geguritan bangbang wétan (IBW Widiasa Kenitén

from Majalah Suara Saking Bali edisi 62 (LXII)

by Suara Saking Bali

puisi-puisi ketut sumadi

Geguritan

geguritan bangbang wétan

IBW Widiasa Kenitén

Pupuh Sinom /1/

Daya sangkil Bangbang Wétan, tityang nguda guar-guir, dija unduk nawang ṡastra, bongkol muñcuk tan kuningin, enyak raris nuut mriring, mangléñcok tatan pasulur, duleg kayun sang miarṣa, nénten nuut sulur margi,

swéccha Ratu, nyuryanin I Anwam tambet.

/2/

Lugra Ratu ngampurayang, tan pamupuh tan panyutri, sambeh buut doh ring pasang, ngṛesekin baṣa ngrucakin, janten nuek raṣa ati, lugra ri jeng maha guru, tuna ṡastra mabet wayah, nutur sanė tan pabukti, ṡastra dangu, ketah kucap daṡa ṡila.

/3/

Tan pamati ya ahimṣa, tṛeṣṇa asih ya wulati, tamuwuh satwa ya jadma, wit ya maring Sanghyang Widhi, uripang ya welas asih, daging jagatė ya rungu, bukit gunung pasih alas, serahina ya tamtamin, nerus lanus, kawekas ya patut tṛeptyang.

/4/

Hyang giri pinaka bapa,

i mémé ṡegara luwih, tamtamin jwa becikang, nunggal ngamerthanin gumi, solah ahimsa gugonin, nyoñcong alas pasih urug, sengsara i mémé bapa, bhaya idup bakat alih, asih tuut, gumi boya aba lekad.

/5/

Pasih gunung bukit alas, becikang patut tajukin, yén sakitin ya mamurtya, blabar agung mangemasin, paling ngalih tongos urip, Widhiné kasambat milu, awak tamyu ngaku gelah, bikasé nyengkalén gumi, inget malu, mumpung dina enu ada.

/6/

Resikin i gunung alas, ṡegara lan sarwwa nadi, sarwwa cemer to kahadang, apabuin soroh cuwil, siu tiban mara dadi, tanah usak gering grubug,

mrana ngéndah mañca bhaya, mantra usadha tan mandhi, melah malu, daṣa bhayuné iñcepang.

/7/

Dadi tamyu mercepadha, solah ngapak to kisidin, boya tingkah kamanusan, ané ngelah idhep budhi, nyakitin rusit nyulegin, adéng-adéngin ya lebur, dadi inget tekén awak, wakya ṡastra tunggul kanti, bhaṣa tinut, uttama manadi jadma.

/8/

Ṥastrotamanė ngunggahang, himṣa karma kacumpuin, rikalaning dėwa puja, pañca yadnya minakadi, katiba ring sang athithi, lunas lanus pageh kukuh, i meseh galak ngrubėda, himṣa karma kamarginin, i sad ripū, nėnten dados anggėn dasar. (pacang kalanturang....)