Külachi chillka

11 Nofiempüre ka 29 Diziempüre konchi küyen

Temuko - Wallmapu

Txekañman taiñ kiñewküleal pewen mapu mew

epu mapuche ñi mülealu konkürezo mew

mapuche weche nentuy 850 punto psu mew

Gütxamkawün: Wallmapu ka ñi rupawma zugu

‘’ Kiñe gülam eluwayiñ pu wekeche’’ Florentino Coroso Huenchugñir, Mayo 1988. ‘’Feley taiñ mapudunguael’’

Eymün pu wekeche, fey ta chi rakizuam feypiwayiñ. Iñchiñ kimpalaiñ kuifike kimün mülerkelu ka kimpeñpewün taiñ fütakeche yem mew. Rume nierkefuy kümeke gülam tañi eluafiel ñi pu yall.

Küme zapigey fütakeche ka fentxe küzawmagey, fey mew ka rume küme felerkefuy egün.

Fantepu zoy gewelay fey chi kümeke zugu. Zuamgewetunoluam pu wekeche mew tüfachi poyen kümeke rakizuam, fey mew wirintukufiyiñ tüfachi chillka mew eymün tamün kimael, pu peñi ka pu lamgen, weke txemkülelu.

. Kizu taiñ mapuzugun mew gütxamkaayiñ, ka fey mew zoy küme günezuamayiñ, poyeafiyiñ fey tachi kümeke zugu.

Amulnieafiyiñ ayüfilmün. Fey küme rüpü mew reke witxakonaymün. Ayüwüngey tüfachi gütxam güneazuamün mew.

Chumkawnorume gelay taiñ yewentukuael iñ mapuzugun iñchiñ. Zeyukalerpu taiñ mapuzugun ta wigkazugun egu. Küpa mapuzuguwekalayiñ kiñeke mew, welu kümelafuy fey chi zugu.

Müley taiñ mapuzuguael müten, weñagküngefuy taiñ felerpun.

Eymün llemay pu wekeche, llowmün tüfachi rakizuam, pütxün mageluwün müley eymün mew.

Müley tamün rakizuamael ka zugukawael.

Günezuamayiñ llemay chumgechi felerpuael ka antü mew.

Fey mew rume kümefuy yenielmün rumel taiñ mapuzugun. Kizu günewün nielafiyiñ taiñ kewün (‘’idioma’’ pigey wigkazugun mew).

Ka kizu feleayiñ tüfachi ayüel küme mapu mew.

Txapümnietuayiñ taiñ falin kümeke rakizuam, fey kiñewkületuayiñ, p ü r a my e n i e w t u a y i ñ mew taiñ Chaw günechen ta mülelu wenu mew, azkintunagümniepaeyiñ mew kom pu che taiñ mülen mapu mew.

Chillka: Feley taiñ mapudunguael 1988-Txipantu mew Mayo küyen mew. Florentino Coroso Huenchugñir pigefuy‘’ Kiñe gülam eluwayiñ pu wekeche’’

mapuche weche nentuy 850 punto psu mew

“Inche ta mapuchegen fey yewekelan ta ñi epu txem ñi gülamtuetew” pi ta rail Rupan ñi amuel puliwen in mew Ñizol Bachelet egu, Rail Neira chillkatualu CAE mew nentunole ti gratuidad, trokiwi. Ti weche amuy ñi ñuke egu, Gloria Marivil pigelu, fey ta igkakünufi ti kulligenochi kimeltuwün. kiñe mütxümün, fey ayekan zugu reke txokifi ti weche, fey ñi afmatuetew ta Rail Neira Marivil tachi afreqlentu mew Temuco waria mew. Ti weche txipalu Pablo Neruda kimeltuwe ruka mew, nentuy ta 850 ti Lenguaje PSU mew, fey mew magelkünugey ñi puliwen imeal Ñizol Bachelet egu. Liwen mu puwi La Moneda ruka mew, rupan ñi nampülkael txipapalu Temuko püle ñi ñuke egu. fey ñi ñuke mapun takuluwkiyawlu ka.

“Inchiñ yiñ pu mogeyel fey rakizuamküleyiñ ñi küme zugu ta kimgeal ñi mapuche wechegen, fey pu mapuche mülelu tachi mapu mew re kewan zugu no ta ti femgey.

