WIENKELTJES IN ZAOMSLAG 't Is â meer as zestig jaor geleejn dà zôvee wienkeltjes op Zaomslag 't goed deejn. Dao bin dur vee van uutgeroeid maor oek 'n stik of wa hrôôter hehroeid. Veerstraote Merinus Galle die was timmerman en maokten dur nog à wà van. De buurtwienkel van Van Langevelde Ko verkocht van alles en dà dee die ZO. Jan Fraoien'ove beter bekend as Jan Schoen, z'n kleinzeune zit noe op 't Plein, je moet 't um maor is naodoen. Van Westen Herenmode en Kleermaokerieje zit noe oek op 't Plein wan z'n zaokje dâ wier wà te klein. Arjaon de Vos, buurtwienkel, hieng mee kar-en-pèrd nest de deuren om zo z'n agosie uut te leuren. Kapper Buuze was de heren- en daomeskapper. Zit noe mee alles in Terneuzen das oek dapper. De Fuiter, koleboer, uut de Veerstraote leverde kolen van vroeg tot laote. Teeuwtje de Blaoi, waohenmaoker was z'n stiel, maokten alles, à was 't maor 'n wiel. Deurwaorder, buurtwienkel, nog maor is êên, daovan ao je dur op 't durp wel êên an iedere têên. Duvestein, drank verkocht ie, hieng nao 'd Axelsestraote ver'uuzen, dao verkocht ie oek drogisteriespullen en verhif vôô de muuzen. 't Noordstraotje Daor ao je Slotemao boek'andel en drukkerie, dao liep je nie zomao vôôbie. Jan de Krieger mandemaoker was z'n vak. Mao knikkers kon je der oek kôpen, voor een stuuver 'n êêle zak. Jannao van de Velde aod een krujenierswienkeltje in die straot en iew dao vee mènsen aon de praot. Een schoenwienkel van Jan de Vos, die verkocht der lustig op los. Pau Dêê, behang, verf en drogisterie, end ie dee dao nog van alles bie. Joris Wisse's slaoherieje mee slachtplaots en al, die slachtten de koeien zô uut de stal. 'Aomelink de Sparkrujenier verkocht oek melk der bie, hieng nao 't Plein, 't wier Meermarkt en je moet et noe is zie. Koepoortstraote Wisse die was schoenmaoker van z'n vak en zelf was tie van de slaoherstak. Timmerman Keiser verkocht een plankje latje en een spieker en zô, dochten wudder, wier Keiser apmao rieker. J' ao daor oek nog een krujenier dà was Ante 'Aok wad à je daor oek kocht 't was altied raok. 't Stoofstraotje Daor ao je Wullem de Fuiter die verkocht pannen en potten, en was lôôdgieter, dao viel nie mee te spotten. En Lensen, die was vrachtriejer en krujenier, wa d'n bedrief.
