udal aldizkaria
1743an euskara hutsez idatzitako gutun bat aurkitu da Oiartzungo udal artxiboan Oiartzungo zirujauak herriko bikarioari Fontainebleutik bidalitako gutuna da 1743ko urrian Fontainebleutik (Frantzia) Oiartzunera gutun bat bidali zuen orduan herriko zirujauetako bat zen Auger Greciet hazpandarrak. Jose Fagoaga Oiartzungo bikarioari zuzendu zion gutuna, "bailaratik kanpo joateko udalbatzak emandako baimena luzatzen" laguntzeko. Honaino, ezer harrigarririk ez. Baina gutun hori euskara hutsean idatzi zuen Grecietek. XVIII. mendean korrespondentzia pribatua euskaraz zela agerian utziz.
2021eko ABENDUA • 274. ZENBAKIA
Ability Digital Award-a jaso du Udalak
Oiartzungo Udalak ABB Ability Digital Award saria eskuratu du, erakunde publikoen arloan. Oiartzungo Udala azpiegituren kontrol eta modernizazioaren arloan egiten ari den lanarengatik eman diote saria.
"Ustekabeko" aurkikuntza Iago Irixoa Ereiten Kultur Zerbitzuetako historialariak topatu zuen gutuna udal artxiboan, "ustekabean", beste informazio batzuk egiaztatzen ari zela. Oiartzungo Udalak "poz" izugarria hartu du aurkikuntzarekin, "Oiartzun eta Euskal Herriaren historia eta gure hizkuntzarenean jar dezakeen aletxoarengatik". Eskutitza lapurteraz idatzia dago, Greciet lapurtarra baitzen. Akten hustuketa, euskara hutsean Euskara hutsez idatzitako gutun hau aurkitu izana "kasualitatea" izan da, baina Oiartzungo Udalak euskararekiko duen konpromisoa ez da hala. Hori dela eta, 2014a geroztik udal akten hustuketa euskara hutsean ari da egiten. Momentuz, 1658 eta 1742 arteko akta liburuen hustuketa egin da. Helburua orri guztien laburpen deskribatzailea eta agertzen diren pertsona eta toponimoak jasotzea da, bilaketak errazteko.
Labore Oarso, Oarsoarrak saria
Labore Oarsok Oarsoaldeko Euskara Batzordearen Oarsoarrak saria jaso du, 2016an martxan jarri zenetik euskaraz funtzionatzeko izan duten jarrerarengatik. Saria Pello Jauregi antxotarrrarekin batera jaso zuten Laboreko kideek.
Xabier Lete XXXIV. Prosa eta Poesia lehiaketako sariak banatu dira idazle gazteen artean Xabier Lete XXXIV. Prosa eta Poesia lehiaketako sariak banatu ditu Oiartzungo Udalak. Dagokion sariaz gain, irabazleetako bakoitzak Jokin Mitxelena ilustratzaileak propio berarentzako sortutako marrazki bat ere jaso du. Lan guztiak liburuxka batean argitaratuko ditu Udalak. SARITUAK: Prosa: 1. saila: Elaia Lasa eta Xuhar Larretxea. 2. saila: Luka Ellenrieder eta Kattin Garai. Aipamen berezia: Irati Zabalo. 3. saila: Oier Frantsesena eta Udane Bereau. Aipamen berezia: Maddi Susperregi. 4. saila: Nara Susperregi eta Xuhar Sarasola. Aipamen berezia: Leire Suarez. 5. maila: Uxue Etxeberria eta Lide Larrea. Aipamen berezia: Mattin Gelbentzu. 6. maila: Malen Frantsesena eta Mattin Etxebeste.
Poesia: 3. saila: Aitor Agirre eta Laiene Castellano. Aipamen berezia: Mireia Sagarra. 4. saila: Ekhi Arizmendi eta Joane Irigoien. Aipamen berezia: Ilargi Ziaurritz. 5. saila: Jurgi Arbelaitz eta Unai Wolfram. 6. saila: Lohizune Telletxea eta Ane Garmendia. Aipamen berezia: Maren Aginaga.
Oiartzunera etorri berriei, harrera
Duela urte eta erdi, bertan behera utzi behar izan zituen Udalak Oiartzunera etorri berrientzako harrera saioak COVID19arengatik. Orain, berreskuratu egin da eta Oiartzunen erroldatu berri direnak eta lehendik hemen bizi direnak elkartu dira.
Mikel Mendizabalen funtsaren akordioa
LANIN blogak 3.000 bisita baino gehiago izan ditu
Gabon hauetan, oparitu euskara(z)!
Udalak eta Mikel Mendizabalek hitzarmena sinatu dute, honen ikusentzunezko funtseko 147 dokumentu Oiartzungo Ondarearen datu basean txertatzeko. Dokumentu horiek guztiek Oiartzungo ondarearekin zerikusia dute: kantagintza, bertsogintza, herriko ohiturak, ondare kulturala... Mendizabalek urtetan herriko ondarea bildu eta zabaltzeko egin duen lana aitortu nahi du Udalak, eta egileari eskerrak eman dohainik herritarren eskura jartzegatik. Hitzarmen honi esker, Oiartzungo ondarea are handiagoa izango da.
