Epuchi chillka

13 Oktufüre ka 11 Nofiempüre konchi küyen mew

Temuko - Wallmapu

Ana millaeo: re zewmamuzikagenoal, küñe zugu wulgeal

ti pelotatun: kom zugu ñi aywiñ

Wechuy ti ficwallmapu2017

kizungünewün ifegeaiñ

Akukilpe ti Lawtaru ñi üyümtukupozwe

Gen wirin: Elizabeth Nuñez Sanhueza Rulpanzugu: Bastian Chandia Millanao

Fillke igkaitxofill mogen txawüluwüy ñi pegelelafieñ ñi chumgelu ñi zuamnenofiel ti Lawtaru üyümtukupozwe.

K om ti poz Los Angeles tukunegerpualu, Boyeko tuwalu, epu txi-

pantu femekegealu petu zewmagele ti üyümtukupozwe Leftxaru kara mew.

17 konchi diziemfüre, epu waragka mari kayu txipantu mew zewmagey küñe ayekan, rakümtugen mew ti Boyeko vertezeru, alhün txipantu rupalu wula ñi fill rüfke zugu feypi-feypimeketew ti fillke lof ka ti pu igkaitrxofillmogenfe txawün, temuko waria ñi municipalidad mew. Welu “küñe waria amulkünugey ti reqle tonela poz fey ka küpalgetuay, femngechi kümlegetuay ti weza zugu petu zewmagele ti leftxaru üyümtukupozwe” pinegey.

RADA: Red de derechos mediambientales, mapuche lof, kom ti Temuko müleyechi che ka Leftxaru müleyechi che, küñe fütxa marcha azkünuygün, küla konchi Oktufüre txipay ñi marchayal egün, kechu pataka che txawüy.

Feytachi üyümtukupozwe müna wera wezañmalkaitxofillmogenafuy, kutxanelkacheafuy, ünhfitupülliafuy ka kom che ñi mapu ünhfituafuy.

Kom che kimlegeuyey ñi ünhfigen tüfachi üyümtukupozwe, ti planta kayu mari kilometxo amuafuy ñi ünhfitumapun. Blaise Plantel, konkülelu RADA mew feypi:

“tüfachi üyümtukupozwe kutxanelkaponhonafuy, kutxanelkapiwkeyafuy, kanzelkachefuy kütu. Ragiñkonafuy ti kakerumechi yaqel, ti püchike partikula liq txufken reke naqay kachu mew, piwchil mew, ko mew, lhewfü mew, ruka kulliñ mew ka ti awkake kulliñ mew.

Wunelu mew kutxanay püchike che, pepi kümelngewetulayay, kayu mari kilometxo amuay ti ünhfi, wallpayay, welu konünpanefiliyiñ ti fütxake kürüf, 90 km amukelu ora mew, feychi 60 km zoy amulerpuay”. Femgechi ti tugeay Kalfarinu, Fiktoria,Korfea, Pitxufken ka Temuko.

Epu mari txipantu yenegnegy ñi rakizuamtukunegen ñi chumgechi kümelgeam tüfachi poz tañi zugu, Chile mew zewmageuyey ti reziklaje zugu ka kompoztajegeuyey, 80 % mew naqtuam ti poz. La Pintana küñe ejemplogey. Welu ti Temuko municipalidad amuy Europa ñi inayentuafiel ti müleyechi pu üyümtukupozwe feychi mapu mew, welu feytachi fütxake planta zuamgewelay fey püle ñi ünhfitukachemekeken mew ka ünhfitukaitxofillmogenleken mew. Fantepu küla mari kayu che kanzerüy ti üyümtukupozwe ñi zuam España Mapu mew

Müna kümey ñi rakümtukugen mew ti Boyeko fertezeru pigefuy yem, müna weza femekekefin mew küñe fütxa txogen mapuche lof.

Ti zoziologo ka aktibizta feypi: “15% ka 18% mapu niey mapuche lof. 80% konküley well pülleley ti fertezeru lof mapuche mew; feytachi zugu Meziambiental illamkan pi ONU. Cheli mew felelay ti pu municipio ñi politika welu weziambiental illamkan mew azkonküley ñi femeken egün”.

Ti üyümtukupozwe txepewelkachekelay ti poz mew.

Itxokom üyümtukuafuy, uzamkachemkünlayafuy, reziklan ka wüño zuamgeyetun.

Niewetulayafuy politika ekolojika tati país, ejemplo ka fanguarziangewetulayafuy Latinoamerika mew.

Geno poz günen.

Küzefilu ti üyümtukupozwe ti rekion mew, tati RADA yom zewmagey küñe günen, femgechi gewetualayafuy poz. Femgechi elkünugeafuy ti Fertezeru ka ti üyümtukupozwe.

