KOMUNIKADO 12 di mart 2012
Eksposishon pa públiko en general
Konferensha i Eksposishon tokante energia duradero fin di mart na WTC Willemstad – Kontinuando riba e maneho ku ta konserní energia duradero ku a keda introdusí resientemente, gobièrnu di Kòrsou den kolaborashon ku Bureau Telecommunicatie Post en Utiliteiten ta organisá un konferensha internashonal dia 29 te ku 31 di mart den World Trade Center titulá: “The 2012 Conference/Expo on the future of Durable Energy – Involvement, Implementation, Innovation”. Entrada nan e konferensha ta 300 US. dòler; e eksposishon ta grátis, i ta dirigí riba públiko en general. Konferensha Durante di e konferensha un kantidat grandi di orador internashonal i algun orador lokal lo elaborá mas profundo riba e importansia di energia duradero pa Kòrsou. Tambe lo trata ‘best practices’ di otro paisnan. E idioma di instrukshon lo ta Ingles. Pa un kontribushon di 300 US dòler un partisipante por haña akseso na e konferensha inkluso almuerso ku ta keda sirbí tur dia i tur otro aktividat sosial i posibilidat di netwèrk. E programa ta kuminsá 9:00 or’ i ta terminá 16:00 or’ riba e dos promé dianan. E lastu dia e programa ta terminá 14:00 or’. Oradornan Oradornan internashonal ta entre otro: Per Lund Ph. D., Chief Engineer na Energinet.dk for di Dinamarka, (tokante di ‘best practices’ riba e isla Bornholm, kaminda ya por papia di penetrashon di energia duradero riba nivel haltu) Ricardo Ramírez Carreo M.Sc., Sekretario Tékniko di Consejo Nacional de Operación de Gas Natural, for di Colombia, (tokante di gas natural /LNG komo alternativa di petroli krudo), Prof. dr. David M.J. Smeulders (tokante di diferente aspekto di energia duradero) Luis Garrido, Joint Managing Director di e Assyce Group (tokante di uso di pènelnan solar riba gran eskala Michael Garvin, Presidente di Renais LLC (tokante di energia duradero) Alabes algun orador lokal lo subi podio, manera Minister Presidènt Gerrit Schotte, responsabel pa e sektor di energia, ing. Joao de Canha, direktor di e regulador di e sektor di energia Bureau Telecommunicatie Post & Utiliteiten i e CEO di Aqualectra Darick Jonis, Msc. MBA konhunto ku
Pagina 1 van 2
diferente eksperto lo duna splikashon di e desaroyonan riba tereno di energia duradero den sektor di energia na Kòrsou, e maneho lokal nobo, regulashon i prosedimentunan, i no lubidá e posibilidatnan di spar koriente si ta traha di uso di koriente. Eksposishon Banda di e konferensha lo tin tambe un eksposishon di produktonan i servisionan ku ta keda ofresé riba merkado lokal i den region riba tereno di energia duradero. E eksposishon ta dirigí na pueblo en general i entrada ta grátis. Pueblo di Kòrsou kompletu ta keda kordialmente invitá pa bin tira un bista den e eksposishon i pa optené mas informashon tokante uso di energia solar i a base di bientu na Kòrsou. Kompanianan manera Curapex, Ecovision, EcoEnergy, Schnog Imports, Dutch Durables, Dynaff Caribbean & Coral Solar i diferente otro mas lo ta presente komo partisipantenan na e eksposishon. Tambe lo tin un sorpresa interesante. Djaweps 29 di mart 2012, riba e promé di konferensha, ta habri e eksposishon na World Trade Center, i esaki ta aksesibel pa públiko di 16:00 – 20:00 or’ riba djaweps i djabièrnè, i di 14:00 – 17:00 or’ riba djasabra. Tambe lo tin diferente diskurso tokante e tópiko aki, ku ta importante pa futuro di Kòrsou. Spònsernan E konferensha ta risibí “sponsoring” di entre otro algun organisashon lokal esta: Ennia i Coral Solar komo spònsernan Platinum; Ernst & Young i NuCapital komo spònsernan Gold; EcoEnergy i Connecting Technologies N.V. komo spònsernan Silver i Price Waterhouse Coopers komo spònser Bronze. Di e manera aki sektor privá tambe ta spera di por duna un aporte positivo p’asina demonstrá pueblo di Kòrsou i habitantenan den region kiko energia duradero lo por nifiká pa nos futuro. Mas informashon Tur e informashon, ainda tentativo, tokante e lista kompletu di oradornan, programa di e konferensha, partisipantenan na e eksposishon i spònsernan, i formularionan di inskripshon tantu pa partisipantenan na e konferensha komo pa partisipantenan na e eksposishon i spònsernan ta optenibel riba www.energiakonsiente.com. [FINAL DI KOMUNIKADO] Nota pa redakshon – no pa publikashon Pa mas informashon: Jacques Heide Bosero Kampaña di Publisidat Maneho di Koriente nobo Tel. 563-3717
Pagina 2 van 2