satuan ati (6)--Agus Sutrarama

Satua Masambung

satuan ati (6)

Semeng, matan ai nguda mara san enten uli leplep sesaputan

petengé. Jendéla-jendéla kamarné Gendis suba tragia, sayaga uli

busanné, buka apang simalu maan duman sunarné Ida Hyang Raditya,

ngenyorin rapih pasirepanné, lan kedas téhelné.

Agus Sutrarama

“A..yu. Wih, wih... sing pelihné Mbok Luh ningalin? Ckckck.” Kakak kelasné Gendis, ané mara pesuan uli kamar ipunné, buka makesiab ningalin Gendis ané suba ada di sisi lan limanné ngisi pangepélan.

“Kenapa mbok? Hahaha...” Gendis makenyir saha ngusapin alisné, belus baan peluh ipunné.

“Asanné, beberapa hari ené tingalin mbok Luh, Ayu dadi tambah rajin aja…”

“Mm... tepatnya bukan tambah rajin... tapi baru belajar rajin Mbok Luh… hahaha.”

“Iya lho. Biasanné Mbok Luh teka uli lari pagi to, Ayu ondén masih bangun.”

“Iya, uda males nih jadi pemalas terus... haha.”

“Jangan-jangan perubahan ini karena ada sesuatu...?”

“Apa sih mbok Luh...?”

“Jangan-jangan ayu uda jadian ama... siapa ja, Ngurah, iya Ngurah kan yang sering ke sini tuh?”

“Iya, maksudnya iya namanya Ngurah, tapi ga jadian kok, orang temen ja...”

“Serius...? Keliatan kali Ngurah tuh suka ama Yu...”

“Mm...”

“Oh ya, Yu. Mbok Luh dadiné inget, waktu dulu Ayu baru-baru ngekost di sini, Mbok Luh kira nama Yu itu Sang Ayu gitu aja lho. Trus ada pak pos

datang anter surat, buat Gendis. Gendis... mbok bilang ngga ada yang namanya Gendis di sini, malah kadén Mbok Luh tuh nama cowok, haha.”

“Ih, trus...?”

“Trus, pak posnya buru-buru bilang mungkin salah alamatnya, trus dia pergi déh.”

“Oo...”

“Udah lama... baru déh Mbok Luh tahu kalo ini nih si jegeg yang namanya Gendis...”

Abet kakak kelas ipunne ento sambilanga mecik cunguhné Gendis.

“Aduduh...”

“Kayakné surat uling penggemarmu déh Yu. Seinget Mbok Luh amplopné cantik gitu, ada pitanya. Mudah-mudahan ga apa-apa ya...Maaf ya Yu...”

“Ih... ga apa-apa Mbok Luh, lagian ngirim surat kok make nama ga lengkap gitu.”

Lengkap. Dompét di kantong celana, name tag jak pulpén di kantong baju. Hmm, sajan pikun ento mirib tuah bakat. Ulian sing kapah Nada ngengsapin aban-abanné, ipun ngansan ngarasayang yén mirib déwékné mula berbakat pikun-pikunan. Mara ja ia kasisi, ngunci kamar kostné lan tetep enu sambilanga nginget-ngingetang yan mirib enu ada ané éngsapina, saget suaran montor di duriné ngentenin ipun.

“Arra.”

“Hay.”

“Hay.”

Hyang Raditya semeng ento buka jail. Kenyem manis anak luh di malun ipuné buka nyajang kadumin sunar lebian, kanti gigi gingsul ipuné ngemanisang semeng cahya ento.

“Nada, nih bukunya, baca-baca ya.” Ratu, Nada siep akejep. Ipun tuara abedik ngadén yén Arra lakar teka ka kostné semeng-semeng, padidi, tuah ngamaang buku unduk téknik debat ané maan pidan kasambatang baan Arra.

“Ini... bukunya Jung Dé ya Ra?”

“Mm,” Buka realitané tuara lakar ngamaang Nada bes joh makeneh. Apang tetep seimbang, ulian mula kenyataanné Arra enu tunangané Jung Dé.

“Daagh Nada, sampai jumpa di kampus.”

“Yup, makasi Ra, see u.” Tan katulungan, semeng ené Nada ka kampus mabekel girang.

Sajan, Nada tumbén ningalin candi bentar kampus ipuné ganggas buka kéné. Punyan bingin di sisin lapangané ngenah agung mawibawa, lan bungan bougenvilé di malun gedung jurusané, tumbén ngenah ngarembiak warnawarni masunar. Tondén suud-suud ipun ngenehang rasa iing girang ento, apaké mulan ané tingalin ipun mula ngelah sunar, apaké ulian tengahing atin ipuné ané nedeng ngendih lan sunarné maliah uli paningalan ipuné.