Feytachi alernativa gütxumafi ti pu autoridad ñi kulliam 2 millon kulliam tüfachi günen mew. Tukugeam küñe ünhfigenochi günen ka txepelkachechi günen.

Geno poz günen Küzefilu ti üyümtukupozwe ti región mew, tati RADA yom zewmagey küñe günen, femgechi gewetualayafuy poz. Femgechi elkünugeafuy ti Fertezeru ka ti üyümtukupozwe. Feytachi alernativa gütxumafi ti pu autoridad ñi kulliam 2 millon kulliam tüfachi günen mew. Tukugeam küñe ünhfigenochi günen ka txepelkachechi günen.

Kechu etapa niey tüfachi günen: 1)Txepelakachealu ñi chumgechi ünhfigen tüfachi sewmantukunegen itxofill poz. Kimelünmuy ti pu che tañi kimam ñi chumgechi kellukonam ti günen mew egün , küla txoy mew: Kompostafal, rekliklafal ka üzen fracción. Elkünugeafuy anthü ñi nentugeam ti frazion.

2)Kakerumekünugeal ti ñimitupozün kakareumechi wilhgin mew. Ti fillke kamión tukulelgealu küñe klaze poz müten fey ñimitugeay zullin anthü mew.

3) Munizipal kompozta: Küñe fütxa koumuna planta kompostaje zewmagealu. Feymew ti kompostafalchi( zoy 50% chi poz mülelu waria mew) poz kümelkamapukechi chemkünkünugetualu.

4)Reziklaje planta: Küñe reziklaje planta zewmagealu feymew tukukünugealu ti müleyechi reziklafe chügkoluwün. Fey mew uzamkageay ti reziklafalchi chemkün fey zoy püchichi katekoria mew azkünugeay fey yegeay ka welukageay. Feytamu 80% reziklageafuy.

5) pelotufe planta, wuzamün, tratamientu ka rellenu sanitario interino.Feytamnu nentugeay ti ünhfigechi poz, kunüwün-gelu ka goymagechi kenhükonchi reziklafal poz.

Kimelgeay ti pu che, ka gülamtugeay ti pu che ñi gillanoal ti ünhfigechi ka reziklafalgenochi chemkün. Femgechi zuamgewelayay femgechi yewün fey gewelayay poz.

Ti Planta WTE Araucanía müley ñi txafzugual ñi lelinetew ti Sistema de Evaluación de Impacto Ambiental-SEIA. Evaluanegekay puwle wula ka paquete mew femkünugeay. Ti pu Chügkoluwün gütxumnefi che ñi txepewam ka kimelnegeam ti kom ti mülelu fachi Arawkania rekion mew ka txepewküleam anho ka txipale küñe fütxa movilizazion.

MAPUZUGUN: tañi newenmawkülemum ka ñi üllgozmawkülemum

Gen wirin: Alberto Huenchumilla Marilao. Wallmapu, Temuko Waria.

N E W E N M A W K Ü L E M U M

Kiñe : Petu müleyekay kim-mapuzugulu Fey fel ñi felefel tañi fentepun püchikelewen ti kim mapuzuguyelu, welu müleyekay ti petu kimniekalu mapuzugun, feyegün ta püchi alülekayegün, waragkakegeyegün feyti 2007 txipantu mew entugey kiñe chillka chew ñi kimgeam chuntelefel ti kimlu taiñ zugun, feychi mew zoy kechu mari waragkalewi pigey, fey mew ta ti witxañpüramtun mapuzugun mew pepilgekayafel kechilekafuy tañi mülenmu fenten che chew tañi pepi küzawmageafel, petu lanuchi zugun mew, tañi pepi ramtuwün gütxam ñi entugeal, kimgeafuy kuifike zugun.

Epu: : Pu wechekeche petu witxañpüramtulu mapuzugun Ti pu che zoy ayiwuñmanielu tañi witxañpüramtual mapuzugun feyta wechekechegeygün, chillkatuleigün chillkatuwe ruka mew, niegün ka weke kimün tañi zoy küme newenmatuael ta mapuzugun, feyta ka zoy azümüwküleigün tañi azaztuamegün fillke pepiluwün tañi witxañpüramtuael mapuzugunegün, ka rumeke kimwirigün fey mew-

ta chewpüle rume pepi tukupuaigün ta mapuzugun chew ñi mülekemum fantepu re wigka zugun müten. Ka fey ñi zoy wechekechegenegün mew ka zoy günezuamanienmew tañi zugun feyta zoy müley ñi pepi amulgetaul ka kimelgeal ta mapuzugun, kizu tañi pu chafkewenüywenegün mew ka ñi reñmanieyel chi pu che mew.

