Hnehtu aia Ropui

Krista hmangaihna ata chu tuin nge min then thei ang? Hreawmna in emaw, lungaihna in emaw, tihduhdahna in emaw, tam in emaw, saruakna in emaw, hlauhawmna in emaw, khandaihin emaw min then thei a ngem ni? Nangmah avangin nilengin thahin ka awm thin tih ziak ang khan. Ni love, heng zawng zawngah hian min hmangaihtu Isua Krista zarah ropuia ngamtu kan ni.

Thihna te, nunna te, vantirhkohte, lalna te, thil awmsa te, thil lo la awm tur te, thiltihtheihna te, sanna te, thukna te, thilsiam dang reng reng pawhin kan Lalpa Isua Kristaa awm Pathian hmangaihna ata chu min then thei lovang tih ka hre si a tih a sawi hma in Paula hian Rom 8:35 ah thil thalo chi hrang hrang mihringte nun a kan tawh thin chu sawi chhuakin , chungte chuan Krista hmangaihna ata chu mi then thei angem ni? Tiin a zawt ani.

Isua Kristaah chuan Hnehtu aia Ropui kan ni. Pathian kan lama a tan chuan tuin nge min do thei ang (chang 3 na). He thudik pawimawh tak hian fapa Isua kaltlangin hlauhawm tinrengah Pathian chuan min tanpuiin min veng ani tih a nemnghet a ni. A fapa Isua kan tan a hlan si chuan kan mamawh tinreng te chu min pe lovang ngem ni?

Kan nun hian chona tam tak a hmachhawn thin a,nimahsela chung te chuan min ti beidawng mai lovin min ti chak zawk a, Isua Krista zara chakna leh theihna kan neih te chu tarlang thei turin min pui ani.

A chang chuan kan thil tihsual avangin Pathian kan tilawm lo thin a, amaherawh chu a hnen a kan kir leh chuan min ngaidam a, a thil tihtheihna a tihchaka awmin kan rinna pawh alo chak sauh thin ani.

‘ISUA KRISTAAH CHUAN HNEHTU AIA ROPUI KAN NI. PATHIAN KAN LAMA A TAN CHUAN TUIIN NGE MIN DO THEI ANG?’

Mathhaia 16:18 ah chuan ‘Nang Petera i ni tih ka hrilh bawk a che, he lungpui chungah hian ka Kohhran ho ka rem chho vanga, mithhi khaw kulh khawngkharte chuan chu chu a ngam lovang’ tiin min hrilh a.

Church (Kohhran) tih thu hi Greek tawng ‘Ecclesia’ tih atanga lak a ni a, a awmzia chu fuankhawm emaw kalkhawmna atanga kohchhuah tihna a ni.

Kohhran chu mi tamtakin a a siam ani a, mitin te chu rinna nghet nei, Isua Krista hmangaihtu Thlarau Thianghlimin a hruai leh a chenchilh te an ni. Thlarau Thianghlim thiltih theihna chuan thlemna leh hmelma te hneh thei turin min pui a, pumkhatah min siam in hnehna nun Isua Krista avanga kan neih chu puangchhuak thei turin min siam ani.

Pathian hmangaihna ata chu tuin nge min then thei ang? Kalvari tlanga Kross a thihna kaltlangin Isua Kristaah chuan ropuia ngamtu kan nih avangin tuman min then hrang thei lo. Pathian Kohhran kan nih angin rinna nghet neih kan mamawh a, a thawhlehna thiltihtheihna ah chuan Isua Krista a nun dan zuitu kan nih angai ani. Chu chuan ropuia ngamtu ni turin min siam ani.

Tawngtaina:

Lalpa, chakna min pe la, kan Kohhran malsawm la, Setana hneh tura hun harsa kan paltlang angin leh Isua Krista zuitu rinawm tak ni thei turin min pui ang che.

TERESA MAPONGA Mozambique Territory

Teresa hi Territorial Commander tana ziaktu hna thawk mek ani. Maputo a cheng ani a, Pasal neiin fanu pathum an nei a, zai hi a ngaina em em ani.