Møt heltemodige kvalpar

Under Måløydagene blir det barneshow med Paw patrol.

– Vi har hatt barneshow i ei årrekke, og det er noko som skapar mykje glede og aktivitet. Så det å ha eiga underhaldning for ungar er noko av det viktigaste vi gjer, seier Anne Grethe Strand i Måløydagene-komiteen.

Paw patrol er kjend frå barneTV og historia handlar om dei seks heltemodige kvalpane Chase, Marshall, Rocky, Rubble, Zuma og Skye. Men det å skulle arrangere slike show kostar, i alle fall når ein skal få inn profesjonelle aktørar, slik ein gjer når Paw patrol står på scena.

Sparebanken Vest og Sparebanken Sogn og Fjordane har difor gått saman og sponsar komiteen med 80.000 kroner til barneshowa.

Det blir show med dei heltemodige kvalpane i Paw patrol både laurdag og søndag. Men underhaldninga for dei minste startar allereie fredag. Då er barnehagane invitert til å delta på eit eige barnehageshow. Der blir det eit sjørøvarshow. I tillegg til heltemodige kvalpar kan ein også møte Brannbamsen Bjørnis og maskotane til Sparebanken Sogn og Fjordane, Kåre Bjørn og Elin Ekorn. Gjennom heile helga vil også tivoliet med sine attraksjonar vere på plass i Måløy.

Her fra fjorårets show i teltet på Måløydagene. FOTO: FRIDE AUDUNSDOTTER WESTVIK