NGĀ TAONGA REO MĀORI

CELLIA JOE-OLSEN

Ko te reo te mauri o te mana Māori, Ko te kupu te mauri o te reo Māori, E rua ēnei wehenga kōrero e hāngai tonu ana ki runga i te reo Māori, Ko te reo, nō te Atua mai.

TĀ HĒMI HENARE

He reo ā-ture te reo Māori ki Aotearoa nei, ā, i whakamanahia i te tau 1987. He ahakoa, kei te mōrearea tonu tana noho, ā mohoa noa nei.

Ko Ngā Tamatoa rātau ko Te Reo Māori Society, ko Ngā Kaiwhakapūmau i te Reo, i whawhai mā te nohonoho, mā ngā petihana me ngā kerēme ki te Rōpū Whakamana i te Tiriti mō te ako i te reo i roto i ngā kura me ngā teihana reo irirangi. I te tau 1972 i kohia e Ngā Tamatoa ngā waitohu o ngā tāngata 30 mano ki tētahi petihana. I konei, ka tīmata te whakarauora reo i ngā tutūnga puehu o te petihana. Ka tohungia hoki e rātau he Rā mō te Reo Māori, ka haere, ka haere, ā, nō te tau 1975 i eke hei Wiki mō Te Reo. Mei kore ake ēnei rōpū mautohe, e kore pea tō tātau reo e kōrerotia whānuitia.

Me titiro tātau ki ngā kohikohinga o Te Puna Mātauranga, kei kōnei te mahi a te taonga reo Māori. Inā kē te nui o ngā whakaahua tupuna, ngā whakaahua noa, ngā nūpepa reo Māori, ngā pūrongo, ngā pukapuka maheni, ngā mapi, ngā pukapuka, ngā kōrero ā-waha hoki.

Ahakoa te hanga o ngā taonga reo Māori, ko te Kohikohinga o te Reo Irirangi o Te Upoko o te Ika tētahi o ngā taonga mīharo. I whakatūngia te teihana e Ngā Kaiwhakapūmau i Te Reo i te tau 1980. Ko Te Upoko o te Ika te teihana mātāmua hoki o ngā reo irirangi i Aotearoa.

Ko ngā tino toki tonu o te ao Māori ētahi o ngā tini manuhiri ka tae ā-tinana atu ki te teihana rā. Nā Te Wharehuia Milroy te whakatauākī nei e kī ana, ‘Whakahokia te reo mai i te mata o te pene, ki te mata o te arero.’

Mēnā e ngākaunui nei koe ki tō tātau reo, me ngā kaupapa maha o te ao Māori nei, tēnā whakarongo mai. Whakarongo mai ki a kui mā, ki a koro mā. Whakarongo mai ki ngā mita o te reo, ki ngā kupu whakarei, ki ngā kupu whakanikoniko, ki ngā kupu whakarākai. Whakarongo mai ki ngā kaupapa o te wā. Whakarongo mai ki ngā toa o te ao Māori e kōrero ana mō ngā kaupapa maha, mō ngā take nunui ki a rātau. Ki te titiro koe ki ngā mauhanga, ka kite mai koe i te whānui o ngā Kohikohinga o te Reo Irirangi o Te Upoko o te Ika. He taonga puipuiaki.

DESCRIPTION Tama Te Huki (mauī) rāua ko Piripi Walker kei te teihana o Te Upoko o Te Ika i tōna rā pāpāho tuatahi, te 4 o Haratua 1987

MAKER / ARTIST Nā Merv Griffiths

REFERENCE Dominion Post Collection (PA-Group-00685: EP/1987/2071/8-F) Ko ngā Kohikohinga o te Reo Irirangi o Te Upoko o te Ika tētahi o ngā taonga reo Māori mīharo i roto i ā mātou kohikohinga.

Master tape archive awaiting digitisation. The Turnbull has over 100,000 items of magnetic media, mainly comprising music and oral histories. These are digitised for preservation and the physical items stored in controlled environments where temperature, humidity and air quality are moderated.