Oiartzun LANIN blogak urtebete bete du martxan abenduaren 1ean. Oiartzungo enpresa ttiki eta ertainetan euskararen erabilera gehitzeko eta normalizazioa bultzatzeko egitasmoaren tresna bat gehiago da bloga, intereseko informazioa helarazten duena. Urtebetean, 3.000 bisita baino gehiago izan ditu. Horrez gain, LANIN podcasta ere eskaintzen da, Oiartzun Irratiarekin elkarlanean, hilean behin. Azkeneko saioak 62 entzule izan zituen. Helburua, hizkuntza-kudeaketari buruzko informazio praktikoa ematea da.
Gabonak ate joka ditugun honetan, Oarsoaldeko Euskara Batzordeak euskarazko produktuek katalogoa berria argitaratu du, etxeko txikienentzako euskarazko opariak egitea errazteko. Musika, liburua, informatika, filmak, jostailuak... eskaintza bildu da bertan. Haurtzaro Ikastolako, Elizalde Herri Eskolako eta Elizalde Institutuko LH 1. eta DBH 1. mailetako ikasleek eskura jaso dute katalogoa. Bestela, osoa www.oarsoaldea.eus webgunean eskuratu dezakete informazio gehiago interesatuek. Oparitu euskara(z)!
!
aski prexk aldizkaria
JAIONE DRAGDØMMER: “Argazkilaritzan intuitiboki eta era autodidaktan egin dut dena"
Klixk!
Jaione Dragdømmer argazkilari gisa txokoa egiten ari da Euskal Herriko panorama fotografikoan. Egiten dituen lanek artearekin lotura handia dute.
Joxe Iriarte Bikila-k idatzi duen azken liburua aurkeztu du herrian, bera kide den Alternatiba alderdiaren eskutik: Eman Zesarri Zesarrena. Euskal Herriko gatazka politikoaren inguruko saiakera da idatzi duena.
Jaione Dragdømmer izen artistikoarekin iritsi zara argazkilartzaren eta kulturgintzaren mundura. Zer dago izen horren atzean? Badirudi izugarrizko istorioa dela, baina besterik gabekoa da. Nire argazkietan ere nabaritzen da paisaia nordikoak gustatzen zaizkidala, eta besterik gabe, Googlen ameslari nola ote zen norvegieraz begiratu nuen. Dragdømmer agertu zen eta polita iruditu zitzaidan. Ez dakit norvegieraz, baina estetikoki gustatzen zait ø hori. Esanahia ere polita da. Formakuntzaz, berez, ez zara argazkilaria, nahiz eta ari zaren zure tokia egiten disziplina artistiko horretan. Nolalpa izan da prozesu hori? Hori ere kasualitatez iritsi den zerbait izan da. Betidanik gustatu izan zait argazkiak ateratzea, eta atera eta atera, honaino eboluzionatu dut: hobetzen, saltseatzen... Autodidakta izan naiz. Ez daukat oinarri teknikorik argazkilaritzan. Dena intuitiboki eta modu autodidaktan egin dut. Pixkanaka eboluzionatu dut estilo honetara. Aukera batzuk iritsi zaizkit, nik gehiegi bilatu gabe, eta horiek aprobetxatzea izan da kontua, eta aurrera segitzea. Gaur egun, telefono mugikorrak argazkilaritzarako gailu ari dira bihurtzen. Zuk, argazkilari gisa, zerekin egiten duzu lan? Nik argazki guztiak telefono mugikorrarekin ateratzen ditut. Bere garaian erosi nuen reflex kamera bat, baina gaur egun reflex horrek kalitate eskasagoa dauka nire mugikorrak baino. Gaur egun telefono mugikorren kamerak oso onak dira, eta zoragarria da. Jaitsitako aplikazioekin editatzen ditut lanak. Gauza konkretu profesionalak lortu nahi badituzu agian kamera reflex batekin ateratarako argazkia teknikoki hobea izango da, baina nik bilatzen dudan argazki mota egiteko, telefono mugikor bat nahikoa da. Ez dut faltan ematen kamera hobeago bat edukitzea. Zure argazkiek badute hoztasunaren marka propio bat. Zergatik bilatzen duzu estetika hori? Normalean, oso erraietatik abiatzen naiz. Gustatzen zaidanari ateratzen diot argazkia eta editatzen hasten naizenean, editatze horrek eramaten nau alde batera edo bestera, nire aldartearen arabera: sentitzen ari naizena, entzuten ari naizen abestiren batek inspiratuta, ikusi dudan zeozerrek... Denak dauka eragina. Askotan, nire burua ulertzen dut argazki horiek editatzen bukatzean. Argazkilaritzak nire burua gehiago ezagutzen laguntzen dit. Kurioski, horrela ateratzen zaizkit. Iluntasun eta drama hori gustatzen zaizkit, egunerokotasunean ez banaiz ere halakoa. Ezkortasun horrek laguntzen dit nire burua ezagutzen; pozak baino gehiago. Natura eta paisaia aldetik toki aproposean bizi al zara bilatu nahi duzun efektu estetikoa aurkitzeko? Bai. Gainera, negua nire garai gogokoena da! Egun grisak gehiago gustatzen zaizkit argazkiak ateratzeko; zeru urdin batek baino aukera gehiago ematen ditu editatzeko garaian. Leku aldetik ere, Oiartzun eta ingurua zoragarriak dira; dauzkagun mendiak-eta. Gehienetan, ez da urrutira joan beharrik. Begiratzen ikastea da, detaileetan erreparatzea. Edertasuna eta gauza bereziak leku guztietan topatu daitezkeela iruditzen zait.
