1 minute read
puisi-puisi komang sujana (ki jugul
Sayah
Guminé nedeng sayah Enu masi gagah pangenah Tusing dadi kalah Matograh nyama gelah Tegak umah dadi kantah Akéténg tusing ngelah Makejang telah bah sayan layah
Advertisement
Guminé nedeng sayah Pabedikin abah cékah muah ampah Malaksana ané tawah-tawah
Rajah tamah pragat nagih nadah Apang tusing sanget benyah Idupé osah sirepé blangsah Sakité ngahngah Sengsarané ngahkah Kanti ngakah
Guminé nedeng sayah Maka cihna suba wayah Sugih lacuré asah
Ngastiti Sang Hyang Titah Apang tusing kena raja pinulah Laksanané corah jalan uah Mulat sarira apang katah Dasarin itep ngayah Caluhang yatna salantang galah Ngulati gumi gemah ripah Kemu mai élah
Idupé bungah
(Ki Jugul, 16/06/2021)
Ampura Guru
Saking niskala guru ngadakang tiang Madasar patemoning Hyang Ratih miwah Semara Wit makasami wit ring maya pada Ngicénin uirip kabaos Sang Hyang Jagat Karana Nanging ampura … Sembah pangubaktin titiang kantun tuna
Saking garba guru ngemit tiang Kantos embas ka jagat pada Ten ngétang sengsara duka lara Madasar tresna sih kaupapira
Nanging ampura … Durung sida ngwales ban tresna muah arta brana
Saking alit guru ngajahin tiang Maka dadalan tiang nawang Paundukan idupé beneh kalawan iwang Kaweruhan tata susila dasar ngunadikayang Nanging ampura … Durung paripurna tiang nglaksanayang
Saking kajajah kantos dados panegara Guru nabdabang jagaté kerta raharja Sida tiang ngisinin idup ring sekala Masekolah ngrereh pangupajiwa Nanging ampura … Durung kukuh titiang makrama nyalanang darmaning negara
(Ki Jugul, 17/06/2021)
Jero Korona
Yéning batbat sayan nglimbak Sayan uug yening purun mamurug Yéning kasaru sayan sengkala tan patanggu Sayan benyah yéning abah manusa ampah
Gering agung kawangiang patut Icén margi nénten ngawé pati Saksat bikul kabaosang Jero Ketut Mangda usan nyengkalén wong tani
Gering agung sasab mrana Patut kasengguh Jero Korona Kasapa kaupacara sekala niskala Mangda nénten nyansan raat daging buana
Jero Korona rarisang mamargi Sampun sué nguasa siang ratri Jero Korona sampunang mawali Icén galah manusa ngwangun gumi
(Ki Jugul, 18/06/2021)
Komang Sujana (Ki Jugul), makarya dados guru Bahasa Bali ring Buléléng.