Stef Stauffer: ‹Chräiefüess› by Zytglogge

CHRÄIEFÜESS Stef Stauffer

Foto: Lukas Maeder

Grosses Lob für den fulminanten Erzählstil. Die witzigen Formulierungen, gespickt mit ungewohnt frecher Schreibweise der Fremdwörter, lassen ‹Chräiefüess› zu einem unvergesslichen Lese-Erlebnis werden. Dr Stef ihri Büecher müessti me kapitelwiis am Radio ghöre! Dodo Hug

Stef Stauffer Geb. 1965 in Bern, lebt heute im Onsernonetal und in Zürich, arbeitet bei der ‹Tessiner Zeitung›, als freie Journalistin und als Schriftstellerin. ‹Marthas Gäste› war ihre erste Publikation bei Zytglogge. Mittlerweile hat sie insgesamt sieben Romane veröffentlicht, u.a. die Mundart-Trilogie ‹Hingerhang›, ‹Bluescht› und ‹Chräiefüess›.

Stef Stauffer

CHRÄIE FÜESS Roman

www.stefstauffer.com

Bei Zytglogge erschienen: 2020 ‹Bluescht› 2018 ‹Hingerhang› 2017 ‹Marthas Gäste›

I S B N 978-3-7296-5064-0

783729 650640

Wer die Wahl hat zwischen Stimmungsschwankungen und Johanniskraut, Gewichtszunahme und Fastenkuren, Falten und Botox oder Bluthochdruck und Herzklopfen, findet nicht selten Trost bei einem Stück Schwarzwäldertorte oder zwei. Gegen Hitzewallungen hilft ein Gläschen Prosecco auf Eis, und um alte Gewohnheiten über Bord zu werfen und zu neuen Horizonten aufzubrechen, gibt es nichts Besseres als eine Kreuzfahrt. Die mittlerweile lebenskluge Protagonistin, die bereits die Klippen der Pubertät geschickt umschifft und bei der Partnersuche manchem Sturm stoisch standgehalten hat, stellt sich ihrem körpereigenen Klimawandel in gewohnt verwegener Manier, und ein altkluger Bengel, der ihr als Berater im Alltag zur Seite steht, bringt die mit dem Altern in Zusammenhang stehenden Fragen frech auf den Punkt.

STEF STAUFFER CHRÄIEFÜESS

Die Autorin und der Verlag danken herzlich für die Unterstützung :

Der Zytglogge Verlag wird vom Bundesamt für Kultur mit einem Strukturbeitrag für die Jahre 2021 – 2024 unterstützt.

MIX Papier aus verantwortungsvollen Quellen

www.fsc.org

FSC® C083411

© 2021 Zytglogge Verlag, Schwabe Verlagsgruppe AG, Basel Alle Rechte vorbehalten Lektorat : Angelia Schwaller Korrektorat : Jakob Salzmann Covergestaltung : Kathrin Strohschnieder Layout/Satz : Layout/Satz : 3w+p, Rimpar Druck : CPI books GmbH, Leck ISBN : 978-3-7296-5064-0 www.zytglogge.ch

Stef Stauffer

CHRÄIE FÜESS Roman

Der Sinn vom Läbe sygi ds Läben an sich u ds Läben an sich, das syg nüt weder der Autag, wo ke Tag so sygi wi der anger. Vorggä sygi nume ds Ziiu u dert wärdi gstorbe.

Nougou Das mach me nid, hets superschlau vo der angere Syte här kwer über e Tisch ii tönt, wo me ds Nutellamässer abgschläcket het. Angers hätt men aber ja gar nümm chönnen Anken abhoue. Aber das hätt men ihm itz nid müessen erkläre, so wyt isch sini für dä relatiif chlii Gielechopf verhäutnismässig überdurchschnittlech entwickleti Logik nämlech scho lang ggange. We men ihm itz aber erlütteret hätt, ab emene gwüsssen Auter futtier me sech drum, was me machi u was nid, hätt är ganz sicher nüt Bessers gwüsst z sägen aus, i däm Auter syg är im Fau de o scho lengschtens, mi gseis ihm vilech nid grad umbedingt aa, aber är syg nämlech krass riif für sini Grössi. Rein körperlech hätt men ihn uf öppe sächsi gschetzt. Wenn er aber ds Muu het uftaa, hätt er grad so guet chönne sibezgi sii. Aber d Frag, wi aut dass er eigetlech syg, het men ihm wöuen erspare. Auso het me zu däm Thema lieber gschwige, wüu me sech vo ihm scho einisch het müesse la säge, schliesslech heig är scho mit drü chönne läse, är heig drum en Insubegaabig. Das hätt me näb ihm zuche mängisch o bbruucht, u we ke Begaabig so doch de en Insle für vor ihm z flüchte. Oder de emu zmingscht es Schiff. Eso nes hueren Oberschlööieli isch eim nämlech es ugrads Mau tierisch uf e Sänku, u mi het sech gfragt, wägerum dass es ihm usgrächnet hie bi eim eso woou isch gsi, wo men ihm doch mängisch fasch lieber eifach us Wäg isch, weder sech mit ihm z beschäftige. Aber vilech isch es grad genau um das ggange. Dass är öpper bbruucht het, wo ne nid beachtet het. So isch me mit ihm mit Abstang am beschte gfahre. D Schwoscht het ja nume mau gmacht gha, ds Tabi chömm mängisch fasch nümm zschlag mit ihm u bruuchi Hiuf vo usse. Aber so syg si äbe, di jungen Eutere, het o d Kää, wo vo Psüchologii am

meischten Ahnig vo aune gha het, oder das emu gmeint het, voletscht gmacht. Di renni ging grad sofort i ne Beratig, we öppis nid so nach Plan loufi, u de wöug si en Abklärig u am liebschten e Diagnose. So ne Aschpärger, e Borderläin oder süsch irgend e Status, wo se vor ihrer Verantwortig befreii. Derbii göngs doch mängisch eifach nume drum, dass di Goofe o lehri, e chli Fruscht uszhaute. Säuber hätt me settigem nid besser chönne gwachse sii. Drum isch men itz eifach ga nes früsches Mässer reiche u het derbii ddänkt, de heigi d Schwoscht ihrne Goofen äuä irgendwodüre gliich öppis chönne mit uf e Wäg gä, wo auso ds Tabi itzen ihrersyts ihrem Bueb wytergäbi. Immerhin heig si dervo abgseh, das Bürschteli da antioutoritär z erzie oder, besser gseit, nen eifach aues la z mache, wüus eso fasch ringer ggange wär, aus we si hätti probiert, Iifluss z näh. Emu si em Kewin gwüssi Regle nid ganz frömd gsi, un es het eim nid ds Tümmschte ddünkt, we Ching no gwüsst hei, was me landlöifig so macht u was nid. Mi het drum auso eifach stiu vor sech häregschmunzlet u di Schnitte mit zwöine Mässer fertig gstriche, ohni eis vo beidnen abzschläcke. Der Gschyder gäb naa, het me ds Frölein Mettler ghöre säge. Ds Frölein Mettler, wo eim ging no irgendwo im Chopf ghocket isch oder uf der Schoutere u sech mit ihrne Komentär ging u ging wider het bemerkbar gmacht, o we si scho lang gstorben isch gsi. U schliesslech, da het si ja einisch meh rächt gha, isch eim würklech ke Zaggen us der Chrone gheit, we dä Gieu wider einisch ds letschte Wort het müesse ha, en Esu isch er wägdesse no lang nid gsi. Es wärdi ir nächschte Zyt öppe nid ds letscht Mau vorcho, het me ddänkt. Gäge däm si Schnure u vor auem gäge siner Argumentazionschöttine het men eh ke Brot gha. Vo itzen aa syg är übrigens der Zägg, het er o no grad la verlutte. Kewin fing är e blöde Name, het er gmacht, u ir Schueu heissi eine Floh, das syg doch aber öppen e ke Uszeichnig. Wenn de scho nes