Arra. Nada nyidayang mastiang, kunci bagia kelas ipuné tuah sikian Arra. Yan Arra sedek sungsut, yén ulian masalah asmara ipun apaké masalah apa, suba pasti kelasé lakar milu layu. Lucu-lucuan muaniné lakar ngenah garing, jamé buka adéng san majalan. Lén cara semeng ené, yén suba Arra girang, kelasé riang. Lucu-lucuané I Ari Kusuma ngajak I Gober sing suud-suud ngaé ingkel-ingkel kanti basangé sakit. Lén suba kéné, sing ja tuah mahasisya kelasé kanti dosénné lakar ngerasayang jamé becat majalan. Mata kuliah Tour Guiding, Arra maan duman maju ka mukak lakar nyelasang unduk objék wisata Penglipuran. Makejang mahasisyané ané uli tunian suba kalikub baan cita, naanang kedékné ningalin Arra, pajalané lan kenyemné buka ada ané kataanang.

“Oo... Ok this is Inul Dara Arra...” Abetné Ibu Surni, dosén Tour Guidingé, mirib mara inget unduk ipidan dugas acara Dénpasar City Touré. Kala ento Arra madangdutan di tengan bisé, ngibur timpal-timpalné, lan Alit ané mara suud nyelé ati. Ningeh munyin dosén ipuné ento, mabangkes, kedék mahasisyané makejang mabrarakan, muani-muaniné negak di duri pada uyut kuuk-kuuk.

Wayan Jengki Sunarta

“Goyang, goyang…”

Nada nakep bibihné, kendel ipuné kaliwat, diapi kéto paliat ipuné abedik sing enyak kelés uli anak luh ané jani majujuk di mukak ento. Adetik, ané lakar setata ingetang ipun, kala paliat ipunné mapalu, Arra ningalin ipun lantas kedék ngéwérin. Duh, Arra.. terus kakéné nah.. Buka tuara ngarasa perlu ada ané musti kataenang buin, Nada ngalebang kedékné pesu makejang, kéto masih nyukserahang abungkulan atinné kaebekin baan pangapti. Tuara sabar ngantiang wai lakar maganti baan wai, malajah dini, ada Arra dini, buka wai ané jani.

Nada jak Arsa mara suud di warnét, ngaréntal ngaé tugas ilmu komputer, uli mulih kampus, kanti liwat sandikala mara suud.

“Da, singgah meli canang kejep yuk, kliwon jani.”

“Lan.” Sautné Nada.

Montorné Arsa macelep malunan ka umah kosté, mara lantas Nada durian. Sagetan Nada jak Arsa ningeh suarané Éka kauk-kauk, suba kéto buin kejepné ada suara jerit-jerit, ento sing ada lén tuah suaranné Éwik.

“Wii.. Wi Arsa, Wi Nada mai…” Éka tulung-tulung uli tengah kamar.

“Anak ada apa né, Ka?” Munyinné Wayan Arsa, becat nyangkol Éwik ané tepukina makakeb di téhel kamarné betén, gosongé ka duur sirepané. Éwik enu jerit-jerit, peningalanné ngidem, limané magemelan, kekeh.

“Ék, Éka sing nawang apa Wi.. nak Ka mara suud manjus, pesu li kamar mandi, langsung tingalin Ka, Éwik malingeb jerit-jerit.”

Nada, ngurut-ngurut limané Éwik, sambilanga nungkulang ketug jantungné ané enu nrugtug, prajani aksara suci mentas di papinehné. Tingalina Wayan Arsa abedik sing ngelésang tekek gelutan ipuné, ngusap-usap ebokné Éwik, laut kisi-kisi di kuping ipuné, ané enu kadingeh baan Nada.

“Wik.. mantram gayatri.. mantram gayatri…”

Lén kénkén kadén, sakabedik awakné Éwik ngendukang, gemelanné magagahan, ada ketélan pesu uli kadadua paningalan ipuné, ngansan

madingehan bait-bait gayatri mantramé pesu uli kemikan ipuné, laut ipun sigsigan. Ditu Wayan Arsa buin ngusap-usap rambutné Éwik.

“Astungkara Wik.. Ka, aturang segehan jep di malu nah, jemak ditu di montor winé.”

Buka ngerti jak tugas uling Wi Arsané, Éka kasisi. Nada ningalin di sisi suba ada bapak jak mémé tuan rumahé.

Éwik ané jani buka mara enten uli ipian jelekné, ningalin Wayan Arsa di sampingné. “Sing Wik, sing éngkén..” abetné Wayan Arsa.

“Wi Arsa..” Lantas Éwik buin melekuk Wayan Arsa.

“Yan, né baang Éwik minum malu..” Bapak tuan rumahé ngenjuhang aqua, “Nak éngkén lad busan, Wik?” Lantas i bapa nugtugang matakon di suba ningalin Éwik suba biasa.

“Éwik busan nak negak gén betén Pak, maan bengong, tiba-tiba inget Wik ngajak duwatan Pekak Wiké, lantas sing inget apa Wik buin. Mm, mara lantas Wik ningeh kisi-kisi nak ngorahin Wik ngucapang gayatri mantra.” Kéto tuturné Éwik.

“Oo .. hebat, ternyata kisi-kisiné Wi Arsa nyusup, ampuh!” Abetné Éka ané mara nyidang makenyem.

