PASILIDADES NGA GISAAD SA PROBINSYAL NA PANGGAMHANAN SA AGUSAN NORTE SA LAS NIEVES, IPATUMAN NA

Sugdan na ang konstruksyon sa Manpower Human Resource Development and PhP8 million Productivity Enhancement Center (MHRDPEC) ug usa ka PhP3.5 million nga Day Care Center sa Sitio Bokbokon, Lawan-lawan, Las Nieves ug gipunting nga mahuman kini sa dili pa mahuman ang tuig 2022.

Kini ang gibutyag ni Dr. Tomas O. Tener, ang Provincial Planning and Development Coordinator, sa pakighinabi ning semanaha.

Mahimumdoman nga gisaad ni Gob. Dale B. Corvera ang maong mga proyekto human kini gihangyo sa mga lumulupyo atol sa gipahigayong “AguSerbisyo” o immersion nga gihimo sa maong hilit nga lugar sa milabay’ng tuig. maong pagbisita aron ipabati sa katawhan sa lugar ang sinseridad sa probinsyal nga panggamhanan sa pagpadangat og serbisyo alang sa kalinaw ug kalambuan.

Gawas sa mga pasilidades, ubay-ubay usab nga social services ug mga proyekto alang sa panginabuhian ang gipadangat sa probinsya sa maong komunidad nga kadaghanan sa nagpuyo mga sakop sa Tribung Higaonon.

Ang Sitio Bokbokon usa lamang sa pipila ka hilit nga sitio sa probinsya nga personal nga gibisitahan ni Gob. Corvera, uban ni Kongw. Angel Amante-Matba, aron mapadangat ang gikinahanglang mga serbisyo. (Karen Kie Decamotan, LGUAgusan del Norte/PIAAgusan del Norte)

Learning Resource Packages alang sa child development workers padayong giapodapod sa Agusan del Norte

Nagpadayon ang pagturn over sa probinsya sa Agusan del Norte sa mga Early Childhood Care Development (ECCD) Learning Resource Packages ngadto sa Child Development Workers.

Nagsugod ang maong pagpang-apod apod sa mga lungsod niadtong Enero 11 ug ang lungsod sa Las Nieves ang giadto sa mga personahe sa Provincial Social Welfare and Development Office (PSWD) kagahapon. Mosuma sa 33 ka packages ang napadangat sa mga day care workers sa maong lungsod. Ang nasangpit nga learning materials nagagikan sa nasudnong panggamhanan ug gi re-produce sa PSWD aron makadawat ang matag day care workers sa probinsya. Sa kinatibuk-an, adunay 260 ka mga child development workers ang probinsya.

Sumala ni Jeremie Dagani, personahe sa PSWD, nga pinaagi sa maong mga learning materials mapalapdan pa ang kahibalo sa mga child development workers ug magiyahan sila sa ilang pagtudlo sa mga kabataan sa day care centers o mga preschoolers.

Kining maong suporta sa day care workers daku kaayo ang mahimong kontribusyon sa komunidad ilabina diha sa paggiya sa kanila sa pagtudlo sa mga kabataan, sumala ni Gob. Dale B. Corvera. (Shena Mae Pabia, LGUAgusan del Norte/PIAAgusan del Norte)