POÉTICAS DIVERSAS é o lema que a Consellería de Educación, Universidade e Formación Profesional propuxo ás bibliotecas escolares para este curso 2018/2019, A biblioteca do López Ferreiro, téndoo en conta, achegou as familias ao texto poético a través do obradoiro Ler en Familia. Debemos ter en conta que a poesía é ritmo, música... pero especialmente sentimento. A mellor poesía será a que teña a capacidade de asombrar, de desvelar misterios ou de crealos, de achegarnos a realidades que só existen nela. Na orixe do texto lírico temos que falar, en primeiro lugar, dos textos poéticos de tradición oral: lerias, arrolos, trabalinguas... Moitos deles non foron escritos pensando nos nenos e nas nenas, outros téñenos como protagonistas e obxecto... Debido a que posúen unha forma sinxela e un ritmo moi marcado, os/as nenos/as axiña se fan con estes textos tradicionais e empezan a empregalos nos seus xogos. Estas composicións rítmico-literarias, que foron infravaloradas durante moito tempo, teñen un grande valor pedagóxico e son importantísimas para traballar as emocións, a lingua, o ritmo, a música.... En segundo lugar está a poesía escrita para nenos e nenas. En Galicia hai moita boa poesía escrita para nenos/as e grandes autores/as: Manuel María, Antonio García Teijeiro, Helena Villar, Ana María Fernández, Xoán Babarro, Xosé Neira Vilas, Anisia Miranda... En terceiro lugar estaría a poesía que os pequenos e as pequenas crean, ben porque xorde espontaneamente ou ben porque a persoa adulta a provoca a través, por exemplo, da invitación a crear frases poéticas, a facer xogos de rimas, a cambiar palabras nun poema coñecido para obter un novo poema... Aínda así, non podemos falar de nenos/as poetas, pois falta capacidade reflexiva e faltan coñecementos sobre a poesía, pero si de nenos e nenas que realizan expresións poéticas. Malia que se adoita insistir en que non hai máis que poesía, sen cualificativos, non se pode negar a peculiaridade dunha poesía escrita para nenos e nenas. Dun ou doutro xeito, existe, é poesía destinada ao público infantil e xuvenil.
Debemos ofrecer poesía que posúa calidade literaria. O poeta Carlos Negro valora no poema o “rigor lingüístico, ambición estética e debate ético”. Para chegar a este obxectivo cómpre comezar por textos de tradición oral. Ler poesía na aula e na casa supón unha guía para os/as pequenos/as lectores/as, que os/as leva ao descubrimento de que os poemas proporcionan palabras que se nos fan necesarias.
ENDEREZOS WEB DE POESÍA INFANTIL : http://www.orellapendella.org (poesía e rimas populares en galego) http://www.poemitas.com (portal de poesía para nenos de Carmen Gil). http://franalonso.gal/ https://www.cultura.gal/sites/default/files/guia_poesia_1.pdf http://garciateijeiro.blogspot.com/ Poesía visual: http://poemasparapeques.blogspot.com/ http://www.amediavoz.com http://portaldepoesia.com
Equipo de dinamización da biblioteca. bibliolulu.blogspot.com.