Küla: Zoy zoy petu ayigetuy mapuzugun Fantepu ti mapuzugun küzaw mew alünke che konkongey, ka ti pu chillkatufe kiñeke wechekechegeigün ka kiñeke zoy alüketxemigün, zoy ellakuifi mew femgen kiñeke che ta konkefuy, kiñekemew femgen kechu che puwkefuy ti kursu mew, welu ta fantepu kaletuy ta zugu, kiñeke kursu mew zoy pataka che ta puwpuwgey ta wirintukuwalu, tañi pepikonafel ti kursu mew. Ka fey ti koneltun mapuzugun mew pigechi küzaw ka müley, epuchipantugey ñi llitugen, fey mew ta ka rume müley ti küpa konael feichi zugu mew ti pu che. Feytachi zugu fenteken che ka wirintukuwkey ñi konafel, feymew pu zomo mugel küpa koni, ka waria mew müleyechi pu che konkey.

ÜLLGOZMAWKÜLEMUM Kiñe:

Rume newenkonküley ti rakizuam kiñeke mapuche mew, kimyelu ta mapuzugun, feyta txokiniefilu ti mapzugun re ti pu mapuche kimalu mapuzugun, ka feypigün ñi re lelfün mew müten zugugeal, ka kiñeke re püllü zugu mew konal, ka kiñeke mugel feyta wigka kimlayay ta mapuzugun pi. Feytachi rakizuam niey ti pu zugukelu mapuzugun ka ti kiñeke mapuche wünenküleyelu ti estaw ñi txokiñkeche mew.

Weluñmawtuley ti kiñeke rakizuam feitichi mapuzugun püllü zugu txokigeyem, feyta re gillatun zugu mew müten pünegekey pigün, feyta kümelkalefule ti mapuzugun fill püle müleafulu txokilafigün, feyta re püllü zugu mew müten konkenofulu, feyta femiyem fey tati zugun kiñepüle famentunegeyem. Ka müley ti welulkalechi rakizuam, feyta wigka kimkilpe ta mapuzugun pigün, weñeñmayafeiñmu taiñ kimün pileigün, feyta re mapuche müten kimelgeay ta mapuzugun pigün, ka fey ñi pünegenuam ti estaw ñi txokiñkeche mew ka fey ñi fanenpegenuamrume feyta feipilenmew tüfachi rakizuam ti wülgetuafuy ti mapuzugun ka ti “mapuche kimün” estaw mew pituigün.

Feytakechi rakizuam katxütumekeyefi ti witxañpüramgetuafel ta mapuzugun, welu ta ka feytakechi rakizuam müte zuamkunugewekatulafuy.

Epu: Fillke wirin müley, müley meli wirin zoy kimnegelu fantepu, welu zoy müley Fantepu gelay chem zugunrume ñi pepi witxañpüramgetulu alüken wirin mew, feyta chumkawnorume pepi witxañpüramgetulayafuy, feyta puwelkawüngelayafuy tañi pepi zewmageyeafel ti chillka mapuzugun ñi kimeltugeafel, ka fey ñi kimelgefum ti mapuzugun pepilgelayafuy chuchike wirin welukentu tukugele, ka fey-

zoy zoy püntükawkülerpuafuy taiñ zugun fantepu ta zew müte kiñewkülewelay tati.

Küla: Kiñewlay ti pu che küzawmakelu mapuzugun Ti pu txokiñke che ka ti pu newemamekelu küzawmanielu ti mapuzugun feyegün müte txürümnielaigün ñi rakizuam, ka müte kiñewkülelaigün kom ti pu küzawmanielu ti mapuzugun, ka rume müley ti fill küzaw püntükawküley, kichuketu küzawmekeigün ka kizu ñi rakizuam mew müten yenieigün, ka kiñeke feyta maneluwküleigün ti zew topayenochi küzaw mew feyti EIB llemay, feyta kom kimniegey ñi zew günamkan küzawgenmew.

Ka fey rume müley ti genkawün zugu chem txokiñke che mew rume ka newe kimfalgelay ti chemgen ti pu txokiñke che, newe che txürlay ñi gütxamegün, femechi mew ta müte pepi yegelay ti leqgenchi pepilfal küzaw, txürkechi, pekanka pünekagenoam ti püchikelen chi pepiltuwe, feyta küme rüpütulafel ti fillke newen tañi kiñewafel ti mapuzugun ñi fütxa txokiñ che.

Leqgenchi = estrategias Pepilfal= efectivas, efectividad Pepiltuwe = recursos

“Inayekonün taiñ yafütun mew. Fey ñochika kizugünewün ifegeaiñ ” Sergio Puebla Araya Gen wirin: Elizabeth Nuñez Sanhueza Rulpanzugu: Sergio Marinao Nahuelpan - Bastian Chandia Millanao

Kishu yiñ piel chem yiñ iyal (kishugünewün in mew): ti in ñi az-zugu itxokom txokiñmapu che, niey az-zugu kishu ñi azkünual chem ñi ial egün, txürkülelu ñi azmogen mew, fey pepi ñi pipigeal mogewe kiñe az-zugu reke.