Ka müley fey chi zugu, welu re fey zugu no ta ti, müley ta mapuche küpa nietulu ñi mapu yem, inche ka igkayefiñ fey chi zugu, welu re weshake zugu mew trokigekey pu mapuche, fey mew müley yiñ wenuntual kümeke zugu nielu pu mapuche fill püle fey ñi txokigewenoal re weshake zugu mew” feypilu ñi ñuke prensa mew rupan ti puliwen in.

Ti zomo, kimeltuchekey Rulu mapu mew (Puerto Saavedra mew), tachi waria Lafken mapu mülelu.

Genwirin: Sergio Marinao Nahuelpan

Rail ta kishu chillkatukefuy, fey elugey kiñe beca ñi chillkatual kiñe preuniversitario mew fey mu ta nentuy ti puntaje nacional.

“Inche ta mapuchegen fey yewekelan ta ñi epu txem ñi gülamtuetew” feypi ta ti weche Moneda mew, müley ñi chillkatuafel CAE mew, elugenoafulu kam ti gratuidad chillkatuam.

“Re pepi nentun ta CAE, welu pewmagen may chew ñi chillkatual fey elugeafun kiñe beca. Ti CAE, fey ti pu che genolu chem no rume ñi kullial ñi chillkatuam, fey ta zulligeafuy, welu müte kümelu no ta ti” feypilu ta Rail Neira, küpa chillkatuy Temuko mew kiñe Ingenieria well ciencias zugu. fey ñi ñuke igkayey ti kulligenochi kimeltuwün elufilu ñi püñeñ, fey mew feypi “itxokom che müley ñi chillkatuael kulligenochi kimeltuwe mew, fey chi pu che txipalu kam fey chi kimeltuwe ruka mew pepi ñi konal universidad mew, femnole, fey rumeñma kulliafuyiñ ñi küme chillkatual yiñ pu püchikeche well wekeche ñi elugeam küme kimeltun zugu, felelu ta chi zugu txürkülenolu kam ta chi azmogen. Itxokom che pepi konlay fill zugu mew, itxokom che niekelay kümeke küzaw, felen zugu ta fanten mew”

Zullintun 19N mew: Ti we izkierda, ti witxamtunla derecha mew ka pu mapuche ñi wiñotuel konküresu mew”

Ka txa wewlu fey ta Frente Amplio pigey, fey ñi we rakizuam izquierda mew amulkunufi alhün che ñi fotalaetew few mew wewüy epu mari kiñe (21) wanku konküresu mew, fey chi zugu iney no rume rakizuamkülelafuy rupalu alhün txipantu mew femkelafuy welu fey ta we txokiñ Frente Amplio rakizuamkey wekun püle ti Nueva Mayoria ka Chile Vamos mew. Fantepu mew tüfachi we txokiñ fey ta külagechi zoy newengelu politika mew.

Feyegün ñi rakizuam inanentuniefi ta Podemos (España), Syriza (Grecia), 5 Stelle (Italia), Momentum (Gran Bretaña) ka mapu mülelu ta che reke ayüwenofilu ta kuifi zugu izquierda ka derecha fey mew txawüwküley ñi femam.

Ka femgechi ti derecha ñi wewün congreso mew piley ta ka zugu; ti ragiñizkierda müly ñi nütxamkayael ta ñi nentual ka politika.

Genwirin : Stefanie P. Pailahual.

Rulpanzugu: Felipe Contreras Salazar

Ka zugu ta müley ta ekonomia zugu, Frente Amplio ñi akuel konküresu ruka mew müley fentxen kuyiñ ñi txawulafiel ta che ka igkayafiel ñi pin. Beatriz Sanchez ñi konel candidatura presidencial, nütxamkalefuy ti che ñi zuam ka femgechi pilefuy feministagen felelu ta zugu fantepu mew.

Müley taiñ goymanoal ti kandidatu Kast, fey ta pinochetistagelu ka igkalelu ta ziktadura, petu müley ta fascistakeche Chile mew. Fey ñi wewpin “machismo, homofobia, rascismo” yenielu fey ñi rakizuam.

