Ngutang awak (IGA Darma Putra

Lawat-lawat

ngutang awak

IGA Darma Putra

nak ané luas joh ulih umahné, tur tusing karoan dija lakar ngoyong madan ngutang awak. Ngutang awak sing patuh ajak ngentungang awak. Sing masih dadi orahang mesib cara anak malabuh banyu ka A sagarané. Ngutang awak ento pajalan ngalih ané tusing bakat yén tuah ngandelang negak aji ngidem dogén. Cutetné ngutang awak tetujonné apang nepukin awak.

Sing mara jani dogén ada anak ngutang-ngutang awak buka kéto. Ipidan masih ada anak ngutang awak sajoh gumi. Ada ané ngutang awak neked di désa lénan, ada masih ngutang awak kanti nyebrang ka pulo lénan. Biasané anaké ané ngutang awak, dot nepukin ané kondén taén tepukina. Ipidan, anaké ngutang awak madan mango.

Mango ento anak ané ngutang-ngutang awak apang maan sarin-sarin kalengengan. Luas koné sang Mango ka sisin pasihé, ditu nepukin bias mawarna magenepan. Ada bias mawarna selem cara bokné. Ada bias mawarna putih cara giginné. Ada bias mawarna sawang barak cara getihné. Ada masih bias kuning cara tilun kupingné. Magenepan sarwa biasé tepukina. Lacurné, kalengengané sing bakat masih baan ngejuk di sarwa biasé ento.

Ulian kenyel, ditu sang Mango negak di sisin pasih di batan punyan pudaké. Dingeha gebyuran ombak pasihé ané ngapé-apé ka pasisi. Saihanga nyak koné makuus cara kuusan kupingné yén tekep. Buihné ané putih ento mesib cara paosné. Rasan yéh pasihé masih pakeh cara peluhné. Sakéwala sing masih bakatanga ngarasang sarin-sarin kalengengané di yéh pasihé.

Ada sang Mango ka pasih, ada masih ané ka gunung. Menék ia ka muncuk gunung paling tegeha. Ditu tepukina sarwa lumut. Ada lumut gadang, ada lumut gading. Lumuté ento makejang tlektekanga, mara ia ngeh lumuté mentik yén maan ai. Lumuté nyak cara nujuhang, uli dija dogén pajalan ainé. I Lumut cara pagandan ané ngiringang Ratu Surya mamargi nelahang galah, mapuja ngiterin gumi. Wiréh ia satia tekén Ratu Surya, maan ia panugrahan ngidang nujuhang ai.

Kéto pajalan sang Mango ngutang awak ngalih kalengengan. Ada masih sang Mango ngalih kalengengan ka tukad-tukadé. Ditu ia masila tiding ningehang kénkén munyin yéh tukadé. Ipidan taén kocapan ia ningeh satua, yéh tukadé bisa pules. Yén pules, yéh tukadé mendep tur tusing membah. Jeg ngoyong koné yéh tukadé tusing makrisikan. Yén nepukin ané kéto, ngidang koné iraga majalan di duur yéhé ané pules ento.

Ada masih sang Mango ané ngutang-ngutang awakné ka sarwa setra. Di semané koné ia ngoyong masila di gegumuk agungé. Maan ia tutur, ané madan kalengengan sing tuah di tongos-tongosé luung dogén lakar ngoyong. Di tongosé ané misi endut miwah bengu masih nyak kalengengané ngoyong, patuh cara bungan tunjungé. Yan setra orahang cara endut bengu, kalengengané orahang tunjung. Di enduté bengu ento ada tunjung miik ané dadi palinggihan bhatara-bhatari.

Buka kéto satuan anak ngutang-ngutang awak. Di jamané jani, dadi iraga nugtug pajalan ané cara di satuané. Milu iraga ngutang-utang awak kemu mai ngalih kalengengan. Apa conto ngutang-utang awak jamané jani? Tirta yatra!

Tirta yatra dadi orahang cara anak ngutang-utang awak. Makejang purané alih, bhataranné baktinin. Ditu iraga marasa suba nyak patuh cara sang Mango. Sang Mango ngalih kalengengan ané tusing bakat-bakatanga. Yén anak matirta yatra, ngalih tirta ané kondén taén ketisanga. Jani suba panamayané malajah ngutang-ngutang awak. Ngutang awak perlu plajahin sawiréh buin pidan awaké lakar kutang lan kutanga.

IGA Darma Putra

embas lan magenah ring Bangli. Kakawiannyané kawedar ring makudangkudang média, minakadi Bali Post, Pos Bali, Tatkala.co, Suara Saking Bali, miwah sané lianan. Ngamolihang Hadiah Sastera Rancage 2018 antuk cakepan “Bulan Sisi Kauh”