geguritan bangbang wétan (IBW Widiasa Kenitén

Geguritan

geguritan bangbang wétan

IBW Widiasa Kenitén

/9/

Ṥiwalinggané kaluhur, daun pisangé ngaledin, daun medoriné mider, padang lepasé nyusunin, sekar medori ya lingga, satus kutus ya wilangin.

/10/

Brata Saraswati tuut, tan amaca tajeg rawi, ri wenginé ngawi ngripta, mogi Ida ngicén geni, geni ṡastra wakya dharmma, sasuluh kalaning murip.

/11/

Béñjangné Banyu Pinaruh, aṡucilakṣaṇa ngening, ṡegara campwan klebutan, amerthaning Wagiswari, ring rauhné makumkuman, bhakti maring Hyang Saraswati.

/12/

Ajengan kuning ya katur, tedun turut Saraswati, ṡegara giri loloh jwa, tatab mogi kaswécanin, Saraswatén ṡidhi wakya, galang budhi ngadamarin.

/13/

Brata Nyepi sipeng patut, amati karya gugonin, amati sarwwa lelangwan, amati geni mangendih, amati sarwwa lelungan, pucuk dina yoga sandhi.

/14/

Sipeng angga sipeng kayun, nguleng linggih Sanghyang Widhi, nurékṣa angga awarsa, nemu gelang kawastanin, patut iwangé élingang, ngawit mungkah marga jati.

/15/

Tanggal apisan ngawindu, ngawit kedas mungkah ati, sipeng pūrṇa raṣa idhep, kroda bakṣa ngeret geni, milah milih marga beneng, nasarin solah ṡadhu budhi.

/16/

Yoga samadhi matemu, iñcep Ṥiwabudha nunggil, Namaṡiwaya Hyang Ṥiwa, Namabudhaya Jinarthi, sampūrṇa sūryya ṡaṡangka sandhi akṣarané suci. (pacang kalanturang....)