O Equipo de Biblioteca convídavos a participar no concurso A VOLTAS COA PUBLICIDADE..., no que haberá que respostar cinco preguntas diarias, relacionadas coas técnicas publicitarias e coa orixe do nome de produtos e marcas comerciais. BASES 1. O obxectivo do concurso será a procura de datos para respostar cinco cuestións diarias, durante cinco días, sobre o contido dos cartaces expostos no corredor da planta baixa do instituto e publicados, asemade, no blog da biblioteca (sarmientobiblioteca.blogspot.com.es). 2. Poderá participar todo o alumnado do IES de Curtis. 3. A participación poderá ser individual ou en equipos de 2 persoas, como máximo. 4. Aqueles que decidan participar farano no período comprendido entre os días 20 e 22 de abril (luns, martes e mércores). Para formalizar a inscripción, poderán anotarse na biblioteca, comunicándoo ao profesor encargado, ou ben a través do correo electrónico deste espazo: curtisbiblio@gmail.com; neste último caso indicarase en ASUNTO, “CONCURSO DE PUBLICIDADE” e no texto da mensaxe figurarán o nome, os apelidos e o curso do participante ou participantes. 5. O concurso comezará o xoves, 23 de abril (Día do Libro). O alumnado terá que escoller entre dúas modalidades de participación: - MODALIDADE A (FORMATO PAPEL): no primeiro recreo, os participantes inscritos recollerán na biblioteca unha ficha coas cinco preguntas correspondentes a ese día. Repetirán a mesma operación ata o mércores, 29 de abril, día no que rematará a quenda de preguntas. - MODALIDADE B (FORMATO DIXITAL) : os participantes inscritos poderán descargar diariamente do blog da biblioteca unha ficha coas cinco preguntas correspondentes a cada día. Repetirán a mesma operación ata o mércores, 29 de abril, día no que rematará a quenda de preguntas. O venres, 24 de abril, entregarán no primeiro recreo, na biblioteca ou ben a través do correo electrónico da biblioteca, a ficha coas respostas do día anterior; neste último caso, o correo deberá ser remitido antes das 10.45 horas. Repetirán a mesma dinámica nos seguintes días: o xoves, 30 de abril, farán a última entrega.
6. O prazo do concurso abrangue do xoves, 23 ao xoves, 30 de maio, ámbolos dous incluídos. 7. Haberá un primeiro e un segundo premio para aquelas persoas ou equipos que consigan achegar un maior número de respostas correctas tanto no contido como na forma (ortografía e organización gramatical ).
Para poder resolver as cuestións propostas cada día, teredes que buscar información non paneis do corredor da biblioteca, tamén publicados no blog deste espazo. Cómpre que teñades claro que as respostas debédelas dar sempre a partir dos carteis que vos ofrecemos: esa é a fonte que debedes manexar. Por suposto, toda a información que se vos demande, poderedes extraela deles. A continuación, presentámosvos un dos cartaces da exposición, unha pregunta relacionada con el e un modelo de resposta, para que vos fagades unha idea do tipo de tarefa que se vos propón.
A orixe desta marca hai que relacionala co verbo latino sanare, que significa “curar, sanar” e co adxectivo sanus,-a,-um que significa “san, con saúde”. A casa comercial que o lanzou deulle cor branca, olor fresco e un PH compatible co da pel (moitos productos para a hixiene corporal eran moi perfumados, con cores moi fortes e con fórmulas agresivas coa pel). Tentou facer un produto parecido ós que se venden en farmacia, reforzando así, non só co nome, senón tamén co aspecto a idea de PRODUTO BO PARA A SAÚDE.
POSIBLE PREGUNTA: -
Busca nos carteis un produto de hixiene cuxo nome está relacionado coa vida saudable. Explica que palabras latinas están na orixe desa marca e que significan. Finalmente indica se hai algo máis no produto que lle suxira ao consumidor a idea de vida sa.
POSIBLE RESPOSTA: -
Xel e desodorante SANEX. O seu nome relacionase co verbo SANARE (“sanar”) e co adxectivo SANUS, SANA, SANUM (“san, con saúde”). A idea de produto saudable non está suxerida só polo nome da marca, senón tamén pola cor branca dos envases, que os fan similares aos de moitos medicamentos, cremas… de venta en farmacias.