Mao dad ao, hlôôf ik, nie vee om 't lief. En oek 'n postkantoor, dao zurgdn van Vessem vôôr Bram Bastieng was slaoher, die verkocht vlêês van êêl vet tot êêl maoher. Polderstraote Daor ao je bakkerieje Molzaoke, da was niet zo'n kwaode. Z'n zeune was reiziger in snoepjes en sukelaode. J' ao daor oek Kees Oppe die verkocht mosterd ,zelf gemaokt en serviesgoed aot ie oek in z'n zaok. Je kon werkeluk om van alles vraohn, ie leurden 't uut mee de kruuwaohn. Van Biezen, àwêêr een buurtwienkel in de straote, verkocht van alles van 's morgens vroeg tot 's aovens laote. De daomes Duvestein verkochten mooi 'oeien en lekkere wijn. Wanne Joris verkocht drukjes en snoep en dà was zeker hêên troep. Oele dà was 'n wèrme bakker, die was oek altied êêl vroeg wakker. 'Aok ten Kaote aod 'n wienkeltje in tabak, das noe een hrôôte bank, dus een êêl ander vak. [Foto Bakkerij Oele] Terneuzensestraote Daor ao je Dieleman de timmerfabriek en dao wèrkten altied een êêle kliek. Leen'outs was krujenier. Verkocht van alles behalve bier. Bie Kee van Wanne, een soort supermart, dao koch je voo een cent van 't schiemblad. Stokvis en appelsienen die laohn vôô 't raom mao 't schiemblad dà gaf eur eihenluk naom. En mee al dur krujenierswaoren iew ze 't vol vele jaoren. Dekker was wêê zo'n timmerman en die kon der oek wà van. Kees Rouw dao kon je kleren laoten maoken, à je tenminste an centen kon geraoken Geelhoedt, slaoherieje à jaorenlange, die was vôôr een verbouwing nie bange. Knijf, garage en fietsenwienkel in de straot stieng vôôr iederêên paraot. Van der Baanstraote Bie Stoffels kon je kachels kôôpen of een nieuwe fiets, mao vèdur ao je daor êêmao niets. Achteraf ao je nog Van Èrentals, die brocht overà de vracht. Maor aod oek den lekkersten ijsco, lekker zoet en lekker zacht. Plein Markusse van de smederieje, besloeg de pèrden zodà je dur wêê mee kon riejen. Van Breen, krujenier, maokten zelf boter, dà wist iedere kleine kôôter
Heel'oedt àwêê een wèrme bakker, vroeg nao bed en oek vroeg wakker Kapsalon Lènsen vôô daomes en vôô heren hieng 't z'n zeune oek leren. Daon Riemes, vèrve en behang en dà was in ieders belang. Bakker Boer àwêêr 'n krujenier, die tel ik een êêleboel ier. Almekinders, textiel, dekens, laokens en slôôpen. Van alles kon je daor op dà gebied kôôpen. Gezusters Heel'oedt,verkochten koffie en kaos en waoren lekker udder eihun baos. Keetje Schieman serviesgoed dà was geslaogd, maor ze wier deu de kinders vaok geplaogd. Keetje Pupuntje noemden ze eur en ze liep dikkels vôô niks nao de deur. De Ruischer, electriciteit en lampen, die ao mee concurrentie te kampen Kees 'Aok verf ,behang en textiel, je snap nie dat er nog wà te verdienen viel. Fraoienove, slachterieje, hieng oek an uus slachten en à tur vee waoren dan mos je mao wachten. Wullemsen dà was de pèresmid, ik dienk à tao nog brood in zit. Daor ao je oek een fotograaf, Aordewerk Loe dao hieng je mee al je foto's nao toe. Cornelissen petrolieboer, die maokten elke weke z'n toer. Hotel De Appel dà was een echt hotel. Je kon dur drienken maor slaopen oek wel. Risseeuw dun bakker op den oek, die ao lekkere brôôdjes en oek wel is koek. Kees 'Aok mee z'n zuster die zaoten in textiel. Mao Keesje docht dat er as badmêêster meer te verdienen viel. Café De Vlasbloem ei nooit ard gelôôpen, oewel à je dur toch altied bier kon kôôpen. Dan ao je nog bakker Westerwêêl, die verkocht oek nog veel. Wannes Fraoien'ove groenten en fruit, die leurden z'n waoren liengs de deuren uit. Marie Wullemsen dà was de supermart, dao kreeg je altied je part. Dan nog 't café van Van der Veken. Die ao de zaok oek goed bekeken. Zaogstraote De gezusters Scheele, krujenier maor ze naoiden oek kleren. En à je nog jonk was kon je dur oek nog wà van leren. Rein de Krieger was juwelier, mao verkocht oek wittekruuspoeiers ier. Putter de Kok verkocht radio's en anverwante zaoken. Dao zou die noe nie vère mee geraoken. Drieschouwenstraote Stoffels, snoep en krujenierswaoren, en dàd è tie gedaon vele jaoren. Janna van de Vrede een echte buurtsuper verkocht klompen en snoep.
