prosa liris nirguna

Damuh Sasih Karo

/1/

Dingin. Sasihé saputin wengi kelem ring song langit dedet. Wénten ambu masawang kuning ngetélang damuh ring tungtung dui. Pendak sarauhé antuk canang awak asebit sari sari. Magurnita gambelan sepi angkihan gumi. Ratu, napi majanten tedun kisi-kisi? Déwék ébekin tuna siu nénten kawilang. Petékpeték titiang bulihan damuhé sané sempiar ring gumi alit. Telas petékan, titiang engsap ulung mabrarakan.

/2/

Majanten kuusan toya ring tukad langit masepih sanga. Ngaton nénten tinonton, Ratu ngembahang sarwi pitakén sukil. Titiang nyapnyap nguber pasaur sané kasawur ring pasir wukir. Telas sekaré mayang kutang duduk, lawaté kutang sakéwala nugtug. Braya sraya kanti nyemu ngemu kayun. Nampek-nampekin titiang, ngalungsur margi nénten brangti. Kijapan ai nénten ngicalang dingin sasih karo. Wénten anget ngetél saking panyingakan surya.

/3/

Kantun iriki néwek ngugah ngugah pangkah. Ratu, mémé bapa sastra nambung sawat lawat lawat. Titiang ngulehang pamor putih ring enjung sepi. Sangu niténin kaang landep watu bulitan selem. Ring dija patut ruruh rengreng ngribis sané makta gatra saking Ratu? Ring dingin sasih karo, damuh néltél ring muncuk dui. Titiang paling nugtug katungkul.

Damuh Angsoka

/1/

Wénten kembang angsoka labuh ring nataré Ratu. Sané ajapa nénten uningin. Minab nyaratang sepihan sabeh sané sempiar mabrarakan ring langité. Minabang leleh nyantosang damuhé sané néltél tan pagantulan. Petengé makebat Ratu, nyaputin tangkahé duk kosekan. Pamargin hyang sasangka kadi andegang, kéwanten titiang tan purun ngandupang. Titiang tan purun ngandupang.

/2/

Yakti déréng uningin Ratu. Saluir sekar mangolét nyujur tawang pitu. Pecak irika mambu merik ayub kritisan sayong. Sakaluir bebungah nyelémpoh linglung nyerihin ngalub pandan wangi. Ring bulakané jelegé mapi mapi sirep mirengang jelatik binal. Nénten wénten genah kingking iriki sasamén gumi. Makardi antuka lengut sangkan wantah Iratu. Sangkan wantah Iratu.

/3/

Minab titiang mapi-mapi uning sakancan rurung. Mobabang naya mangda jenar sakancan suwung. Kéwanten damuhé nénten medal saking naya. Iriki sadaweg manahé butek dados sipeng. Manik maketél tan masuara umung. Ratu, mustikan prana sané meneng tan kauningin salawas lawas. Moyanin sarwa lawat sané ngelut kutkut. Damuh damuh samben, kruna kruna sampun sineb leplep. Sampun sineb leplep.

Damuh Lawu

/I/

Saluir dingin sané nyusup saking téjan iratu, ngembahang kasubagian sumar marebuk wewangén. Titiang katak nengkul ring batan akah sekar rijasa. Togog gajahé marengut kanten mageguyuan. I Sekar Padma durung mekar. Paturu mapadu tungtung pusuh. Duh, déwa ratu, basa napi jagi anggén titiang ngidepang kesiuhan anginé mirir ngampehang lelungidan. Mogi jenek irika ring lebu sang parama suksma.

/II/

Wénten basa basita ring tengah dalu. Kisi-kisi nujah kuping titiangé sané sué mamongol. Damuh lawu ngulapin titiang saking kadohan. Marawat ratu tan pagantulan. Nénten ugi pacang masesambat, raos boyané jerihin embas saking makudang-kudang pikayunan. Sinah kacacad raris kasepékang. Duka napi malih sané luihan saking tan pakanti. Rowang musuh saru pisan. Sraya kanti

maya maya.

Nirguna

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan “Bulan Sisi Kauh”