SULIFFEQARFIK PILLUGU PAASISSUTISSAT
Uninngasuutinut tunngasut siuliani taaneqartut tunngavigalugit ukioq manna naatsorsuutit suliarineqarnerini naatsorsuinermi inississukkat allat aamma pissusissamisuunngitsumik suliarineqartarsimanersut immikkut eqqummaariffiginianeqarnikuupput. Paasineqarporlu pissusissamisuunngitsoqartoq. Paasineqarpoq KNI A/S-imi niuernermik ingerlatat akornanni ukiuni arlariinni akuerineqanngitsunik nuussisoqartarsimasoq kiisalu 2014/15-imiilli nalikilliliinerit allanngortinneqartarsimasut. Pisut siuliani taaneqartut amerlasuunik misissorluarneqartarsimapput, iluarsiisarsimanerillu ukioq manna naatsorsuutinut tunngavigalugit naatsorsuisoqarluni. Misissueqqissaarnerilli suli piariivinneqanngillat, taamaattumik naatsorsuutinut tunniunneqartunut iluarsiisoqarataannaavoq. Paasineqarportaaq sulisup taassuma politiinut nalunaarutigineqartup nalinginnaasumik akissarsititsinermi akileraarutit a-t eqqortumik akileraarutaasussat qaavisigut akissarsialerivik avaqqullugu tunngaviusumik akileraarusigaanngitsunik sulisunut arlariinnut aningaasarsititsisarsimasoq (amerlanertigut bonus-ititsisarsimasoq). Taamatut iliortarsimaneq suliffeqarfiup malittarisassaanik unioqqutitsineruvoq. Suliaq tamanna inatsisitigut nalilersorneqarpoq, aningaasarsiaritinneqartarsimasullu annertuumik sunniuteqanngillat. Politiinut unnerluutigineqareersup saniatigut allanik nalunaarutiginnittoqarsinnaanera perataannaavoq. Misissueqqissaarnermi paasisassat tamarmik paasineqareerpata pissusissamisuunngitsumik iliuuserineqarsimasut tamarmik eqqartuussivikkut piumasaqaatitalinnik suliarineqartussanik inatsisitigut unioqqutitsisoqarsimanersoq paasiniarneqassaaq.
Suliffeqarfimmut tatiginninneq Siulersuisut pisortaaninngortullu ilisimaaraat suliat tamavimmik piffissami qaninnermi paasineqarnissaat piginnittut naatsorsuutigissagaat pisarialimmillu sukaterisoqarnissaanik naggaserneqassasut - suliffeqarfimmi amma niuernermik ingerlatseriaatsini - taamalu ililluni siunissami pissusissamisuunngitsunik iliuuseqartoqarsinnaanera annikillisillugu. Tamanna siulersuisut qullersallu maannakkut tamakkiisumik eqqummaariffigaat, tamannalu pisortaaningortup siunissami eqqummaariffigiuassavaa. Siunissaq ungasinnerusoq eqqarsaatigalugu piginnittut, taarsigassarsitsisut pisisartullu KNI-mik tatiginnillutik pinerisa pilersitseqqinnissaa kisimi suliassaanngilaq. Suliassarli aamma tassaavoq KNI-mi sulisut pikkorissut peqatigalugit suliffeqarfiup pingaarutilimmik pilersuisussaanera nutaaliornermik ilallugu niuernermik ineriartortitsinissaq. Suliassallu tamatuma suliarinissaani oqaloqatigiinnissamut ataqqeqatigiinnikkut ammaffiginninnikkullu sulinermi pitsaasunik avatangiiseqartitsinissaq suliniutigissavarput. Tamannalu tunngavigalugu KNI-p siunissami aamma Nunatsinni tamarmi pingaarutilimmik inissisimalluni piujuaannartitsisumik ineriartortitsinissaa siulersuisut pisortaanerullu qularutiginngilaat. Pisisartuvut, suleqatigisartakkavut sulisuvullu tamaasa qutsavigaavut.
Lars Borris Pedersen Siulittaasoq
Jeppe Jensen Pisortaaneq
Ukiumoortumik nalunaarut 2020-21
5