Insekt, de müessis scho ne Zägg sii, fingi är, di Fiicher gäbs schliesslech scho hundert Milione vo Jahr oder no lenger, das dünki ihn doch no so nes Kwalitätsmerkmau. Wobii dass d Zägge ja gar kener Insekte syg, sondern zu de Spinnele ghöri, gob me das eigetlech wüssi. Eso het dä Plagöör möge schnure, u das ohni Punkt u Koma u scho am Morge früe. Da het me chuum nachemöge mit Zuelose, u mi hätti itze nid gwüsst, was drufabe säge. Drum het me nume der Gring gschüttlet u gschwigen u sech gfragt, gob er äch bis am Aabe däm Name tröi blybi oder gob sech das bis am Mittag vilech scho wider würdi erlediget ha. Bi Goofe het me das nie so gnau chönne wüsse. U wüu eim uf deren Äbeni d Erfahrig gfääut het, het me nid viu meh chönne machen aus Abwarten u däm so chli Zueluege. Wo du der Schnäbi fangen isch cho z schlarpe no mit bau zuenen Ougen u im Galiida, won ihm der Schritt vo de Hose schier i de Chnöiäcke ghanget isch, so usgliiret wis isch gsi, aber das Pischi sygi ds bekwemschte, won är je heig gha, het der Schnäbi jedes Mau gmacht, we men ihms het wöuen ersetze, settegi gäbs nümme u di nöimoderne us däm süntetische Materiau, di chratzi u gäbi Bibeli am Buuch, win er bhouptet het. Won er auso isch cho z schlarpen u schier blingligen uf d Gaffeemaschine zuegstüret isch, het er gmacht, das syg gar nid so schlimm mit däm Gieu, vo däm merki me ja gar nüt. Kes Wunger, het me bös hinger der Zytig füre ddänkt, wenn eine penni bis am nüüni, de merk er nid viu vo däm, was angeri sider de sächse machi u sech derbii no Müe gäbi, liisli z sii. Vermuetlech het er o ds Gfüeu gha, d Husautig machi sech säuber, oder emu zmingscht di Wösch, wo sech scho i der Maschine gwäuzt het, di tüeg sech säuber über. Aber für settigs z diskutieren isch är nid der Tüp gsi. Är isch grundsätzlech nid der Tüp gsi für mit ihm z diskutiere, gschyder, mi het nen i Rue gla mit sim Gaffee u de Niuus am Händy. Es het Tage ggä, da isch men uf u dervo, a angerne het

mes glasse chönne näh u d Zytig fertig läse, u so isch emu nid ei Tag gsi wi der anger. Aber sider dass der Schnäbi isch pangsioniert gsi, hets eidüttig meh settig Täg ggä aus anger, wo me ruig hätt am Chuchitisch chönne blybe hocke. Der Schnäbi het eim nämlech ungloublech chönnen uf e Wecker gah. So schön hätt ärs o gärn gha, het er i der erschte Wuche, won er nümm i d Bude het müesse, vo sech ggä, won er eim het gseh di Zytig läse. Am liebschte hätt men ihm die du grad um e Gring um gwuuschet, aber glücklecherwiis isch das denn grad eso ne Tag gsi mit viu Potenziau zum chönne ruig blybe. So isch me de nüt aus ufgstange, het ihm der Iichoufszedu vor d Nase gleit un ihm gseit, wenn er uf di zwöufi wöugi ässe, de müess de bis am haubi eufi kömerlet sii, u mi het irgendöpperem im Himu obe ddanket, oder emu ar Bäbe, wo eim der Tipp het ggä, mi söu em Tüp eifach öppis z tüe gä, am beschten usser Huus. D Bäben isch eim scho siner Läbtig, oder emu scho sider der Primarschueu, ging zmingscht zwe Schritte vorus gsi u het mit guete Ratschleg nie hingerha. Wobii de der Schnäbi sinersyts mit sire übertribe guet organisierte Strukturiertheit zur nöien Uftragslaag gmeint het, das Kömerle syg doch en aute Huet, we me das e chlei düredänki u gstrafft a d Hang nähmi, de müess me maximau einisch i der Wuche ga iichoufe. O i däm Momänt hätt men ihm mit Argumänt nid bruuche z cho, wüu we der Schnäbi öppis gseit het, de het er rächt gha u fertig. U im Prinzip het er o rächt gha, mi het du nume gmacht, wenn er derzue der Mönüplan liferi u ds Chochen o no grad übernähmi, de chönn är das gärn eso mache. Uf das ache het er gschwige. Gott sei Dank het me mit de Jahr glehrt, wi me der Schnäbi het müesse händle, ohni dass ers aus Manipulazion empfunge hätt. Solang är isch der Meinig gsi, är bestimmi ds Läbe, isch är im Prinzip e ganz en aagnähme Bitz Mönsch gsi. Oder emu nid en unaagnähme. U trotzdäm het me sech vorgno, mi wöug de