Ka ta Mapuche zugu mew tukulpakey ta “El mercurio” ñi koylake zugu, ka wezakapikefi taiñ pu che mew. Welu ta ka Frente Amplio müte küme günezuamnielay ta Mapuche ñi kütxankan zugu, petu müley taiñ küzawal inchiñ

mew, Chile ta petu zefekonküley ta mapuche mew. Fewla müley epu Mapuche konküresu mew , ka we wüla ta kiñe Mapuche zomo koni ta konküresu mew Diputada Emilia Nuyado Ancapichún pigey ka ti wegen wüla Senador gelu Mapuche Francisco Huenchumilla.

Fewla ta Parlamento kaly ta zugu ka gütxam; pewmagele ti lamgen ka ti peñi künlu konküresu mew fewal, goymalayay chew ñi küpan egu. Müley fillke zugu, mapu ñi weychan ka taiñ mapuzugun.

Emilia Nuyado Ancapichún: Tati wüne mapuche zomo diputadagelu Genwirin: Elizabeth Nuñez Sanhueza

Zulligelu ta küzawael Osorno, San Kuan de La Kosta, San Paflo, Fresia, Frutillar, Llankiwee, Los Muermos, Puerto Oktay, Puerto Faras, Puranke, Puyewe y Kurü Lewfü waria mew Tati papay Emilia Nuyado, wünegechi mapuche zomo diputadagelu Chile mew.

Konkülefuy politika küzaw mew San Pablo ñi Konseko Munisipal, Los Lagos fütxa waria mew. Kafey, konkülefuy Conadi ñi nacional konseko ka. Mari txipantu mew, 2002-2012.

Igkakey tati mapuche weichan, fey ñi txokifiñ mew kintumekey zoy kulliñ tati mapuche kizu kimeltuwün iñ witxapüramafiel Wallmapu mew.

Fey ñi wünegechi zuam ta igkayafiel konqreso mew fey ta mapuche kimeltuwün tati.

Rume fali tüfachi we zugu, fey mew fachiantü ga petu rume küzawgey tati pu zomo, fill zomo, küzawlu politika mew. Mapuche zomo ka zoy rume küzawgey, fewla kiñe mapuche zomo müten müley Konqreso mew.

Ayiwün zugu ta tüfa tati pu mapuche zomogelu.

“Txekañman taiñ kiñewküleal ka kizugünewtual taiñ mapu”

Gütxamkawün: Wallmapu ka ñi rupawma zugu

Gen wirin: Viktor Naqil, Temuko, Wallmapu

Newe chumüll tati safazu 9 diziem-

püre könchi küyen mew, chi pu che pewen mapu tuwülu txekañmaygün ñi igkayafel kizu ñi mapu egün Raqko waria püle. Fillke che amuygün ñi kompañafiel tüfachi zugu mew tati pu pewenche, amuy che Santiaw waria tuwülu, lafken mapu püle tuwülu, willi mapu tuwülu ka fillke mapuche kom püle mülelu. Fanten mu taiñ Wallmapu mew küpa konpay

Genwirin: Rodolfo Painemal

fill empüresa genkawpatual taiñ mapu, taiñ lewfü ka itxokom taiñ itxofil mogen… fey mu fey ka awükagekeiñ pu mapuche Kofierno tañi zuam mu, we gelu ta Chile taiñ kuifikecheyem awükagekefuygün inchiñ reke fanten mu tüfachi Estaw mew, fey mu tati comunidades mapuche-pewenche mülelu pewen mapu mu witxaleygün ñi igkayafiel egün taiñ mapuche gen.

Ti rupalechi mari

kiñe antü konchi nofiempüre küyen, Temuko mew txawüyiñ taiñ gütxamkayal Wallmapu ñi rupawma mew ka kakunugetual ti kimeltun zugu. Tüfachi txawün yeñpürami ti Historia ka Geografía kimelfe txokiñ. Ka koni kake txokiñche küzawkülelu tüfachi zugu: Mapuzuguletuaiñ, Centro de Estudios e Investigaciones Mapuche - Comunidad de Historia Mapuche (CEIM-CHM), Colegio de Profesores Regional Araucanía, Colegio de Profesores Comunal Temuko, Movimiento por la Unidad Docente, Bloque por la Educación intercultural ka Colectivo Gladis Armijo.

Ka akuy taiñ lamgen Txalkan Pwelmapu tuwlu. Feymew txawün mew kiñewtuy reke Wallmapu, Gulumapu ka Pwelmapu.