Esan al daiteke Gaztezulo aldizkaria eta sare sozialak garrantzitsuak izan direla zure ibilbide artistikoa egiteko orduan?
Bikilaren azken liburuaren aurkezpena
Sare sozialek gaur egun sekulako eragina daukate, curriculum gisakoak dira, baina sarean. Jendeak zutaz ikusten duen lehenengoa izaten da. Gaztezulon musika kritikak idazten hasi nintzen eta, azkenean, bertan lan egiten bukatu dut. Egia da izen bat ematen dizula, jendeak zugan konfiantza gehiago izateko. Guztiaren arteko batuketa bat izan dela uste dut. Azkenaldira, zenbait libururen azal bihurtu dira zure argazki batzuk. Prozesu horiek nolakoak izan dira? Mikelen (Ayllon) kasuan, berak idatzi zidan argazki jakin bat gustatzen zitzaiola eta ea nahi ote nuen Zoriontsuak izatea aukeratu genuen liburuan ateratzea. Horrela sortu zen harremana, nahiz eta gero Elkarrekoekin jarraitu. Goizalderen (Landabaso) Krakovia-ren kasuan, Ereinetik deitu ninduten zuzenean, esanez Goizaldek argazki jakin bat nahi zuela azalerako. Mikelek erabilitako argazkia urteak dira atera nuela, eta kuriosoa da nola batzuetan oihartzun bat etortzen den, ez duzunean pentsatzen argazki horrek beste bizitza bat izango duenik. Goizalderen kasuan, Bordeleko bidaia batean ateratako argazkia da. Ferminen (Etxegoien) Totelak liburuko azalak ilusio berezia egin dit, Ereinetik deitu nindutelako propio eskatzen argazkiak ateratzeko. Ideia batzuk eman zizkidaten -mikrofono bat, ausentzia eta aulki bat agertzea nahi zuten-, eta argazki ezberdinak egin nituen. Enkarguz egin dudan lehenengo azala izan da, eta erronka izan da nire buruarentzat. Kuttuna dut horregatik, zerotik sortutako proiektua da, bestela ziurrenik ez ziren sortuko argazki horiek. Besteak, atera nituen ateratako momentuan, eta kito. Gero, saldu besterik ez duzu egiten. Esku artean baduzu kontatu daiteken proiekturik? Oraingoz, ez daukat deus. Azkena egin dudana musika kontzertu baterako azala izan da, Dabada salak kontaktatu zuen nirekin. Gustatuko litzaidake disko baten azala egitea, ni oso musikazalea naizelako. Baina datozen bezala hartzen ditut gauzak.
Kultur ekitaldia haurren aurrean
Haurren haurren, helduak heldu egitasmoa girotuz eta Euskararen Egunari indarra eman asmoz, kultur ekitaldia antolatu dute Udalak, Ttur-Tturrek, Haurtzaro Ikastolak, Elizaldeko Guraso Elkarteak eta Urmendi Haur Eskolak. Herriko kulturgileen emanaldiak eta haurrentzako jolasak izan ziren.
Lartaunen gabonetako kontzertua
Lartaun abesbatzak gabonetako kontzertua eskaini zuen aurreko asteburuan, Kontzejupean. Herriko abesbatza osatzen duten kantariek euren ahotsik ederrena eta errepertariorik zainduena atera zuten kalera.
INSTAGRAM: @ezlekuak.
TELEFONO BALIAGARRIAK: - Udaleko informazio bulegoa: 943 49 01 42 - Udaltzaingoa: 943 49 33 11 - Taxia eta taxibusa: 943 49 14 74 - Elorsoro udal kiroldegia:943 49 25 52 - Manuel Lekuona udal biblioteka: 943 49 38 64 - Osasun Zentrua: 943 00 65 05 - Urmendi Haur Eskola: 943 26 00 86 - Elizalde Herri Eskola: 943 49 01 93 - Haurtzaro Ikastola: 943 49 16 59 - Oiartzun Irratia: 943 49 37 11 - Helduen Heziketa Iraunkorra-EPA: 943 49 00 48 - Bidez Bide/Bidelagun programak: 690 769 466
GUARDIAKO FARMAZIA: Abenduaren 10etik 16ra
Egunez: Gorostiaga • Lartzabal, z/g • 943 49 43 48 Gauez: Escudero • Biteri, 16 (Errenteria) • 943 68 62 21