Wo isch der Bärner Bäre-Samichlous im Summer?

Gschicht u Illustratione vor Elsbeth Boss

Momou, der Samichlous gits! Du bruuchsch gar nid a Samichlous z gloube. Es git ne, ganz sicher! Grosses Samichlouseehrewort! – Was? Wo dä de im Summer syg? Gueti Frag! Dä wärchet ja nume im Dezämber. Vom Jäner bis im Novämber het er uf der Wienachtsinsu der Plousch: sünnele, bade, am Strand lige u tröime. Aber das isch «top secret», auso es gheims Gheimnis. Wo das der aut Bär im Däuhöuzli vernoh het, het er sich bir Stadt Bärn aus Samichlous gmäudet. U itz hocket o dä di meischti Zyt uf der Wienachtsinsu: sünnele, bade, Honig schläcke, fulänze u tröime … Wo d Wienachtsinsu isch? I verrate dir das gärn, aber gäu, muesch es de für dii bhaute. Süsch wei de aui der Bärner Bär ga bsueche. Das Eiland isch zum grosse Teil mit tropischem Rägewaud überwachse, ligt im Indische Ozean u ghört zu Oustralie. Es herrlechs Paradies: fyne Sand, Paume, türkisblaus Wasser, Wauhaie, Krabbe u Seevögu, wo der liebläng Tag umekreische. D Houptstadt vo «Christmas Island» – Wienachte heisst uf Änglisch «Christmas» –, isch «Flying Fish Core», auso d Stadt vo de Fische mit flüguähnleche Flosse. D Wienachtsinsu isch 135 Quadratkilometer gross, d Schwiz isch guet 305 mau grösser. D Insu het ungfähr 2200 Bewohnerinne u Bewohner, d Schwiz öppe 8,6 Millione. Der höchscht Hoger, der «Muray Hill», isch 361 Meter höch. Guet drüüehaubmau BärnerMünschterturm-Höchi. Kennsch du der höchscht Bärg vor Schwiz? Genau, d Dufourspitze mit 4634 Meter. U der höchscht Bärg vor Wäut isch, mit 8848 Meter, der Mount Everest im Himalaya. Der «Muray Hill» isch auso nume es Högerli. Warum die Insu usgrächnet «Wienachtsinsu» heisst? Das isch en auti Gschicht, no euter aus die vom Bärner Bäre-Chlous. Vor ur-ur-urauter Zyt het me ddäicht d Wäut syg e Schybe, u änet em Meer syg fertig. Muetegi Manne hei de mit Säguschiff das riesige u schuderhaft gfährleche Wasser befahre. D Schiff sy de nid i nes Loch ache gheit. Am Ändi vom Meer hets nämlech ume Land gha. U dermit isch bewise gsi, dass d Wäut e Chugle isch. Di griechische Gelehrte, – der Pythagoras, der Platon u der Aristoteles – hei das bereits 500 Jahr vor Chrischtus usegfunge. Bewise hei de das der Christoph Kolumbus u d Wäutumsägler Ferdinand Magellan u Francis Drake. Der William Mynors het de 1643 mit der «Royal Mary», emne Schiff vor britische Oschtindie-Kompagnie, e nöji Insu entdeckt. U wiu das grad am 25. Dezämber gsi isch, het er die «Wienachtsinsu» touft.

Ne-nei, i ha dir ke Bär ufbbunge. D Wienachtsinsu gits würklech. Würklecher aus der Bärner Bäre-Samichlous. Wo dä gnue het gha vo schwümme u ir Sunne plegere, het er em Schmutzli telefoniert u gfragt, ob är scho flyssig ddichtet heig. Wi wyt är mit de Värsli syg. Me sött doch für d Ching nöji Wienachtsgedichtli ha. Das syg längwylig, we si geng nume di aute, usglyyrete Sprüchli müess ufsäge. U der Schmutzli, wo daheim Ruete bbunge u em Chrischtchingli bim Läbchüeche bache ghoufe het, het de vo syne Dichtkünscht plagiert. Doch, doch, är heig scho paar Värsli. Ganz sicher! Ob är öppe grad eis söu vorläse? Klar, aber «quickly please!», het der Bäre-Chlous gseit u derzue Honig vo de Taupe gschläcket, dass ne der Schmutzli dür ds Telefon het ghöre schmatze. Henu, was söus! … het der Värslipoet aagfange …

Henu, was söus! Chumm iche Chlous. Stampf der Schnee vo de Schue. Värsli ghört hesch auä gnue. Der Päcklisack la nume staa. U de chasch grad ume gaa.

«Aber, aber Schmutzli, schämdi!»…, het der Bärner Bäre-Samichlous i ds Telefon gschumpfe. U de isch d Verbindig abbroche.

Elsbeth Boss ist eine Berner Geschichten, Kinder und Kochbuchautorin. Die Illustrationen stammen aus dem Buch «Bärner Bäre» erhältlich in der Weber Verlag AG. www.weberverlag.ch Noch mehr «Wienachtsvärsli» hat es im eben erschienenen Buch «U plötzlech wienachtets» von Elsbeth Boss.