Tüfachi gütxamkan küme txipay. Itrokom che konlu fanentufi tüfachi txawün. Müley iñ gütxamkayal tüfachi zugu mew ñi kakunugetual chumgechi ñi kimeltugeken mapuche ñi rupawma gütxam. Mülellefulu rume fillke rakizuam itrokom ayünieiñ ñi amulgeal tüfachi zugu.

Tüfachi txawün mew feypikunuiñ ñi pepikayafiel kiñe fütxa trawün küpalechi txipantu mew. Küpalechi txawün ayiyiñ ñi witxampüramgeal kiñe fütxa txokiñche yeñpüramalu ñi kakunugeal kimeltun zugu.

Walüg mew zuamnieiñ tayiñ magelcheael kom ayilu ñi konpayal tüfachi zugu mew.

PEIB pu kimeltuwe ruka mew.

(Programa Educación Intercultural Bilingüe)

Gen wirin: Alvaro Mariano, Wallmapu, Temuko Waria.

Fantepu epe epu mary txipan-

tu amuley PEIB (Programa de Educación Intercultural Bilingüe)fillke kimeltuwe ruka mew chew zoy mülelu mapuche chillkatufe. Newe küme kimlaiñ chumgechi llituy kom tüfachi zugu pu kimeltuwe ruka mew, chem kintugekey? ñi zoy fanentuael taiñ mapuche kimün, feyentun, fillke az mogen?; taiñ mapuchezugun ñi ñamnoal, pigekeiegün, welu chem pefalgey pu kimeltuwe ruka mew?.

Fillke günezuamtun ta wirintukeiegün tati pu che inarumepelu fillke zugun ñi chumlen, pegealu chumgechi amuley tüfachi küzaw pu püchike chillkatufe egu.

Epe kom feitachy günezuamtun küme azkintukelaigün

PEIB ñi küzawken ka tati pu che küzawtulelu tüfa mew. Kiñeke mew pu che, pu kimeltuchefe ka tati pu ñizolkülelu Mineduc ka kimeltuwe ruka mew welulkakeigün PEIB ñi chem zewmayal. PEIB zoy fanentukey iñchiñ pu mapuche ñi az mogen, ñi feyentun, witrañpüramtualu tati pu püchikeche chillkatufe ñi mapuchegen (Lagos, 2015), welu newe kiñewkunukelay ñi aznerpual mapuche zugun mew; rume wuzamentuniekey ti “kewün” ka ti kagelu zugu mülelu taiñ mapuche az mogen mew. Welu tuchi rume zugun küme kimeltugele ka konafuy kom ti chem azgelu chuchi txokinche rume.

Fey mew kom tüfachi zew wirin zugun, PEIB newe kellukelay mapuzugun ñi witxañpüramtuael; kiñeke mew kümekunukelay taiñ mapuzugun ñi chumlen. Fillpüle tati pu che kimeltupalu mapuzugun pu kimeltuwe ruka mew kimlaiegün chumgechi amuley ti kimelkantun kiñe katxüntuku kimeltuwe ruka mew, fey mew ta küme pünelkelaiegün ñi rupan kimeltuwe mew kam tati pu kimelfe ka pu ñizolkülelu kimeltuwe ruka mew yamkelafiegün tati pu “kimche” ka fanentugekelay ñi chumgechi amul kimeltun (kaleketuy ti kimelkatun kiñe lof kam ruka mew ti kimelkatun kiñe kimeltuwe ruka mew).

Kümeafuy ta kaletule ti “programa”, kiñewkunugele ñi aznerpual “kewün” mew, mapuzugun mew, zoy küme amuleafuy

ka femechi zoy ñamtuwelayafuy ta mapuzugun. Fentxen chumgechi ñi kimeltual kiñe zugu müley, alün chillka ka müley tüfachi zugu mew.

Kom feytachi kimün pünelgele mapuzugun ñi kimeltual mew, zoy püchi kümetuafuy mapuzugun ñi chumlen. Kagelu zugu nüwkülelu tüfachi zugu mew txawukey tati pu “kimche” ñi küzaw. Chumgechi am ta küme amuleafuy kiñe mapuche, genrukagelu, mapu küzawfegelu well kamañgelu kiñe wigka kimeltuwe mew? Kom tati kimeltuwe mew müley ta kimeltuchefe, kom txipaiegün Universidad mew, küme azumkeiegün ñi küzaw, welu tati pu “kimche” kimelgelaiegün chumgechi küzawtufiel pu püchikeche; txürüwlay ti zugu apuen.

