Čuovâuáivi peivikirje luvâdemnáál!, Fabrizio Brecciaroli

Čuovâuáivi peivikirje luvâdemnáál!

Tekstâ: Fabrizio Breciaroli Kove: Marke Laaksonen

Moonnâm cuáŋuimáánust Sämitigge jurgâlitij já almostitij anarâškielân nuorâiroomaan, mon nommâ lii Čuovâuáivi peivikirje. Tot lii Jeff Kinney čäällim siämmáánommâsii rááiđu vuossâmuš kirje. Jeff Kinney (š. 1971) lii ameriklâš kirječällee, ráiđukovetaaiđâr, spellâvuávájeijee já ohjelmistee. Sust šoodâi pegâlmâs ive 2007, ko Diary of Wimpy Kid (Neropatin päiväkirja) -rááiđu vuossâmuš kirje almostui eŋgâlâskielân. Tastmaŋa ráiđu lii vijđánâm jotelávt, já tääl tot siskeeld jo 15 kirjed.

Rááiđu sáŋgárin lii Greg Heffley, paješkoovlâ uáppee. Suu perrui kuleh eeči (Frank), enni (Susan), stuorrâviljâ (Rodrick) já uccâviljâ (Manny). Peivikiirján Greg čáálá jieijâs elimist já feeriimijn Plainview-nommâsii kaavpugist. Koččâmâšâst lii kuittâg eenâb almostittem tâi äigičaalâ ko táválâš peivikirje – nuuvtko Greg jieš taha tállán aalgâst čielgâsin. Kirje lii uáli hitruus luhâmuš, mii povvâstut čuuvtij já lasseet luuhâmmoovtâ. Kirje lii uáivildum iänááš nuoráid, mut tot suápá pyereest jyehiahasáid lohheid – päärnist äijihân.

Čuovâuáivi peivikirje lii jurgâlâm anarâškielân Mikkâl Morottaja, já tom puáhtá uástiđ Duodji-käävpist Sajosist sehe Sämitige nettikäävpist čujottâsâst https://www. samediggi.fi/tuote/cuovauaivi-peivikirje/?lang=an.

Anarâškielâ servi lii jurgâlittám Čuovâuáivi peivikirje -rááiđu nube, kuálmád já niäljád kirje anarâškielân. Nube já kuálmád kirje jurgâlusah láá valmâšeh. Niäljád kirje jurgâlus vuod valmâštuvvoo puáttee ive peln. Forgâpalij anarâškielâ sárnooh peesih luuhâđ lase Gregist já Plainview eres ässein.