O RĘCE AUTORÓW RELACJI ROKU
LAUREAT RANKINGU
Relacja nadesłana do publikacji w sezonie 2011 (01.04.2011 - 31.03.2012)
DBA NA TURYSTYCZNYM SZLAKU PRODUCENT RĘKAWIC:
RELACJA ROKU 2011* Sponsor głównej nagrody dla Moto-Turysty Roku
* przejdź do działu rankingu >>
Danka (MT 153) AUTOR
04.09.2011
*
DATA WYPRAWY
* Data nadesłania relacji:
30.09.2011
Słowacja - Zamek Orawski TYTUŁ
Numer relacji: 40 / 2011 / Turystyczne wojaże - wersja śląska UWAGA ! Na końcu relacji znajdziesz link do wersji „dla goroli”
Niedziela 4 wrzesiyń, warza łobiod i myśla se, że szkoda takigo fajnego dnia. Godom wiync mojymy chopu, coby my kasik pojechali po łobiedzie na moplikach. Podobo mu się moj pomys i pado mi, że mom wymyślić kaj chca jechać. No toch se wymyślyła... Orawski Podzamok. Chca łobocyć zamek co my go mijali jak jechalimy nad Balaton. Jyndruś się zgodzo, bo niy ma daleko to zdonżymy łoblukać zamek zawrzom. Jymy łobiod i w droga. Jadymy na Korbielof, bo tam chcymy przejechać granica, ale po drodze zminio sie plan, bo po kigo diobła momy jechać tom samom drogom co w maju. No to jadymy na Ujsoły. Całkiym gryfnie sie jedzie, a przes Wyngiersko Gorka i Milofka jada piyrszy roz. Pusto na drogach, fajnisto pogoda, mopliki idom jak po szpagacie, cego chcieć wiyncy. Stowomy na chwila na granicy, dołokoła same lasy. Turysty słazom ze szlakof. Pozdrowiomy sie. Moj Jyndrek paczy na nich przes chwila a potym pado, że takie łazynie to jest jus masochizm. Łodpolomy mopliki i jadymy dali jus we Słowacji. Kierujymy sie na Novot i Zakamenne. Delektujymy sie rajzom... Przed nami łościongo sie pasmo Magury Orawski. Drogom nr 520 i 521 dojyzdzomy do celu. 1/4
Stowomy pod Orawskym Zamkym ftory stoi na skale 112 m nad rzekom Orawa. Szukomy miejsca kaj mogymy łostawić mopliki. Fest miło pani pokazuje nom kaj mogymy stanoć coby my niy dostali mandatu. Jak sie seblykomy z hałerof i kurtek, mijajom nos motocyklisty. Uśmiychom sie ,dźwigom rynka i słysza: „Cześć”. No i jest git. Idymy kupić bilety. Łod jednego cowieka 5€ a łod aparatu 3€ . Cekomy na przewodnika. Miyndzy turystami jest dużo Polokof, co nos niy dziwi, bo to jest fajne miejsce i niydaleko łod Polski. Kiedy łotwiyro sie brama włazymy na dziedziniec dolnego zamku.
Wito nos pani przewodnik i jest nom fest miło jak wito turystof z Polski po polsku. Jak cegoś niy umiymy skumać to godo nom po naszymu. Powiym Wom, że wiyncy rozumia po słowacku niż po czesku, a przeca to podobne som godki. Niy byda Wom łopowiadać historii zamku. Jak zeście som ciekawi to pocytejcie se w Wikipedii. W zamkowych izbach mo swoja siedziba Muzeum Orawskie. Zaclimy zwiydzanie na dolnym dziedzińcu a skońcylimy w nojstarszy i nojwyższy jego czynści – w cytadeli. Jak zech łaziła po zamku to zech se nuciyła: „....dziewcontko
orawskie,
pódź
ze
mnom
na
pańskie...
pod orawski zomek, pod orawski zamek sadzić majeronek...” - zanućma ta piosenka >>>
Normalnie prześladuje mie ta przyśpiywka i durch za mnom łazi.
2/4
Dziynkujymy pani przewodnik i łopuscomy zamek. Zanim jadymy dali to jesce coś zjadomy i jak jus my som przy moplikach to stwierdzomy, że jus jest prawie ciymno. Jadymy nazot. Nasza pańcia z GPSu chce nos poprowadzić tom samom drogom jakom my przyjechali, ale to niy mo być przyjymne jak godo moj chop i wpisujymy ji jakoś miejscowość
w Czechach, bo chcymy przez Cieszyn jechać. No to jadymy. Póki jest jesce w miara widno to jest ok, ale jak jus jest coroz to ciymni as w końcu całkiym ciymno to zacyno być niybezpiecznie. A niybezpieczyństwo to sie czai na wiejskich drogach bes chodnikof i światła na drogach. A to łoroz ftoś sie z rowu wylezie, a to se cało rodzinka z woskiym dziecinnym środkiym drogi lezie, a to se na kole jedzie bez świateł, ba! ...nawet bez łodblaskof. Muszymy uważać... Nojlepi jest wtedy jak widza przed nami wielko gora, a tak richtik to ino corno epno plama i droga co prowadzi prosto na nia. Myśla se: - no fajnie jest, skońcy sie asfalt i bydymy jechać pod ta gora. Za dnia to jesce spoko ale po ćmoku to jus niy jest spoko. Za niydugo moje lynki rozwiywo łostry zakrynt w prawo ...uffff. 3/4
Po drodze zaczymujymy sie przy rancie na fajka. Jak se tak stojymy i beblomy to podjyzdzo do nos śtyrech motocyklistof, pytajom sie ło coś ale my nic niy kumomy, bo po italiańsku godajom. Dopiyro na migi dowiadujymy sie co chodzi jym ło tanksztela. Nasza pańcia z GPSu pomogo nom naprowadzić ich, kaj takowo mogom znolyść. Sami siadomy na mopliki i jadymy. Za niydugo przejyzdzomy przez granica z Czechami, niy ma źle. Do dom dojyzdzomy przed połnocom po przejechaniu prawie 400 km i łobocyniu fajnistego zamku. Łoba z zadowolyniym stwierdzomy, że to była fajno wycieszka i udany dziyń.
Zapraszamy do galerii >
Ze ślonskim pozdrowieniem Danka i Jyndrek
(Moto-Turysta 153)
Jeśli przeczytałeś wersję śląską relacji, otrzymujesz prawo przeczytania wersji „dla goroli” >> wersja dla goroli <<
4/4