makarya satua cutet mabasa bali punika dangan? (I Putu Supartika

Artikel

makarya satua cutet mabasa bali punika dangan?

I Putu Supartika

Daweg puniki, wénten sawitran titiangé sané dados wartawan ngandika sakadi puniki: ngaé berita ento sing saaluh ngaé cerpén basa Bali. Titiang kejut mirengang baosé punika. Sakéwanten titiang nénten nungkasin indiké punika. Tiang mamilih siep lan mataken ring déwék: aluh ngaé cerpén basa Bali?

Napi sané ngawinang titiang nénten nungkasin? Kapertama titiang kantun malajah makarya berita, dadosné titiang ten uning cén sané danganan. Kaping kalih, titiang nénten naanin manggihin kakawian wartawan inucap marupa satua cutet mabasa Bali ring média, ring internét, wiadin ring toko buku. Lan titiang taler nénten naanin manggihin ipun makarya satua cutet rikala titiang

sareng ragana.

Papineh titiangé taler, nungkasin anak sané nganikaang nyurat satu cutet mabasa Bali punika dangan, nanging nénten naanin makarya satua cutet pastika ipun nénten ja nyak kalah lan pastika ipun pacang nganggep déwékné beneh. Sira sané nyak kalah matungkas mangkin?

Titiang raris mataken ring sinalih tunggil wartawan lan pangawi cerpén nasional, Madé Adnyana Olé. Mirengang indiké punika, ragana kedék. Raris asapuniki pinampénnyané: aluhan ngaé berita, buktiné ia sing bisa ngaé cerpén basa Bali. Ragana taler nganikaang makarya satua cutet asiki, abulan durung janten pragat, nanging yening berita arahina prasida makarya lebih kén tigang berita.

Madé Sugianto, wartawan, pangawi sastra Bali modéren sané mangkin dados kadés Kukuh taler pateh panampéné sareng Madé Adnyana Olé. Ipun nganikaang danganan rikala makarya berita ketimbang makarya satua cutet mabasa Bali. Ipun taler ngawewehin yéning makarya berita punika tinggal ngolah data sané wénten manados lengkara, sakéwanten yéning makarya satua cutet mangda wénten rasa. Punika taler rikala tiang ngorta sareng Putra Ariawan, pangawi saking Tabanan sané ngamolihang Hadiah Sastera Rancagé 2015. Putra nganikaang yéning karya sastra sakadi cerpén, nénten prasida

kabandingang sakadi punika. Mabinayan, yadiastun wénten cerpén sané kaangkat saking berita.

Raris titiang inget indiké dumun sakantuné malajah makarya satua cutet, lan kantun magabag-gabagan sakadi mamargi ring tengahing wengi tan pasundih. Titiang nyliksikin saka siki satua cutet kakawian pangawi sénior minakadi Madé Suarsa, IDK Raka Kusuma, Nyoman Manda, Samar Gantang, miwah sané lianan ring internét, koran, utawi cakepannyané lan matakén ring déwék: adi bisa ragana ngaé cerpén? Magutit titiang malajahin sapunapi carané pangawi punika sumangdané bantang satua sané wénten prasida manados satua sané becik tur mapanjang kantos limang halaman utawi nem halaman kertas A4.

Usan ngwacén, tiang nyobak makarya ring buku catetan, sakéwanten nénten polih pamargi utawi buntu. Malih tiang nyumunin ngwacén, tur nelebang. Dadosné tiang boya ja ngwacén pinaka hiburan kémanten, nanging ngresepang sapunapi carané sang pangawi punika makarya satua cutet.

Yadiastun dagingnyané kangin kauh, sayan makelo tiang prasida makarya satua cutet asiki. Lan tiang malajah nénten ja ajebos. Pateh sakadi pinampéné Madé Sugianto, makarya satua cutet mangda wénten rasa. Lianan ring punika patut taler kawatesin sumangdané satuané nénten kangin kauh lan fokus ring bantang sané kasatuayang. Jakti méweh taler arahina prasida mragatang satua cutet asiki, sajabaning satuané punika sampun puput ring keneh raris kajumunin ngetik.

Raris ngenénin indik makarya berita, napiké rimbitan ring makarya satua cutet? Titiang nénten prasida nyawis, bangayang anak lianan sané ngerti indiké punika nyawis.

Satua Cutet

balian kapé