dadi gamer (Ida I Déwa Nyoman Merta Semara Bawa

Satua Cutet

Ida I Déwa Nyoman Merta Semara Bawa

“Mohon perhatian kepada para pengunjung acara undian berhadiah

dalam Grand Opening ASUS Republik Of Gamer agar tetap di tempat,

karena pengumuman kepada pemenang undian akan diumumkan

sekarang,” baos silih tunggil pangénter acara.

Selamat kepada nomor undi 0777 atas nama Wayan Joni karena berhasil mendapatkan laptop ASUS ROG Strix Hero II, persembahan “ dari ASUS Republic Of Gamer,” baos pangénter acara malih.

“Yéaaaaah! Payu masi cang maan laptop sultan, hahaha ngidang jani cang main gamé sepuasné,” kéto abetné Wayan Joni awinan ia kendel maan laptop ané luung lan mael.

“Selamat kepada dik Joni karena telah berhasil mendapatkan laptop ASUS ROG Strix Hero II. Bagaimana kira-kira perasaan Bapak saat ini?” pitakén pangénter acarané.

“Saya sangat senang sekali karena saya gemar bermain game jadi tidak heran jika saya sangat senang apalagi mendapatkan laptop sultan seperti ini,” abet Wayan Joni ambilanga makenyem.

Suud wawancarainé laptopé ento enjuanga sig Wayan Joniné, aéng kendelné Wayan Joni ambilanga ngomong di kenehné. “Ratu Hyang Widhi suksma duaning ratu sampun suéca ring titiang, lancar jaya Ratu.” Suba maan laptop luung tur mael lantas ngeségsag ia mulih menékin montor. Menékin montor ambilanga kenyem-kenyem di jalané, laut ada anak luané nepukin kedék ningalin muanné Wayan Joni buka kéto. Bes keliwat kendelné lan mapangenan kanti anak nyebrang di jalanné tusing tepukina. Lantas ia makesiab lan ngerém mendadak, aget ia tusing nabrak anaké ané nyebrang jalanné ento. Anaké ané nyebrang ento laut nguél-nguél, awinan ia das kena

sengkala. Ditu lantas ia nunas pangampura awinan bes keliwat kendel tekén déwék.

“Panak apa kadén cai. Tepuk anaké nyebrang di jalanné? Aget awaké sing tabrak cai, yén kéto suba laporang polisi nes né,” kéto munyin anaké ané nyebrang jalan ento.

“Aduh Pak, ampura Pak tiang ten nyelapang Pak bakat mapangenang tiang wawu Pak menékin montor,” cawis Wayan Joni sambil ngetor awakné awinan ia jejeh.

“Ih, yén cai nagih mapangenan, ditu, ditu di umah cainé tongosné. Eda cai mapangenan di marga gedené cara anak buduh, sing tawang nyén cai tekén bahaya di jalan. Kondén tawang cai asanné masuk di rumah rodéo! Kilangkileng cara siap sambuhin injin,” munyin anakké nyebrang ento bangras.

“Inggih Pak, tiang nunas pangampura. Tiang ampun dahat iwang Pak,” saut Wayan Joni ngelemesin.

“Nah-nah! Kemu mulih jani cai, eda kéto biin buin mani!” pabesen anaké nyebrang jalanné ento.

“Nggih Pak Suksma,” abet Wayan Joni ambilanga nyatater montorné lan majalan énggal. Disubanné neked jumah ngundebang tur ngunci pintu depan umahné nglantas ia mukak pembungkus laptopé, ngakit charger lan ngidupang laptopné. Laptop suba idup laut ia browsing-an ngalih gamé ané terbaru lantas download-a. Suud download game lantas ia main nganti petang jam.

Sing kerasa galah suba jam tengah dasa peteng Wayan Joni itep maplaianan game, sing taunanga mémé lan bapanné diwangan umahné ngawat-ngawat uli sisi.

“Wayan! Wayan! Mémé ajak bapa suba di mukak umahné. Bukak njep pintunné!” raos méménné ngorahin pesu.

“Wayan! Di tengah Yan? Énggal dik pesu bapa ajak mémé suba diwangan ngantosang!” bapanné ngorahin pesu nyagjagin.

Manik Sudra

“Aduh! Adi tusing pesu-pesu anaké truna totonan? Pa nang penékin pintu gerbangé lan macelep alih mulihan panaké. Adi jeg sing pesu-pesu, padahal montorné ada jumah.”

“Nah-nah tiang kal macelep jani.”