En misschien oek nog wel iets vôô de soep. Diaconiestraote Ko van Cadzand, die noemden ze Ko van Giet, verkocht snoep en vèdur weet ik ut niet. Kees Jansen was vrachtriejer mao verkocht oek gas. Die zurgden dur vôô dà 't altied wèrm in uus was. Dao zat oek nog annemer Houg, Piet 'Oog zeijen ze dao tegen. Die nam alles an in wind en in regen. Riemensstraote Jan en Siene van de Vrede die dao mee krujenierswaoren op de voorgrond ziin getreden Rozemarijnstraotje Slaogerieje den 'Aomer zat dao mee z'n zaok. Die sloeg bie 't vèrken altied raok. Jan de Zeeuw, lôôdgieter was z'n vak, potten en pannen was een andere tak. En Stout'aomer die schoenmaoker was, kwam nogal is van pas. Van de Velde Siene ao een krujenierswienkeltje en praots vor tiene. Dao zat oek nog een groenteboer, Wannes van Doorn mao dà ei je, dienk ik, à hôôrn. Driesje Keizer en Maotje Deurwaorder, krujenier. Al wà je nôôdig ao dà von je ier. Mietje Riemes, textiel en handwerkmateriaol, dà verkocht ze allemaol. 'Eintje 'Oog, eihenluk Houg geheten. Elektrische artikelen en lampen, je moet 't mao weten. De bakkerieje van Moens was daor oek in 't straotje en die was nie vies van een praotje. 't Kiezelstraotje Dao zat nog de Pooter, die was koleboer Om dao te weunen was 'n êêlen toer. Axelsestraote Johantje Wisse, een electriciteitszaak, die ao wà voor ieder z'n smaok. Kees Keizer was schilder, z'n vrouwe dee de drogisterie. Dà kon allemaol derbie. Bram Dêê, textiel en wol, dao'van was z'n wienkel vol. Chris van de Velde, annemer en metselaor. Z'n zeune stong nog lang voor ons klaor. Jan 'Aomelienk was bakker. En dà was een echte rakker. De slaoherieje van Wisse dà was een kruus wan die slachtten eihenluk liever an uus. Piet van de Velde, buurtwienkel, laoter de VéGé. Al die buurtwienkels wà moe je der mee. Jan van Pier, àwêê 'n metselèr 'ier. Slabbekoorn dao kon je bloemen en planten kôôpen Dao mocht je dus nie zo vère vôô lôôpen.
Dao was oek nog een Stoffels die kon de geweren maoken en de jaogers konden dao van udder buit afgeraoken. Wullem 'Outzaoger verkocht fietsen en j'n ouwen wier dao hersteld, en in de werkplaots wieren nog à verhaolen verteld. Kees 'Aok dà was de meulenèr, oek mee je graon moes je niet vèr. Joris De Vos, schoenen en zadelmakerieje, à je naor een ander hieng was tie nie blieje. Jacob Wisse, drukkerieje, boekhandel en bibliotheek. Speelgoed en serviesgoed overà waor à je keek. Nico Van Antwèrpen nog à 'n buurtwienkel. Dao was tur een voor iedere boerekienkel. Brouweriestraote Mietje Fraoienove, krujenierswaoren en 'n snoepje. Vôô 't wienkeltje lag een êêl klein stoepje. 't Achterstraotje Jan van Langevelde, krujenierswaoren, laoter wier dà Henk en Kaotje. Ik kocht daor al mun boodschappen en maoktn dur hèrn een praotje. Neeltje Peterolie, 'k weet nie eur echte naom. Mao mee dur peterolie maoktn ze faom. Korte Delft Daor ao je 't Goese Pietje,mee z'n zaok. Die aod êêl wa kinders , 't was daor altied raok. Voor ank an dit gedicht bin behonnen ènk bie mènsn van rond de tachtig êêst inlichtiengen ingewonnen. Zô ziin me dan noe Zaomslag rond. En êêl misschien àt 'r èrgus nog een wienkeltje stond. Dà bin'k dan verheten. Maor ik moe toch oek nie alles weten? Zaamslag, mevr. K. Dobbelaar, april 2007.