O Onye-nwe, Chineke Pụrụ Ime Ihe nile nke nna anyị, Abraham, Aịzik, na Jekọb, na nke mkpụrụ ezi-omume ha; Onye meworo elu-igwe na uwa, ya na ihe-ichọ-nma-ha nile; Onye ji okwu-ọnu-Gi abu oké osimiri; Onye mechiworo obu-miri, were kwa aha-Gi di egwu nke di ebube rachita ya; nke madu nile nātu egwu, nāma kwa jijiji n'iru ike-Gi; n'ihi na apughi idi idi-uku nke ebube-Gi, ọ bu kwa iwe-iwe-Gi n'aru ndi-nmehie di oké ọnu-ahia: ma okwu-ebere-Gi bu ihe anātughi ọtùtù na anāchọputa; n'ihi na Gi onwe-gi bu Onye-nwe-ayi kachasi ihe nile elu, onye nwere ọmiko uku, nwere ogologo-ntachi-obi, onye-ebere nkeuku, ma chegharia n'ihe ọjọ nile nke madu. Gi onwe-gi, Onye-nwe, dika idi-uku nke idi-nma-Gi si di, ekwewo ncheghari na nbaghara nye ndi mehieworo megide Gi: na nime obi-ebere-Gi nile nke nēnweghi ngwụcha ka edoputawo ncheghari nye ndi-nmehie, ka ewe zọputa ha. Ya mere gi onwe-gi, Onye-nwe, bú Chineke nke ndi ezi omume, edoghi ncheghari nye ndi ezi omume, dika Abraham na Aisak na Jekob, ndi nēmehieghi megide Gi; ma I dowo nchegharị nye m bụ onye-nmehie: n’ihi na emehiewo m karịa ọnụ-ọgụgụ nke aja nile nke oké osimiri.
Mmejọm nile, Jehova, nāba uba: njehiem nile ba uba, ma ekwesighm ihu na ihu elu elu-igwe n'ihi iba-uba nke ajọ omumem nile. Ejiwo m
ọtutu ihe-ọkiké ígwè ruru ala, na apughm ibuli isim elu, ọ dighi kwa nrapu ọ bula m'nwere: n'ihi na akpasuwom iwe-Gi, me kwa ihe ọjọ n'iru Gi: emeghm ihe-Gi, edebeghm m ihe nile I nyere n'iwu; ọ bu kwa iheárú nile ka ha ba uba; Ma ubu a mu onwem ruru ikpere nke obim n'ala, nāriọ Gi amara. Emehiewom, Jehova, emehiewom, ma amawom ajọ omumem nile: n'ihi nka, aririọm n'obi-ume-ala, bagharam, Jehova, bagharam, were kwa ajọ omumem me ka m'la n'iyì. Ewesolam iwe rue mbe ebighi-ebi, site n'ichekwasirim ihe ọjọ; ma-ọbu ikpem ikpe rue ebe di ala nke uwa. N'ihi na Gi onwe-gi bu Chineke, bú Chineke nke ndi nēchèghari; ọ bu kwa nimem ka i gēgosi idi-nma-Gi nile: n'ihi na I gāzọputam, bú onye nērughi eru, dika ọtutu ebere-Gi si di. N'ihi nka ka m'gēkele Gi rue mbe ebighi-ebi ubọchi nile nke ndum: N'ihi na ike nile nke elu-igwe nēkele Gi, ebube diri Gi rue mbe nile ebighi-ebi. Amen.