mit der Bäbe gliich no ds einten oder angere Wörtli wächsle so punkto Mannen u Pangsionierig. Vilech het aber Schnäbis Veränderig weniger mit sire Pangsionierig z tüe gha weder meh mit em Umstang, dass er itz het der Wiiu gha, ab u zue mit em Bidu eis ga z schnappe. Aber we der Schnäbi öppis no weniger aus ds Suufe vertreit het, de isch es das gsi, dass men ihm gseit hätt, er vertragi ds Suufe nid. Drum het me nüt gseit u das de lieber mit der Bäbe besproche. Es hätt eim nämlech wunger gno, gob sech da irgendeinisch wider so öppis wi ne Normauzuestang iipändli im Autag. D Bäbe isch eim o i däm Punkt es paar Jährli vorus gsi mit ihrem Ruedi, wo sie dennzmau während der Lehr aus Oggasiong von eren angere Frou het überno gha. Är het uf seie guet zwänzg Jahr Vorsprung gha u auem aa wider Luscht uf früsches Fleisch. O we me mit der Bäbe nume so meh het z tüe gha, wüus der Zuefau het wöue, dass men enang begägnet isch am Dorfmärit u hurti isch i ds Gspräch cho, het sech abzeichnet, dass me dür dä Räntner, wo me nöierdings im Huus het gha, plötzlech wider e Berüerigsäbeni het gha u auso es Thema, wo me zäme hätt chönnen erörtere. O we me Bäbes Usfüerige ging öppe füfesibezg Prozänt het müessen abzie, für e Wahrheitsghaut chönne z eruiere, hets eim doch gliich grad chlei intressiert, wi sie s mit ihrem Zanarzt im Ruestang so ghändlet het. Der Schnäbi sinersyts het ja vo eim Tag uf en anger i sine bsungerbar böse Momänte ds Gfüeu gha, sini nöii Stelig uf der Bevöukerigspüramiide gäb ihm jedes Rächt, si Aastang abzgä. Derbii isch är us töifschtem Härz en oberliebe Siech gsi, wo eim bi jeder Tages- u Nachtzyt am Bahnhof isch cho reiche u wes ihm drum isch gsi, e Zähgänger het uf e Tisch gchlepft, dass eim schier ds Ougewasser cho isch. U scharmant het er chönne sii u strahle, dass es d Froue reiewiis het unger e Tisch glitzt, u mi isch uhuere stouz druf gsi, isch er eim si Maa gsi. Blueme het er eim nie kener bbracht. Aber nid, wüu ers hätt

vergässe, sondern wüu er gwüsst het, dass eim so nes Buggee nüt gseit het. Viu lieber het er eim galant d Türen ufgha oder d Rächnig überno im Restorang. Das intressier ihn itze nid emau meh am Rand, was me machi, het er nöierdings chönne deklariere. Schliesslech heig är si Dienscht ar Mönschheit gleischtet. Itze heig är d Ahafou u di ganzen Ermässigungen u syg ersch no frei vo aune Pflichte. Är het regurächt afa pubertieren u het di leidschte Tschiins zum Schaft usgno. Das syg totau läässig u miech ihn zum Autachtesächzger, het er gmeint, usgseh hets aber nume nachläässig. Zum Guafför isch är o nümm, u was genau är mit dere Proteschtakzion het wöue zum Usdruck bringe, isch eim verborge bblibe. Ussertdäm isch me nid ganz sicher gsi, gob das offensiife Chätschgumigchätsch mit offnigem Muu em Kauboiimitsch hätti söue zueträglech sii oder Teeu isch gsi vo sire Gsamtprowokazion, wüu i ds Tram isch är nöierdings iigstige, we angeri no hätten use wöue. De Lüt, won ihm nid passt hei, het er der Fogu zeigt un es hätt eim nid verwungeret, wär er eines Tages mit iigschlagnige Zäng heicho, so win er sech nid nume mit de Welofahrer, sondern o mit de Hündeler aagleit het. Ke Mönsch isch vor sim Urteeu sicher gsi, o nid das Modi a der Kasse, won er fasch het mache z gränne, wüu die nid emau wüssi, wo di Bisgwii gmacht wärdi, wo sie da verchoufi. Aber är syg ja nid dä, wo da wöugi kritisiere. Das syg de öppe gar nid sini Art. Ar löi nämlech d Lüt la läbe wi si syg im Gägesatz zu angerne. U mit den angere het er eim gmeint, u das mit em Kritisiere, won är nid machi, het o numen är gmeint u nid gmerkt, dass er a chuum öpperem es guets Haar het chönne laa, wes ihm dernaa isch gsi. Är het ke Laktose bbruucht, für intolerant z sii, es hets ta, dass er isch füfesächzgi worde. Derbii het me sech derewä uf di Zyt gfröit gha u het a sim letschten Arbeitstag es Aperööli vorbereitet für nes gmüetlechs Teetateet z zwöit, wo me hätti zämen uf dä nöi

Läbesabschnitt u ne gmeinsami Zuekunft aagstoosse. Znacht am haubi eufi het me du aber der Räschte vo de Bletterteigschnäggen i nes Töpperweer i d Gfrüüri ta, wo der Schämpis läär isch gsi. Äs hätt eim chönnen es Zeiche sii, dass men eleini uf d Zuekunft gsoffe het. Das syg doch nid so wichtig, het der Schnäbi der anger Tag nume gmacht, wo me ganz süüferli si Enttüüschig het wöue zum Usdruck bringen u ds Gränne het z vorderscht gha. Genau, het me ddänkt, uf das müess me sech itz äuä iisteue. Dass me nümm so wichtig syg. Wüu itz isch är drann gsi mit Dracho u het am Schiin aa d Lizänz zum Uflat gfasset, u mängisch het me sech chlei schiniert, was ihn nume het mache z lache, d Frouen im ne gwüssen Auter syg haut eifach chlei empfintlech. Ar Bäbe gägenüber hätt me das aues sicher nie so gschiuderet. U ihre Herr Dokter isch i Sache Koutiwiertheit sicher o nes ganz es angers Kaliber gsi. Wunger gno hätts eim de gliich, gobs nid vilech gwüssi Überschnydige hätti ggä. Pressiert het itz aber das mit däm Gspräch nid. Chuum isch der Dennersack mit de Komissione – är louf doch nid mit emene Chörbli oder öppe no mit so mene beschränkte Charrli, wo doch nüt weder der Vorlöifer vom Rolator syg, dür ds Dorf, het der Schnäbi düreggä gha – uf em Chuchitisch deponiert gsi, isch dise scho im Papageiedress u de Weloschnabuschue i der Türe gstange, är göng spontan mit em Bidu uf enes Tüürli. Si wöuge zum Gämping übere, dert syg ds Gras de öppe wider nache. Mi het du nid gfragt, gob är der Raase meini oder das zum Rouke, es het eim nume chönne rächt sii, so ne freie Namittag. O we me für e Gieu het müesse Zmittag mache. Aber für dä heis Fertigtortelatschi o ta. Das mit em Zägg isch bim Ässe du ging no aktuell gsi, er het sogar gmeint, dä Name syg vilech nid würklech optimau, aber er passi unheimlech guet, so lang är no a frömde Tischen ässi u vo däm profitieri, wo angeri ihm ufsteui. Tue müess är für das ja gar nüt, bis är gross gnue syg,

