1 minute read
puisi-puisi i kadék widiantana
Saji Sang Palatra
tegep sesaji sampun katur panyomia butha ring kubon i lacur kahanan sakala niskala manados tamiu
Advertisement
prawartaka karya atur unjuk lungsur
mantra utama saking pandita luih ngungsi genah sunia né kaalih marga rahayu né kapanggih sang hyang atma ngélingang linggih
saji tarpana wong-wongan bubur pirata masekar ura padupan panjang ilang nasi takilan matuak arak
agung alit saji tarpana masegehan manca warna pabersihan matoya kumkuman sarwa saji ngiring pamargin sang palatra
Sang Putus Awarah-Warah
mémé bapa mindon kalawan misan pianak adiri jua katinggal durung swagotrania genah makarya sami kantun kaliputing tangis kalaran
maselémpoh matimpuh masila sami mategepan kuwangi wiadin canang pangiring pandita nunas tragia ring atiti sami sané rauh mangremba
ida pandita awarah-warah indik pamargan sang waraatma moga angungsi luihing genah ngiring acepang mangkin sang palatra
sembah katur ring hyang widhi asembah puyung pinih sawiji nglantur sembah ring batara batari nglantur sembah ring sang pati
Gagendingan Sang Palatra
wirama girisa indrawangsa katur gurnita ramia ring pakubon i lacur wénten naler nembangang bala ugu caritannya indik i pan brayut
kidung kekawiné tan papegatan angiring pamargin i lampus né kaduhkitan penyuluhé tragia ngaturang tembang negepin upakara sané kakaryanang
Galahé Mamargi Sang Palatra
dinané ayu paniwakan pandita anggara wagé wuku matal catur laba maingkel mina tanggalé kalih likur sasihé kasa lebur awu kala sudukan
ketékan dina manuju setra dauh ayu galah utama kairing sami antuk swagotra yadnya nglanus né kapikamkam
Samaptaning Lara
Puput manyarik samayané ring gumi Mangungsi ka tanah wayah ngaruruh sepi Atingal saking jagat sanghara tuwi Nyalanang lampah sang kawiswari
Larané pamuputné pati Patiné pamuputné tan yukti Mogi wastu sami pada mangeling Éling ring katatwan tekané pati...