geguritan bangbang wétan (IBW Widiasa Kenitén

Geguritan

geguritan bangbang wétan

IBW Widiasa Kenitén

Ong Awighanam Astu Nama Sidhem, OM Namashiwaya, Om Namabudhaya

Demung Gudig

/1/

Sembah ingsun ri Hyang Kawi, jadma dongol, nembé ngurit pati jujut, bhaṣa ṡastra kangin kauh, sulat salit tan paniti, manyulegin raṣa, dija perah nudut kayun, tan péndah buka kakunang,

anarung ring Sang Hyang Ṥaṡi, joh pūrṇa kasidhan, énggal punyah tekén puput.

/2/

Bangbang Wétan kamurdhanin, pangkah bongkos, tatwa ṡila tan kaweruh, masi ngawi belog ajum, mlajah patut ya kawitin, maberuk punggungé, éngalan sempyar mamesu, nyulegin sang tatas ṡastra, nutur gangsar tan paindik, joh sawat karambang, ṛerambangan kangin kauh.

/3/

Bhaṣa bhaṣita kantwali, samiroto, ngutah-ngutah kecuh-kecuh, ampurayang i wong jugul, tan ajerih kakedėkin, meledé manyurat, nyurat ṡastra tan paunduk, kapah mamelut pepesan, masi ngaku ngejuk angin,

maciri mamokak, sang mangawi nunas tutur.

/4/

Doh gandharaṣaning raṣmi, rupa bocok, ṡastranė buricak tan tulus, tan manut ring sulur tutur, lepihannė lepug nganggit, tuturė manegeh, isinnė twah prungpung puyung, lugra Ratu i katunan, mudhālpa ṡastra mangawi, nunas sentir sunar, dipem ngurit lunjuk lungsur.

(pacang kalanturang....)

IBW Widiasa Kenitén

embas ring Geria Gelumpang, Karangasem, 20 Januari 1967. Oneng ring sastra Bali klasik, sastra Bali modéren taler sastra Indonésia. Kakawian idané kawedar ring Bali Post, Buratwangi, Mémorandum, Warta Bali, Bali Aga, Majalah Sinar Agung, Majalah Éksprési, Bali Tribun, Pos Bali. Ngamolihang Hadiah Sastra Rancagé ring warsa 2006 antuk pupulan satua cutet Buduh Nglawang. Ring warsa 2015 ida ngamolihang Penghargaan Widya Pataka antuk cakepan Jero Lalung Ngutah.