für säuber uf eigete Scheiche z stah. U bis denn heig er de sicher o ne bessere Name gfunge. Uf au Fäu isch der Exkewin du am Nami wider i d Schueu oder zu Koleege, so gnau het mes eigetlech gar nid wöue wüsse, Houptsach, er het sech vom Acher gmacht, u mi het unverhofft es paar Stung ds Huus für sich gha u nid müesse luege, dass men am Schnäbi nid i d Kweeri chunnt oder ender är eim. Mi het lutt Musig überta, genau die, won är so gärn het d Nase grümpft drab, wüu das so tüpisch Schwytzer Schubiduu sygi, wo nüt angers chönn, weder nume gfaue. Das syg doch öppe der eigetlech Sinn vo Musig oder vo der ganzen Ungerhautig, hätt men ihm mängisch gärn z bedänke ggä. Aber äbe. Meinigsustuusch isch nid so am Schnäbi siis gsi, drum het me je lenger je meh am Fride zlieb nume ddänkt anstatt gredt, u über däm ganze Dänke isch eim no so mängs angers dür e Chopf, Züüg, wo me nie lutt gseit hätt. Wüu me das nid machi, so settigs uselaa. Mi hets auso für sich bhauten u het uf däm Wäg öppis gha, wo numen eim ghört het. Das het eim niemer chönne näh. Oder öppe no schlächt mache. U niemer het nüt gwüsst dervo. Das isch am Ganze ds Beschte gsi. Gob me das Züüg aues itzen aus inneri Wärte hätti chönne verbueche, isch me nid ganz sicher gsi. Aber wüu inneri Wärte nume für eim säuber si vo Bedüttig gsi, het o das im Grund gno gar e ke Roue gspiut.

Sunnegruess Grüessech Frou Hügli, heigs de aube müesse heisse, de syg d Wäut i der Ornig. Emu di chliini Wäut deheime. So het mes ar Söne probiere z erkläre, we o numen am Telefon. Gseh het me sech scho lenger nümm. O we sis vilech no nid grad vouumfänglech het möge tschegge, het me doch ohni Pouse wytergfahre, nämlech, dass me sider mängisch froh wär gsi, di Wäut um eim ume wär genauso chlii bblibe wi denn, wo men i däm soublöden Auter isch gsi u gmeint het, aus müesse z hingerfragen u säuber chönne z bestimme. Dass sech das Ganze viu schwiriger würdi gstaute, aus me gmeint het, heig men ersch denn realisiert, wos syg z spät gsi, denn nämlech, wo me sech bi auem u jedem säuber heig müessen überlege, gob itz das für eim genau eso stimmi oder nid. Vilech gönge ja deschtwäge d Lüt lieber z zwöite weder eleini dür ds Läbe. Wüu si eleini ke Müglechkeit heige, gägen öpper z sii. Wüu gägen öpper oder öppis z sii, göngi viu ringer, weder sech ganz eleini für öppis müesse z entscheide, dergäge sii chönni me ging, ohni sech gross Gedanke drüber z mache. Mi wöugi öppis eifach nid eso ha. Punkt. U faus en Auternatiife gfragt wär, chönni me ging no i ds Fäud füere, das heig me sech itz no grad nid überleit. We me sech hingäge säuber müess entscheide, de müessi me ja ne Meinig ha, u das syg no fei aasträngend, u was no viu schlimmer syg, für jede Fähler syg men am Änd no säuber verantwortlech. Da chönn me niemer tschoud gä, wenn öppis i d Hose göng oder lätz loufi. Drum heig me sech de schlusäntlech gliich vo auem Aafang aa a das ghaute, wo men einisch heig glehrt gha, so wi bischpiuswiis a das Grüesse, i der Hoffnig, si heigen eim scho ds Rächte biibbracht sinerzyt. U de heig es de zum Glück ging o no Hüüfen angers ggä, wo me machi oder äbe nid, u vo däm här syg

men immerhin scho fei e chli iibbettet i so Gepflogeheite u hangi nid eifach so im luftlääre Ruum ohni z wüsse, wo vooren u hinger u was richtig oder fautsch syg. Vilech bedütti di Akzeptanz gägenüber däm Reguwärch letschtäntlech ja nüt angers, aus dass me zum Erwachsesii chönni stah. Dass men aapasst sygi, wi me das zwar nie heig wöue wärde, aber heig müesse merke, dass ds Läben eso viu eifacher syg. U genau drum grüessi me wyter. Gäbi d Hang u der Name. Fragi, wis göng, o we me das gar nid wöugi wüsse, u säuber säg me, mou, mi chönn nid chlage, gobschon men aue Grund derzue hätt. Es göng eim eifach ringer eso im Autag. Mi müess es doch nid um ds Tööden angers wöue machen aus aui angere u meine, das sygi besser so. Oder säuber syg me besser derdür. Mi mach sech uf däm Wäg doch nume ds Läbe schwär. Es isch so gar nid eim si Art gsi, eso z doziere, aber d Sönen isch grad derewä us em Hüsli gsi, dass me nüt Gschyders gwüsst het, weder se zuezstusse, o we me das, wo me da het use gla, nid i sire ganze Tragwyti ganz genau eso hätt chönne verträtte, aber mi isch sicher gsi, dass d Söne das Ganze nid emau akustisch würd zu hundert Prozänt chönne verstah, ganz z schwyge dervo, dass sis vom Inhaut här kapiert hätt. Mi het eifach ddänkt, so chli en Art vo Anthebi wäri vilech nid ds Tümmschten i ihrem hautlose Zuestang. Aber einisch meh het men ihres Potenziau es bitzeli fautsch iigschetzt. Si het vou gschnauet, was me da grad vo sech ggä het gha u gmeint, si heig doch zimlech viu gliich gmacht wi aui angere, heig zwöi Ching gha u ne Teilzyttschopp, glii drufabe ke Maa meh u derfür e gröseri Aastelig, si heig e Chatz gha u syg i re Vierehaubzimmerwonig mit Garte gwohnt u heig gluegt, dass es de Goofen a nüt fähli. Aber gliich heig si ging ds Gfüeu gha, si syg ganz angers druff aus aui angere. Si syg zwar i Usgang wi angeri, syg gärn es ugrads Mau usswärts ga ässen oder am enen angeren Ort i ds Pfänndli, einisch im Jahr syg si i d