Ko f k e Federiko ñi nütxam “Segundo Llamin Canulaf 1987”

Feymew Fezeriko feypi chumgechi tañi zewmageken kofke lelfün pu che mew.

Kuifi petu pichi wentxugelu, inazuamniekefun chumgechi tañi zewmagen. Welu Gen wirin: feychi mew Federico müte petu gekenolu txokikefiñ feychi ronotun kofke, feychi mew am ka gekenofulu ti rono, re kiñeke ruka mew müten. Feychi mew zoy ikefuiñ ti rügal kofke, fey tortilla pigey.

Welu wünelu mew feypian – pi Fezeriko – chem tañi kofkegeken. Walüg am mülekelu fentxeken kachilla kompüle ruka, feytichi kachilla yegekey waria mew chew tañi rügümgepeyüm ti kachilla kiñe makina molinu pigey. Feymew yegekey tunten saku kachilla rume, epu saku kam küla saku, well zoy alhün. Feyti rügün kachilla fey rügo pigey.

Fey wünelu mew, ti rügo fey narfülgekey ella are chazi ko mew. Fey ziwüllkagekey re kuwü mew müten, fey txegkoluwlu, fey masan pigey. Feymew tichi masan zew kom narfülu, fey güñkükagekey waychifka güñkügekey. Zew kom femgelu mew, fey wüla chapüzkagekey. Ti masan fey katxükagekey wüla well meli txokiñ, fey txipakey fütake chapüz kofke. Feyti chapüzkan elgekey kiñe wente mesa, takunaqümkunugekey kiñe füta pañu mew tañi pürayam fayüm kofke. Welu rumenka fayümgekelay. Zewma puwlu tañi kümen txokigen, fey afümgekey.

Welu zew kom chapüzkalechi kofke mew, feywüla üyümgekey kütxal kofimkayalu txufkenh. Fey üychi kütxal mew aylenh mamüll rume kofiñelkey kütxal. Fey alüñma zewma kofichi txufkenh mew ka femgechi zew puwküley tañi afümgeam ti kofke. Feywüla pilümgekey ti aylenh, kiñeñpüle entukünugekey fey küme elgekey ti txufkenh rügalgeam ti kofke pu txufkenh feywüla txanantukugekey pu rangiñ mew feymew tañi afüam, ka püramelgekey ka feychi txufkenh wente mew, welu niekelay aylenh fey tañi lüfnoam kofke, welu am ta ka inarumeniegekelu tañi küme afümgeam müten.

Fey zewma alhüñma rügalküleyüm feychi kofiñ txufkenh mew, fey zewma küme afülu txokigeyüm minche mew, fey waychifgekey epuñpüle femgechi tañi küme afüam ti kofke. Fey ka pichi alhün mew kimgey ñi küme afün, fey entugekey zew kolüfküleweyüm. Fey ta tortilla pigey. Welu tañi kom txipayael ti txufkenh ka feychi pañu mew impolhgekey tañi narfüleam ñi txayayünoam.

Feychi tortilla kofke ta zoy tugüñüngey pikefuy tañi kuse ñeñe em – pi ta Fezeriko. Ka feypi: - fey ti tortilla petu ñi eñumkülen, wikefkagey fey mate mew. Intukugekey ka pichin yiwiñgey ka txanan txapigeyüm, fey zoy kümekey tachi tortilla kofke.

Kom feychi zugu tañi feypiel ta Fezeriko, chumgechi tañi zewmageken tachi tortilla kiñe küme kofiñ txufkenh mew.

¡Chaltumay tamün chillkatuniefel Pürüm llemay! ¿Quieres que seamos un periódico impreso y alternativo fomentando el mapuzugun? ¡escríbenos a purumllemay@gmail.com y puedes aportarnos para avanzar!

Küzawlu tüfachi chillka: Elizabeth Nuñez Sanhueza Alberto Huenchumilla

Sergio Marinao Nahuelpan Rodolfo Painemal Quidel Felipe Contreras Salazar.

Azentu: Fiestoforo