Handuwaran

Jasper Cabarte

Naa ka kanunay nag sige rag tambay sa’kong handurawan Grabing ka anyag ang imong kahayag ako nasulawan Usa ka bahandi di pwede matandi sa mga bulawan Demonyong dako apan pag abot nimo ako nabulahan

Gamitong espasyo sa atong palasyo kay ang kawanangan Wala tay utlanan sa atong adtuan bisan asa taman Imong kahumot sa atong palibot magsilbing timaan Nga gikan paka harden sa langit puno ug tanaman

Bag.o na amgo nga dili tu damgo mga panahon Dakong pasalamat ikaw nahimamat naa ka karon Usahay masipog, malibog sa imong dala nga gahom Di maisplikar ug di masukod ang imong katahaom

Atong lantawon daplin baybayon ang mga bitoon Maminaw sa balod samtang na anod ang atong kahilom Ni halok nato lamdag nga buwan sa kangitngiton Sa imong gakos ako nalumos sa lawm nga gabi-on