nyonték (I Gusti Lanang Sutéja Naréndra

Isin Gumi

nyonték

I Gusti Lanang Sutéja Naréndra

Idup di désa mula kéweh pesaja. Makejang raosina tekén pisagané. Mirib kuting song jité bakat bana ngaraosang. Selem, keriput, kerék, koréng... Adaaahhh... pokokné pisaga maha tahu dan maha benar!

Ipidan tiang wayahan tuuhé tondén ngantén, suba raosina.

“Pidan lakar ngantén, Dé?”

“Sing ngelah tunangan, Dé?”

“Aiiihhh... Cai bes mamilih adané. Lagasang!”

“Adah... goban cainé pasaran. Sing laku, Dé!”

“Pasti wandu cai, Dé. Impotén! Orahin pabedikin ngoyot arak jak roko kétoang!”

Piiihhh... ber masepuk raos pisagané, uli ané alus kanti ané nyakitin keneh. Déwa ratu...

Kéwala ada masi melahné. Ulian ento tiang saat ngalih tunangan. Matuuh setimaan, mara Widhiné ngicén jodo. Kadén lakar pragat masalahé, ternyata buin nyangetang. Raos pisagané sayan-sayan ngarécokin.

“Dija Cai nunas lengis colék, Dé?”

“Piiihhh... biasané Sang Rama ngandong Déwi Sita, jani Rowanané makatang. Hébat cai, Dé! Ngomong-ngomong, akuda matombok I Luh Apang Nyak?”

“Dueg cai ngalih kurenan, Dé. Sakéwala I Luh belog ngalih kurenan!”

Celekotokané! Kadéna bocok goban tiangé? Kadéna sing maut rayuan tiangé? Kadéna sing ngelah sekaya tiang lakar nyuang anak luh? Piiihhh... pisaga durhaka nénénan!

Abulan pitung dina, ilang raraosané ento uli perédaran. Siep makejang. Ané maburuh luas maburuh, ané mamunyah luas mamunyah. Semua berjalan seperti biasa. Ah... tenang kenehé.

Sakéwala tusing makelo, buin ada raraosan nyukakin koping. Ulian makelo kurenan tiangé tusing beling, ento dadi raraosan.

“Mirib taén ngulungang belingan I Luh, Dé?”

“Adah... kuang manjur gelah cainé!”

“Enduk cai, Dé!”

“Mirib jubeng kurenan cainé, alihang malu sodagar!”

Celekotokané.... Patuhanga cara sampi kurenan tiangé, orahanga jubeng! Gedeg basangé tan sipi, sakéwala sing nyidang baan tiang ngempahang. Disubané tiang ngindeng ngaba sokasi, mapinunasan tekén anak wikan, sagét swéca Widhiné, nyidang beling I Luh. Jani pabrétbét lekad panaké kanti akélan! Kadirasa I Luh sing sempat ma-hand body, sing sempat mapayas, pragat beling dogén gaéné. Jani ia cara Mén Brayut rejeng pianak!

Sakéwala buin jani ada masalah. Ulian panaké makejang luh, jani tiang raosina tekén pisagané.

“Pedalem bli, cai Dé, putung jani sing masentana!”

“Aduh, telahang malu adep tegal lan cariké, Dé. Masé pianaké luha makejang!”

“Icang nyak nyentana sik cainé Dé! Buka nem nem pianak cainé lakar maduang!”

Piiih... jengah kenehé mirengang raosé buka kéto. Mawanan tiang mautsaha pesan apang ngelah pianak muani. Dajan umahé selat témbok, ada pisagané madan Pak Gusti. Ia langganan ojékné I Luh nuju ka peken. Piiih... Ber makejang okané lekad muani. Kanti akutus, ber macocong makejang!

Kénkén ya carané? Apa ya resépné? Budi matakon, sing juari.

Petengé ento, tiang ngalagasang déwék ngecosin pagehan lakar ngintip Pak Gusti. Di durin kamarné, ada jendéla bolong, uli ditu tiang ngicer jangkak jongkok ngintipin. Piiih... Kerurakara Pak Gusti! Magulet, mapuntel, cara lipi ngalilit katak. Pamragat, kataké macoét ngalemet melas balung. Lantas Pak Gusti ngaléngsot ka kenawan, misi ngaraos kisi-kisi, “Muani... Muani... Muani!”

Unduké ento ingetang tiang pesaja. Lakar conték tiang carané Pak Gusti, apang nyak muani lekad panak tiangé. Gagésonan tiang mulih, sahasa ngedeng

kurenan ka pasaréan. Ditu tiang magulet, mapuntel, cara lipi ngilit lelasan. Pamragat, lipiné lemet, lasané makeblés.

Tiang ngaléngsot ka kenawan, kisi-kisi mamantra, “Muani... Muani... Muani!”

I Luh bengong cara penyu tawahin, kijep-kijep sing resep tekén unduk.

Bawak satua, dinané majalan. Ngantiang I Luh Nyakit, piiih.... Cara ngantiang undian gebyar LPD rasané. Nyak ya lakar ngenén resepné Pak Gusti?

Tiang kaukina tekén bidané.

“Pak Madé! Pak Madé Susila!”

Gagésonan tiang nyagjagin. Tondén tiang ngaraos, bidané suba nyelametin tiang, “Selamat Pak. Anak Bapak lahir sehat. Laki-laki Pak!”

Ber tusing tiang nyautin raos bidané, kadroponan tiang ka ruang bersalin. Dapetang tiang kurenan tiangé nyempang nyangkutin pianak.

“Muani panaké Bli!” Kéto raosné I Luh enu lemet pesaja.

Tiang manggutan, makenyem nyeebin muan pianaké.

Muané, pipiné, limané, basangné, kanti adengan di gémpol jitné makejang cara... Cara... Cara... Pak Gusti!

(Macang Rumah Cinta Seribu Jendela)

I Gusti Lanang Sutéja Naréndra

magenah ring Macang, Bebandem, Karangasem. Satuanyané prasida kawacén ring facebooknyané.