Lesson 7

Nangin inbeihna atan chuan chaknain ka taiah mi hreng si a:mi rawn beitute chu ka hnuaiah I tudawl ta a.

Kar kalta khan ka thian Heleni nen kan titi a. Heleni chuan a hnathawhna hmuna thil awmdan te a sawi a. Damlohna avangin a kar liamta chhung khan chawlh la in a hnathawhna ah a kal thei lova, a hnathawhpui pakhat chuan damlo tak tak pawh nilo, hna thawh tur tam lutuk tlansan a ina awm mai mai angin midang a lo hrilh a, Heleni chuan amah an hriatsualna avang chuan a ti thinrim hle ani. A chanchin a sawi chuan min khawih hle a ka hriatthiampui. Chutih hunlai chu ka chhungte zingah diklo taka puh a ka awm lai ani bawk nen, Heleni chanchin chuan ka thinur a ti sosang thar hle ani.

Rin loh takin Heleni chuan, ka dinhmun atan hian min tawngtai sak rawh tiin he Bible chang Ephesi 6:12-13 thu hi min hriat thar tir a: “Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh,van hmunahte thlarau sualho awm te an ni zawk e. Chuvangin, ni tha lovah chuan in do zawhna tur leh, in tih zawh vek hnu pawh a in din theihna turin, Pathian ralthuam famkim chu la rawh u.” Chu Pathian thu chuan min kaiharh zawk mai. Engemaw chen chu ka ngaihtuahna thalo in ka chhungte lakah thinlung bawlhhlawh siam in ka khawhmuh chu a lo tinu a chu chuan Heleni chanchin sawi pawh kha min hmuh fiah tir theilo alo ni. Helenin chu Bible thu a chhiar rik chuan Bible thusawi chu ka lo hrefiah ta ani.

Heleni nen chuan kan tawngtai dun ta a, kan hmelmate hmangaih a tanpui (Luka 6:35) thei tur leh min tinatute hmangaihna thinlung min pe turin Pathian kan au dun ta a ni. Thuneihna pek kan nih tawh angin (Matthaia 12:29) thim thuneihnate chu Isua Krista hminga kalbo turin thu kan pe ta zawk ani.

Infiammi chu ka ni teh chiamlo, amaherawhchu infiamna bulthum diktak erawh ka hre ve. Kan elpui turte ruahmanna siam dan hriat a pawimawh khawp. Chu erawh ka tum ber ani lemlo. Ka thlur bing tur chu, engtinge ruahmanna siam ila kan chak ang tih ani. Rinna kawng pawh hi chutiang deuh tho chu niin ka hria. Kan hmelmapa hi kan thlir ber nilo mahse a chetzia erawh hriat a tha. Kan hmelma lo hneh tawhtu Isua Krista hi kan thlir ber ani fo tur ani.(Heb 2:14-15). Krista kan en tlat chuan kan vel a thil awm te kan hmufiah thin.

ISUA KAN THLIR TLAT CHUAN, KAN BUL VELA THIL THLENGTE CHU FIAH TAKIN KAN HMU THIAM DAWN A NI.

A hmelmate leh Saula lakah Lalpan a chhandam hnu khan Lal Davida chuan Sam 18 hi a ziak anih kha. Sam 18 phen a thawnthu awm kan chhiar chuan, Davida kha a hmelmate leh lal Saula lakah nasa takin a talbuai ani tih kan hre thei (I Samuel). Saula khan tiduhdah hle mahse, a chipui a nih miau avangin lal Davida khan, Saula kha hmelma dangte nen angkhatin a dah ngai lo. Lal Davida kan tan entawn tlak anihna tamtak zinga pakhat chu hei hi ani – a khawhmuh a fiah tlat. Lalpa a en tlat thin. Dinhmun a hmachhawn tinrengte Lalpa hnen a thlen thin. Vawikhat erawh a khawhmuh a fiahlo, Bethsebi chungchangah, nimahsela Zawlnei Nathan'an a mit a tih men sak. Hei pawh hi mitha kan vela, thudik sawi ngam an awm pawimawhzia tichiangtu, zirlai tha tak ani.

