puisi-puisi indik klungkung

Ida Bagus Pawanasuta

Gending Nyaluk Sandikala

Ring sinalih tunggil paduraksa genah akung Nyaluk sandikala isin gumi ngantos gong macegur panyilur kuasa selem putih peteng srepet panganggo selem uli tuni ngantiang telah matan ai cihna galah luas majalan ngawitin panyumun gending ka tanggun selem ka muncuk putih apang pragat nyarik apada punyan kepah ngepah dot ngrasayang baret angin ubesin kain putih nasi cacahan

sasuguh sanggah cucuk endihan sundih api endih... endih... endih

endih api di mata tengen endih panes manesin endih... endih... endih

endih api di mata kiwa endih ngabar ngebusin

I Ketut Rida

Kreta Gosa

Kreta Gosa

genah malila cita murnayang duhkita anggén pinda wayang KAMAsan riang madyaning SMARApura sarining langun kapiarsa Kreta Gosa

maka sipta saba panepas karma paripolahing lumaksana ri kauripaning jadma yan lémpas ring agama Kreta Gosa

tengahing ulangun negdegang pikayun sadu susilané kawangun neptepin ngulurin ajum boya indriyané karumrum Kreta Gosa

anggén pakéling mangda éling riang rga setata éling kayuné sada ening corah drowakané nyamping

IB Rai Putra

Jurang Belung I

Aji- Biang doh gumanti doh sawat sampun pamargin titiangé nuut titi ugal-agil nglintangin bias pasih rauh-ngarauhin genahé madurgama

Wantah Jurang Belung maring désa sekartaji wiakti ngupasaksi pedek tangkil titiang néwék

Titi kayu maselat kayu katos adepa sisin jurang sor ipun ombakan toya samudara galak ngebug pasisi mapageh batu kaang matangkid wayah

Ratu doh sampun genahé ngilgil mauparenggan warna malit nyrosodang-nyrosodang kawéntenané

Kawah – Sorga

klidin – rauh

tirta amerta

ngamertain urip – kauripan Jurang Belung wiakti margi siki kawah – sorga dados siki karma nyihnayang kawon klawan beciké

Aji – Biang wiakti titiang polih molihang tirta amerta

Jurang Belung sida nulung

IBW Widiasa Kenitén

Pasisi Kaler Kangin

Katur ing Sang Tulya Wagiswari

Iriki Ratu ring pasisi kalér kangin nyepukang semara sastra ngruruh suaraning sepi matatakan galang kayun ngaras ngarasin linggih Ratu

Iriki Ratu ring pasisi kalér kangin ngaptiang muncuk toya ketisin ping tiga anggén ngepitang tresna

Iriki Ratu ring pasisi kalér kangin ngambel tapak angin isep ping tiga ngumbara suwung

Iriki Ratu ring pasisi kalér kangin ngaksi unteng téja macaya, laksana anggén masuluh astra Iriki Ratu ring pasisi kalér kangin....

Ngakan Madé Kasub Sidan

Klungkung

Klungkung wantah genah patemon smara sang Semara Ratih Ngardi binih nyurat sasuratan ilakita Pangrupak napak, natah nyarca lontar Ngalembar sang pangawi ngawi pangawit dum duman dumadi Ngalembar sang pangawi ngawinang tetes tutug ayah Ngalembar sang pangawi ngawit wetu watek kawitan

Klungkung wantah genah mataki-taki nakénin sang mapitakén Nakénang sang katakénang Nakénin sang katakénin nyangkepin patakénnyané Sira?

Dija? Nguda? Kija? Klungkung tungtung nembungang KUNGKUNG

Klungkung wantah genah pangaresikan Ngaresikin sikian labuh gentuh Ngingkinang raresikan dasa mala, malaning nawa sanga Lebuh ring ancut segara Klotok

Klungkung wantah genah jaga satru Wadua sayaga nyaga metu wawetuan duhkita duratmaka Pecalang, pemating, lan endehan nyatur désa nangkepin Bencingah jengah sinurat tabuh rah

Pejah Michiel ring pantaraning segara Kusamba Tan sida magutin kasuradirgan Déwa Agung Istri Kanya ; Perang Kusamba nyarita indik

Klungkung wantah kagambar gegambaran jagat Wayang Kamasan nyurat sasuratan karma sang maurip Medal Agung nyurat sesuratan agung linggih panglingsir puri Gong pandé Tihingan nabuhin wewalian lan bebalihan Nabuhang tabuh jagat Bali ring dura negara Genta pandita tatahan Budaga ngujar mantra paripurna

Klungkung wantah carita tan sida kacaritayang Indik kusir dokar mecut kuda

Indik Goa Jepang netesang indik Jepang Indik brahmantian Gunung Agung niwakang lahar : nyapuh jagat Taler indik panca sembah ngardi rahayu ; lan indik wong tan pa indik : Klungkung gumanti wantah genah nemuang KUNG.