekne u petradu Uvik ništo vali miču u mašur More je i škarpelin i kavadur Martelina i tajenta, teški puntarol Ča ne svrši fortuna, učiniće sol Fratun, lito, mlat i maca O’bote i s valon baca Ka’ more uskuva, u pinu zakipi O’najgrubji škrapi ispadedu kipi I još ka’ sve misec zlatnin zvizdan prospe A lipote, a čistote ka’ i oči Gospe.

• 155 •

ZA’NJI TEŽAK Jutro zalila rosuja Na tovara, ol’ vrj kara Tvrda ruka puna žuja Dil povisti pozatvara Barba Zorzi kolafjaka Ne čeka ga particela Jušto se je zeru maka Iščedu ga poja vela Ni zatvori o’ konobe kvaku Ni povuka ni krakun Vazelo je svu dušu težaku Staro tilo u bili lancun Ladno čelo, pala fibra Vitar zagropa koltrinu Slipile se bande libra Meknut stoji u Božju veltrinu Zaperak je udušija lozu A po poju zaresla je trava Sagnjijali kari odavna ne vozu Zorzi gori meju svoje spava.

• 156 •

DALMACIJA Dalmacija jema smokve i masline More plavo, sunce sjajno do miline.

Male ribe i veliki vali I jedan tovar u kali.

Lavanda i ružmarin mirišu jako Možeš moj zavičaj pronaći lako.

Galeb leti priko mora, dok u Splitu sviće zora.

Paola Roza Dumanić 10 god , Split 2014.

• 157 •

RIČ AUTORA Gradu svojemu i spli’skemu puku darujen ovu kolajnu pisam, dicu moju o’besid. Da pritekne, da se ne zaudobi, da mlajima našin u naslidstvo ostane.

Mekli smo jušto koliko je na ovo listi moglo doteć’, a ono ča je priteklo, a obilato je priteklo, more bit da dopade u niki drugi libret.

Ričnik nisan nadožuntava, ni bilo mista, ma oni ča oće razumit, sve će razumit, a za one druge jema pušti ričnika, najskoli ga na internet moredu nać’ i zove se Bartul (o’šjor Šegvića).

Volija bi da morete proštit i libar fjabi, glendi, sulaci, cilu onu skulu splićanistike i štoriju o fami’ji Dumanić, ma jema vrimena, tribalo bi i to doć na vidilo.

Ovo je moj pervi libar, a nadan se da nije i zadnji. Jerbo je samo pismic priteklo da bi još dva puta ovoko. Jema i priko 120 humoreski-dijaloga ča su se štile na Radio Split u emisiju Kad se smijah tad i bijah.

Pa onda je tot i okolo 150 glendi, fjabi, sulaci onako Uvodićevski oli Vlahovićevski za nasmijat se, ali i za suzu puštit. Stiva san i jedan posebni spli’ski ričnik batudi, frazi i poslovic ča su govorili naši stari ma na jedan svoj način di je sve meknuto onod di su to pradidi mekli. Skupi san i ništo poljički besid u poljički ričnik.

Nota san i par ijad aforizmi nako sebi za gušt, jerbo u malo besid moreš puno tega reč. Jošćec uvik stivajen kronologiju Splita u 20 st. ka’ niki povisni libar ma tot jema puno posla, to je libar brez kraja, a brez kraja je i libar o mojoj fami’ji Dumanić, njega notajen već 10 godin i to je libar koji se ne piše o’bote vengo bi se otilo sve žuntat u par libri.

Reka bi moj pok. dida da jema matrijala samo sve to vaja uziđat. I eto počeli smo ziđat, pervi libar je ovod, gremo naprid, ne smi se dat da ova naša lipa spli’ska besida u povist ostane, da se zaudobi, da je gagrice izidu, kiša opere i bura raspuše.

Split je bez svoje čakavice ka’ mater brez diteta, ka’ crikva brez svita, nesmimo ji dilit, vengo dušon razdilit.

