Byggingarframkvæmdir á byrjunarreit
Bygging lögreglustöðvarinnar við Hverfisgötu hófst í árslok 1961, en húsið teiknaði hinn landskunni arkitekt og íþróttamálafrömuður, Gísli Halldórsson. Lögreglustöðin var tekin í notkun í áföngum eftir því sem byggingarframkvæmdum miðaði áfram. Á þessum stað var Gasstöðin áður til húsa, en ætla má að á neðstu myndinni sé verið að ryðja leifum hennar á brott þegar hinar eiginlegu framkvæmdir hófust. Á efstu myndinni er hins vegar líkan af lögreglustöðinni eins og menn sáu hana fyrir sér í upphafi. Ekki varð þó af því að lóðin yrði nýtt með þeim hætti og húsið austanmegin við lögreglustöðina var aldrei byggt. Sama á við um húsið á norðanverðri lóðinni, en ímynda má sér að Lögregluskólinn hafi átt að fá inni í þessum húsum. Ekki er heldur ósennilegt að ætla að annað húsanna hafi verið hugsað undir íþróttastarfsemi. Þá var ennfremur fallið frá því að byggja 6. hæðina og þakhýsi þar ofan á. Hér til hliðar má sjá Sigurjón Sigurðsson lögreglustjóra og Ásgeir Ásgeirsson forseta virða fyrir sér líkan af lögreglustöðinni, en myndin er tekin á Hótel Sögu og að öllum líkindum í boði sem Bjarni Benediktsson dóms– og kirkjumálaráðherra hélt sama dag og hornsteinn var lagður að lögreglustöðinni 1963.
SÍÐA
4
