ulian kulit (Anak Agung Ari Plasa Octoyota

Satua Cutet

ulian kulit

Anak Agung Ari Plasa Octoyota

Dini, di tengah kosan Bli Bagus ané madamar 5 watt, tiang sirep

di pabinan Bliné. Kéto masi samar-samar rasayang tiang liman

Bliné ngusap paban tiangé. Ngetél, ngangsan nuunan. Peluh

iragané saling matemu, nrébés mamesik. Méh-méhan sing kena baan

ngingetan buin, encén pagelan padidi. Miriban ené dadi saksi,

nuturang pajalan tresnan iragané ané suba majalan duang tiban

nanggu limolas lemeng. Bli pastika suba nawang unduk kasujatian

tresnan tiangé. Tusing nyandang Bli nakonang mailehan. Apa buin

kema mai ngugu ortan pisaga. Eda nyen Bli sumandangsaya.

Kadirasa, ané kapingitang suba kasukserahang, pinaka bukti

kasumekenan tresnan tiangé ané mamesik tuah kapining Bli.

pa buin lakar tagih anggon muktiang Bli? Konyang sajan suba kaketogang. Jani Bli nguda buka kéné? Tiang tuah ngidih abesik tekén Bli. Sekenang buin I Aji ngajak Biang “A tiangé.”

Bli Bagus tuah mendep, nanging limané tekek ngisiang bangkiang tiangé.

“Apa Bli nu nyakit ati? Eda ja ento buin ingetanga Bli, suba atiban ané liwat kadirasayang tiang.”

Kéto tiang nyekenang Bli Bagus. Pang kuda kadén tiang suba mautsaha, apang nyak Bli Bagus nyumunang nyekenang kasujatian tresnan iraga ngajak dadua ring I Aji, kéto masi ring I Biang. Nanging, Bli Bagus satata mendep. Kadirasa bibihné majait, tusing pesu munyi nang akecap. Mirib nyakit keneh, ulian I Aji dugasé ento ngorahang...

“Ih caiii!!! Cai baduda! Teka mai ka linggih anaké agung, nyambatang lakar ngundukang tresna! Tresnan nyéné takonang cai to?! Suluhang ibané malu! Dong jlema sudra buka cai bani clapat-clapat mai! Numitis cai buin cepok tusing karuan pantes masanding ngajak pianak gelah!”

Kadirasa macepol tangkah tiangé dugasé ento. Tumbén ya tiang ngajak gegélan, dong kéné bakat tepuk. Sebet pesan yén tuturang. Nyag, dedek lidek. Nyeledét tiang ka tongos I Bli majujuk. Eda nyen iyéh, kadirasa anak ngorahin

negak tusing ada. Kenyem manis yéning ada tamiu suba matilar, kija kadén ambaina. Mirib ka tongos ané joh sawat, engkebina baan petengé dingin. Malipetan I Bli, nguntul, laut matilar. Nyajang ujané sada bales, nututin pajalan I Bliné mulih.

Usapan liman Bli Bagus sarasa malénan, tusing patuh cara dibi puan. Apaké ulian sesai iraga malaksana kéné? Mara matunangan, nanging suba cara anak makurenan. Apaké Bli med ngajak tiang? Ahhh... tusing bani tiang nakonang, kadirasa petakon ané malunan tuara sautina. Nadak Bli Bagus matintingan saha ngorahin tiang bangun uling di tongos ané paling demenin, sai ngaé engsap tekén galah.

“Adi, adi Gung Ayu... Adi gagélan sané banget sayangan lan tresnain Bli. Kadi baos adiné wawu, suba konyang sajan kaketogang. Jani iraga ngajak dadua buka anaké macemplung ka tukadé, suba belus. Lepég. Kanti béndan adi lakar ngoyong di tukad ané patuh? Kéto masi Bli, tusing ngidang terus mengkeb-mengkeb buka kéné. Yén dadi tunas Bli, lan ja bareng ngelangi ka tongos ané melah. Diapin tan parestu Aji lan Biang ané banget arepang adiné. Nanging, percaya ja tekén paukudan Bli. Bli sanggup ngawé adi bagia.”

Tan palémpas paliatan I Bli ngajakin tiang kawin lari. Bagia ningehang kasumekenan Bli Bagus tekén padéwékan tiang. Kadirasa tokéné ngampel dibucun témbok kosané milu masuryak girang.

“Cekcekcek, oké! Cekcekcek, oké!” Nanging, ada masi ané ngaé tiang ingguh. Kéweh tiang ngalahin I Aji lan Biang yén buka kéné pajalané..