Lantas penékina pintu umahé ento tekén bapanné Wayan Joni, laut bapanné macelep ka umahanné, majalan menékin undagé nuju ka kamar Wayan Joni. Uli diwangan kamarné Wayan Joni bapanné ngaukin ia nanging tusing sautinna tekén Wayan Joni. Suba kéto getokina pintu kamarné, nanging tusing masi dingeha. Krana tan sida naanang gedeg lantas bapanné ngedor pintu, ditu lantas Wayan Joni dapetanga suba masengseng kupingné aji earphone ané gedéné amen jempong gongé lan itep ia ngutak-ngatik laptop ambilanga ngomong padidinné. Wayan Joni ané tusing séngeh bapanné macelep lantas kaplakina muanné, lusa airphonne laut pilesa kupingné kanti barak biing. Wayan Joni tangkejut lan rumasa lek atinné krana déwékné pelih. Ditu baanga munyi ia tekén bapanné.

“Wayan! Wayan! Nak truna apa kadén né? Uli semengan nganti kepeteng terus nguyak game kéné gén gaéné. Tusing ngitungang masa depan. Tolih to bapa ajak mémé uling tuni ngantosang diwangan umahé, lén pintu gerbang makancing, ibanné kaukin sing nyak pesu-pesu. Kel kénkén Wayan jani nagih suudang masuk?”

“Aduh! Aduh! A... A... Ampura Pa tiang lali Pa. Tusing dingeh tiang Bapa ajak Mémé gelur-gelur diwangan umahé.”

“Éngkénang kel ningeh? Kuping ibanné ba masengseng baan earphone. Yadiapin ping siu gelurina ibanné sing lakar ningeh apa. Nah! Nah! Jani suud main game, matiang laptopé. Tur jagjagin méméné diwangan padalem suba makelo ngantosang.”

“Ng... Ng... Nggih-nggih Pa.”

“Énggalin!”

Ngeségsag Wayan Joni ngamatiang laptop lan pesu uling kamarné takut tekén muan bapanné ané suba barak nyihnayang suba gedeg tekén Wayan Joni. Wayan Joni mula dahat takut yéning bapanné suba nguél, yén suba nguél bapanné anak barak muanné lan galak pisan sekadi krodha Sang Hyang Rudra mamurti nagih mralina gumi. Wayan Joni lantas nyemak kunci lan nyagjagin méménné ané suba nyantosang di mukak umahné. Suba mukak pintu saget pilesa kupingné tekén méménné kanti barak biing. Ditu Wayan Joni aduh-aduh naanang sakit kupingné, lantas baanga tutur tékén méménné.

“Panak apa kadén nénénan? Tusingké medalemin nak tua? Mémé ajak bapa gelar-gelur ngaukin ibanné adi sing jagjagin?” kéto petakon méménné ambilanga nganengneng Wayan Joni ané enu duh-aduh.”

“Aduh Mé, kudang anak tua matakon kéto tékén tiang. Ampurayang tiang Mé! Tiang tusing ningeh Mémé ajak Bapa gelar-gelur diwangan umahé, awinan kuping tiangé masengseng baan earphone,” imbuh Wayan Joni ngelemesin.

“Ooo... kéto gén gaén Wayanné sabilang wai, kanti sing cumpu tekén rerama padidi. Ih Wayan! Sekat Wayan bergaul ajak nak uli luar jeg suba berubah parisolah Wayanné. Pragat kéto gén gaén Wayané. Ento tolih timpal pisaga dauh umahé I Sucitra kéto antengné tekén reramanné sesai melajah tur jemet magaé, sesai maan juara satu di kelas. Ibanné pragat main game lemahpeteng.”

“Nggih Mé, tiang nunas geng rena sinampura Mé! Kéwala eda Mémé wandingang tiang ngajak I Sucitra! Dueg anak pada lén Mé.”

“Adah! Ngaji mabasa alus peda, nah énggalin macelep ka jumahan! Ih, Wayan ingetang suud mandus ganti baju, ngajeng suud ento mabakti di sanggah, nah!”

“Nggih, Mé.”

Suud maan tutur Wayan Joni mandus, lantas mabusana bersih lan ngajeng di paon. Suud ngajeng lantas ia mabakti di sanggah. Rikala ia mabakti ia ngacep ambilanga ngomong di kenehné majeng ring Ida Hyang Widhi.

“Ratu Hyang Widhi dados kekéné nasib titiangé dados nak truna maderbé rerama sané galak. Ratu titiang dot pisan sekadi Jess No Limit, dados gamer professional lan kajanaloka pisan.”

Suud ngomong kéto lantas ada suaran cek-cek, sané pinaka cecirén suéca Hyang Widhi tekén ia. Di kenehné Wayan Joni ngaturang suksma dahat majeng Ida.Tekanné uli mabakti Wayan Joni lantas tegakanga tekén memé lan bapanné. Mémé lan bapanné lantas ngemaang tutur.