Fill antü, müte kimkelayiñ chew ñi txipaken fill mogewe. Mülen mew zoyel mogewe yenielu ifalgenochi chem, ka mülen mew kiñeke empresa nentulu ta ti küzaw, fey mew ikeyiñ yaqel yiñ müte wesha kontukeetew. ¿Rumegeyiñ yiñ chem iyal mew?¿ka zugu mülepelay?¿faligey yiñ küme zullial chem yiñ iyal?¿chumafuy kay newe küme ikenoliyiñ am?

Chile mapu mew, marike che fey aylla che motxin kutangelu well kanzer kutxangelu ka, fey kutrankelu che kam ñi küme ikenon mew. Rodolfo Cea Vargas nutricioniosticagelu UFRO mew feypi, kuyfi mew wesha zugu müley fey ñi mülenon mew ta yaqel, welu fante mew wesha zugu müley motrilelu kam che, “müte rakizuamkelay che kishu ñi nieafel ñi tukukan egün, kam ñi küme zulliafel chew ñi gillayal kümeke yaqel, mapun tukukan, kotükawe mew, welu fey zoy ayikey ñi iyal kake yaqel,

ünfigechi yaqel, well yiwiñmagechi yaqel. Ka fey newe awkantunolu am che, fey zoy kimfalgey ñi fenten motxigen che” “mülen mew fentxen empüresa zewmakelu yaqel fey rumeñma kakünukefi ti yaqel, fey mülen mew kiñe rume fün ketxan fey ta azlay, mülele kiñe rume tukukan fey fey ti tukukan kakünugekey kimiko mew, kümeafuy ñi gütxamkageal ta chi zugu mew, fey pu ñizolkülelu ñi günezuamal fey ta chi zugu mew” rume zuamgekey ta chi zugu pi ta Sergio Puebla Araya, Sergio ta kiñe tukukafe.

Konküley Hemisferio sustentable txokiñche mew, tachi txokiñ zuamniey ñi witxañpüramgeal ti küme elelürpun zugu, fey ta reküluwgelu ti kümelen mapu zugu mew, ka ekonomia mew kafey ti kiñentxürwen mew. Kom tachi zugu nüwküley ti agroecologia mew. Fey ta mew wüzamkünuyiñ ta iñ koñküpü, fey ta iñ elafiel funagechi mogewe ta iñ mapu mew. Tukukayal geno kimiko, azkünual tukukawe, kakewmegeal tukukan, kimal ñi chemgen well ñi lawengen fill mogewe, mürkeal fill ketxan nieam kümeke mürke yiñ küme iyal, geno ünfitugechi yaqel insectisida no rume.

Pütxü müna alhüley waria che. Püchiken che kizu ñi yael tukukakey.

Waria mew rume püchikeley chew ñi zulligeam ti ünhfigenochi iyael.

Gelay tranzparenzia Temuko cadena zupermerkaw mew, gelay akroekolokiku sellugechi merkaw. “kizugünewun igen ta kizu zulliy ñi yael ta che, tüfachi mapu mew mülechi prozuktor wunelu mew zulligele, femafuy ti nenolu tiempu ñi tukukayam. “Küñekemu ta re feypifaluwün tati, ruka mew neafuiñ taiñ ayinelchi ferzura” pieiñmu Melina Bravo, Komunitaria zikoloqa. Temuko waria, mapuche tukukafe ka re nelfün che tukukafe ñi zuam niey fentxen ferzura.

Amukatuyawchi welukawün müna pefalüy Temuko waria, zoy kechu mari txipantu yeney ñi welukaferzurameken egün, kezu, rügo, anümka, kake orkanika chemkün kütu. “Ti zoy konfianzafalchi ferzura, Kimiko mew, wenegechi trankenikagenochi fün, chumgechi zewmagen, kom femgelu küpalgekey ti mapuche lof mew, ti amukantuyawchi welukafe. Ina Pintu püle anümuwkeygün ka ti kalle

“Ti waria tukukawe müna zuamfalüy waria mew femngechi pepi zulliw che ñi chem ñi iyael küñemew”

Rodolfo Cea Vargas

“Küñekemew ta re feypifaluwün tati, ruka mew neafuiñ taiñ ayinelchi ferzura” Melina Bravo

Montt mew, ragintu waria.” Pi Sergio Puebla. Konfianzagechi wellin mew gillaliyiñ ka müley taiñ püchike anümkayal taiñ ruka mew ka ñochika txipalerpuy ti waria tukukawe.