Ferie, wes syg ggange sogar mit em Flüger, u de im Winter i der Sportwuche no ga Schii fahre, si heig sogar es chliners Outo gha, aber süsch heig si sech gliich irgendwie totau vo den angeren ungerschide, heig si gmeint. Nume hätti si nie ganz genau chönne säge, wie u dür was. Wüu vo usse gseh syg si totau sozialisiert u kompatibu gsi u syg us dere Dorfgmeinschaft nie hert usegstoche. Vilech syg das öppis Töifers, öppis, wo mit denen Erwartige, wo me gägen usse heig müessen erfüue, was ihre ja meh oder weniger glunge syg, irgendwodüre de gliich nid so ganz überiigstumme heig. Vilech sygs aber haut o ging dä Aaspruch gsi, öppis angers z wöuen aus das, was es für aui angeren o ggä het, wo seie heig la zwiifle dranne, dass ds Läbe würklech numen us so Banalitäte bestöi. Si heig eifach ging so chli ds Gfüeu gha, das Läbe syg es bitzli z chlii für seie. Genau hie hätt me sen itzen am liebschten ungerbroche. Mi hätt das aues chönne bestätige. Wüu d Söne ja ihrer Läbtig nie isch zfride gsi mit däm, wo si grad het gha, u duurend gmeint het, irgendwo gäbis sicher no öppis Bessers für seie, wüu sie schliesslech säuber o öppis Bessers syg. Wüu si aber grad eso im Fluss isch gsi, het me das Gspräch, oder besser gseit ihre Monolog, nid ungerbroche. Klar heig si gwüsst, dass der Sinn vom Läben us em Läben an sich bestöi, aber si heig sech vo däm Läben an sich äbe scho no grad chlei meh versproche gha aus nume grad das, wo der Autag so heig mit sech bbracht. Si heig das nie aus Beriicherig empfunge, mit angerne Müeteren am Sangchaschterand drüber z diskutiere, gob es Wäse mit zwöijärig scho müess chönne der Ärr säge, wüu si syg sicher gsi, dass es de dä Ärr wärdi säge, sobaus für ihns so wyt wär gsi. Si heig o nid mit däm Wäse drüber möge diskutiere, gobs itz lieber di Teigwaren ässi oder es Jogurt us em Chüeuschrank. Schliesslech heig si gchochet gha u fertig. O nid diskutiert heig si mit eutere Froue, wo a der gliiche Kasse wi sie o aagstange syge, wägerum si ihrem pääggen-

de Goof nid äntlech di Täfeli, won er gärn hätti gha, het wöue choufe, für dass dä antlech Rue gäb. Si heigs sowiso genereu weniger mit em Diskutiere weder meh mit em Mache gha u syg eso no nid emau schlächt gfahre. Meischtens emu effiziänter weder angeri, wo us jedem Winglewächslen es Gschiis heige gmacht, aus giengs um enen Entscheidig, wo di ganzi Wäut würdi verändere. Ihrer Ching sygen emu gross worden o ohni di bständige Debatte, u irgend am ene Tag, nämlech a däm, das syg letscht Ziischti gsi, wo ds Mäxli zu siren Elodii sygi züglet, syg si de plötzlech ganz eleini i dere Vierehaubzimmerwonig gstange. Dass das de öppe Zyt syg gsi, wüu das Mäxli schwär uf di Driissge zuegöngi, hätt men itz eigetlech gärn i ds Fäud gfüert, aber d Söne hets ja grad säuber gseit gha, si isch nid der Tüp gsi für so settig Sache z diskutiere. D Chatz syg o scho lengschtens überfahre worde, so heig sie itzen unverhofft no einisch d Schangse, ganz vo vooren aazfa, ohni Rücksicht uf irgendöpper angers. U drum sygs eso, dass si sech no einisch uf di ganz eigete Bedürfnis chönni probiere z bsinne, u genau das machi seie fix u foxi u bringi seien a Rand vo der Verzwiiflig, het si sech ergeuschteret. Itze chönnti sis doch eigetlech so richtig dick düregä, si wüssi eifach nume nid wie. Si heig so nüt meh, wo si sech dernaa chönni richte, nüt, wo seien usmachi, nüt, wo se definieri. Si heig ja no nid emau es Hobi. Äntlech het si äuä vor lutter Lafere so ne trochnige Haus übercho gha, dass si het müessen e Schluck trinke, so dass hurti e Pousen entstangen isch u me hätt chönnen aasetze zu neren Antwort. We me gwüsst hätt, was säge. Ddänkt het me numen a eis. A dä Begriff nämlech, wo di hormoneue Vorussetzige het zämegfasst, wo derfür si verantwortlech gsi, für us em füdlegwöhnlechen Autag es Drama z fabriziere. Das Wort het men aber nid dörfe säge. Wüu das isch es Reizwort gsi. Nei, no ender es Tabu. Das isch nämlech für di diräkt betroffnegi Auterskategorii öppis

gsi, wo nume den angere passiert isch, sicher nid eim säuber. U solang das Wort niemer i ds Muu het gno, isch das u di ganzi Miseere drumum o nid vorhande gsi. Dertdüre het d Söne scho ging gärn eifach d Ouge zueta, we si öppis nid het wöue wahr ha. D Kää, wo vor Jahre mit der Söne di Wyterbiudig i Gstauttherapii gmacht het gha, het ihre ja scho denn vorgha, mit Verdränge sygs de no lang nid gmacht, irgendeinisch chömi de d Röturgutsche. U vilech isch das itze grad genau der Momänt gsi. Eim isch plötzlech di Reklame, wo me voletscht bim Guafför im ene Heftli gseh u ddänkt het gha, das wäri itzen emu no öppis, i Sinn cho. Es isch um ne Wellnessoasen im Schwarzwaud ggange, wo versproche het, hie fing me garantiert zu sich säuber. U das zum ene Priis, wos eim ddünkt het, viu biuiger chömm men äuä sim Innerschte nie neecher. Was eim näb em Dampfbad, em Joga u der Massaasch fasch am meischten überzügt het a däm Arangschmaa, isch di gedigeni Chuchi gsi. Fasch wi Nuwellgwisin, aber mit meh druffen u aues bio, wi si gschribe hei. Süsch het me ja ging nume z ghören übercho, mi müessi schwyge, faschte, sech bewegen u töif schnuufe, für zue sech säuber z cho. Emu z Indie. Was scho nume di Reis derthäre gchoschtet hätt, u de hätt men uf aus uche no müesse Hunger ha. Da het eim d Wariante Schwarzwaud de irgendwodüre verlockender ddünkt. Das het men itz ar Söne gseit. Si söu doch einisch en Uszyt näh u sech so richtig la verwöhne. U we si derbii no grad usefingi, weles ihre wyter Wäg söui sii, de syg das no grad einisch e Pluspunkt. Eigetlech heig sie meh so a ne Wäutreis ddänkt, het d Söne gseit. Aber es müess ja nid grad öppis so Verruckts sii. Vilech sygi sech säuber z finge gschyder weder dervozseckle. So öppis heig si würklech no nie gmacht, wüus ja o nüt bbracht hätti, we si sech säuber gfunge hätt, wo si doch duurend ging nume für angeri heig müesse da sii. Da sygs ihre doch wöhler gsi, ds eigeten Ego eifach chönnen uf d