Sam 18 chhung thu ah hian kan mit tifiah a Isua en tlat tura minpui theitu pathum ka hmu:

1. ‘Aw Lalpa, ka chakna, ka hmangaih a che (V-1) – Isua Krista nen a kan inlaichinna a pawimawh hmasa ber, amah kan hmangaihna. Inbeihna, indona emaw hnehna lam ani lo. Bultanna tinrengte chu Krista hmangaihna ah a innghat tur ani. Lalpa hmangaihna au chhuahpui chunga lal Davida in he Sam ziak bul a tan ang hian. A ziah zawm zelna ah pawh lal Davida chuan rinawm tak a thinlung hawng chungin Lalpa nen inlaichinna nghet tak an nei ani tih a hriat ani. Davida khan Lalpa Pathian a hmangaih ani.

2. Lalpa lo chu tunge Pathian awm ni? (v-31) – Hnehna a chan zozaite avang khan lal Davida kha invaivunga han chapo ve viau awm tak ania, nimahsela ropuina zawng zawngte kha Lalpa a hlan fo thin. Pathian thianghlimna leh amah kan tih phah hialna khawpin Pathian ropuina leh thiltihtheihnate uar takin a puangchhuak thin. Englai pawhin Pathian a dah chungnung ber fo thin.

3. Ka kutte hi ral kap turin a zirtir thin a (v-34) - Pathian in min hruai thin a, innghahna tlak anih zia Davida hian min kawhhmuh thin. Paula chuan I Korinth 10:13 ah chuan “Mihring tuar theih ang chauh lo chu… tlan chhuahna kawng a siam nghal zawk ang.” Pathian chuan min buatsaihin min thuam thin. Isua Krista meuh pawh kha rawng a bawl hma in ni 40 chhung zet thlalerah a inbuatsaih a, a tawpah setanan a thlem zui lehnghal anih kha.

Isua nen kan chendun chuan fiahna emaw thlemna kan pumpelh hauh lovang. Pathian chuan min thlem ngai lovang, chu chu setana hna ani, Pathian chuan min fiah thin. Thlemna tinreng in tawh hunin lawmna hlirah ngai rawh u, chu chuan chhelna a siam, tiin Jakoba chuan a ziak anih kha (Jakoba 1:2-3). Paula chuan, hlawhtling taka indona tha bei tur chuan tuarchhel angai ani (2 Timothea 4:7). A thu hmanga harsatna hmachhawn dan Pathian in min kawhhmuh thin. Heta thu a tih hi enge? Thu chu Isua hi ani (Johnana 1:1). Isua bul a kan awm chuan hnehna bul maiah kan awm tihna a lo ni. Chuti a lo nih chuan min hmachhawn turin enge lo kal tih velah kan buai angai tawh lovang. Pathian chu engkim chunga thuneitu leh engkim thununtu anih zia Davida khan a hrechiang hle.

Chutichuan, Davida chuan kan khawhmuh a fiahna turin, a tlem berah kawng 3 min zirtir a lo ni; Lalpa hmangaih a, Lalpa dah chungnun fo leh engkim chunga thuneitu anih hriat reng. Petera chuan ‘Ngaihven ula, Fimkhur rawh u; in khingpui diabola….. nghet taka awmin amah chu do rawh u’ (I Peter 5:8-9) tiin fimkhur angaih zia a ziak. Bible in engtinnge a sawi tih hre turin Helene-i'n min hrilh ka ngai a, anin min kai harh ta a ni. “THU” kan tih KRISTA a thiltihtheihna min hmuhfiah tir leh turin. Indo turin Lalpan chakna in min thuam thar ani tih min hriattir turin, min beih tumtute chu anin min hneh sak ta ani.

Tawngtaina :

Isu, ka hmangaih che, ropuina zawng zawng chang tlak I ni. Thuneihna chelhtu inih avangin lawmthu ka hril a che. Khawhmuh fiah tak nei fo turin min pui ang che.

LIEUTENANT JOHANNA SAMUELSSON Sweden and Latvia Territory

Lieutenant Johanna hi kum 18 a nih in a piangthar a. Emil nen in neiin fa duhawm tak tak pahnih, Malte kum 4 mi leh Signe kum 1 mi an nei a ni. Johanna leh Emil te hi Sweden khaw thlanglam tuipui kam a awm Halmstad a Corps hruaitute an ni. Johanna hian Sipai Pawl kaltlanga Pathian rawngbawl hi a ropui a ti a ni.