MANUEL G. BUSTO. TOMANDO SIDRA CON ELVIS

Cómu echar sidre

Pasu 5: beber el culín

Si se tratare de cualisquier otra bébora, sedría ridículo dar lleciones de cómu bebelo. Nel casu de la sidre esti ye, de fechu, ún de los pasos más emportantes, ya qu’un mal bebedor estrozará ensin remediu el culete meyor echáu. ¿A qué asturianu nun se-y retuerce l’estómadu al ver un culín reposáu y recalentáu posáu enriba la mesa?

Ya tenemos el culín. Agora damos la vuelta a la perspeutiva, dexamos al echaor y cientrámonos nel vasu. Lo primero, garralu con xeitu y sorrir a quien nos lu da, ser amables cuesta perpocu ya’l trabayaor o trabayaora va agradecénoslo. Col culín na man presta fixase nel pegue, la esplumina blanco que queda en vasu al mover la sidre, seña de la calidá de la sidre que se va beber, y presta tamién averar un momentín les ñarres pa esfrutar plenamente del arrecendor de la sidre. Pero que seya rapidino, nun podemos dexar morrer el culete. La sidre hai que bebelo recién echao y d’una, dexando claro que nun mos referimos a bebelo “d’un tragu”, sinón d’una sola vegada, ensin posalo de la boca fasta que quede namás un pizcu en vasu. Esi pizcu final, que nun se bebi, llánzase al suelu o al duernu, cola mesma man cola que se bebió. La tradición cuenta qu’asina devolvemos a la tierra parte de lo que mos dá, pero tien tamién un lláu práuticu: con esi xeitu tamos esclariando el llau pel que bebimos, vezu enraigonáu na tradición de compartir vasu. Pol mesmu motivu, devolvemos darréu el vasu al echaor, pa que puea siguir sirviendo. Esti vezu ta en pelligru de desapaición nos chigres por mor de les precauciones covid, pero sigue vixente en praos y romeríes.