Syte z steue. Itzen aber chönnis vilech scho richtig sii, nach so mängem Jahr wider einisch ganz eleini für sich z luege. Gob me nid vilech mit ihre chiem. Schade chönn ja settigs nie. Das göngi ender schlächt, het me müessen abwinken oder ender meh dörfe, wüu mit der Söne ga wellnesse wär itzen öppe grad ds Hingerletschte gsi, wo eim der Sinn dernaa gstange wär. Jeden Aabe so nes Gliir wär eim de schnäu einisch uf ds Gäder. Mi het chönnen i ds Fäud füere, mi heig äben im Momänt grad so ne Scheidepiuz, wo Souna vilech itz nid grad so das Wahre wäri, emu für di angeren um eim um, u derzue no der Zägg. Wie, der Zägg, het si gfragt. Borelioosen oder was. U mi het ere das erklärt mit Tabis Kewin, wo nöierdings bi eim heig aagsoge. Dä chönn men itz nid eifach am Schnäbi aahänke. Aber wüu men o ddänkt het, si wär vilech wöhler, sech nid so ganz eleini dür so ne gspürigi Fitnesswuche müesse z kwäle, wos womüglech weder Auk no Fleisch hätt ggä, het me vorgschlage, si söus doch einisch bi der Migge probiere, gob die nid vilech ähnlechi Ambizione heig wi sie u o grad gärn en Uszyt würdi näh. D Miggen isch ja bekannt gsi derfür, dass si überau het wöue derby sii u gliich niene het derzue ghört. Die syg grad totau im Stress, het d Sönen aber gwüsst, wäge der Maturarbeit vor Tochter. Mi chönni meine, het d Söne gmacht, si müessi die säuber schrybe, was si letschtlech vilech sogar machi, d Migge. U itz het si eim di ganzi Schtori vo deren o no verklickeret. Mi sött itz äntlech no d Wösch ga hänke, het me du schliesslech chönnen aus Argumänt i ds Fäud füeren u das Telefonat beände. Ja, u si wöug sech itze no grad um dä Schwarzwaud tue, het d Söne no gmeint. Das töön ja scho nume rein i Sache Turte verlockend. Schlusäntlech, het me du paar Täg speter erfahre, heig si du d Änne gfunge, wo se würdi möge begleite. D Änne heig zwar gmeint, si heigi das itz weniger nötig, wüu si eigetlech ging ganz bi sich säuber syg, aber we sen öpper bruuchi, de wöug si doch

da sii, für öppis syge ja Fründinne da. Aus Fründin hätt d Söne d Ännen itze weniger bezeichnet, wüu ab emene gwüssen Auter, so dünkis seie, heig me Fründinne gnue, het sie ging verträtte. Mi heigi doch gnue z tüe mit dene, wo me scho heigi. U we me bis denn no kener heigi, de syg me vilech am Änd weniger der Tüp für überhoupt Fründinne z ha. Das louf doch öppe so i di ähnlechi Richtig wi bi de Manne. Dass men aktuell kene heig, syg nämlech überhoupt nid ds Gliiche, wi we me genereu kene gfunge hätt i au dere Zyt. Aber d Manne syge ja itz kes Thema. Da chönn me speter de wider uf d Suechi. Zersch müess me sech itz mau säuber finge. U wes mit Meditiere müessi sii. Wüu si ja ds Suufen ender schlächt u ds Kiffe no weniger guet vertragi, müess men itz äben uf angeri Subschtanzen oder Metoode zrugg griiffe, für uf nöii Äbenine z cho oder ds eigete Bewusstsii chli chönne z erwytere. Das het eim e gueten Aasatz ddünkt u mi isch froh gsi, het men ar Söne chlei us ihrem Töif chönnen use häufe. U we si i dere Wuche weniger d Frou Hügli aus viu meh täglech d Sunne ggrüesst het, het se das mit Sicherheit wyter bbrungen aus das duurende Drübernachedänke, was me machi u was nid u vor auem wie u wo oder mit wäm. Wo si du gschribe het, es heig hie e geile Treener, u ds Zumba syg ds nöien Erobigg, si überlegi sech scho, gob si nid wöug der Inschtrukter mache, der Itschi heig das o gmeint, da het me gwüsst, dass si uf em richtige Wäg isch, u wo du d Änne ihrersyts di Wuchen am Fritimorge vorzitig abbroche het mit der Begründig, di Üebig syg für d Füchs, vo der Söne heig si sider am Midwuch gar nüt meh gseh, het me chönne sicher sii, dass sech bi der Sönen e Wächsu het aabbahnet, u das ganz ohni Wäutreis, u dass si i Zuekunft zwar nid kener, derfür aber angeri Problem würdi ha. Settegi, wo sen uf nöii Gedanke würdi bringe. Gob si gnue Schnuuf würdi ha, für die z bewäutige, würdi sech de schnäu einisch usesteue. Der Sunne-

gruess, so het si o no la verlutte, chönn si uf jede Fau scho usswändig.

Bluetverdünner Lieber riich u gsung, was heigen o di Arme dervo, we si chrank syge, het aube der Stifu, dä Lööu, vo sech ggä, wenn er bsungerbar guet isch binenang gsi. U da derbii het er äuä weniger a di stygende Chrankekasseprämie ddänkt gha oder öppe no a d Spitaurächnige, wo sech d Büse, wo süsch ender uf der Schoggisyte vom Läbe gwirtschaftet het, itze no so aus Dessär dermit het dörfen umeschla. Si het nämlech ersch grad ihre Dädi beärdiget gha u bi dere Glägeheit mit em Bestatter afa aabändle, was eim de scho chli het z dänke ggä, hätt sis nid umgehend i richtig Zämehang gsteut. Das, genau das, sygi äben eim si Zuekunft. Schliesslech ghöri me säuber o glii zu de Gruftis, da müess me derzue chönne stah, u de chönn me dere Tatsach oder däm, wo dermit zämehangi, grad so guet eifach töif i d Ouge luege u s la passiere, het si gmeint, u ussertdäm stöi der Fräne mit sim Tschopp uf der extrem sichere Syte, däm göngi d Püetz oder emu d Chundschaft nie uus, wüu d Konkuränz syg i däm Bisness nid grad riesig, solang me Beärdigunge no nid onläin chönni abwickle. Gob der Fräne seie lengerfrischtig würdi chönne versorge, hätti ihren aber chönnen einerlei sii, itze, wo Dädis Gäut zum ene guete Teeu ganz ihre ghört het. Vilech choufi si sech de gliich no di Eigetumswonig dert unger am Gaugestutz, het si lutt überleit, wo si i der Pizzeria Stellina, wi der Stärne nöierdings gheisse het, ds Münz fürezeut het für ihre Gaputschino z zale. Trinkgäut gäbi si kes meh, het si o no gmacht, bi dene Priise, wo da efange ghöische wärdi. Da sygs de im Tessin unger scho no grad e chlei besser. Dert zali me für ds Express zwe Stutz. De söu si doch gschyder dert unger für ne Wonig luege, het men ihre vorgschlage. Vo däm het si aber nüt wöue ghöre, si heig vor Kää gnue ghört, wi me dert aus Zügging vo de Polenta-