“Ti waria tukukawe müna zuamfalüy Temuko waria mew ka ti rekion mew, femgechi pepi zulliw che ñi chem ñi iyael küñemew, anümkawe mew ka plaza mew femgechi ta kimüwuy che. Mogelam ti kuifi zuamgekechi wellin welu fantepu goynentunegetulu. Ti anümkawe itxokom yafütun kufrilay welu zoy faratuy ka kutxanelkachelay” pieiñmu Rozolfo.

“Küñe lechuka mari epu zentimetru tremkey, epu küyen mew, küñe txipantu anümnegeafuy, küme elutiempuwuy che ka küme zewmay günen” Amuley. Ti ezukazion, chew püle az amulen politika puflika ka ti inarukañmawkülechi che ñi orkanizazion ñochika txügkaykülerpuy küme karantizayam tüfachi iyael derecho, ti müna püchike gütxamtukugekelu. Kimfalüy ñi chumneñmafiel ñi salu ta che. Müley taiñ zoy küme kimafiel chem taiñ ikelchi yael, inayekonün taiñ yafütun mew.

Fey ñochika kizugünewün ifegeaiñ ”

Wechekeche ñi txawün

“Ana Millaleo: re zewmamuzikagenoal, küñe zugu wulgeal” Pürümllemay egu gütxamkawlu, tati Wechekeche ñi Txawün mew konkülelu ka ülkantufegelu, Ana Millalew, tukulpafi ti txadizionalgenochi muzika mapuzugun mew amulelu, mapuchegen ka chumken zomo tati cultura mew.

-¿Chumgechi azkünufimün tüfachi txokinche ülkantukelu? Ka ¿Chumgelu femüymün?

Chewkütuchi küpaiñ taiñ inayekonpuam ti puwtxemke che ñi txawün mew, Santiaw waria mew. Petu konlu ti Lelfünche organización mew llituy Wechekeche ñi txawün Floriza mapu mew.

Fütra kuifi chügkoluwün, wunelu mew nentulu gillatun Santiaw waria mew.

Fey mew kimfiyiñ ti mapuche mogen, püllelekelaiñ chew ñi mülemum mapuche kimün. Ka kimfiyiñ kake wechekeche konküleyekelu kake chügkoluwün mew fey “txawüafuyiñ taiñ pegelküzawelafiel ta che ka kimelelafiel fillke mapuchezugu ka taiñ zewmayam ayünelchi zugu” piyiñ, küpa kimüwlekeiñ, wenhüykayafiel taiñ txemyenke che, inchiñ taiñ zugu mew reke rupayelu.

-¿Chumgechi llituymün zewmamuzikan?

Petu llitukenolu inchiñ zewmawyekeiñ muzika, petu konkenolu tüfachi mapuche zugu mew inchiñ. Welu rakizuamüiñ “re chumkawpüzamekeiñ, müley taiñ kimelael iñ mapucheke zugu” piyiñ, feymew trawüluwüiñ taiñ azkünuafiel tüfachi Wechekeche ñi Txawün txokiñ. Epu waragka kayukonchi txipantu mew nentuiñ taiñ wünen disku, welu krafafiyiñ epu waragka melikonchi txipantu ka epu waragka kechu konchi txipantu.

-¿Chumgechi llituy tamün zewmayafiel ti mapuzugulechi muzika?

Taiñ wünelechi ülkantun, Inchiñ geyiñ tukulefiyiñ taiñ püchi kimnekelchi mapuzugun. Femgechi kagentuiñ taiñ müna kümelkameken, kimkantumekekefiyiñ ti mapuzugun, femgechi kimelüiñ taiñ chumgechi zuamkülen, fey taiñ küpa femkefuel wechekeche reke. Fey mew ayiwmaiñ fey llituy taiñ küñe mew zewmakaülkantunün.

Ti ülkantun mew kizutu txipakey zugu ka chumzuamkülen che, hiphop reke, ka nielu feychi kizugünewun kay tati. Püchin mew ka peiñ kake az muzika, küme kompuam pu wuechekeche ñi logko mew, itxokom ayünolu hip-hop kay ti. Re zewmagenolu muzika kay tati, küñe zugu wulam tati.

Wünelu mew “Chumgelu am ta zewmaymün tüfachi ülkantun, ülkantun kechilenolu” pikeiñ mew. Fütxa chuchikünuwtulu reke taiñ ülkantun, mafien taiñ küzaw zigenentupayafulu ti kuifike ülkantun welu feyno fel taiñ rakizuam. Welu we llitulelu wula inchiñ txipay feychi zugu. Püchin mew pütxüken che ayüñmaiñmu taiñ küzaw, tati zugukechi pu che kütu.

