puisi-puisi ni wayan adnyani

Tresnané Kecag Asibak

Dasa tibané sampun liwat Masaput poléng matungked emas Nasikin luu di karang awak Di natahé sesai nyikutang tresna Neked pajalané di muncuk sayongé

Yadiastun sawat, lawaté lakar masunaran galang Niki né mawasta tresna asibak

Meled makilitan

Nanging tanggguné kecag di durin koriné Dija ambahin ngedeng ka natahé driki Pang suud tyang ngantosang Tresnané kecag asibak di natah bajang

Oktober 2017

Maprani

Enem sasihé sayan paek driki tyang metékin dina bilang wai nyantos galah raris prasida mapupul sametoné ring natar banjar cingakin tatasang selegang adulang praniné majujuk genépin lakaran tabuh, toya, asep , lan sekar raris margiang pakénaké Ratu iriki titiang mamanda ngucap ucap sakancan pinunas akebitan rejang, akebitan tabuh matuéling sang maurip

néh, nah, déwa ratu

dong dayanin I prani sayan nadi

Sabilang dina, sabilang wai Mapulang sasarin sunia Mawinan, Enem sasih setata ngantosang

Tihingan, Januari 2019

Anak Luh

Luwih pangaptiné Yadisatun luu panyandingé Jegég semitané, tolih parilaksanané Manis kemikané, masawang pahit kakecapé Niki pakéling Anak luh maka sasuluh

Pebruari 2019

Ogoh-Ogoh

Sasaluh napi Sané kasolahang Sinunggil Kasanga matangi nadi

Sang Kala dados lalampahan Nanging nénten wénten uning Manut napi? Ngerereh napi? Pamarginé kangin kauh, Masuryak, nyurakang napi?

Pamuput, Sampun telas satuané maider Jantos ajebos Napi benjang dados Sang Isaka ring sasih kadasa Kedas ning magalang bulan

Maret 2019