Fjord Expedition sine beste fjordtips

Øyvind Stuvik har vakse opp tett på fjorden på Jelsa, og blei vidare godt kjend med fjordane på tvers av regionen som motorpassar hjå Rødne. I 2006 starta han opp selskapet Fjord Expedition som hobby, noko som vaks vidare til det som i dag er hans heiltidsjobb. Her tilbyr han guida kajakkturar og utleige av kajakk og utstyr frå Jørpeland, Forsand og Lysebotn. I 2021 lanserte han også turar frå heimbygda i Suldal der han tek med seg grupper inn Økstrafjorden, i tillegg til å leige ut båt og kajakk. Det siste tillegget til selskapet var i fjor då dei også lanserte kajakkturar i Bergen, som kan kombinerast med krabbefiske og utandørs matlaging. Me tok praten med Øyvind for å høyre litt meir om hans opplevingar i Suldalsfjordane.

Kva er di beste oppleving på fjorden i Suldal?

– Mi beste oppleving er nok å få ein ei- gen liten båt med 9,9 HK som 15-åring på Jelsa. Eg hadde utallige timer i denne på fjorden. Det var ein enorm frihetsfølelse å ta seg ein tur i båten, fiske og vera med vener.

Kvifor valde du å satse i Økstrafjorden?

– Økstrafjorden er ein uoppdaga skatt, og det finst ikkje ein flottare stad å padle i området, spør du meg. I Grønneviksholmane kan du gli roleg gjennom trange sund der berre ein kajakk får plass, og du passerer jettegryter og blåbærlyng før du er ute i den opne fjorden igjen. Ein kan gjera strandhogg på eit svaberg mange stadar.

Økstrafjorden er den perfekte staden å padle i kajakk med lite vind og bølger, reint vatn og ikkje for mykje folk. I ein kajakk glir ein lydlaust fram, og kjem tett innpå alt dyreliv som ørn og sel. Fjorden har også mykje historie med moglegheiter for å sjå rester av både istid og tidligare busetnadar, i tillegg til at ein får flott utsikt mot dei gamle, små gardsbruka.

Har du eit tips til nye fjordentusiastar i Suldal?

– Økstrafjorden er mitt tips, men det finst flotte andre stadar som Hylsfjorden og området rundt Marvik. Felles for alle stadane er ro, skjerma omgjevnadar og nydelig natur. Sjå i kartet, finn turstiar og utforsk. Eit tips dersom ein kjem med bil og ikkje har moglegheit til å dra på fjorden er å sjå i kartet etter turløyper som går i strandsona. Ofte kan ein nå flotte svaberg eller ei bortgøymd strand berre ved å gå seg ein tur. Når du først har funne deg ein stad langs fjorden så er det berre å ta med seg ein liten hov og ei fiskestang. Lunsjen ligg som regel og ventar rett utanfor svaberga i form av små strandreker, strandkrabbar, makrell, lyr eller torsk. Min favoritt er å ha med salt, peppar og en klatt smør. Ingenting slår nyfiska makrell steikt på eit lite stormkjøkken.