TULO KA AWARDS NAKUHA SA AGUSAN DEL NORTE TUNGOD SA MAAYONG PAGPATUMAN SA MGA PROGRAMA SA POPCOM

Tulo ka award ang nadawat sa probinsyal nga panggamhanan sa Agusan del Norte pinaagi sa buhatan sa Provincial Social Welfare and Development (PSWD) gikan sa Commission on Population and Development (PopCom) – Caraga atol sa gihimong Awarding and Recognition Ceremony niini niadtong Enero 14 didto sa Amontay Beach Resort and Convention Center sa lungsod sa Nasipit.

Kini tungod sa inisyatiba ug pagpaningkamot sa probinsya nga mahatagan og serbisyo ang target beneficiaries sa giila nga Special Population Groups ubos sa Population and Development Program sa maong buhatan.

Ang maong mga pasidungog ubos sa Provincial Category mao ang mosunod: Best Responsible Parenthood and Family Planning (RPFP) Program Implementer; Best Provincial Population Implementer, ug; Special Population Group Program Implementer.

Mapasalamaton ang probinsya nga panggamhanan ubos sa liderato ni Gob. Dale B. Corvera nga bisan pa talewala sa hulga nga dala sa COVID-19, naimplementar gihapon ug naipadangat sa maong buhatan ang mga serbisyo nga maoy gibasehan sa maong mga pasidungog ngadto sa mga Agusanons.

Sumala pa sa mensahe ni Board Member Elizabeth Calo, chairperson sa Committee On Social Welfare and Population Development, nakuha nga pasidungog tungod sa mga panukaran sa probinsya nga ma-implementar ang mga kalihukan nga kalabot niini nga mao ang gitawag nga 3Cs nga buot pasabot nga Cooperation, Coordination ug Collaboration.

Tungod sa maong mga panukaran napasabot sa probinysa ang adbokasiya sa maong programa ngadto sa target beneficiaries sa special population groups sa Responsible Parenthood and Family Planning ngadto sa PWD couples, Living Spacers sa Provincial Jail, Recovering Drug Dependents, Parole and Probationers, ang mga IPs ug uban pa. (Karen Kie Decamotan, LGU-Agusan del Norte/PIA-Agusan del Norte) Caraga INFOCUS