Lesson 5

Hringnunah hian indona chi hrang hrang, thlarau indona a ni thei a, eng emaw kawng zawng tala inbeihna kan tawk reng thin a ni. Inlaichinna kehchhia, chhungkuaa dam lohna, kan chunga thil diklo titute avanga thinurna emaw ngawlveina, rilru buaina leh lungngaihna te kan tawk fo thin. Harsatna leh buaina kan tawh te hi kan sawi seng kher lovang.

Tunlai khawvelah rilru lam harsatna tawk kan pung chho nasa hle, he buaina hi taksa lam indona hruai tel ve reng a ni. Rilru chiaina, mualphona, hlauhna leh beisei tur reng reng nei lova inhriatna hi thil thar a nita lo. A tak ngei a tawngtu tam tak an awm a, kei ngei pawh hi ka fihlim lo a ni. Kum 20 vel ka nih lain rilru buaina hian min chenchilh tlat a ni.

Chhungril lam indona nasa tak hi keimahniah zung a kaih ngheh em avangin kan hmelma pa chuan thiam takin he dawt thu hmang hian min bei thin a ni. Ruk hmang chuan ru tur leh tihlum tur leh tichhe turin kan rilru leh ngaihtuahna hi a rawn bitum chat mai a ni (Johana 10 : 10)

Pathianin a ngaihsak lo che, tuman an hmangaih lo che, I ngawlveina hi I sim thei tak tak chuang lovang, I nuna thil tha tinreng hian rawih lam a pan zel dawn, Pathianin in chhungkua a venghim lovang, Pathian hmantlak pawh I ni tawh lo, Pathian hmangaihna dawng tlak I ni tawh lo tiin heng dawt thu hmang hian min bei reng thin a ni.

Nimahsela chanchin tha hriat tur kan nei reng a chu chu hei hi ani “ Tin, thutak in hria ang a, thutak chuan bawih a ban ang che u” Johana 8 : 32 Pathian thutak chuan dawt thu avanga kan sal tanna lak atang hian min chhuah zalen thei a ni. Harsatna leh buaina karah pawh Pathian lam kan en tlat ang, a thu min hrilh te vawng tlatin thutak chuan amaha kan nihna min hriattir ang. Thutak chu hei hi a ni, a fa duh takte kan ni a, min ngaihsak reng thin tih hi. Kan hma min hruaisak a, kan tan a awm reng a, kan thatna turin engkim min thawhsak thin. Kan fel vang leh thil tih that avanga chhandam kan ni lova, amah kan rinna avanga

khawngaihna a chhandam kan ni. Pathian thutak chuan nun tam min neihtir a tum a ni.

Kan hmelma, dawt hmanga min beitu kan hmachhawn huna ralthuam thiltithei ber chu thutak mak tak hi a ni. Indona hmachhawn tur chuan Pathian thutak hi kan thinlungah kan vawng reng tur a ni a, laksawn kan phal tur a ni lo. He thutak hrefiah tur hian thil mak danglam kan mamawh kher lo. Pathian laka rinawm tlat hi kan tih tur chu a ni mai a ni.

'KAN NUNA INDONA A LO THLEN HUNIN HEI HI KAN HRIAT RENG A PAWIMAWH - PATHIAN CHU EN TLATIN, A FATE KAN NIH A SAWI HRE RENGIN AMAHA KAN NIHNA DIK TAK CHU I VAWNG RENG ANG U.'

Johana 8 : 31-32 ah chuan ti hian Isua’n a sawi a ‘ Ka thu a in awm reng chuan ka zirtirte in ni tak tak ang. Tin, thutak in hria ang a, thutak chuan bawih a ban ang che u’. Pathian thu zirtirna vawng reng tur chuan Bible kan chhiar thin ang. Tawngtai, midangte nena inpawlhona leh Pathian biakna kan thlahthlam tur a ni lo.

Kan rilru leh ngaihtuahna pawh thil tha lo tinreng lakah kan venghim tlat ang a hmelma dawt thu a eiral tir kan phal tur a ni lo. Pathian laka kan rinawm tlat chuan thutak chu kan innghahna lungphum pawimawh tak a lo ni ang. Thutak hi hmelma beih nana ralthuam pawimawh ber a ni.

Dawt thu hmanga hmelma pain min beihna hmun ralmuang lo leh hlauhna hmunah hian Pathianin amaha kan nihna min hrilh ai chuan kan huaisenna te hmachhuan kan tum ve fo thin. Amaha kan nihna Pathianin min hrilh chu kan rinna kan hauh tlat chuan thil engkim hi a danglam vek thei a, nun a inthlak danglam vek thei. Pathian ram tana sipai huaisen an lo piang chhuak thei a he khawvelah hian hlimna leh beiseina kan thlen thei a ni.

Hun khirh leh harsa kan tawh chang te, inlaichinna a lo kehchhiat lai te leh ngawlveina in min thlem mek lai te hian Pathian thutak kan hriatchianna chuan kan thinlung hi ti danglamin kan thil thlir dan pawh a thlakthleng vek thei a ni.

Pathian thutak chuan nitin nun hman thiamna, zalenna leh nun tam min pe thin. Indona pakhat mai min hnehtir lova, buaina leh harsatna tinreng ropui taka ngamtu min lo nihtir zawk thin.

Eng ang buaina leh manganna pawh tawk ila Pathian thutak chuan chung harsatna atang chuan min chhuah zalen thei a ni tih hian kan rilru leh thlarau te a tichakin a tinghet deuh deuh dawn a ni.

Tawngtaina:

Hmangaih Pathian kan thinlunga nunna thutak min pek hrechiang turin min pui ang che. Kan hriatna chuan min chhuah zalen se, buaina tinreng karah pawh hnehtu aia ropui ni thei turin min tanpui ang che. Isua hmingin kan dil a che Amen.

CADET REBECCA HOWEN New Zealand, Fiji, Tonga leh Samoa Territory

Cadet Rebecca – i hi Reflectors of Holiness Session-ah Officer ni turin a training mek a, mi dang nena inbiak tawn nuam ti mi a nih avangin thuziakna hmun bikah thu a ziak fova, ram chhung leh tualchhung zaipawl member a ni bawk.