-¿Chem piley tami rakizuam ti pu zomo mew ka tati zomogen ka wentxugen muzika zugu mew?Inchiñ kanerputufiyiñ fey chi rakizuam, fentxenke lamgen femyey peno, “tüfachi wentxugen ka zomogen katxütukey tüfachi kizugünewtun zugu” pigekey, “Mafien uzamkapakefi ti pu wentru ka ti zomo tüfachi

Gen wirin: Karina Palma Trujillo Nütxamkagelu: Ana Millaleo Rulpanzugu: Bastian Chandia Millanao

mapuche weichan mew”, nanelkachealu reke, welu femgechilelay ti rakizuam. Kom che niey ñi chumal tüfachi mapuch e azmogen pilen inche, ka femgechi falintunmuy egün, zoy falilgenol küñeke che kakelu mew. Txürkülealu ti zugu kay tati, müley ñi femgechinegerpual müten, femgechi rakizuam müley mapuche azmogen mew. Kom fey tachi rakizuam konkülerpuy ti puke ülkantun mew, taiñ we nentuelchi dizku mew tukulelfiyiñ fentxenke zomogen ka wentrugen zugu. Küñeli chew ñi txipalem ti pu elfünfeke zomo, feymew pengelüiñ taiñ rakizuam, ka mapu rakizuam reke no.

-¿Chumkünugeafuy fey chi zugu?

Fey tachi zugu mew wüñokintualu che tati fey tukugetualchi zomo chew ñi mülekemum, mapuche az mogen mew. Küñekemu ti zewmagen ti “mapuchidad” müna azkonkülekey wentrugen mew, wekuntu kimelgeken mew ti mapuche az mogen. Rüftu txekamtungetuy zomo, ti pu kronizta ayüwmalafi ti müleyechi itxofill ruka zuam.

Falintulafi tüfachi zugu egün, welu inchiñ may falintufiyiñ, fey mew ta itxofill zugu txipakelu , zomo ta ñizolkülekey fey mew.

Müley ñi wüñokintugeal ti txürkülechi mapuche zugu, witxañpüramgetual ti zomo ñi chumkawken. Müna faliy pu zomo, fey egün ta mogelnelu mapuzugun ka ti kuifike zugu.

Pu ruka, punwi mülewey fey chi zugu, fey chi zugu wichakalay wigka, falilnofinmu; fey mew mülewey ti mapuche kimün.

ti pelotatun: kom zugu ñi aywiñ

goymakilmün ti kulliñ kizulelu

Gen wirin: Pamela Ñancupil Rulpanzugu: Sergio Marinao Nahuelpan

F ey ta pelotatun mew txipakey ta fütxake kutxankawün zugu, txokikey epe

kom che ayikenolu ti pelotatun, fey ka ñi peafel politika zugu ta ti che zoy zullikey ñi peal awkantun zugu xipalu TV, txokikey ayinolu, ka fey pikey ti pelotatun ñi füla illamgekey pu weye ka pu katxipache, ka ñi mülen zoy wesha zugu nielu che fantepu. Welu ta ti pelotatun kiñe püchi llaq müten kom fey ta chi zugu mew, “fill püle ti txokiñche pelota inanielu, yafüluwi kutxankawkülechi wekeche mew, genolu küzaw maneluwün no rume” pi ta Korke Falzano, mülen mew ta la ka kutxan fillke pelotatuwe Arkentina mew, kimfalgey ta chi zugu müte ayikenolu kam ñi pu che egün.

Chile mew ka feley ta zugu, pu inanielu kimgekey weñefe reke ka awükafe reke, ti Garra Blanca, femgechiley ta pu inanielu ta Colo Colo, ka femgechiley kake txokiñche konkülelu pu lelfünche ka küzawfe, kom Chile mew ta ti txokiñ inanielu Colo Colo pewfaluwi ti zoy kutxankagechi txokiñche mülelu Chile mew, müte nienolu ran ka weñefe pipigepüzagekelu, inaltu waria mülekelu kam zoy küzawfalgenochi mapu mew mülekelu.

Rupalechi reglentu kimelgey kiñe zugu, fey Colo Colo ta mütxümfalgeay ANFP norümzuguwe mew, fey petu ñi awkantulen