“Wayan jani Wayan suba truna lan sedeng masekolah suud ja main kekétoan gén! Malajah naké itungang malu eda Wayan maboya cara kéné! Pedalam reramané ajak dadua puntag-pantig ngalih gaé anggon bekel ceningé,” kéto raos méméné banban.

“Beneh orahanga tekén mémén ibanné Yan suud malu main kéto! Apalah kel maan uli main game kéto? Pamuputné ngutang-ngutang pipis ajak pelajahan di sekolah. Jani apang Wayan sing main game dogénan kel sita bapa laptop Wayané,” kéto raos bapané negesin.

Wayan Joni runtag bayuné tur ia menep tusing ngidaang nungkasin raos mémé lan bapané ulian ia tusing bani tekén anak tua. Wayan Joni tuah ngomong nggih lantas ia mewalik ka kamar malajah. Suud malajah ia lantas sirep. Bapané ané ngintip Wayan Joni sirep latas nyemak laptopné laut kunci di brangkas di tengah kamarné.

Wayan Joni rikala sirep ia ngipi, di pengipianné ento ia dadi peserta turnamen Esport International. Ia kaceritayang sinalih tunggil peserta uli Bali ané ngewakilin Indonésia di cabang Esport International. Rumasa bangga pisan déwékné, nanging rikala ento awakné rumasa kakocok cara ada linuh. Lantas ia makraik takut kadéna ada linuh.

“Aduh tulung-tulung! Linuh! Linuh!”

“Wé...! Wayan banguin adi jeg gaap mara bangunin. Énggalin bangun suba tengai né, tulungin mémé mabanten purnama di sanggah jak di pakaranganné.”

“Ng.. Nggih Mé. Ampura Mé!”

Cedas-cedés Wayan Joni ngampilang sirepanné, suba kéto ia megedi uli kamarné nuju ka kamar mandi kal mandus lan masugi. Suud mandus ajaka masugi laut ia meséh adat madya kel nulungin méménné mabanten. Di suudé mabanten lantas ia macelep ka kamar ada kenehné nagih nyemak laptop nanging ia tangkejut laptopné tusing ada. Ditu lantas sebet kenehné paling ngalinang laptopné. Ia lantas macelep ka kamar mémé lan bapanné ditu ia ngalin-ngalinang di betén kasuré ajak di lemariné tusing bakatanga. Sagét tepukina brangkas warna selem, bukaké brangkasé ento aji kunci lan tangkejut Wayan Joni krana dapetanga ditu laptopné. Ia lantas nawang kocap bapanné ané ngengkebang laptopné apang ia tusing ngidaang main game. Kuciwa atinné krana dayainné tekén bapanné. Wayan Joni nyemak laptonné lantas magedi uli kamar mémé lan bapanné. Neked di kamarné ia lantas main game, ngilangang atinné ané kuciwa tekén reramanné.

Sedek Wayan Joni main game lantas tepukina tekén méménné, gedeg méméné nolih ia main game. Lantas gampara muan Wayan Joni nganti barak, ditu lantas Wayan Joni baanga munyi tekén méméné. Wayan Joni runtag bayuné nolih muan méménné galak. Kondén suud ditu lantas teka bapanné nyagjag krana dingeha uyut. Nawang bapanné teka macelep lantas ocem semunné Wayan Joni.

“Ping kuda mémé lakar mapeta, suud ibanné main kakéto. Adi Wayan sing dadi orahin nah?”

“Jelamané ené sing ngerti kin bahasa ajaan, tepuk ibi bapa galak tekén cai tusing masi kapok-kapok. Adi tusing dadi orahin?”

“Mémé! Bapa! Tiang tusing demen yén kenehanga gén terus-terusan. Apa pelih tiangé ané ngainang Mémé ajak Bapa kasar buka kéné? Tianga sarasa ring naraka kéné. Taénké tiang mamaksa Mémé lan Bapa meliang tiang laptop,

ené ada sangkaning utsaha tiangé. Tiang tusing juari ngidih tekén Mémé ajak Bapa.”

Mendep mémé lan bapanné ningeh munyin pianakné. Wayan Joni ané ngetél yéh panoné lantas pesu. Wayan Joni majalan di rurungé ngantos ka lapangan sépakbola ané dohné satu kilo uli umahné. Ditu ia negak, negaknegak ambilangan mapangenan ambilangan naanang kasungsutang kenehné. Nganti sandikala ia ngoyong ditu, ambilanga nutur pedidiané.

“Arah, kakéné buka awaké, kadirasa cara anak bebinyat, sesai kéna munyi boya-boya.”

