kota palekadan (IDK Raka Kusuma

Pamahbah

kota palekadan

IDK Raka Kusuma

/1/

tiang, idéwa, mapasahan tongosé majohan surat ané ngranaang paak iraga diastun pasahang makudang-kudang segara sig suraté abulan ané liwat magatra idéwa: di Prancis makejang melah, makejang malengis makejang makenyah, ngulapin paliat baan gaguyon tiang ngwales: awanan lipia tekén Dénpasar pinaka kota palekadan ituni nélpun idéwa: kota palekadan? apa ento kota palekadan? ané tawang tiang tuah kota préman tuah kota préman!

/2/

negak di ampiké. nlektekang bulan marawat unduké pidan peteng dugasé ento. bulan Méi idéwa teka. muané barak gati

gedeg pesan. ngraos tan parérénan kota préman! kota préman! nélpun idéwa buin maninné ngorahang di kapal pesiaré ané nylajah segara ngorahang kenéhé dukita

/3/

di ampiké. majujuk. nlektekang langité masunaran buin marawat unduké ipidan di subané makelo sing teka ngirim surat idéwa magatra: jenek di Paris sig guminé setata ngesiuhang bo manis sekat ento: tiang, idéwa ngutus surat pinaka duta sekat ento: tiang, idéwa saling kirimin surat, setata isin surat idéwané: tan mari

ngorahang dukita tan kadi dukita ulian sakit ati

tekén kota palekadan pedidi

/4/

masadah di sendin ampiké. nlektekang remawa maoyagan marawat idéwa majalan paliaté nrawang sawang tindakan idéwané gancang matakon tiang di keneh sarwi nyusutin poos

buin lakar magedi idéwa nyujur sajoh-joh tongos megat makudang-kudang segara? aidupan nongos ditu idéwa? aidupan sing mawali mai? aidupan nandang dukita? aidupan nyakit ati? kota palekadan iragané luung suba jani lakar orahin di kacunduké dini

jumah, di jalan Surapati

/2008-2012/

Catetan: Puisi puniki kaambil saking cakepan Dénpasar lan Donpasar

IDK Raka Kusuma

embas ring Getakan, Klungkung, 21 Novémber 1957. Kakawian-kakawian danéné sané mabasa Bali kawedar ring Bali Orti (Bali Post), Médiaswari (Pos Bali), Bali Aga, Jurnal Kawi, miwah Canang Sari. Ring warsa 2002 dané ngamolihang Sastra Rancagé antuk baktin ipun ring pangembangan sastra Bali malarapan antuk Majalah Buratwangi lan taler 2011 antuk kakawiannyané sane mamurda “Sang Lelana”. Ngamolihang Penghargaan Widya Pataka saking Gubernur Bali warsa 2012 antuk cakepané sané mamurda “Bégal”. Sareng pangawi saking Karangasem dané ngwangun sanggar sané mawasta Sanggar Buratwangi, lan dané taler dados silih sinunggil pangremba ring sanggaré punika.