CLÚ DE LA SIDRA

10ª Clas d’Echar Sidre

Culín interxeneracional.

Los talleres d’echar sidre despiden l’añu con una masterclass na que se pudieron comprebar los adelantos algamaos a lo llargo los nueve talleres d’esti cursu

Tamos en feches de cellebrar: Nadal, Fin d’Añu, cenes d’empreses y de collacios, folixes y tola pesca. Amás, vamos ser sinceros, a los sidreros el xaréu préstamos pola vida y sobro tou los que son del Clú de LA SIDRA nun entarden un menutu n’apuntase a la xarana. Con tou ello foi inevitable que’l caberu taller d’echar sidre del añu, que tuvo llugar el xueves 22, penúltimu del mes d’avientu, tuvieren más ambiente de folixa que d’otra cosa. Lo que nun quier dicir que nun se tomare’n seriu lo d’ameyorar echando sidre, tolo contrario, los asistentes punxeron muncho enfotu en siguir les recomendaciones de les nueses campiones echaores, Laura Ovín y Alejandra Vanegas, echando un culete tres d’otru ensin malpenes posa. Decimos ameyorar y non deprender porque nesta ocasión la práutica totalidá de los asistentes yeren yá veteranos y controlaben ya siquier un pocu les técniques básiques pa echar la sidre.

Poro, la desplicación pasó rápido pela fase anicial del taller, na que siempres se dan les istruciones básiques pa conseguir que la sidre siquier entre en vasu: esa parte yá taba superada pola mayoría de los asistentes. Esti xueves el taller cientróse principalmente’n controlar cuestiones d’estilu, correición de la postura y detalles que puen facer meyorar una sidre gracies a la forma en que s’echa, ensin escaecer un detalle qu’estrema a los más espertos: la forma d’entregar el culín. Comu ye vezu, la sede del taller foi la sidrería La Montera Picona de Ramón, cuestión que tien dos importantes ventaxes: en primer llugar, el poder contar con Alejandra Vanegas, y n’ocasiones con Jorge Vargas comu profesores d’esceición ya en segundu, y non por ello menos importante, lo afayaízo de les istalaciones y la posibilidá de continuar cola folixa ensin movese del sitiu, una bones finen les práutiques. Esta ocasión nun foi estremao y la xornada completóse con un pinchéu qu’acompangó la sidre, cortesía de la sidrería La Montera Picona de Ramón, y unes botellines depués na barra la sidrería, que siempres vienen bien pa confraternizar colos compañeros. Remembra-y que los talleres d’echar sidre nun precisen d’esperiencia previo, tan abiertos a asistentes de toles edaes y oríxenes y cellébrense tolos meses, de magar les siete y media la tardi, el penúltimu xueves de ca mes; ello ye, que’l prósimu 19 de xineru tenemos otra cita na idrería La Montera Picona de Ramón. Pues atopar más información en www.lasidra.as.

Nun ye preciso cuntar con conocimientos previos pa participar nos talleres práuticos d’echar sidre que se cellebren ca penúltimu xueves del mes na Sidrería La Montera Picona de Ramón

VER MÁS SEMEYES