Guštajte u pisman, neka Vas nikad ne štufadu, a ako bude Božja vo’ja i najde se pinez, vidimo se i ćutimo na kartu nikega novega libra.

Stojte mi zdravi i veseli mi bili.

• 158 •

ČA SU NOTALE FOJE Dio članka novinarke Lenke Gospodnetić u Slobodnoj Dalmaciji (11.05.2013.) nakon prve pjesničke večeri .

Glendave štorije i pismice – glasio je službeni naziv autorske večeri Nađana Dumanića prof. pri Tehničkoj školi u Splitu, održane u prepunoj dvorani iste te škole. Iznenađujuća lakoća pisanja poezije na fetivom splitskom izričaju oduševila je sve prisutne, ali i iznenadila što još uvijek nije ukoričeno ni u kakvu zbirku jer se čeka financijera, sa smiješkom je pojasnio govornik profesor hidraulike i pneumatike i Splićanin o’kolina.

Prigodom izlaganja njegovih literarnih, ali i karikaturnih uradaka koje je godinama objavljivao u prilogu Pomet u Slobodnoj Dalmaciji, te prigodom prezentacije starih obiteljskih fotografija koje su poslužile kao vremenplov za povratak u doba Bajamontuše i onoga kad se Pjaca u Spljetu zvala Gospodski trg pomogli su mu kćerkica, nećakinja i sin, dok je glazbeni dio pripao glazbenicima Mariji Anić i Živanu Matovu.

A bilo je raznih tema: od korteđavanja, priko splitskih štorija i antagonizama Lučca i Varoša do nezaobilaznog Hajduka. Nevjerojatan elan i literarni dar natopljen nostalgijom za prohujalim vremenima i spli’skim običajima, mnogima je izmamio uz osmijeh i pokoju suzu, a večer koju je za prijatelje priredio svestrani profešur zaključena je uz bićerin i kolače koje su ispekle žena mu i mater, te unisonu želju da se obavezno mora ponoviti i to povodom promocije njegova libra koji željno išćekujemo….

• 159 •

BIOGRAFIJA Rođen 29.06.1962. u Splitu u rodilištu kod Staroga placa.

Diplomirao na Fesb-u Split i stekao zvanje diplomiranog inženjera strojarstva, a potom i profesora strojarske skupine predmeta.

Radi u Tehničkoj školi za strojarstvo i mehatroniku, Split.

Piše na splitskoj čakavici eseje, pjesme, glende, fjabe, sulace, šale, dijaloge, aforizme…..

Napisao više od 320 pjesama, 250 gornje spomenutih proznih oblika, nekoliko tisuća aforizama, prikupio rječnik Poljičke republike, posložio povijest obitelji Dumanić prema podacima iz arhiva, splitske beside, fraze i užance posložio u djelu Mala skula splićanistike, a sada radi na opsežnoj kronologiji grada Splita kroz 20. stoljeće.

Još kao srednjoškolac bilježio izraze, frazeme i riječi svojih starih na spliskom govoru, a po didi naslijedio sposobnost igre rimama (napivavanje).

Kao student objavljivao karikature, aforizme šale i anegdote u prilogu Pomet- Slobodna Dalmacija, a neki od njegovih tekstova su i uglazbljeni.

Imao nekoliko samostalnih priredbi, čitao na pjesničkim večerima Dana Radunice i sličnim događanjima, a redoviti je suradnik na radio Split-u, u emisiji Kad se smijah tad i bijah. Gostovao u TV emisiji Čakalica (Tv Mreža), sudionik manifestacije Mjesec hrvatske knjige 2014. u okviru GKMM, a niz zapisa je objavljen u lokalnim tiskovinam U knjizi Magare gre u raj, Mladena Vukovića, svojevrsnoj antologiji hrvatskih pjesama o magarcima objavljena mu je pjesma Tovar.

Sretno oženjen diplomiranom pravnicom Iris, a otac je troje djece: Duje(1992.)- student kineziologije, Vicenco (1996.)- srednjoškolac, Paola (2004.)- pučkoškolka, djed male Rite (2014.)

