“Mense se reaksie op my musiek en hulle volgehoue aansporing is my inspirasie” Henry van Dyk het op die platteland in die Noordwes provinsie grootgeword en het van kleins af ‘n baie spesiale liefde vir musiek gehad. Hy het dan ook op ‘n jeugdige ouderdom reeds betrokke geraak in die musiekwêreld… In 2002 was Henry die algehele wenner vir volwassenes van die Beeld Eisteddfod (afdeling ligte musiek) en in 2005 was hy die algehele wenner vir volwassenes in die Eisteddfod se klassieke afdeling. Hy is in 2004 gekies om aan die semifinaal van die ATKV se Crescendo musiekkompetisie deel te neem en is genomineer om SuidAfrika in 2005 in Los Angeles te verteenwoordig as lid van die Championship of Performing Arts span. In 2008 het Henry sy First Concert Certificate in sang, soos aangebied deur die Trinity College London, met ‘n algehele punt van 93% geslaag. In 2010 het Henry sy opera-debuut gemaak in Verdi se opera La Traviata met Johan Spies as regisseur. Henry het die verhoog al gedeel met verskeie groot name in die musiekbedryf, onder andere Jannie Moolman, Charl du Plessis, Bobby van Jaarsveld, Corlea Botha en Joe Niemand. Sy debuut-album is in 2009 vrygestel met die titel “Love’s Presence Lingers” en sy vorige album getiteld “Laat die Liefde Leef” is einde 2012 uitgereik. Henry is onlangs benoem vir ‘n Ghoema Musiektoekenning vir daardie album in die kategorie Beste Afrikaanse Lig Klassieke CD. Verskeie radiostasies speel Henry se musiek en sy musiekvideo’s word gereeld gewys op kykNET, asook SABC 2 en 3. Henry is ook ‘n liedjieskrywer en speel klavier, kitaar en kerkorrel en as daar tyd is, is hy ook nog deeltydse orrelis by verskeie kerke in die Pretoria-omgewing. Henry is ‘n toegelate prokureur wat spesialiseer in arbeidsreg en wanneer hy nie by musiek betrokke is nie, verskaf hy arbeidsregdienste aan verskeie kliënte. Hy het ‘n passie vir die lewe en hy glo dat die liefde die spil
is waarom alles draai. Dit is die inspirasie agter die meeste van sy liedere. Henry se uniekheid word vasgevang in sy nuwe album, “Sommer So”, en mens word meegevoer deur die klanke. Dit neem jou op ‘n reis wat jou weer laat fokus op die belangrike aspekte van die lewe. Sy liefde vir musiek is aansteeklik, die boodskap is eenvoudig en almal sal aanklank daarby vind.
Meer op www.henryvandyk.co.za
Agter die skerms Wat is jou volle naam? Henry Jacobus van Dyk. Familiename sonder diepere betekenis… Vanwaar die afkorting? NVT. Dit is my doopnaam. Waar het jy grootgeword? Noordwes – Koster Het jy enige broers of susters? Sing hulle ook? Ek is ‘n erge laatlammetjie en het twee heelwat ouer broers. Die naaste wat my oudste broer Johan aan musiek gekom het was om my Pa sover te kry om ‘n kitaar te koop, maar hy het nooit ‘n snaar aangeraak nie, in dieselfde lyn as sy goueraambril wat gekoop moes word, hoewel hy nie ‘n bril nodig gehad het nie... My ander boet, André, is baie musikaal – kan feitlik enigiets op gehoor op klavier speel, maar het dit nie verder ontwikkel nie. Hoe en waar het jou liefde en passie vir musiek begin? Dit het by die laerskoolkoor begin. Die kooronderwyseres het gedink ek sing baie mooi en het my graag laat
solo’s sing. Ek was nie ‘n baie sportiewe ou op skool nie (sagkens gestel), maar my betrokkenheid by musiek en kultuur het my die nodige hupstootjie gegee en dit het my primêre buitemuurse aktiwiteit geword. Ek het ook vroeg begin klavier- en orrellesse neem en het op hoërskool die saalopeninge behartig. Dit was op daardie stadium baie “cool”, en het baie vir my selfbeeld beteken. In st. 9 en 10 was ek voltydse orrelis by een van die plaaslike gemeentes.