züchter über ds Näscht ab gschrisse wärdi. Mit der Kää isch d Büse nöierdings dür dick u dünn, ender dür dick, we me di zwo so aagluegt het, sider dass si sech nid nume mit Schwitzhütten u Klimawandu befasst hei, sondern je lenger je weniger em Süesse hei chönne widerstah. Säuber hets eim ja ddünkt, mi schwitzi o ohni Hütte gnue u mi heig gnue z tüe mit der eigete Klimaveränderig, da müess me nid no achen i Süde. Wes nämlech über eim isch cho wi ne Schwetti chochigs Wasser, de isch me froh gsi, sy d Ussetämperatuure nid o no über driissg Grad gläge. Aber so syge haut aui chlei verschide, het me gspürt. Dass sech di beiden ir letschte Zyt hei aagneecheret, isch eim grad entgäge cho, so het me zur Büse, wo itz duurend bir Kää unger i deren ihrem Rustiggo ghocket isch, vermuetlech weniger für z meditiere weder meh für zämen über aui angere chönnen abzläschtere, di richtegi Dischtanz gha, wüu si eim mit ihrne Luune meh weder nid uf ds Gäder isch. I junge Jahre het me settigs ja no ganz locker möge verchrafte. Wobii eim das mit der Kää uf enen Art de gliich widerumen o gnärft het u me scho chlei schaluus isch gsi uf di zwo, wo zmingscht enang hei gha, für sech i ds Buesetäschli z gränne, wo me säuber meischtens mit sim ganze Schysdräck eleini dagstangen isch. Dass Polentazüchter e nid ganz koräkten Usdruck syg, weniger uf der politischen Äbeni aus meh, wüu me Meis züchti u Polenta ender chochi, het me du aber gliich nid gseit, wüu d Büsen itze zum ene Vortrag aagsetzt het, vo wäge wi schwirig dass es syg, aus Dütschschwytzer, u de ersch no aus eleistehendi Frou änet em Gotthard, zu sire Sach z cho. Da wärd me scho bim Houzbsteue bschisse, u so richtig abzocke tüeg si eim de när bim Boue, vo de Stüre wöug sie gar nid ersch aafa. So heigs d Kää ihre verzeut. Es gäbi schliesslech o dert unger scho Wonige mit Zäntrauheizig un es müessi ja nid eso nes boufäuigs Ghütt im Gjätt usse sii, wo si sech chönnti choufe, het me wöuen ii-

wände, aber d Büsen isch scho gstange. Si müess. Si heig no ne Termin bim Dokter. Si göng ja eigetlech nume no zum Homöopaat, aber itz bruuchi si gliich en Überwysig wäge dene Chrampfaadere. Das syg eifach e kes Luege meh, di Bei. Das het eim scho lenger ddünkt, u mi het nume chönne hoffe, dass es ihre de vilech der Dokter sägi, dass e chlei meh Bewegig dene Bei guet täti. Säuber het me ja nüt dörfe säge. Aber zmingscht het men im Hieblick uf d Trombooseprofilaxe probiert, jede Tag ga z loufe, we me nid eh der ganz Tag em Züüg nachegsecklet isch. U wes nume grad der Heiwäg isch gsi, wo me z Fuess gmacht het. Scho das het ds Risiko enorm verringeret. Früecher isch ja da no nüt verstopft gsi, u das Bluet isch vo säuber glüffe, ganz ohni dass men öppis hätti müesse verdünne, mängisch sogar e chlei sehr unaagnähm u weniger gäbig, u wo du das äntlech ufghört het, het me scho gmeint gha, e Grund z ha, das mit ere Megaparti z fiire. Da het me no nid gwüsst, dass das ersch der Aafang würdi sii vom enen Übu, wo kes Ändi meh würd wöue näh. Aber im Momänt het me gar nid uf das gwartet, sondern uf e Zägg, wo zaagget het. Dä isch nämlech scho wider vor eim sire Hustüre ghocket, gobschon das gar nid eso isch abgmacht gsi, u itz isch men am Chuchitisch ghanget u het druf ghoffet, dass er äntlech fertig wärdi mit sinen Ufgabe. Derwile het me wyter a dere Blüeterei umestudiert, u mi hätti Zyt gha für uszrächne, wi viu Gäut me zuekümftig würdi chönne sparen ohni di ganze Hügieenemassnahme mit Keerfrii mit u ohni Flügeli u di Obees, so wi das die gmacht hei, wo nümm lenger groukt hei u itze lut eigeter Ussaag Gäut hei gha wi Höi, wüu si söfu weniger hei usggä. Das mit dere Blüeterei isch aber nach wi vor nid gratis gsi, o wes gar nümm bblüetet het. Iitze hei ja d Bluetverdünner Chöschte verursacht. Zaut het das zwar d Chrankekasse, was me so gseh aber indiräkt ja gliich säuber zaut het. I däm Momänt u überhoupt isch me de

gliich z weni e Statistikerseeu gsi, für akriibisch usträchne, gob eim ds Läbe vor oder nach der Menopouse tüürer oder biuiger cho isch. Schliesslech heig aues si Priis, het me ddänkt, u dä müess nid emau umbedingt materieue Charakter ha. Der Zägg, wo wärend denen Überlegige mit em Sirup un em Röhrli d Zirkularatmig güebt het, het ungereinisch gfragt, a waasem dass men eigetlech umehirni, mi syg so stiu, u uf der Suechi nach ere chindsgrächten Antwort isch i eim d Frag uftoucht, gobs äch o nes Mindischtauter für gwüssi Theme gäb. Emu Fiume mit viu Bluet syg ja ersch ab sächzäni. Mi het du das Thema auso so guet, wis isch ggange, probiere z umschiffe, für au das Bluet müglechscht us em Spiu z la. Mi het ja nid gwüsst, wi viu der Zägg vo settige Sache bereits verstange het. Drum isch me meh so genereu uf e finanzieu Aschpäkt usgwiche. Gäut syg würklech nid aues, het är zu däm gwüsst biiztrage, schliesslech heig sini Mam o nie wöue wüsse, wi viu Kubik Pämpers dass si für ihrer Goofen im Ganze düregla heig. Mi het du wider probiert, sis Ougemerk ender uf siner Ufgabe z reise, für säuber gedanklech no chlei vertöifter unger der Gürtulinie chönne wyterzgrüble. Apropo Bluetverdünner het d Erele, wo das aues du schlusäntlech gar nid het müessen erläbe, nämlech mau gmeint gha, das syg doch e gopferdammti Hüschterii mit däm Choleschteriin un em Bluetdruck, wo itz aui zämen über füfzgi derwäge müessi Tablettli näh gägen au das u när no drü angeri drüberii für d Näbewürkige vo den eigetleche Medikamänt wider z nöitralisiere, für dass me nid ds Magebrönnen oder Migräänen überchömm. Sie machi dä ganz Zirkus ganz sicher emu einisch de nid mit, da chönn me Gift druf näh, genau so weni wi si öppe no Hormon frässi für ihren inner Husaut i Sachen Öschtro u Weschtro u was nid no aues z reguliere, si ungerstützi doch da de nid no öppe d Farmainduschtrii bis a ihres Läbesändi u stopfi dene der Stutz i Rache, u mi het itze, wo me sech a di Usfüerigen erinneret