Inguh kenehné Wayan Joni ingutangang buka kéto, ambilanga mekeneh terus-terusan. Tungkula makeneh kanti suaran cicingé ngongkong tusing dingeha. Sedek ia nu makeneh lantas ada montor gerung-gerung nuju ka tongosné masungsungtan. Ngentér endihan lampu montoré ka peliatan muané Wayan Joni. Makijapan I Wayan Joni nolih anaké menékin montor, mara toliha sing lianan tuah bapanné ané toliha. Prejani ngenger sebeng Wayan Joniné nolih bapanné.

“Yan, sing cai kal mulih, makan nang kondén, mai mulih!”

Wayan Joni siep tusing ngwales.

“Yan, kénkén ci adi tusing masaut? Apa ulian mamedih cai kakéné?!”

“Ae Pa, sing ja len Pa tiang mula mamedih tekén Mémé jak Bapa, ngerti naké tiang tusing ada mamanah jelék tekén Mémé lan Bapa. Tiang nagih barang ané dotin tiang ulian utsaha tiang padidi tusing pati tiang ngidih tekén Mémé ajak Bapa.”

“Nah, yén kakéto bapa ajak mémé ngidih pelih tekén cai. Tusing lakar mamisuh cai uli jani. Uli jani lautang suba demenan cainé. Kéto samayan bapa ngajak mémé, dadi gisi tur ingetang cai.”

“Nah, Bapa kel ingetang tiang apa orahang Bapa. Nanging, tiang masamaya apang seleg malajah apang suksés.”

Wayan Joni lantas muliha nutut pajalan reramané. Teked jumah laut ia malajah ajebos, ulian paningalan tusin maca tulisan nglantas ia sirep. Di sirepné ia ngipi jagjaga tekén idolané ané dadi gamer tur youtuber Jess No Limit ditu ia kendel pesan nganti mesuang yéh mata. Kriiiiiingggggg….! Alarmé suba nujuang jam nem semengan. Gegison bangun I Wayan Joni uli pasirepanné apang tusing latan masuk. Kahanané di sekolah cara biasanné murid-muridé pada sibuk malajah. I Wayan Joni mapangenan di tengah kelas ngenehang ané ipianga dugasé peteng ento. Nanging belah tan pagantulan tatkala guru BK ngaukin adanné Wayan Joni apang ka kantoran. Tangkejut kadi rasa samber tatit I Wayan Joni, sebet kenehné sing ada pilihan ia lantas nuutang keneh guru BK ané uling tunian suba nujuh aji lima. Selantang jalan nuju kantoran Wayan Joni suba Wayan Joni suba takut. Apa minab ia ada pelih ladné. Di tengah ruang BK tan dumadé ditu nongos ané ipi-ipianga uli pidan, I Wayan ngruntag tangkahné ulian bes sing percaya lakar macunduk ajak bintang idolanné. Ia bengong sambianga enggang ainan cara anaka kéna penyakit busung lapar.

Ditu lantas ia orahina negak madampingan ajak bintang idolanné. Di atiné ia ngomong, “bih, kléng seken Jess No Limit ci.” Jess No Limit suba kenyemkenyem ngatonang muané Wayan Joni ané kaliwat ngon.

“Wayan Joni, kamu dipercaya mewakili sekolah ini untuk ikut ajan esport bersama Jess No Limit,” kéto atur Guru BK-né. Kendel kauman-uman kadirasa tangkahné Wayan Joni ningehang kabar ento. Lantas ia munduhang bayu ngomong ajaka bintang idolané, “Bli. Ihh…Kak beneran kita akan satu tim?” Wayan Joni matakon.

“Ya iyalah satu tim bro, buat sekolahmu bangga bro! Kita tanding bersama 16 Agustus, oké!”

Sing ngidaang naanang baan sukan kenehné Wayan Joni. Ditu ia sing engsap ngaturang suksma tekén Hyang Widhi. Jamé suba nujuang galah jam setengah dua bél mulih memunyi ngalun. Binta idolané Jess No Limit lakar

mawalik ka hotél, ditu mapalasan I Wayan Joni ajak bintang idola sahasa lakar matemu buin di pertandingan Esport bin abulan.

“Mé…..! Pa….!” IWayan Joni ngadébras paliabné kaliwat égarné

“Yéh… kénkén panaké Pa, kauk-kauk?”

“Yiih… kénkén cai kauk-kauk Yan?” takon bapané.

“Mé… Pa…. tiang lakar ngwakilin sekolahé di ajang game, esport.”

Mémé tur bapanné Wayan Joni saling coong sing nyangka pianakné lakar ngwakilin sekolah. I Wayan Joni, cara ané suba-suba ngejengit ulian kendelné sing katawah.