‘n Paar vinnige vrae:
Gunstelingkos: ‘n Geurige skaapkerrie lê my baie na aan die hart. Ek kook en onthaal ook baie graag. Gunstelingfliek: Wissel gereeld, maar my onlangse beste fliek is “Blue Jasmine” (met Cate Blanchett) en as ek sommer net wil lag iets soos “Daddy and them”. Watter CD speel tans in jou kar: Karen Zoid & Elvis Blue se nuutste CDs. Wat is jou gym-musiek: O gits ek fokus te hard om die oefeninge gedoen te kry om nog te worry oor die musiek… Gunstelingvakansiebestemming: Weskus en toe die rand nog sterker was, die Griekse Eilande. 7de Laan of Binnelanders: Dié tyd van die dag is gewoonlik nog te bedrywig by ons – ek is óf op pad in die verkeer na konserte óf besig met ateljeewerk óf agter die kospotte. Wit- of rooiwyn: Rooiwyn (behalwe by die see, dan vonkelwyn of yskoue, sonder ys, Chardonnay). Jazz of blues: Jazz Rock of Pop: Rock Indie of Opera: Opera
Het jou gesin hierdie besluit ondersteun? Ja, hulle almal was baie lief vir musiek. Wat het jy na skool gaan doen? My ouers het geglo ‘n mens moet ‘n formele kwalifikasie hê waarop jy kan terugval indien nodig. Onder hulle invloed het ek BCom (Regte) & LLB gaan studeer en is ek toegelaat as prokureur. Ek het vir baie jare as regsadviseur by ‘n korporatiewe instansie gewerk en later ook my meestersgraad in Arbeidsreg behaal. Hoewel ek dankbaar was hiervoor, was daar nie tyd of energie oor vir musiek nie. In die begin van 2012 was my begeerte om professioneel te sing egter so oorweldigend dat ek besluit het om te bedank en het ek vir myself begin werk as arbeidsregkonsultant. Sodoende kon ek meer tyd inruim vir my musiekloopbaan. Dit was natuurlik ‘n groot risiko, maar soos die spreekwoord sê: “Wie nie waag nie, sal nie wen nie”. Ek kyk glad nie terug nie en sal my musiek vir niks verruil nie. Wat was jou musikale invloede as kind? Ek was mal oor Afrikaanse musiek en as laerskoolkind kon ek nie ophou luister na ikone soos Sonja Herholdt en Laurika Rauch nie. Later onder my ouers se invloed is ek blootgestel aan klassieke musiek soos Domingo en Carreras. Ons het ook baie na Gé Korsten se musiek geluister. Die radio het maar die heeltyd in ons huis gespeel. Wat is vir jou die moeilikste deel van die musiekbedryf? Die feit dat ons mark so klein is en die beperkte geleenthede vir ‘n opkomende kunstenaar om jou gehoor te bereik. Met konserte bereik ‘n mens maar net ‘n klein deel van jou potensiële mark en ons het die hulp van die hoofstroomradiostasies asook ander media nodig om by soveel as moontlik mense uit te kom. En die lekkerste deel? Die vreugde om iemand in die gehoor se gesig te sien wanneer jy ‘n lied sing wat sy/haar hartsnare raak. Wanneer jy besef jy het iemand met jou musiek weggevoer na ‘n beter plek as waar hy/sy was voordat jy gesing het. Kan jy jouself in een sin opsom? Positiewe, vrolike mens wat lief is vir mense en die lewe. Wat is die uiteindelike droom vir jou as kunstenaar? My eerlike antwoord: Om groot skares te trek wat my musiek so goed ken dat hulle elke woord saam met my kan sing…!! Maar intussen is my droom om soveel as moontlik mense te bereik met my musiek en hulle lewens op ‘n positiewe manier te beïnvloed. Wie is die kunstenaars in ons bedryf na wie jy opkyk? Ek word besonder geïnspireer deur kunstenaars wat hulle eie identiteit behou en iets unieks vir hulle ondersteuners bied. Ek leer baie by kunstenaars soos Nataniël, Amanda Strydom en Karen Zoid.
Vorige geleenthede in die media
TV-verskynings (onderhoude en optredes):
- JAM - Jukebox - Morning Live Media: - Vrouekeur - Beeld - Rapport
Belangrike optredes: - Afri duetfees 2015 o.a. saam met Jannie Moolman, Corlea Botha en Chris Cameleon - Beeld Kinderfonds se Kerskonsert - Walter Sisulu Botaniese Tuin se Valentynskonsert en Moedersdagkonsert - Laeveld Botaniese Tuin saam met Nadine & Nicholis Louw - 1000 Women 1 Voice (Cape Town International Convention Centre) - SA Raad vir Sakevroue se jaareind-galafunksie - Jakaranda Kinderhuis se jaarlikse Gospelfees
www.henryvandyk.co.za henryvandykmusic hvdmusic Besprekings: Lizette van der Walt 083 272 5245 lvdw@global.co.za Media navrae: Wian Smith 012 807 4827