“Siep Ka, hush.” Arsa ngrenggeng.

“Adah, pasti né ulian nepukin muan Éka é mara pesuan uli kamar mandi to, Éwik tangkejut dadiné sing!” Munyin Bapak kosté ento prajani nyidang ngaénang makejang kedék, Éwik masih milu kedék.

“Nah, mirib Pekak Wiké ngingetin Wik apang setata inget sembahyang…” Abetné Wayan Arsa.

“Mm.. ao wi o, Éwik masih engsap yén jani kliwon. Makasih nah Wi Arsa, kéto masih Wi Nada..”

“Nah, Wik.” Nada jak Arsa pesuan.

“Hadéh, ada-ada gén. Da, lan manjus énggalin, pang dadi maturan jak makan tas.” Abetné Arsa saha malaib ka kamar mandi.

“Okay.” Buin acepok Nada tuara nyidang ngengkebang rasa bangga ipuné matimpal jak Arsa, lan buin cepok kénkén kadén tuara ada adan lén ané jani ada di keneh ipuné, sajaba ia.. Arra. Dot san jani nuturang peristiwa mistis ané bakatanga mara, kéwala ah, kan enu ada dina buin mani, kéto Nada nungkulang atiné, saha majanji lakar miara kenyem ipuné ené, kanti dinané buin mani.

Bukuné Arra, ané.. ah, tuah bukuné Jung Dé, buin negesang unduk prinsipprinsip dasar ané musti kagambel baan seorang debater. Dini ditu di betén lengkara-lengkara pentingé magaris baan pénsil, ngenah san kénkén ipidan sekené sang ané ngelahang bukuné malajahang déwék ipuné. Nada suba kanti mamaca halaman siduri lan ngarasa siaga lakar ngamilunin lomba tahunan, English Debate Contest sa-universitas sa-Bali.

Ada kenyem ané mangembang, dikala déwék ipuné nganggon jas almamaterné, semeng ento galah lakar berangkat ngamilunin lomba debat di Dénpasar. Nada nemuang galang, iing atinné tuah kaiisinin baan musim semi yén indayang di negara-negara Éropa. Sarwa pangapti ané tulus makeber-keber. Hh, kel baang enyén ké makejang ené? Baang sang rupaka ipuné ané suba sabar miara nyekolahin déwékné kanti jani, kel baang sarwa tresna, sarwa kasih ané taén lan enu urati kén déwék ipuné? Hyang Aji Saraswati dumogi sida makenyem, semeng ento.

Pak Romy utawi Mister Romy, dosén Bahasa Inggris, pembina tim debat Kampus Pariwisata Baliné munduhang ka nenem anggota tim debate disubané makejang tuunan uli mobile. Arda, Joe, Déwi ada di tim A. Okta, Dayu, lan Nada ada di tim B.

“Ok! Semua! Kita udah ada di sini. Kita uda latihan, sekarang kita beri yang terbaik! Kampus Pariwisata Bali..” Abetné Pak Romy saha ngenjuhang liman ipuné. Makejang anggota tim ipuné milu ngenjuhang limané, ka malu, matumpuk dadi abesik.

“BISA!!”

Makejang ngemaang ané terbaik. Makejang ngelah carané padidi mem’bius’ juri lan panontoné, diapin ja tetep ané madan lomba, musti ada pemenangné. Terbaik dari yang terbaik. Nada lan tim B astungkara nyidang menang dipertarungan pertamané. Tim A kalah tipis di pertemuan pertamané. Kéwala enu joh pajalané. Di kala istirahat, makiré lakar nugtugang ka pertandingan selanturné, ditu Nada ningalin ada Arra, negak di kursi penontoné ngajak Jung Dé. Ipun jak dadua ngenyemin Nada buka ngamaang semangat. Nada ngarasayang keneh ipuné dangsah. Ipun tuara ja ngarepang apanga Arra teka tan padampingin baan Jung Dé. Ipun masih tusing nyidayang lakar nganggon ento karana, kalah tim ipuné di pertandingan ané kedua lan ketiga laut tuara lolos ka babak final. Astungkara tim A di pertandingan salanturné nyidayang dadi jengah, menang, ngansan mamanes, menang, lan menang. Sesel bisa metu ulian tuara ngadén lawan iraga di pertandingané lakaran ngamaang ané luungan tekén apa ané kadénang iraga. Diapin selisih buin abedik nilainé, tetep ja madan kalah, tetep ja kaadanin menang. Di tongos ané malénan tingalina baan Nada, Arda, Joe jak Dewi jibrag-jibrag girang, nyidayang lolos ka babak final, lan ngaé harapan mempertahankan piala juara satuné, enu ada. Nada tuara nyidang ngomong apa ningalin Dayu jak Okta ané siep. Kalah di pertandingan kedua buka tuara nyidang nundunin ka tuara kompakan tim ipuné. (masambung....)

Agus Sutrarama

magenah ring Tabanan. Kakawiannyané naanin kawedar ring Bali Orti Sampun ngamedalang cakepan pupulan satua cutet “Bulan Satwak”.