Gen wirin: Martin Hernández Ankalaf Rulpanzugu: Sergio Marinao Nahuelpan

Colo Colo ta chi 15 konchi Octufüre küyen mew, pu inanielu ta Colo Colo pegelnieygün kiñeke pankarta chew ñi pegelgeel ti mapuche weychan zugu, feypilelu, “Amulepe taiñ weichan” ka “525 txipantu zewma Chile petu amulniefi ti lagümchen” kom fey ta chi zugu mew, pewfaluwi ta Chile, fey mew ti txokiñche fey lagümchefe pipigelu,weñefe pipigelu ka kuñiwüngelu pipigelu, Garra Blanca pipigelu reke, pepi zugunolu pu dirigente ñi femetew mew, fey famentuygün reke ñi poyefiel ta ñi ekipo fey pünekey ta pelotatuwe, wallpalelu kamara mu, fey ñi pegelafiel ti zugu pegelnolu pu kimelzugufe (periodista), pu mapuche wigka estaw ñi awükaetew ka. Ta ti artikulo 51 feypiley: pepi nentugelay lienzo pegelgelu politika ka feyentun zugu kake zugu ka, welu rumeñma zewma katxütugekey che ñi wirarnoal mupike zugu, lagümgele ka nüchegele rume. günezuamliyiñ ñi mülen ta awükan re pelotatuwe mew ka pelotatun ñi füla kuxankayawkey ta che, ka günezuamliyiñ re inanielu Colo Colo nüküfelgey ñi mupinoal, fey chem no rume ta günezuamlayayiñ, fey ta ti pelotatun zugu fey wenche pewfaluwi fentxen zugu mülelu ta iñ mogen mu, epe kom zugu pe no.

Mari mari pu lamgen, tachi epugechi kulliñ zugu mew, zoy güxtamtuayiñ fey ta chi fütxa ruka chew ñi koñikegewenoal pu txewa ka pu narki, ka chumgechi yiñ küme nieal kulliñ temuko mew. tati txokiñche konkülelu inche “grupo adopciones” pigelu, ka fey ta chi txokiñche konküley kagelu txokiñ mu, fey CPCEM ñi konkülen, kayugey ta ti xokiñche zuamnielu ñi küme azkünugeal ka ñi küme kakünugeal fillke politika, ka re falte ñi pünegenoal ran ñi küme günenieam tunte txewa ka narki mülen, tüfa azkünugeay kake txokiñche ñi piel zapin kulliñ zugu mew, ka ñi chem pilen zoy pepiluwlu tachi zugu mew ka küme txipakechi zugu mew ka mapu mew ñi küme llowgeal tüfachi zugu, zuamniey kiñe azkünugechi zugu kimeltun mew ka koñigewenochi kulliñ zugu mew.

Temuko mew müley 336.000 che

txokigekey, melike che mew müley kiñe txewa, fey mew müley 84.000 txewa txokigekey, ta ti OMS gülamtukey ñi kapogeal 10% pu txewa mülelu, femniegele 7 kam 10 txipantu fey ñi tügküleal tunte txewa ñi mülefel. 8.400 txewa koñigewenufule kiñe txipantu mew fey kümeafuy pi ta municipio, welu fanten mew fey 3.850 kapogekey müten kiñe txipantu mew, fey ta chi zugu pegelkeyiñ küzawkelu municipioche ka universidache inchiñ, ñi günezuamal egün fütxa zugugelu tüfa, fey mew newentu zuguiyiñ ñi pürüm püramgeal ta chi püroyekto consejo municipal txawün mew fey ñi gillatual ran nielu SUBDERE tachi fütxa ruka gealu koñigewenoan kulliñ. Tüfachi zugu petu nentugeay pinolu kam pu ñizolkülelu municipio mew, fey ta chi zugu re kümeleam kulliñ no ta ti, kom inchiñ ka yiñ kümeleam.

Müley yiñ küzawal chew ñi lleqün ta ti wesha zugu, fey yiñ inawenoal re weshake zugu txipalu

Ta mi nieal kiñe püchi txewa, werkülelmuayiñ WSP mew +56983334973

Fic Wallmapu 2017

Zoy falifalzugugelu fey ñi konkülen egün pütxün zomo zewmalu ti amelkan zugu ka azentufegelu. Llitulu ti festifal “Berta vive” zocumental mew, ta ti zugu mew kimgey chumgechi ñi lagümgeel kiñe mapun weychafe

Berta caceres pigelu fey guatemala mapu chew ñi tuwmum, Maria Mercedez Gomez ñi kompañnietew, wenüyyefuy ta berta ka mür konkülefuygu Conpinh tokiñ mew.

Gen wirin: Elizabeth Nuñez Sanhueza Rulpanzugu: Sergio Marinao Nahuelpan.

F ICWallmapu 2017,pu mapungechi amelkantufe ka azentufe fey

txawüluwigün tüfachi külagechi FICWallmapu temuko mew, elugey kiñeke üytuchen yewün fey ta chi zoy falifalgelu ñi küzaw mew: pu mapu zomo ñi az-zugu zugu, igkañpen mapu zugu, fanentugen mapunkechegen, püchikeche ñi amelkantun, zoy kümelu kortometrake, amelkan zugu, kake kay.