Hobi mu je fotografija i sve ono što je vezano za Split i more (objavljivao i priče u istoimenom listu), a posjeduje veliku privatnu biblioteku knjiga o svom gradu, starim običajima i splitskom jeziku, svemu vezanom za svoj grad.

Spličanin od kolina, ča ovod reču fetivi, baštarda Lušca po čači (Dumanić, Ozretrić) i Velega Varoša po materi (Kragić, Reić) • 160 •

FALA IN Zahvaljujem štovanoj gospodi iz Banovine na pomoći pri tiskanju ove knjige, te djelatnicima DES-a na realizaciji iste.

Hvala i novinarima Lenki Gospodnetić (Slobodna Dalmacija), Jeleni Perko (TV Mreža), te Mladenu Vukoviću (HRT radio Split) koji su medijski popratili i podržali ovaj projekt, te osoblju GKMM -knjižnica Bol-Plokite na časti ukazanoj u priređivanju pjesničke večeri u sklopu otvaranja manifestacije Mjesec hrvatske knjige 2014. kao i Udruzi za očuvanje kulturne baštine splitske čakavštine – Marko Uvodić.

Veliko hvala prof. Matijević i školskoj knjižničarki Domagoji koje su inicirale prvu pjesničku večer u dvorani Tehničke škole za strojarstvo i mehatroniku, a prof Matijević je i napisala tako topao predgovor za ovaj libar. Hvala ravnatelju gosp. Marinu Tvrdiću na ustupljenom prostoru i podršci, te također svim profesorima i učenicima škole sadašnjim i prošlim.

Posebno hvala obitelji na razumijevanju i onoj tipičnoj splitskoj podršci (znaju oni kako), redom: majci Bosiljki, supruzi Iris, djeci Paoli, Vicku i Duji sa curama, bratu Vedranu i njegovima, pa teti Gordani, barba Nikši Krstuloviću i svim ljudima dobre volje koji su vjerovali u mene.

Ne mogu ne spomenuti one koji su mi usadili svu lipotu spli’ske beside, moje babe i dide: Viska Dumanića-Gigotu, Klaru Ozretić Lisa-Joskan, Gega Kragića – Marinić i moju Vinku Reić- Kranjac.

Svima o’srca hvala.

Pape znan da odozgar sve vidiš i da si kuntenat

• 161 •

sadržaj PREDGOVOR......................................................................................................5 RIŠPET NAĐANOVU DIŠPETU........................................................................9 SPLIT.................................................................................................................. 11 SPLI’SKA ČAKAVICA......................................................................................13 RIŠPET SPLITU................................................................................................. 14 BOG I SPLIT......................................................................................................15 RADUNICA........................................................................................................16 CENTAR SVITA.................................................................................................17 LIPOTICE SPLI’SKE.........................................................................................18 RIVA...................................................................................................................20 SPLI’SKI MISECI..............................................................................................21 SPLISKI KOLURI..............................................................................................23 FJERA SV DUJE................................................................................................24 ČUVAJ BOŽE..................................................................................................... 26 PRIŠVARAK......................................................................................................27 MA JE UVIK SPLIT........................................................................................29 KRNJEVAL (VRIME O’MAŠKAR).................................................................. 30 TOMBULA.........................................................................................................32 TEJATAR............................................................................................................ 34 SEDAN MOSTOV............................................................................................35 OSAN POTOKOV.............................................................................................37 BAJAMONTUŠA...............................................................................................38 PEŠKARIJA........................................................................................................40 DIDINA KONOBA.............................................................................................42 VERDURA.........................................................................................................44 FRUT..................................................................................................................46 NJOKI.................................................................................................................48 U GVANTJERU OLI BIĆERIN......................................................................50 STARINSKA KUŽINA......................................................................................52 BEŠTJE...............................................................................................................53 BEŠTJICE...........................................................................................................55 MAŠKA..............................................................................................................57 TABAKIN (TEŽAŠKI PASIĆ)......................................................................... 58 PIVAC................................................................................................................. 59 SIPA....................................................................................................................60 CIPAL O’ PORTA...............................................................................................61 CVRČAK............................................................................................................63