“Bli... Uli di dasar atin tiangé, liang pesan ningehang kasujatian tresnan Bliné lakar ngajakin tiang ngantén. Nanging, kéweh masi baan tiang ngalahin I Aji tekén Biang. Baat karasa keneh tiangé yéning nututin Bli kawin lari.”

“Yén kéto, Bli tuah sanggup ngemang adi galah abulan. Léwat kin abulan, Bli suba sing ngidang.”

Nguntul tiang ningehang pabesen Bli Bagus. Ngajohang karasa gelutan limané. Tiang lantas bangun, ninggalin Bli Bagus tan panyanggupin

pangidihné tekén tiang. Krana tiang nawang, Bli bagus sing mungkin ngalahin tiang. Uli di jalané neked jumah, nguda tumbén jeg enduk gati awak tiangé. Sirah sakit, nanging paesé ngetél. Jeg éncéh sajan. Apa ja mirib kuangan, jeg cara anak ngidam pragat makecuh. Ééittttt... Ndén malu! Anak ngidam??? Prajani nrugtug tangkahé, apa buin tamiu bulanané suba liwat tanggal.

Kenehé kal mastiang, kanggoang meli téstpack di Indojuni. Mara neked di mukak kasiré, suba jelék kenehé. Sada kasiré nak muani. Kéngkénang kal ngorahanggg?!!! Prajani ketug-ketug tangkahé, apa ené madan gejeran tresna?? Aisss, gejeran tresna koné, hahahaa... Sing kéné sing kéto, juariang gén ba néh, suba ngantré masi anaké lakar ka kasir ulian tiang bengong ngenehang ané tidong-tidong.

“Mas, yang biru itu satu.”

Nak Jawa ané di kasir, tawang uling adané ané magantung di kantong bajuné.

“Yang mana mbak?”

Atahh!! Misi matakon kasiré, ngalantas suba. Nah pang énggalan .

“Téstpack yang biru satu Mas.” Bakat tegehang sebengé, pangsing takona kéné kéto kin kasiré.

Suwud mabayahan tiang tusing malipetan mulih, tiang nuju kosan ané majarak 12 km nganggon motor vario selem. Neked di kosan, setata lampu ané 5 watt nyambut tiang. Idup, akon ngaremeng. I Beli tusing ada di kosan, pasti ia mulih ka kampung, miriban pedih krana unduké dibi.

Suba turah panadiné, garis dua pesu uling di téstpack ené. Nanging kénkén kadén, sing kena baan ngorahang isin keneh tiangé jani. Kadi majalan di titi tan patali, sing ada tongos magisiang. Ngejer batis tiangé, lemet. Mautsaha tiang nyegjegang awak, sakéwala jeg maserod awak tiangé di témbok kamar mandi kosané. Sing taunan yéh matané ngetél pesu, sayan bales, nrébés. Tiang sing nawang apa ané makada tiang ngeling, sesek sajan rasa tangkahé, baat.

Wayan Jengki Sunarta

Enu masé dini, di batan lampu 5 watt tiang makeneh, ngundukan pajalan ané lakar ambahin tiang. Apa ké tiang ka umahné Bli Bagus, ngorahang paundukang tiangé ané suba mawak dadua? Apa tiang ka jero, ngorahang ring I Biang? Nanging, jelék sajan kenehé. Rasan tiang I Aji tusing lakar nerima. Nanging Biang? Rasané Biang lakar ngerti keadaan tiangé jani. Motor vario selem ané dadi saksi pajalan idup tiangé, peteng lemah ajak tiang ngukur jalan. Jani, lakar ajak tiang mulih. Kaparkirang motoré, adéng-adéng tiang majalan, ngalih I Biang.

“Biang...”

Pesu masi munyin tiangé, ngejer. Kagelut lantas bangkiangnyané, ditu pesu ling tiangé tan kadi-kadi. Ulian bingung kin paukudan tiangé ngéling, Biang ngajakin tiang negak di plangkan ané maembatan di prantenan. Ditu tiang nyaritayang unduk paukudan tiangé, tan lali tiang nunas apang Biang nyarengin tiang matur ring I Aji indik kasujatian tresna ané gelahang tiang tekén I Bli.

Sagét ngaap karasa pipiné, sing madaya tiang tekén Biang. Dadi ati namplak paukudan tiangé. Kakedeng lantas liman tiangé, saha gelur-gelur I Biang ngaukin I Aji. Kaentungin paukudan tiangé, asah tekéning tanah. Tan kodag baan tiang naenan sesek tangkah mirengan raosné I Aji ané nyutetin tiang apang ngulungin belingan.

