Malva y el papapallabres / Pintar-Pintar

Malva y el

papapallabres Marisa L贸pez Diz - Elena Fern谩ndez

Direutores de la coleición: Ángela Sánchez Vallina Ester Sánchez

Cola ayuda de la Conseyería de Cultura y Turismu del Gobiernu del Principáu d’Asturies Primera edición: xunu de 2010

© de los testos: Marisa López Diz

© de les ilustraciones: Elena Fernández

© d’esta edición: Editorial Pintar-Pintar Proyeutu: Editorial Pintar-Pintar

Piñole 1, 33011 - Uviéu www.pintar-pintar.com Testu: Marisa López Diz Ilustración: Elena Fernández Diseñu: Pintar-Pintar Comunicación Imprime: G.Rigel, S.A. - Asturias D.L.: ISBN: 978-84-92964-05-5 IMPRESO NA UE

Nun se permite la reproducción total nin parcial d’esti llibru, nin el so tratamientu informáticu, nin la tresmisión en nenguna forma nin por nengún mediu, yá seya ellectrónicu, mecánicu, por fotocopia, por rexistru o otros medios, ensin el permisu previu y escritu de los titulares del copyright.

Malva y el

papapallabres Marisa L贸pez Diz - Elena Fern谩ndez

“Pa qu’enxamás nos falten les pallabres nin les ganes de contar”.

Marisa López Diz “P’Andrés, Touba, Ángela Fatu y Marta.

Na acordanza de xuegos y cuentos compartíos en Ranón”.

Elena Fernández

Dalgo mui raro taba pasando nel colexu estos últimos díes: toles pallabres de los llibros taben desapaeciendo misteriosamente ensin que naide supiera’l motivu, dexando los llibros en blanco. En pocu tiempu, formóse un revuelu tremendu en tol colexu y nun se falaba d’otra cosa.

Al principiu, la reciella taba la mar de contento porque nun tenía qu’estudiar, ya que tolos llibros taben en blanco, y amás nun podíen manda-yos deberes pa casa. Pero la cosa complicóse cuando foron a la biblioteca y tolos cuentos y llibros d’aventures quedaron vacíos tamién. ¡Vaya rollu!

Malva taba dispuesta a resolver aquel asuntu anque nun sabía per ónde empezar. Pasó tol fin de selmana pensando, dándo-y vueltes a la cabeza a ver si se-y ocurría daqué. El llunes pela mañana, de la que llegaba a la escuela, vio a la direutora del colexu que falaba con dos policíes. ¿Había un lladrón na escuela? ¿Quién podía tar robando les pallabres de los llibros? ¿Cómo diba resolver la poli aquel misteriu tan raru?

Aquella mañana tol mundu taba nerviosu. Nes clases naide atendía a les esplicaciones de los profes y toos falaben pelo baxo faciendo hipótesis y tratando d’aldovinar quién yera’l lladrón. Hasta los profes taben despistaos, trabucábense a cada momentu y confundíen toles coses: a la profe de Matemátiques nun-y salíen les cuentes; el de Ximnasia mandába-yos llevantase cuando teníen qu’agachase y al revés; la de Llingua confundía los suxetos colos predicaos y el de Conocimientu del Mediu nun daba una en clavu. ¡Vaya desastre!

Nel recréu tolos neños y neñes axuntáronse nel patiu del colexu pa ver cómo solucionar aquello. El más charrán de toos que, nel fondu, yera un medranosu, dixo qu’él nun diba falar más por si-y robaben les pallabres. Por supuestu, los más vagos y folgazanes de la escuela –que yeren unos cuantos– tuvieron d’acuerdu, los que cuasi nunca falaben porque yeren mui apocaos nun-yos importó y el restu, por combayar, siguieron el mesmu exemplu. Asina que tol mundu aplaudió quedando declarada una güelga de pallabres.

Pero Malva sabía perbién qu’aquella nun yera la meyor solución nin la más intelixente.

–¡Nun ser fatos! –dixo–. ¡Esa nun ye manera d’arreglar les coses!

Pero naide retrucó porque nun podíen falar y, amás, yá empezaren a tarazar el bocadillu y nun teníen ganes de perder el tiempu con aquel asuntu. Ensin embargu, dempués que comieren pasaron tol recréu sentaos nes escaleres cola cabeza ente les manes y muertos d’aburrimientu. ¡Aquella güelga de pallabres taba resultando ser un rollu y nun ficiera más qu’empezar!

Taben en clase de Plástica cuando picaron fuerte a la puerta. Yera un de los policíes que viera Malva falando cola direutora pela mañana. Yera altu, con un bigote mui grande y con cara de pocos amigos.

Díxo-y a la maestra que quería face-yos dalgunes entrugues a los escolinos y sacando una llibretuca púnxose a interrogalos: –¿Dalgunu de vosotros vio daqué raro estos últimos díes na escuela?

Toos callaron como afogaos.

–¿Naide? –dixo con una vozona ronca.

Silenciu otra vegada. El policía paecía impacientase enroscando’l bigote ente dos deos. Como naide dicía nada entrugó-y a la maestra: –¿Y usté?, ¿nun vio nada que la ficiera sospechar?

–Nada –repostió ella–. Nun sé quién pue ser el culpable de que tean desapaeciendo toles pallabres de los llibros.

El policía, al que nun-y gustara un res que los escolinos nun-y contestaren, díxo-y más baxo a la maestra: –¿Y nun sedrá dalgún de los sos alumnos pa gastar una broma? ¡Lo que-yos faltaba! ¡Agora yeren toes y toos sospechosos del robu de les pallabres!

MARISA LÓPEZ DIZ

Foto: Luis M. Suárez

Ye llicenciada en Filoloxía Hispánica, Especialista n’Asturianu y tien la capacitación de Gallego-asturiano.

Yá dende neña-y prestaba lleer cuentos y imaxinaba llueu histories qu’escribía en llibretines secretes.

Poquitín a poco, foi creando coles pallabres un mundu máxicu nel que too yera posible y dalguna de les sos aventures acabó cobrando vida nos llibros.

Forma parte del dúu Mestura, con dos discos publicaos (“Agua del Norte”, 2006, y “Poemes de Carambelu”, 2008).

Recibió abondos premios, ente ellos, el Premiu de la Crítica d’Escritores d’Asturies 2007.

ELENA FERNÁNDEZ Nací en Madrid y ellí estudié Belles Artes.

Amás de pintar y dibuxar, siempre prestóme abondo lleer y mirar llibros guapos una y otra vez.Tengo muncha suerte porque vini a Asturies y equí quedé a vivir. Agora disfruto de los llibros xunto al mio fíu Andrés y amás pásolo perbién ilustrando dalgunos d’ellos.