• 162 •

TIĆI.....................................................................................................................64 BULIN, BALOTA...............................................................................................67 FRANJE.............................................................................................................. 69 KARET (na balinjere)......................................................................................... 70 PARTIJA KARAT...............................................................................................71 U SIČANJE NA SPLISKI BALUN....................................................................72 PICIGIN..............................................................................................................75 MALE BRANKE...............................................................................................77 NAJLIPJA BAŠTARDA.....................................................................................79 MOBI’JA............................................................................................................80 BARJAK I BANDIRA........................................................................................ 82 IMENJAČE DIDIN...........................................................................................83 LAVANDERA.....................................................................................................85 MARANGUN (mome dobremu papi)................................................................87 BARBIR..............................................................................................................88 ŠALTURICA.......................................................................................................90 KAFA, FOJE I ŠPANJULETI............................................................................92 MERJANSKA KADENA..................................................................................93 DVANAJST APOSTOLA (VRTLI DUILOVA)............................................. 95 DUJMOVAČA....................................................................................................96 MATEJUŠKA.....................................................................................................98 DUJE I VISKO.................................................................................................99 ČIBA................................................................................................................. 101 STARA VELTRINA......................................................................................... 102 GRATAKAŽA................................................................................................... 104 ČISTA BURA.................................................................................................... 105 GNJILO JUGO.................................................................................................106 NEVERIN (ŠKAPULADA)............................................................................107 PASA VRIME( i sve šnjime)............................................................................108 RIŠPET MORU................................................................................................ 109 TIRAMOLA...................................................................................................... 110 ŠENTADA........................................................................................................ 111 ŠEMPREŠOLA ( STARA CURA)................................................................... 112 BRODI O’DRIVA............................................................................................ 113 BONKULOVIĆ (KA’ ZA PIR)......................................................................... 114 PIMPERLIN..................................................................................................... 115 PECETONA...................................................................................................... 117 SIROMAJ (MIŽERJA)..................................................................................... 118 REDIKULI........................................................................................................ 120 DI STOJI.......................................................................................................... 122 ĐELOŽIJA I KOKOLECA............................................................................. 123

• 163 •

SRIĆA...............................................................................................................124 SJETA...............................................................................................................125 VRIĆA BOŽJA.................................................................................................126 MISA................................................................................................................. 127 DRUGO VRIME..............................................................................................128 BOKUN............................................................................................................129 FALŠO.............................................................................................................. 130 FERAL..............................................................................................................131 PRAZNI PJATI................................................................................................132 ŠETIMANA......................................................................................................133 LAKU NOĆ JUBE.........................................................................................134 ISTI ČAČA......................................................................................................135 ZAŠTO JE PAPE SVOJ....................................................................................136 POSTEJE SE TAKAT..................................................................................... 137 PISMA SEBE NAJDE...................................................................................... 139 NAS DVA SKUPA..........................................................................................140 DOPALO TE ( SA TIŠČI)................................................................................ 142 DUŠA BREZ TILA.........................................................................................143 ĐARDIN...........................................................................................................144 SMOKVA..........................................................................................................145 FETIVI (PREZIME SPLI’SKO).....................................................................147 MULAC............................................................................................................149 STARI SPLI’SKI BALI.................................................................................... 151 TEKNIKA.........................................................................................................152 VLAJ U RAJ...................................................................................................154 UMITNIK.........................................................................................................155 ZA’NJI TEŽAK...............................................................................................156 DALMACIJA.................................................................................................... 157 RIČ AUTORA...................................................................................................158 ČA SU NOTALE FOJE.................................................................................... 159 BIOGRAFIJA...................................................................................................160 FALA IN........................................................................................................... 161

• 164 •