Lesson 4

‘Nimahsela Thlarau Thianghlim chu in chunga a lo thlen hunah thiltih theihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang’ a ti a (Tirhkohte Thiltih 1 : 8)

Thihna hnehtu Isua Krista hnung zuitute kan ni. Ani chuan harsatna leh hreawm tinreng tuarin thlan a nithum phuma a awm hnuin thihna hnehin a rawn tho leh a. Ama zarah ropui taka ngamtu kan ni.

Tirhkohte Thiltih 1 : 8 ah hian Luka chuan Isua’n a zirtirte hnena a thutiam a rawn tarlang a. Keini Isua Krista ringtu te hi zirtirte anga Lal Isua chanchin tha hriatpuitu ni a eng chhuak zel tur kan ni.

HEI HI KAN HRIAT RENG A PAWIMAWH- NGHAH HI PATHIAN RUAHMANNA ZING AMI ANIH VE CHANG A AWM THIN. RAWNGBAWLNA NUNG TAK KAN NEIH THEIH NAN TIRHKOHTE THILTIH A KOHHRANHO ANG HIAN PATHIAN THILTIHTHEIHNA LEH A HNATHAWH HUN CHU KAN NGHAK VE TUR A NI.

Luka 24 : 49 ah chuan Isua chuan a zirtirte chu thitihtheihna a thuam an la nih tur thu a hrilh a, Tirhkohte Thiltih-ah he a thutiam hi a zirtirte chuan a taka an chan thu kan hmu a ni. Tirhkohte Thiltih khohhran ang a ‘ hnehtu kohhran’ nih kan duh chuan min hruaitu Isua Krista thuzawmin a hnung kan zui tur a ni.

• Thlarau Thianghlim chenchilhna kan hrechiang ang a, rinawm takin a thu min zirtir te kan zawm ang.

• Thlarau Thianghlim thiltihtheihna kan hrechiang ang. Isua-a rinna nghat tlatin inngaitlawm leh inpumpekna nen kan tih turte kan ti thin ang

• Isua Krista chanchin tha hriatpui tute kan nih angin min koh chhan hlenchhuak turin a thiltihtheihna zawng zawng keimahni a chet tir kan phal tur a ni.

Isua chuan a zirtirte chu thiltihtheihnaa thuam an nih hma loh zawng rawngbawl tura pen chhuah a phal lova. Thlarau Thianghlim thiltihtheihna chu chakna dawnna satliah mai a ni lova, chu thiltihtheihna chuan huaisenna te, mahni inrintawkna te, mi dangte dinhmun chiang taka hriatthiamna te leh thuneihna te a keng tel vek a ni. Heng thilpek zawng zawng te hi Amah zuitute chuan an rawngbawlna hlenchhuak turin an mamawh a ni.

Tunah chuan Bible kaltlangin hnathawh dan tur kawhhmuh kan ni a. Tunlai Kristian thenkhat te chu an rawngbawlna hlenchhuak tura Pathian kal khalh mai te pawh an awm a ni. Kan hriat reng tur chu lo nghah tlat hi Pathian ruahmanna chi khat a ni tih hi. Tirhkohte Thiltih kohhran ang hian rawngbawlna hlawhtling tak nei tur chuan Pathian hun ruat leh thiltihtheihna kan nghak tur a ni.

Isua chuan khawvel hmun tinreng a chanchintha hrilh darh a nih tur thu min hrilh a, Jerusalem atanga in tanin Judai ram leh Samari ram khaw tinah te leh kawlkil thleng pawha chanchin tha hi puan darh a nih tur thu a sawi a ni. Jerusalem a Juda ho sakhaw ngaihsak zingah bul tanin, Samari mi te leh Samari hnam inthlahpawlh ho zingah puan zar a nita zel a ni. Pathian chuan a chanchin tha darh zau zelna turah hian hnam, chi, khawsak dinhmun emaw a nu leh a pa thliarhranna a nei lo. Kan chhungkua, kan hnathawhna hmun, Sikul leh khawtlangah te hian chanchin tha a lo darh zau zelna tura hriatpuitu kan ni tur a ni.

Tirkohte Thiltih 1 : 8 a kan hmuh ang hian ropui taka ngamtu nih hi kan tihtur a ni. Rinna nasa zawk leh Thlarau Thianghlim thiltihtheihnaa inthuamin he khawvel hi Isua tana ti danglamtu leh a chanchintha hriatpuitu kan ni thei a ni.

Tawngtaina :

Kan pa Pathian, nangmah zuitu ni turin min thlang tih ka hria e. Thlarau Thianghlim min tiam avangin lawmthu ka hrilh a che. I thiltihtheihna keimaha a awm avangin lawmthu ka hrilh a che. Lalpa Isua, he khawvelah hian I chanchin tha hriatpuitu leh nangma tana kal chhuak turin min pui ang che. Ropui taka ngamtu ni turin min siam la, chakna min pe ang che.

LIEUTENANT ROSE SINANA Tanzania Territory

Lt. Rose hian Community Development leh Social Work ah Diploma Course a zir mek a, Pasal neiin fa 4, fanu pakhat leh fapa phir 3 a nei. Shukrani Training College, Mbeya ah Development Officer hna a thawk mek.