Naasi nga Ayat

Pampanunot iti Maikapat a Domingo ti Kuaresma-B: 2 Cron. 36:14-16, 19-23; Ef. 2:4-10; Jn 3:14-21

Ni Rev. Fr. Nolasco Madarang Pascua, Jr.

NO adda paset ti Nasantuan a Surat a mabalin a mangdagupdagup kadagiti amin a linaonna, isu daytoy: “Gapu iti kasta unay a panagayat ti Dios iti lubong, intedna ti Bugbugtong nga Anakna tapno ti siasinoman a mamati kenkuana saan a matay no di ket agbiag nga agnanayon.” (Jn. 3:16) Ayat. Pammati. Biag nga agnanayon.

Ayat. Ti nailansa, naibayog ken natay nga Apo Jesus ipakitana no asinotayo para ken Apo Dios ken no ania ti kabaelanna nga aramiden para kadatayo gapu iti ayatna. Dina impaidam ti kakaisuna nga Anakna ngem intulokna ketdi a matay tapno datayo ti saan a matay. Ni Apo Jesus ti ayat ti Dios!

Ania a kita ti ayat ti adda iti Dios para kadatayo? Kuna ni San Pablo: Iti nawadwad nga asi ti Dios, nupay nataytayon gapu iti kinasukirtayo, pinagbiagnatayo a mairaman ken Apo Jesus. (Ef. 2:4) Asi ti naisangsangayan a ramen ti ayatna kadatayo. (1 Cor. 13:4) Iti “naisalsalumina ken saan a matukod” (Ef. 2:7) a kaasina, inurnosna ti pannakaisalakantayo babaen ken Apo Jesus. Ita, saan laeng a mangtantannawag ti Dios manipud langit kadagiti mapaspasamak, ngem makiraman iti panagbiagtayo, iti kasta, ragsakna dagiti ragsaktayo, lidayna dagiti lidaytayo, pakaseknanna dagiti pakaseknantayo. Asideg ti Dios kadatayo; kaduatayo iti tiempo ti pannakariribuk, panagduadua ken pannakapaay. Makipagdaliasat isuna kadatayo a manggun-od iti pannakapatibker ti pammati ken pannakapasanto ti biagtayo. Ta kayatna a makipagungartayo iti Apo ket itungpalna ti pannakaisalakantayo.

Gapu met laeng iti dakkel nga asi ti Dios kadatayo, no agbasoltayo ket pilientayo ti sipnget, isu pay ti mangtulong kadatayo a bumangon, umasideg iti lawag ken mangabaruanan uray isu ti nasaktan. Ikkannatayo iti tiempo a mangamiris kadagiti riro, nagkurangan ken nagliwayantayo iti pada a tao. Itedna ti Tiempo ti Kuaresma a naidumduma a gundaway tapno agbabawitayo ken dalusantayo dagiti bagbagitayo, makikappia kenkuana ket irugitayo manen ti magna iti dalan ti pammati.

Pammati. Pammati ti tumutop a sungbattayo iti naasi nga ayat ti Dios kadatayo. Kas nabuniagan, patien ken ipagtangsittayo ni Apo Jesus a nailansa, naibayog ken natay iti krus, nupay saan a mairusok daytoy dagiti Judio ken minamaag met kadagiti Griego (1 Cor. 1:23). Daytoy a pammati ti nasken nga ipaduyakyaktayo, rambakantayo iti liturhia ken ibiagtayo babaen iti panangtungpal iti linteg ti ayat.