Tüfachi txawün mew fey pegelgey ñi chumlen fanten mew pu mapuke che, ta chi zugu rekülgey fey pu mapukeche niey kishu ni günewün ñi gütxamtual ka pegelal kishu ñi fillke zugu egün, ñi chumgechi ñi azkülen kishu mogen, ñi chem rakizuamken pu fûtakeche, kushekeche ka pü-

chikeche ka. Tachi külagechi txawün, fey zoy waragka kechu pataka che ñi ayinietew tachi zugu fey llitulu 17 ka wechulu 21 konchi Octufüre küyen mew, fey pewfaluwi ñi ayifalgeel kiñeke aplauso ka kefafan mew.

Zewma ñi pegelgel zoy meli mari pelikula, püchike pelikula, gütxamkawün, kimeluwün zugu, festifal kuzenoal pillefule rume ti yeñpüramlu ti zugu, ka üytugey ti zoy pewfaluwlu ñi küme küzaw mu fillke mapunkechi zugu: pu mapu zomo ñi az-zugu zugu, igkañpen mapu zugu, fanentugen mapunkechegen, püchikeche ñi amelkantun, zoy kümelu kortometrake, amelkan zugu, kake kay.

Mala Junta Apolen

sala mew, Claudia Waikimilla ñi pelikula fey kontuy piwke mew kom che mülelu. Fey ta chi pelikula zoy konlu piwke che mew, ka zoy pewfaluwi ti rüf zugu chumgechi ñi kimuwün

epu weche, kiñe mapuchegelu, ka-

gelu santiaw tuwlu. pegelgelu ti pelikula, mülepay ti “Cheo”, txipalu pelikula mu, ka mülepay Claudia Huaiquimilla ñi chaw.

rulpan antükantuam Küpalechi 12 Diciempüre küyen pegelgeay ti ülkantufe zomo, ti mageluwün gütxümkülegey taiñ txawümeal ti Gimnasio Olímpiko Ufro mew Temuko waria mew.

Tamün zoy kimal chumgechi konküleal tüfachi txawün mew fey pepi gillakafuaymün ti entrada papil mew http://charco.tusentradas.plus/.

Kom pu che mülelu araukania mew küpalechi ta we “Desafío nocturno IND 2017” Lefkantun Nielol wigkul mew ka “Fiesta Fitness Zafadu 25 Nofiempüre 2017 Llitualu 19:00 hrs ka wechualu 22:00 hrs Iney rume küpa amulu fey kullilay ñi konpayal.

-Wirintukumün tamün konpayal - Kit küzentual - Horario ti aztukunual - Sorpresas fiesta fitness Konpamün apuen #Desafíonocturnoind2017 Ti mapu ñi rütxan: Pu wenüy ti mageluwün mütxümküley tamün amual ti küzaw “Ti Mapu ñi Rütxan: fillke Üñum Wallmapu mew” (Joyería del Territorio: Aves de la Araucanía) pegealu Lonkimay, Puerto Saavedra ka Padre las Casas mapu mew.

Lonkimay: llitualu 6 ka wechualu 17 Nofiempüre mew Puerto Saavedra: llitualu 20 Nofiempüre ka wechualu 1 Diziempüre mew Padre las Casas: llitualu 5 ka wechualu 22 Diziempüre mew

Korü nemüll mew

Ilo korü achawall

Gen wirin: Sylvia Quidel Parra

1.- Wüne kiñe challa mew tukugekey püchin yiwiñ, ka tati kayu katxün achawall, püchi fürigekey tati kütxalwe mew.

2.- Fey wirügekey tati cefolla, ka aku. Ka fey katxükagekey fey tukugekey challa mew. Ka püchi ziwillgekey.

3.- Feywüla, tukugekey tati wazkün ko ka chazi, ka püchin orekano, petu afüyem tati achawall.

4.- Chafgekey tati kayu poñi, ka wirügekey tati wa ka katxükagekey. Ka kayu katxükan ti penka.

Ka katxükagekey püchin karü zegüll, ka tati moron, ka chafgekey tati zanaoria ka katxükagekey.

5.-Fey kom tati tukukan tukugekey challa mew, ka wiño ziwillgeketuy.

6.-Fey ka tukugekey tati tükün kachilla ka wazküngeketuy kiñe epu mari minutos.

¡Chaltumay tamün chillkatuniefel Pürüm llemay!

¿Quieres que seamos un periódico impreso y alternativo fomentando el mapuzugun? ¡escríbenos a purumllemay@gmail.com y puedes aportarnos para avanzar!

Txokinche Pürüm llemay!

Elizabeth Nuñez Sanhueza Bastian Chandia Millanao

Sergio Marinao Nahuelpan Karina Palma Trujillo Alberto Huenchumilla Marilao Felipe Contreras Salazar.