Sudipta

bayu pramana ring manusa mabuat pisan anggén nincapang sahananing kaluihan sané wénten. Yéning manusa nénten égar lan seed pisan nincapang kaluihan sané kadasarin antuk bayu pramana sané becik, pastika tatujon sané kaaptiang nénten prasida kapanggih. Santukan bayu pramana gumanti kasujatian manusa sujana. Nganutin Sad Kértih silih sinunggil ipun mapangapti pisan sida kapanggih Jana Kértih punika manusa sané sujana.

Mangda kapanggih manusa sujana pinaka Jana Kértih manut panglimbak révolusi industri 4.0, patut pisan kawangun parikrama sané seneng melajah. Sakadi sané munggah ring Niti Sastra mangda setata ngamargiang takitakining séwaka guna widya. Mangda selantang tuuh setata malajah sané kabaos long life éducation. Manut kadi daging geguritan Selampah Laku mangda sida setata “nandurin karang awak”. Sané anggén nandurin padéwékan wantah guna widya mawit saking seneng melajahin sastra. Parilaksana puniki manut pakibeh abad-21, kamargiang antuk parikrama literasi. Tatujon Gerakan Literasi Nasional (GLN) punika anggén nincapang lan nguripang pamargi literasi ring kauripan puniki sané kakawitin saking kulawarga, sekolah lan ring krama, anggén bantang pamargi séwaka guna widya mangda sida nincap karahayuan lan kasukertan ring jagaté puniki.

Literasi ring kulawarga kamargiang olih guru rupaka antuk parilaksana seneng ngwacén lan sida nyelagang galah rikala nyirepang alit-alitnyané antuk parikrama ngwacén satua. Taler mangda ring gria madué perpustakaan keluarga utawi ngarya pojok baca, sané kagenahang ring kamar tamiu, balé daja, balé dauh, balé dangin utawi genah becik masandekan lan mapupul sareng kulawarga. Literasi ring sekolah kamargiang olih guru pangajian rikala jagi ngawitin ngajahin ring kelas. Punika taler kamargiang ékstra sastra, jurnalistik lan téater pinaka galah lan genah para sisya melajah lan nglimbakang indik literasi ring sekolah. Literasi ring krama kamargiang ring wewidangan désa adat mangda sida nganutin program gerakan literasi masyarakat. Pamargi literasi ring wewidangan désa adat nganutin Peraturan

Daérah Provinsi Bali Nomor 4 warsa 2019 parindikan Désa Adat ring Bali, Pasal 25 butir l, irika munggah indik kapustakaan lan taman bacaan. Puniki matatujon mangda kawangun perpustakaan ring wewidangan désa adat sajebag Bali. Taler punika munggah ring Undang-undang Nomor 43 warsa 2007 parindikan perpustakaan, kabaos irika mangda pemerintah pusat, pemerintah daérah lan masyarakat mautsaha ngawéntenang taman bacaan masyarakat lan rumah baca anggén nincapang budaya seneng ngwacén. Yéning sampun ring désa adat kawangun perpustakaan sané kapiara becik, pastika pamargi literasi sayan nglimbak mangda budaya nyastra sané sampun katami saking nguni sida mamargi antar lan rahayu. Taler ring pura, utamanipun ring Kahyangan Tiga, kagenahang buku indik sastra agama, mangda rikala para pamedek nyantosang pamargi pamuspaan sida nagingin galah punika antuk ngwacén buku. Sujatinyané pamargi budaya literasi patut pisan kadabdabin saking mangkin antuk bayu pramana sané égar lan seed pisan mangda kapanggih manusa sujana. Ngiring aptiang Bali literasi anggén midabdabin révolusi industri 4.0, mangda kapanggih Bali rahayu prayojana mahottama sujana (bayu pramana).

I Nyoman Agus Sudipta

embas ring Karangasem tanggal 29 September 1984. Makarya dados guru ring SMK Negeri 1 Abang Karangasem. Kakawianipuné kawedar ring Bali Post (Bali Orti) miwah Pos Bali (Médiaswari). Ngamolihang jayanti Gerip Maurip saking Pustaka Ekspresi antuk cakepan sane mamurda Ngrebutin Abu

Korupsi

Mula saja masebeng manis Kema mai ngaba barang né malengis Apang setata idup nagih tis Kanti nyemak gaé mapipis

Lega….? Lega keneh cainé né jani Tusing kéh makeneh gati Ulian dot ngaba férari Kanti nyemak gaé korupsi

Sakit…. Sakit kenehé né jani Ulian ninggalin pamerintahé iteh ngastiti Liu anak korupsi nanging tusing mahukum mati