Nasken nga ammotayo ti linaon ti pammatitayo. Ngem dakkel met a riro no ipagaruptayo a makaanayen a pammaneknek a mamatitayo iti Dios no kabaelantayo a saritaen ti pammatitayo wenno yallatiw daytoy iti sabali babaen iti sao. [Kinapudnona, nadlawko – ket nagliday a panunoten – nga adu kadagiti nabuniagan a Katoliko ti di makaammo kadagiti basic prayers a kas koma iti “Amami,” “Ave Maria” ken “Gloria”; saanda a maikabesa ti “Mamatiak” a pakadagupan ti nakatolikuan a pammati, saanda nga ammo dagiti Pito a Sakramento a pagpussuakan ti grasia ti Dios ken dagiti Sangapulo a Bilin a bagnos iti panagbiag. Isu a napanunot daytoy numo a malaksid iti kadawyan a seminar sakbay ti rambak ti buniag, kitaek no makararag met laeng dagiti nagannak ti mabuniagan nga ubing ken/wenno dagiti kangrunaan a manganak kenkuana, wenno ti mabuniagan a mismo no nataengan daytoy, dagiti basic prayers ken maikabesada ti “Mamatiak,” dagiti Sakramento ken dagiti Sangapulo a Bilin. (Maipakaammon daytoy kadakuada no umayda makiuman para iti buniag.) Ngem saan a garantia ti pannakaammotayo kadagiti kararag, sakramento ken bilbilin tapno agbiagtayo a natudio ken makaay-ayo iti Dios; ta nakapuytayo a mangipakat iti naimbag nga ammotayo iti aramid. Aggiddiat ti pammati nga ipaduyakyaktayo iti sao ken ti pammati a makita kadagiti aramidtayo. Kasta met a ti pammati ken ni Apo Jesus saan laeng a pannamati wenno panangawat a kas pudno nga isuna nayanak, nangaskasaba, nagtutuok, natay ken nagungar. Uray ammotayo ti amin maipanggep kenkuana ken dagiti panursurona, no saantayo met nga agbiag segun iti ammotayo, makunatayo kadi a pudno a mamatitayo? Ti pammati ket maipanggep iti biag, ket balbaliwanna ti biag. No ti pammatitayo ammona ti agayat, napudno dayta a pammati. Ta dagiti aramid ti ayat ti mangpaneknek iti kinapudno ti pammati. (San. 2:18)

Biag nga agnanayon. Maysa laeng ti dalan a maited kadatayo nga agturong iti biag nga agnanayon: ti pammati ken ni Apo Jesus a nailansa, naibayog ken natay iti krus. Saan nga immay ti Apo tapno mangukom ngem tapno mangisalakan. Nupay kasta, saanna nga ipilit ti panangawattayo kenkuana a kas Mangisalakan kadatayo. Ngem datayo a mismo ti mangukom kadagiti bagbagitayo no ditayo patien isuna. Apay koma a ditayo patien ken awaten ni Apo Jesus no umay ti pannakaisalakan babaen laeng kenkuana? Apay koma a pilientayo ti agbiag iti kinaulbod, wenno iti kinadakes, wenno iti sipnget, no ammotayo a mapukawtayo met ti biag nga agnanayon?

Ti asino man a mamati pilienna ti lawag ket agtalinaed iti lawag. Balbaliwan dayta a lawag isuna. Iti napabaknang nga ayatna, surotenna ti Apo a naibayog iti krus, ket nakasagana a maibayog met, kayatna a sawen, manglipat iti bagi tapno idatonna nga agserbi. Mayarig isuna iti maysa nga agtutubo a di mangururnos iti bagina. No sumrek iti pagadalan, nakulkol ti badona, narugit dagiti kukona, saan a nasagaysay ti buokna, naalsem ti angotna ta no dadduma di pay agsukat. Ngem iti maysa a bigat, nakigtot dagiti kaeskuelaanna ta simrek a nadalus ken plantsado ti aruatenna, nadalus dagiti ramayna, baro ti pukisna, nabanglo ti pay-udna. Gayam, addan ay-ayatenna. Gapu iti ayattayo iti Dios, kalikagumantayo ti agbalbaliw tapno maikaritayo iti ayatna. Gapu iti ayattayo kenkuana, ragsakentayo a tungpalen ti nakemna kas panagserbi kenkuana. Gapu iti ayattayo kenkuana, ditay mauma nga agaramid iti naimbag para iti pada a tao. Ket no maibayogtayo iti krus ni ayat, mangnamnamatayo a makipagungartayo ken ni Apo Jesus iti biag nga agnanayon.—•