Negak tiang dibucun kasuré, ditengah kamar ané kakonci baan I Biang. Nguda makelo pesan majalan galahé ané jani. Tuah awai tiang ngrasayang keneh liang, sebet, pedih. Jani buin kaisinin baan rasa kilangan. Tan sanggup tiang kilangan pianak, diastun ja enu marupa getih. Nguda kéné pesan pajalan ane tepukin paukudan dewek tiangé. Dot tiang ngabarin Bli Bgus, sakéwala HP tiangé suba tagiha kin I Aji.

Samar-samar tiang nolih matan jam, suba nuju galah kutus semeng. Sing taunan dibi sanja sirep ulian baat paningalané suud ngeling. “Krééokkk....” Makréok basangé semengan, inget tekén déwék tondén ngajeng uli dibi.

Nanging kamaré makunci, kudiang tiang jani pesu. Pedalem pianak di tengah basang tiangé, sing kena apa uling dibi. Mara tiang bangun, sagét I Biang teka ngaba nasi apiring, maimbuh yéh agelas. Nanging asing sajan katepuk pil ané enu maségel dibucun naréné.

“Ngajeng malu, Biang nawang Ayu sing ngajeng uling dibi sanja.”

I Biang ngenjuhin tiang nasi ané matatakan naré. Kénkén kadén seduk basang ané sing ngidang naenan sagét ilang, tan pasambat. Mirib ulian tiang nengil, sagét Biang ngorahin tiang ngajeng pil vitamin. Uli dibungkusané tiang curiga, krana mérekné krasa asing. Misoprosol lan Mifepristone, kéto tulisané. Krana tiang percaya ngajak Biang, kabukak lantas pil ento. Mara tiang nyemak iyéh, kagisi liman tiangé baan I Biang, sambil maitukan.

“Malénan carané ngajeng pil ené. Isep di betén layahé pang kanti engkes laut telah.”

Seken sajan Biang ngorahin tiang. Laut katuwutin cara ané orahanga kin Biang. Kaisep pil ento dibatan layahé. Rasané sing kena baan tiang ngorahang, pilné sing marasa apa, akon keset sajan bena paesé.

“Suba telah pilné?”

Tiang tuah maanggutan.

“Binjepan yén suba sakit basang Ayuné, énggalan ka kamar mandi.”

“Nguda Biang nawang tiang kal nyakitang basang?”

“Pil ento anggon ngulungin belingan.”

Makesiab tan kadi tiang ningehang Biang ngorahang buka kéto. Dong aluh sajan Biang ngorahin tiang. Apa ké Biang tusing nanggep pianak ané di tengah basang tiangé ento masi cucuné? Sing madaya Biang ané sanget bakat percaya, dadi ati ngulungan buah basang tiangé. Sing taunan tiang nengkik, ngorahin Biang pesu. Sing kuat buin tiang nyalanang pilihan idup ané katentuang olih reraman tiangé. Tan ké wenang tiang nyalanang idup nganutin apa ané ngawé tiang bagia? Apa ké lekad dadi anak luh mula lacur buka kéné? Manyeselin déwék tiang lekad dadi anak luh, maan nasib buka kéné. Nyén buin lakar

percayain tiang? Yéning Biang miwah Aji ané banget sayangan tiang, dadi ati malaksana buka kéné kapining tiang. Tiang, tiang pinaka buah basangné. Apa ké Biang miwah Aji takut yéning tiang yerod? Nanging Biang ngajak Aji apa ké sing takut suba ngulungin belingan tiangé, satmaka cucuné pedidi?

Kenjel tiang ngamigmig pedidi sambilang ngeling. Kuang kin awai tiang ngarasayang dadi Ibu, kuang kin awai masi tiang lakar kilanganan pianak. Kuang kin awai mirib tiang kilangan paukudan déwék. Sagétan pesu sakit basangé, maklies. Tan sanggup baan naenang. Puntag-pantig di duur kasuré. Peluhé nrébés pesu uling paukudan tiangé. Liman tiangé ngejer naenang sakit. Sing kéna baan ngorahang sakitné. Jeg nagih pegat karasa basangé uling diawak tiangé. Uduh Bli Bagus, tau ké Bli yening tiang dini kasakitan?!

Makelo sajan tiang naenang sakit basang. Sing taunan batisé suba maurab getih. Dot sajan tiang makaukan, ngidih tulung. Nanginng bayun tiangé suba telah, sing ngidang masuang munyi. Ulian sing ngidang nanggehang buin, baat peningalan tiangé nagih ngidem. Ngangsan samar dingeh tiang munyi anak di sisi. Nanging besik sajan ané kaselselan. Yén dadi baan tiang, dot sajan nguliang idup ané makulit.