Anihan ng Sama ng Loob

Kasabay ng pagdating ng anihan ng sibuyas at bawang ang malakihang pagaangkat ng mga kooperatiba mula sa mga magsasaka sa murang halaga upang gumawa ng artipisyal na kakulangan ng suplay at mapanatili ang mataas na presyo ng sibuyas at bawang sa merkado.

Dumarami na ang sitwasyon na minamanipula ang suplay ng mga pangunahing bilihin tulad ng sibuyas at bawang upang pataasin ang presyo at bentahan nito sa merkado. Ginagawa nila ito sa paraan ng pagtatago ng mga inaangkat nilang sibuyas at bawang sa murang halaga mula sa mga magsasaka upang pataasin ang demand at pababain ang suplay ng mga nasabing pangunahing bilihin.

Ayon kay House Speaker Ferdinand Martin Romualdez nakatanggap sila ng impormasyon hinggil sa mga taong nasa likod ng kakulangan ng sibuyas at bawang kaya inatasan ni House Speaker Romualdez ang House Committee on Agriculture and Food na magsagawa ng imbestigasyon ukol dito at magsilbi na ring babala sa mga kooperatibang sangkot sa pagmamanipula ng suplay ng sibuyas at bawang.

Isang pananabutahe sa ekonomiya ang ginagawang malakihang pagaangkat ng mga kooperatiba sa sibuyas at bawang mula sa mga local farmers sa murang halaga at itatago ito para lang makagawa ng artipisyal na kakulangan ng suplay at pataasin ang bentahan sa merkado.

Tinaon nila ang pananabutahe na ito sa panahon ng anihan at samantalahin na mataas ang demand ng sibuyas at bawang sa bansa. Isa ito sa mga nakagawiang paraan ng mga kooperatiba upang magpayaman at lokohin ang mga lokal na magsasaka.

Napapanatili ng kooperatiba ang mataas na presyo ng sibuyas at bawang sa kabila ng pag-aangkat nito sa murang halaga kaya nararapat lamang silang papanagutin mula sa kanilang pang-aabuso sa mga magsasaka at normal na konsyumers na hindi pa nakababangon mula sa pandemya habang nagpapakasasa sila sa mataas na halagang bumabalik sa kanila kumpara sa orihinal na presyo ng sibuyas at bawang mula sa mga magsasaka ng bansa.