het, ddänkt, das wäri itze mau öppis würklech Relewants, wo sech gräntiert hätti, d Chöschte derfür uszrächne. Das hätt me sogar am Zägg chönnen i Uftrag gä, dä hätti umgehend ds Täblet gno u hätt afa röscherschiere. Hätt e Statistik ersteut für d Paziäntin Iggs u ne Vergliichspärson Üpsilon. Wüu er sech aber äben eigetlech ender weniger weder mit em Iggs no mit em Üpsilon, sondern mit em Aa, won er i Schnüerlischrift uf emene Hüselipapiir hätt söue verschideni Läbesmittu ufschrybe bis ds Blatt wär vou gsi, het müesse beschäftige, was eim nid umbedingt chindsgrächter isch vorchoo, het me gschyder nüt gseit von ere settigen Ufgabestelig. Mi isch ja nid Pädagogin gsi u het nüt verstange vo Didaktik u settigem Züüg. Mi het ihm numen eifach aagseh, wi ne das Schrybe dermaasse het aagschisse, dass me ne lieber nid no het wöuen uf angeri Gedanke bringe. Säuber isch eim i Sinn cho, wi d Grusle mit ihrer grosse Röhren einisch zu nere Lobeshümnen uf e Züklus het aagsetzt gha u gmeint het, wi doch dä syg gäbig gsi, wo me dert no syg dri iibbettet gsi u me drum ging heig gwüsst, woraa dass me stimmigsmässig so syg u wägerum dass es eim beschisse göngi. Klar heige sech o üsseri Iiflüss uf di eigeti Stimmigslaag usgwürkt, im Zwiifusfau aber heig me doch emu de ging no uf das Peämmäss chönne zrugg griiffe. Das heig si jederzyt ungschore chönnen i ds Fäud füere. U scho heige d Wiiber um seien um verständnisvou gluegt u wüssend gnickt, wärend d Tüpe grinsend der Gring heige gschüttlet u öppis vo miudernden Umstäng heige la gheie. Hesch Täg? Mii tuu. Mit däm sygi doch im Grund gno aues gseit gsi. Hütt, wo das verby syg, mach men es uhuere Gschiis drum u das Ganze mit dene Hormonschwankige syg es viu heiklers Thema worde, u we men itz öppe wöug ds Klimakterium uf ds Tabeet bringe, für irgendöppis z entschoudige oder vilech o nume z erkläre, dass eso nes Froueläben eifach nid ging numen es Zuckerschläcke syg, de stöi me, chuum syg eim

Inhaut

Nougou . . . . . . . . . . . . .. . . .. . . . . . . . . . . . .. . . . . . . .. . . . . . . . . . . . .. . . .. . Sunnegruess . . . . . . . .. . . . . . . . . . . .. . . . . .. . . . . . . . .. . . . . . . . . . . . .. . . . Bluetverdünner . . . . . .. . . . . . . .. . . . . . . .. . . . . . . . . . . .. . . . . .. . . . . . . Tüüfuskreis . . . . . .. . . . . . . . .. . . . . . . . . . . . .. . . .. . . . . . . . . .. . . . . .. . . . Goufsack . . . . . . . . .. . . . . . . . . . . . .. . . .. . . . . . . . . .. . . . . .. . . . . . . .. . . . . Trochenüebig . . . . . . . .. . . . . . . .. . . . . . . . . . . .. . . . . .. . . . . . . . .. . . . . . Häxeschuss . . . .. . . . . . . . . .. . . . . .. . . . . . . .. . . . . . . .. . . . . . . . . . . .. . . . . Verchehrswärt . . . . . . . . . . . .. . . . . . . . . . .. . . . . . . .. . . . . . . . . .. . . . . .. . Tschetlääg . . . . . . . .. . . . . . . . . . . .. . . . . .. . . . . . . . .. . . . . . . . . .. . . . . .. . . Nouhau . . . . . . . .. . . .. . . . . . . . . . . . .. . . .. . . . . . . . . .. . . . . .. . . . . . . .. . . . Fläschegeischt . . . . . . . . . . .. . . . . . . . . . . . .. . . . . . . . . .. . . . . .. . . . . . . .. Arschbombe . . . . . . . . . . . . .. . . .. . . . . . . . . . . . .. . . . . . . .. . . . . . . . . . . . . Gwitterzäue . . . . . . . .. . . . . . . . . . . .. . . . . .. . . . . . . . . . . . .. . . . . . . . . . . . . Hackornig . . . . . . . . . . .. . . . . . . . .. . . . . . . . . . . . .. . . . . . . .. . . . . . . . . . . . . Fischbüüch . . . . . .. . . . . . . .. . . . . . . .. . . . . . . . . . . .. . . . . .. . . . . . . . .. . . . Gägesatz . . . . . . . . . . . . .. . . . . . . . . . . . .. . . .. . . . . . . . . .. . . . . .. . . . . . . .. . Noubadi . . . . . . . . . . . . .. . . . . . . . . . . . .. . . .. . . . . . . . . .. . . . . .. . . . . . . .. . Klääraalag . . . . . . . .. . . .. . . . . . . . . . . . .. . . .. . . . . . . . . .. . . . . .. . . . . . . .. Saunträck . . . . . . . . . . . . .. . . . . . . . . . . . .. . . .. . . . . . . . . .. . . . . .. . . . . . . .. Troumroue . . . . . .. . . . . . . .. . . . . . . .. . . . . . . . . . . .. . . . . .. . . . . . . . .. . . Gschmacksverstercher . . . . . .. . . . . . . . . . . . .. . . . . . . . . .. . . . . .. . . . Platzhauter . . . . . . . .. . . .. . . . . . . . . . . . .. . . .. . . . . . . . . .. . . . . .. . . . . . . . Trennigsschmärz . . . . . .. . . . . . . . .. . . . . . . . . . . . .. . . .. . . . . . . . . .. . . Autwiibersummer . . . . . . . . . . . .. . . . . .. . . . . . . .. . . . . . . .. . . . . . . . . .

7 15 23 30 36 44 51 58 64 70 76 82 88 95 102 109 115 122 128 133 140 147 153 158

CHRÄIEFÜESS Stef Stauffer

Foto: Lukas Maeder

Stef Stauffer

CHRÄIE FÜESS Roman

www.stefstauffer.com

Bei Zytglogge erschienen: 2020 ‹Bluescht› 2018 ‹Hingerhang› 2017 ‹Marthas Gäste›

I S B N 978-3-7296-5064-0

783729 650640